Mu Be ni Mubonelo wa Mulimu wa Lika

MWA New York, ili mwa naha ya U.S.A., lizazi la September 14, 2002 ne li lizazi le li futumala hande. Ka lona lizazi leo, batu b’a 6,521 ba ba zwa mwa linaha ze shutana-shutana ne ba kopani kwa Sibaka sa Tuto sa kwa Patterson ni kwa libaka ze ñwi ze peli za Lipaki za Jehova ze mwa naha yeo. Batu bao ne ba kubukanezi ku eza mukiti wa sitopa sa bu 113 wa ku feza Sikolo sa Giliadi. Baituti bao ne ba zwa mwa linaha ze 14, mi mwa likweli ze keta-lizoho ze felile, ne ba nze ba itukiseza ku yo eza musebezi wa bulumiwa mwa linaha ze 19 ze ne ba lumelwa ku zona.

Muina-situlo wa tukiso ne li Carey Barber, yo muñwi wa Sitopa Se Si Etelela sa Lipaki za Jehova, mi u na ni lilimo za buhulu ze 98. N’a talusize kuli Sikolo sa Giliadi ne si kwaluzwi lilimo ze bat’o ba ze 60 kwamulaho, mi si lutile batu b’a likiti-kiti ku eza musebezi wa bulumiwa. Muzwale Barber n’a ize: “Ku bulela kuli ku lutiwa kwa bona ku tahisize lika ze nde hahulu haki ku shangela litaba. Batu ba ba ishuwa b’a likiti ze mianda-nda mwa lifasi kaufela ba ineezi ku Jehova mi ba keni mwa bulapeli bwa hae bwa niti ni sebelezo ye kenile kabakala kuli ba tusizwe ki balumiwa ba ba keni sikolo.”

Ba si ka taha kale kwa Giliadi, baituti ba bañata ne ba bonisize kuli ne ba tabela ku ekeza kwa bukombwa bwa bona. Muzwale yo muñwi ni musal’a hae ba kwa Canada ne ba tandile silimo mutumbi ba nze ba ituta puo ya Sichaina ye bizwa Mandarin ilikuli ba kone ku kutaza kwa batu ba bañata ba kwa China ba ba pila mwa Canada. Bosinyalana ba bañwi ne ba kalile ku ituta puo ya kwa Albania isali bona mi hasamulaho ba tutela kwa Albania kuli ba yo kutaza kwa palo ye n’e hula ya batu ba kwateñi be ne ba tabela Bibele. Ba bañwi mwa sitopa seo ne ba tile kwa Giliadi ku zwa kwa Hungary, Guatemala, ni Dominican Republic, ili linaha ko ne ku na ni butokwi bo butuna mi ne ba tutezi teñi kuli ba yo luta Linzwi la Mulimu.

Nako ye, ba si ka funduka kale ku ya kwa linaha ko ne ba lumelwa, ili mwa Africa, Eastern Europe, Central ni South America, ni kwa linaha ze kwa upa, baituti be ne ba feza sikolo bao kaufela ne ba susuelizwe ku hupula Mulimu ku ze ba eza kaufela.

Mu Be ni Mubonelo wa Mulimu wa Lika

Hamulaho wa manzwi a hae a ku kwalula, Muzwale Barber n’a bizize Muzwale Maxwell Lloyd, yo muñwi wa Katengo ka Mutai wa United States. N’a bulezi fa toho ya taba ye li “Mu Be ni Mubonelo wa Mulimu wa Lika.” Muzwale Lloyd n’a file mitala ya bo Davida ni Jesu, Mwan’a Mulimu. (1 Samuele 24:6; 26:11; Luka 22:42) Mubuleli ha s’a hupulisize baituti kuli lituto za bona za Bibele mwa likweli ze keta-lizoho ze felile ne li ba lutile ku bona lika mw’a li bonela Mulimu, n’a buzize kuli: “Ha mu zamaisa lituto za Bibele kwa batu ba mwa libaka ze mu lumelwa  teñi, kana mu ka ba tusa ku nahanisisa litaba ka ku ya ka mubonelo wa Mulimu?” Ka za ku fa kelezo ku ba bañwi, n’a elelize baituti kuli: “Mu si ke mwa li, ‘Na ni bona kuli . . . ’ Kono mu ba tuse ku bona kuli mubonelo wa Mulimu ki ufi. Ha mu ka eza cwalo, mu ka tusa hahulu batu be mu ka yo sebelisana ni bona ko mu ya.”

