Lipuzo Ze Zwa kwa Babali

Musali wa Mukreste u kona ku eza cwañi kuli a sepahale ku Mulimu mi ka nako ye swana ni ku ipeya kwatas’a munn’a hae ya si mulumeli haiba munna y’o u abananga mwa mikiti ya bulapeli?

Kuli a eze cwalo, u tokwa ku ba ni butali ni maseme. Kono h’a lika ku likanyeza lika ze peli ze mu tamile zeo, u eza se si lukile. Jesu ha n’a elelize ka za muinelo o swana ni w’o, n’a ize: “Mu kutiseze Sesare ze li za Sesare; mi mu kutiseze Mulimu ze li za Mulimu.” (Mateu 22:21) Ki niti kuli n’a bulela za ku ipeya kwatas’a miuso, yeo Bakreste hasamulaho ne ba bulelezwi kuli ba ipeye kwatas’a yona. (Maroma 13:1) Kono kelezo ya hae ya kona ku sebeza ku musali ya lukela ku peta buitamo bwa hae ku Mulimu mi ka nako ye swana ni ku ipeya ka ku ya ka Mañolo ku munn’a hae, munn’a hae niha si mulumeli.

Ha ku na ya tekelezi Bibele ya kona ku latula kuli i koñomeka kuli buitamo bwa Mukreste bwa pili bu ku Mulimu ya M’ata Ote, ili ku sepahala ku yena ka nako kaufela. (Likezo 5:29) Niteñi, mutu ya na ni m’ata ya si mulumeli h’a kupa nto ye ñwi, hañata mulapeli wa niti wa kona ku i eza kono inge a sa abani mwa ku loba milao ya Mulimu ye pahami.

Mutala wa Maheberu ba balalu ba ba bulezwi kwa Daniele kauhanyo 3 u kona ku lu luta se siñwi. Nebukadenezare mubusi wa bona n’a laezi kuli bona ni ba bañwi ba ye kwa libala la Dura. Ha ne ba lemuhile kuli ne ku ka yo eziwa bulapeli bwa buhata, Maheberu ba balalu mwendi ne ba tabezi kuli kambe ne ba si ke ba ba kwateñi. Mwendi Daniele yena n’a konile ku ikupela kuli a si ke a yo ba teñi, kono ba balalu bao bona ne ba si ka kona. * Kacwalo ba latelela mulao mi ba ya kwateñi, kono ne ba si ke ba abana mwa kezo ifi kamba ifi ye fosahezi,  mi mane ne ba si ka eza cwalo.—Daniele 3:1-18.

Ka ku swana, ka linako za mikiti, munna ya si mulumeli a kana a kupa kamba ku bata kuli musal’a hae wa Mukreste a mu ezeze nto ya n’a si ke a bata ku eza. Ki ye mitala ye miñwi: U mu bulelela kuli a apehe sico sa mufuta o muñwi fa lizazi leo yena ni ba bañwi ba ka ca mukiti. Kamba u bata kuli lubasi (ku kopanyeleza ni musal’a hae) ba yo potela bahabo yena fa lizazi leo kuli ba yo ca ni bona kamba ku yo ba potela fela. Kamba mane mukiti u si ka ezahala kale, a kana a li musal’a hae h’a ka ya kwa masintolo, a yo mu lekela lika ze ñwi ze cwale ka lico za fa mukiti, limpo za ku to fa ba bañwi, kamba mapepa a ku putela mwateñi limpo, ni mañolo a ku to li lumela ni ona.

Nif’o, musali wa Sikreste u tokwa ku itiisa kuli a si ke a abana mwa likezo za bulapeli bwa buhata, kono ku cwañi ka za likupo ze cwalo? Ki yena toho ya lubasi, mi Linzwi la Mulimu li li: “Basali, mu ipeye kwatas’a banna ba mina, kakuli ki mo ku swaneleha ku Mulena.” (Makolose 3:18) Kana mwa miinelo ye cwalo, wa kona ku ba ni buipeyo ka ku ba musali mi hape ka nako ye swana inge a sepahala ku Mulimu? U na ni ku ikatulela mwa ku likanyeza ku ipeya ku utwa munn’a hae ni ku utwa Jehova.

Ka linako ze ñwi ze si za mikiti, munn’a hae a kana a mu kupa kuli a apehe sico sa mufuta o muñwi, mwendi kakuli u si lata hahulu kamba u twaezi ku si canga ka linako ze ñwi za silimo. U ka bata ku bonisa lilato ku yena ni kuli wa lemuha butoho bwa hae. Kana musali y’o n’a ka eza cwalo niha n’a ka kupiwa ku eza cwalo ka nako ya mukiti? Basali ba bañwi ba Sikreste ne ba ka lumelezwa ki lizwalo la bona ku eza cwalo, ili ku nga kupo yeo ku ba musebezi wa ka zazi wa ku apeha lico. Munn’a hae yena niha n’a ka nga kuli ku eza cwalo ki ku latelela za mukiti, ha ku na Mukreste ya sepahala ya n’a ka nga cwalo. Ka nzila ye swana, n’a kana a mu kupa kuli ba yo pota hamoho kwa banabahabo ka linako ze ñwi ka kweli kamba ka silimo. Kana n’a ka eza cwalo niha neikaba lizazi la mukiti? Kamba kana n’a ka tabela ku mu lekela lika z’a kupa ku lekelwa, a sa atuli kuli munn’a hae u bata ku itusisa zona cwañi h’a nze a leka-leka lika?

Musali wa Sikreste kaniti u swanela ku nahana mo ba ka ikutwela ba bañwi. (Mafilipi 2:4) U bata ku sa bonisa kuli wa abana mwa mukiti, sina Maheberu ba balalu mo ne ba batezi kuli kambe ba bañwi ha ba ba boni inge ba ya kwa libala la Dura. Kacwalo, ka maseme u kona ku lika ku ambola ni munn’a hae kuli a bone haiba ka ku iyakatwa maikuto a hae, munn’a hae wa kona ku ikezeza lika ze ñwi ze ama mukiti kuli a tuse musal’a hae ya mu lata ni ku mu kuteka. Munna a kana a bona kuli ku butali ku sa beya sibeli sa bona mwa muinelo o n’o ka ba swabisisa musal’a hae ha n’a ka hana ku abana mwa likezo za bulapeli bwa buhata. Ee, ku buhisana hande lika li si ka ezahala kale ku kona ku tahisa kuli lika li tatululwe ka kozo.—Liproverbia 22:3.

Kwa mafelelezo, Mukreste ya sepahala u lukela ku nyakisisa hande lika ni ku ikatulela za ku eza. Sina mo ne ku bezi kwa Maheberu ba balalu, ku utwa Mulimu ku lukela ku ba yona nto ya pili. (1 Makorinte 10:31) Kono ka ku hupula zeo, Mukreste u na ni ku ikatulela lika ze si ka fosahala ze kona ku eziwa ze kupiwa ki ya na ni m’ata mwa lubasi kamba fa silalanda.

[Litaluso za kwatasi]