Haluswaneli kunahana kuli balutiwa ba Jesu ba 70 nebasa mutabisi kamba kuli neba muyubekile, ka libaka feela la kuli nebasiyo hanaatoma Mulalelo wa Mulena. Jesu naabata feela kuba ni baapositola bahae fa kezahalo yeo.

Baapositola ba 12 hamohocwalo ni balutiwa ba 70 neba mutabisa. Jesu naaketile pili baana ba 12 mwahalaa balutiwa bahae babañata, ili banaabizize baapositola. (Luka 6:​12-16) Naali mwa Galilea ‘hakopanya ba 12’ mi “abaluma kuyo kutaza Mubuso wa Mulimu ni kufolisa bakuli.” (Luka 9:​1-6) Hasamulaho, Jesu hanaali mwa Judea, “aketa babañwi ba 70 mi abaluma bababeli ka bababeli.” (Luka 9:51; 10:1) Kacwalo, Jesu naanani balutiwa mwa libaka zeñata bane bakutaza ka za hae.

Majuda bane babile balutiwa ba Jesu nebazwezipili kuezanga Paseka hañwi ka silimo, mi kubonahala kuli nebaezanga cwalo ka mabasi. (Exo. 12:​6-11, 17-20) Jesu hanaatuha ashwa, yena ni baapositola bahae baya kwa Jerusalema. Kono naasika kopanya balutiwa bahae kaufela ba mwa Judea, Galilea, ni Perea, kuli baeze mukiti omutuna wa Paseka. Kusina kukakanya, Jesu naabata kuba ni baapositola bahae fa kezahalo yeo. Naababulelezi kuli: “Nilakalize hahulu kuca Paseka ye ni mina nisika nyanda kale.”—Luka 22:15.

Jesu naanani libaka lelinde hanaaezize cwalo. Jesu naatuha ashwa sina “Ngunyana wa Mulimu yazwisa sibi sa lifasi.” (Joa. 1:29) Nto yeo neika ezahalela mwa Jerusalema, ili mone kuezezwanga matabelo ku Mulimu kuzwa feela kwamulaho. Lifu la Jesu nelitahisize tukuluho yetuna hahulu kufita yenetahisizwe ki ngunyana yene bacile Maisilaele fa busihu bone bazwile mwa Egepita. (1 Makor. 5:​7, 8) Kabakala sitabelo sanaafile Jesu, baapositola ba 12 nebakaba kalulo ya mutomo wa puteho ya Sikreste. (Maef. 2:​20-22) Kwatabisa kuziba kuli muleneñi okenile wa Jerusalema unani “macwe a mutomo a 12” fokuñozwi “mabizo a 12 a baapositola ba Ngunyana ba 12.” (Sin. 21:​10-14) Kaniti luli, baapositola babasepahala nebaka peta kalulo ya butokwa hahulu mwa kutalelezwa kwa mulelo wa Mulimu. Kacwalo, kwautwahala Jesu hanaabata kuba ni bona fa Paseka yahae ya mafelelezo ni kwa kezahalo yenelatelezi, ona Mulalelo wa Mulena.

Balutiwa ba 70 ni balutiwa babañwi nebasiyo ni Jesu kwa mulalelo wo. Nihakulicwalo, balutiwa kaufela bane bazwezipili kusepahala nebaka tusiwa ki Mulalelo wa Mulena wanaatomile Jesu. Bakreste kaufela bane bakatoziwa hasamulaho, nebaka kena mwa tumelelano ya Mubuso, yanaabulezi Jesu fa busihu bwani.—Luka 22:​29, 30.