“Kwapili U Be Ya Talifile”

Muñoli wa Mufura wa litaba wa mwa lilimo za mwa ma-1600, ya bizwa Jean de La Bruyère n’a ize: “Batu ba bañata ba itusisanga lilimo za bona za pili mwa bupilo ka nzila y’e ba beyanga mwa butata kwapili.” Luli, yo munca ya palelwa ku eza katulo a kana a sa zibi hande za ku eza, ili ku ikutwa ku felelwa ki mwangalwa ni ku inyaza. Kono yo munca ya na ni toho t’ata a kana a ñañelela nzila ye maswe, ili ye ka mu tokwisa tabo kwapili. Ku zeo kaufela, mafosisa a ku sa eza ze lukile kamba a ku eza bumaswe a kona ku tahisa maswabi a matuna.

Muinelo o cwalo u kona ku pimiwa cwañi? Ka ku fa temuso ka za ku palelwa ku eza likatulo kwa ba banca, Linzwi la Mulimu li ba eleza kuli: “U hupule Mubupi wa hao mwa mazazi a bucaha bwa hao, mazazi a maswe a si ka taha kale, mi myaha i sa li kwahule y’o ka li: Ha ni i tabeli!” (Muekelesia 12:1) Haiba mu ba banca, mu nge mihato ye minde ya ku ituta ka za ‘Mubupi wa mina’ ha mu sa li mwa bunca.

Kacwalo, Bibele i tusa cwañi ba banca ku pima mafosisa a mwa bunca? I li: “Utwa kelezo, u amuhele temuso, kuli kwapili u be ya talifile.” (Liproverbia 19:20) Hape Bibele i bonisa hande-nde kuli ku hana butali bwa Mulimu kabakala keshebiso kamba mahañi mwa bunca, kamba mwa buhulu bufi kamba bufi ku tahisa butata. (Liproverbia 13:18) Kono ku mamela litaelo za Mulimu ku tahisa ku ‘ekelezwa kwa mazazi ni kwa myaha.’—Liproverbia 3:2.