Mubuleli ya tatama ne li Gerrit Lösch, yo muñwi wa Sitopa Se Si Etelela. Ha n’a bulela mwa ngambolo ye li ‘Ni Inzi Ni Mina,’ n’a bulezi za linako ze ñata Jehova ha n’a bulelezi batanga ba hae ba ba sepahala kuli: “Ni inzi ni wena.” (Genese 26:23, 24; 28:15; Joshua 1:5; Jeremia 1:7, 8) Mwa linako za luna, lwa kona ku sepa Jehova cwalo haiba lu zwelapili ku sepahala. Muzwale Lösch n’a ize: “Kana mu ikalezwi ka za haiba mu ka fumana batu ba ku ituta Bibele ni bona? Mu hupule kuli Jehova n’a ize, ‘Ni inzi ni wena.’ Kana mu ikalezwi ka za haiba mu ka fumana lika za kwa mubili ze likani? Jehova n’a ize: ‘Ha ni na ku ku tuhela, ha ni na ku ku fulalela.’” (Maheberu 13:5) Muzwale Lösch n’a felize ka ku hupulisa baituti kuli Jesu n’a sepisize kuli n’a ka ba ni balateleli ba hae ba ba sepahala mwa musebezi wa ku tahisa balutiwa.—Mateu 28:20.

Lawrence Bowen, muluti wa kwa Sikolo sa Giliadi, n’a file ngambolo ye li “Kana Mu Ka Fumana  Silelezo mwa Mulilo?” N’a ize kabakala litaba ze n’e kalezi mwa Edeni, kaufela ba ba bile ni takazo ya ku sebeleza Jehova a nosi ba bile ni butata, mi mane fokuñwi ni litiko ze tuna. N’a susuelize baituti be ne ba feza sikolo ku latelela mutala wa Jesu, ya n’a fumani silelezo ya luli ka ku itinga ka ku tala ku Jehova ni ku amuhela litiko ze tuna za n’a tuhelezi Jehova kuli li petahaze ku ipeya ku utwa kwa Mwan’a hae. (Maheberu 5:8, 9) Jehova u kona ku swanisezwa ku mukenisi wa gauda ya beya mufutumala o swanela ilikuli a toole masila mwa gauda. Kaniti, tumelo ye likiwa ka mulilo i fa silelezo ye tuna hahulu ku fita gauda ye kenisizwe. Kabakalañi? Muzwale Bowen n’a ize, “Kakuli tumelo ye kenisizwe i kona ku tiyela muliko ufi kamba ufi, mi i lu konisa ku tiya ku isa ‘kwa mafelelezo.’”—Mateu 24:13.

Mark Noumair, muluti yo muñwi wa kwa Giliadi n’a buzize kuli: “Kana Mu Ka Ba Ba Ba Tabelwa?” Toho ya taba ya hae ne i tomile fa manzwi a’ kwa 1 Samuele 2:26, a’ talusa Samuele ku ba ya n’a “tabelwa ki [Muñ’a] Bupilo ni batu.” Ha s’a bulezi ka za mutala wa Samuele, Muzwale Noumair, ya n’a sebelize lilimo ze fitelela ze lishumi mwa bulumiwa mwa Africa n’a ize: “Ni mina mu kona ku ba ba ba tabelwa hahulu ki Mulimu ka ku sa tuhela musebezi w’a mi file ku eza. U mi file musebezi wa butokwa wa bulumiwa.” Muzwale Noumair kih’a susueza sitopa se ne si feza sikolo seo ku nga misebezi ya bona ku ba buikalabelo bo ba filwe ki Mulimu ni ku ba ni mubonelo wa Mulimu ha ba eza misebezi ya bona.

