Muapositola Paulusi naañolezi Bakreste ba mwa Tesalonika kuli: “Haiba mutu asamameli linzwi laluna leli mwa liñolo le, mulemuhe mutu yo.” (2 Mates. 3:14) Kwamulaho nelulumela kuli ketelelo yeo neifilwe kwa baana-bahulu. Haiba mutu azwelapili kukeshebisa likuka za mwa Bibele kusina taba kuli ufilwe kelezo ka kukuta-kutela, baana-bahulu bakona kufa ngambolo ya kulemusa puteho. Hamulaho wa fo, muhasanyi ni muhasanyi naakatuhela kuswalisana ni mutu yo yalemuhilwe.

Nihakulicwalo, luswanela kucinca kutwisiso yaluna. Kubonahala kuli kelezo yanaafile Paulusi iama kwa muhato wa ka butu waswanela kuunga Mukreste mwa miinelo yemiñwi. Kacwalo, baana-bahulu habaswaneli kufa ngambolo ya temuso. Ki kabakalañi halutokwa kueza cinceho ye? Halunyakisiseñi taba yanaaambola Paulusi hanaafile kelezo yeo.

Paulusi naalemuhile kuli babañwi mwa puteho ‘nebasa zamayi ka mukwa oswanela.’ Nebakeshebisa kelezo yetomile fa Bibele. Nako yefelile hanaa bapotezi, naafile taelo ye: “Haiba mutu haalati kusebeza, ni kuca asike aca.” Niteñi, babañwi nebahana kusebeza kuli bafumane fa kuipiliseza, niha nebakona kueza cwalo. Hape nebaikenya mwa litaba za babañwi. Bakreste nebaswanela kueza cwañi batu bao bane basazamayi ka mukwa oswanela?—2 Mates. 3:​6, 10-12.

Paulusi naabulezi kuli, “mulemuhe mutu yo.” Linzwi la Sigerike lelitolokilwe kuli “mulemuhe,” lifa muhupulo wa kuba ni temuho yetuna kuli lusike lwakukuezwa ki mutu yo. Paulusi naafile kelezo yeo kwa puteho kaufela, isiñi feela baana-bahulu. (2 Mates. 1:1; 3:6) Kacwalo, Mukreste ni Mukreste yanaaka lemuha kuli Mukreste yomuñwi haalati kuutwa kelezo ya mwa Bibele, ‘naaka tuhela kuswalisana’ ni mutu yo yasazamayi ka mukwa oswanela.

Kana taba yeo neitalusa kuli mutu yo naakangiwa sina mutu yazwisizwe mwa puteho? Batili, kakuli Paulusi naaekelize kuli: “Muzwelepili kumueleza sina muzwale.” Kacwalo, Bakreste nebakona kuswalisana ni mutu yalemuhilwe yo kwa mikopano ni mwa bukombwa, kono nebaka keta kusaswalisana ni yena mwa lika zeñwi kamba habaishumusa. Kabakalañi? Paulusi naaize, “Kuli aswabe.” Kabakala kulemuhiwa, Mukreste yo yanaasa zamayi ka mukwa oswanela naakona kuswabela muzamao wahae ni kucinca mupilelo wahae.—2 Mates. 3:​14, 15.

Bakreste kacenu bakona kusebelisa cwañi kelezo ye? Sapili, luswanela kuikolwisisa kuli muzamao wo ‘hauswaneli’ luli, sina mwanaataluselize Paulusi. Naasatalusi batu babakona kueza likatulo zeshutana ni zaluna kabakala lizwalo kamba lika zebatabela ka butu. Mi naasatalusi batu baba luutwisize butuku kwa pilu. Kono Paulusi naabulela ka kunonga ka za batu babahana ka bomu kuutwa kelezo yetomile fa Linzwi la Mulimu.

Kacenu, haiba lulemuha kuli Mukreste yomuñwi ubonisa moya wa kusautwa wo, a lukaeza katulo ya ka butu ya kusaswalisana ni yena kamba kusaba ni yena haluishumusa. Bakeñisa kuli yeo ki katulo ya ka butu, haluna kuambola ka za teñi ni batu basili kamba ba lubasi babasa pili fa lapa laluna. Mi lukaswalisana ni mutu yo kwa mikopano ni mwa bukombwa. Haiba acinca mupilelo wahae, lukaswalisana ni yena mwa lika zeñwi hape.