Ku Fumana Mutala kwa Mbondwanyunyi

‘NIHAILI mbondwanyunyi i ziba nako ya yona mwa lihalimu, ya ziba nako ya yona ya ku kuta; kono sona sicaba sa ka ha si zibi tukelo ya Muñ’a Bupilo.’ (Jeremia 8:7) Ka manzwi ao, mupolofita Jeremia n’a zibahalize katulo ya Jehova kwa Majuda ba bakwenuheli, be ne ba fulalezi Jehova Mulimu wa bona ni ku lapela milimu ya buhata ya macaba a sili. (Jeremia 7:18, 31) Jeremia n’a keteziñi mbondwanyunyi kuli i be mutala o sebeza kwa Majuda be ne ba sa sepahali?

Maisilaele ne ba bonanga hahulu mbondwanyunyi, mi sihulu mbondwanyunyi ye sweu ha ne i tutelanga mwa libaka za mwa miteñi ya ze mwa Bibele. Libizo la Siheberu la nyunywani ye tuna ya mwa mezi ye na ni mahutu a matelele yeo ki linzwi le li itusiswa kwa basali le li talusa “ya sepahala, ya na ni sishemo.” Nto yeo ya swanela, kakuli ka ku fapahana ni linyunywani ze ñwi, limbondwanyunyi ze sweu za banna ni za basali li swalisananga ka bubeli ona cwalo ku isa lifu. Silimo ni silimo limbondwanyunyi ze ñata za kutanga ku zwa kwa libaka ze futumala ko li tutelanga maliha ku taha luli mwa liyaleto za zona mo ne li zwile.

Mukwa wa ka taho wa limbondwanyunyi u bonisa kalemeno ka busepahali ka linzila ze ñwi ze ipitezi. Sibeli sa linyunywani zeo, ya munna ni ya musali, li bubamanga hamoho mai ni ku selisa tuzwinyani. Buka ye bizwa Our Magnificent Wildlife i talusa kuli: “Limbondwanyunyi za bashemi li ipitezi kwa busepahali. Mbondwanyunyi ya munna mwa Germany ne i itengile mwa mihala ya malaiti ha ne i fufa mi ya bulaiwa ki malaiti. Ya musali ya zwelapili ku bubama mai i nosi ka mazazi a malalu, mwa mazazi ao kaufela ne i zwile fela hañwi fa mai ku yo sela. . . . Mwa taba ye ñwi hape, mbondwanyunyi ya musali ha ne i kunupilwe, ya munna ya babalela bana.”

Kaniti, ka ku bonisa busepahali bwa yona bwa ka taho kwa mbondwanyunyi ye ñwi ni pabalelo ya yona ye lilato kwa bana ba yona, mbondwanyunyi i bonisa seo luli libizo la yona li si talusa—“ya sepahala.” Kacwalo, limbondwanyunyi ne li sebelize sina mutala o m’ata kwa Maisilaele be ne ba sa sepahali, ba mangulunde.

Kwa batu ba bañata kacenu, busepahali ki muhupulo wa kwa santulu—bwa lakazeha kono ha bu ngiwi kuli bwa tusa. Ku ekezeha kwa telekano, ku yubekwa, ku amuha lika ka sikupuki, ni bupumi bo buñwi li bonisa kuli busepahali ha bu sa ngiwa ku ba nto ya butokwa. Kono Bibele i nga busepahali bo bu tahiswa ki lilato ni musa ku ba bwa butokwa hahulu. I susueza Bakreste “ku apala mutu yo munca ya bupwa ka siswaniso sa Mulimu mwa ku luka, ni mwa [busepahali, NW].” (Maefese 4:24) Ee, butu bo bunca bu lu tusa ku sepahala, kono hape lwa kona ku fumana mutala wa busepahali kwa mbondwanyunyi.