Ha ne ba li mwa sikolo, baituti ne ba bile ni linako ze ñata kwa mafelelezo a liviki za ku taluseza batu “ze tuna za Mulimu” ze fumaneha mwa Bibele. (Likezo 2:11) Mane ne ba konile ku bulela lika zeo mwa lipuo ze 10. Mwa ngambolo ye li “‘Ze Tuna za Mulimu’ Li Tahisa Kuli Batu ba Eze Misebezi,” Wallace Liverance, muluti yo muñwi hape wa kwa Giliadi, n’a buhisani ni sikwata sa baituti be ne ba kandekile ze bonwi. N’a ize: “Fa Pentekonta, moya ne u susumelize be ne ba li mwa muzuzu wa kwahalimu ku bulela ‘ze tuna za Mulimu.’ Ona moya o swana w’o wa sebeza kacenu kwa batanga ba Mulimu kaufela ba ba sepahala.” Ba bañwi mane ba susumelizwe ku ituta lipuo ze ñwi ilikuli ba kone ku paka kwa batu ba bañata ni ku fita.

Kelezo Ye Sebeza ya ku Ba ni Mubonelo wa Mulimu wa Lika

Hamulaho wa lingambolo za makalelo zeo, Gary Breaux ni William Young, ba ba li fa Betele ya mwa United States ne ba buhisani ni ba ba mwa tutengo twa mitai ye shutana-shutana mwa linaha m’o balumiwa ba fumaneha cwale. Hape ne ba buhisani ni muzwale yo muñwi ni musal’a hae be ne ba bile balumiwa ka lilimo ze 41. Sisupo se siñwi se ne si bulezwi ki sa kuli: “Ba ba sa batangi lika ze ñata ba inanga nako ye telele. Mamelelo ya bona i inzi fa libaka ha ba tile. Ba ziba kuli se ba tezi ki ku to kutaza taba ye nde ni ku tusa batu ku ziba Jehova.”

Mwa tukiso yeo, David Splane, yo muñwi hape wa Sitopa Se Si Etelela n’a file ngambolo ya mafelelezo ye li “Ha Mu Yi Kwahule!” N’a talusañi, ka ku ba kuli be ne ba feza sikolo b’a 46 bao ne ba lumelwa kwa linaha ze ñwi mwa lifasi? N’a talusize kuli: “Ko mu inzi kaufela mwa lifasi, kamita mu ka ba mwa ndu ya Mulimu ibe fela mwa sepahala.” Ki niti, Bakreste ba ba sepahala kaufela, ko ba fumaneha kaufela, ba sebeleza mwa tempele, kamba ndu ye tuna ya Mulimu, ye n’e tomilwe f’a kolobelezwa Jesu mwa lilimo za kwa makalelo a Bukreste. (Maheberu 9:9) Kwa baputehi, ne ku omba-ombile hakalo ku ziba kuli Jehova u fakaufi ni batanga ba hae kaufela ba ba sepahala fa lifasi! Jehova mwa n’a iyakatelwa Jesu ha n’a li fa lifasi, wa iyakatwa luna kaufela ni sebelezo ya luna ku Yena, ko lu inzi kaufela. Kacwalo, ha ku taha ku za bulapeli, nako kaufela lu fakaufi ni ba bañwi, hape lu fakaufi ni Jehova ni Jesu.

Ha se ku amuhezwi litumeliso ze zwelela mwa lifasi kaufela, ku zibisa ko ba lumelwa baituti, ni ku balwa kwa liñolo la sitopa la buitumelo kwa tuto ye ba fumani kwa Giliadi, muina-situlo a fitisa tukiso yeo kwa mafelelezo a yona ka ku susueza balumiwa ba banca bao ku zwelapili mwa musebezi wa bona o munde ni ku ba ba ba tabile mwa sebelezo ya Jehova.—Mafilipi 3:1.

[Mbokisi fa likepe 23]

LITABA KA ZA SITOPA

Palo ya linaha ko ba zwa baituti: 14

Palo ya linaha ko ba lumezwi: 19

Palo ya baituti: 46

Avareji ya lilimo za buhulu: 35.0

Avareji ya lilimo za ku ba mwa niti: 17.2

Avareji ya lilimo za ku ba mwa bukombwa bwa ka nako ye tezi: 13.7

[Siswaniso se si fa likepe 24]

Sitopa Sa bu-113 Se Si Feza Sikolo sa Giliadi sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.