Kana Ku Na ni Sepo ye Ñwi ya Puluso?

Lilimo za mwanda wa bu 20 se l’i ngilwe ku ba ze ñwi za lilimo zeo ku zona ku bulailwe batu ba bañata hahulu ku fita lili kaufela. Bukebenga, lindwa, lifapano za mwahal’a mushobo, ku itusisa maswe milyani ye kola, ku sa sepahala, ni mifilifili se li atile sihulu mwa lilimo ze mashumi a sikai ze felile. Hape, ku na ni masitapilu ni manyando a’ tahisizwe ki makulanu, busupali, ni lifu. Ha ku na ya sa nyolelwi ku lukululwa kwa matata a matuna a’ li teñi mwa lifasi kacenu. Ha lu nze lu talima kwa nako ya kwapili, kana ku na ni sepo ye ñwi ya puluso?

MU NAHANE pono ya n’a bile ni yona muapositola Joani lilimo ze bat’o ba ze 2,000 kwamulaho. N’a ñozi kuli: “Mu bone Tabernakele ya Mulimu, i inzi ni batu; U ka yaha ni bona, ba be macaba a hae; mi Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:3, 4) Mupolofita Isaya ni yena n’a polofitile kuli: “U mizize lifu ku ya ku ile; Mulena [Muñ’a] Bupilo u ka takula mioko kwa lipata kamukana, a felise sikobiso sa sicaba sa hae mwa lifasi kaufela; kakuli ki s’a bulezi [Muñ’a] Bupilo.”—Isaya 25:8.

Mu nahane fela mo ku ka bela lisepiso za Mulimu ha li ka talelezwa! Batu ba ka yangwelwa, kamba ku lamulelwa, kwa manyando ni mifilifili, ku ze tahisa manyando ni liziyezi. Nihaiba makulanu, busupali, ni lifu ha li sa na ku lu zieza! Linzwi la Mulimu, Bibele, li sepisa bupilo bo bu sa feli mwatas’a miinelo ye petehile ya fa lifasi. (Luka 23:43; Joani 17:3) Mi i teñi ku bote ba ba i lakaza. “[Mulimu u] lata kuli batu kamukana ba piliswe, mi ba fite fa zibo ya ku ziba niti.”—1 Timotea 2:3, 4.

Niteñi, kuli lu fumane tuso kwa lisepiso za Mulimu, lu lukela ku utwisisa kalulo y’a peta Jesu Kreste mwa ku piliswa kwa luna ni ku lumela ku yena. Jesu yena ka sibili n’a ize: “Mulimu  u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Ka ku bonisa kalulo ye tuna y’a peta Jesu Kreste mwa taba yeo, muapositola Pitrosi n’a ize: “Ku piliswa, ha ku yo ku yo muñwi; kakuli ha ku na Libizo li sili mwatas’a lihalimu, le ba filwe batu, le lu ka piliswa ka lona.” (Likezo 4:12) Muapositola Paulusi ni mulikan’a hae Silasi ne ba susuelize mubuzi ya sepahala kuli: “Lumela ku Mulena Jesu mi u ka piliswa, wena ni ba ndu ya hao.”—Likezo 16:30, 31.

Ee, Jesu Kreste ki yena “Mulen’a bupilo,” mi puluso i konahala ka yena fela. (Likezo 3:15) Kono mutu a li muñwi u kona cwañi ku ba yena wa butokwa cwalo mwa puluso ya luna? Ku ba ni kutwisiso ye nde ka za kalulo y’a peta mwa taba ye ku swanela ku tiisa sepo ya luna ya puluso.

 [Manzwi a bañi ba siswaniso fa likepe 2]

Likepe 3: Lifulai za ndwa: Siswaniso sa ba USAF; banana ba ba lapile: UNITED NATIONS/J. FRAND; sisepe sa ndwa se si ca: Siswaniso sa ba U.S. Navy ▸