TABA YA KUITUTA 33
PINA 130 Munoswalela
Puteho Moilikanyiseza Mubonelo wa Jehova ka za Baezalibi
“Haiba mutu aeza sibi, lunani mutusi.”—1 JOA. 2:1.
ZEKAITUTIWA
Lukaituta ka za mone italimezwi taba yeama bufosi bobutuna mwa puteho ya mwa Korinte ya mwa linako za baapositola.
1. Jehova ubata kuli batu kaufela baezeñi?
JEHOVA hanaabupile batu naabafile tukelo ya kuiketela za kueza. Mwaitusisanga mpo yeo kamita hamueza likatulo. Katulo ya butokwa hahulu yakona kueza mutu ufi kamba ufi, ki kuneela bupilo bwahae ku Jehova ni kumulapela ka kuswalisana ni batanga bahae. Jehova ubata kuli batu kaufela baeze cwalo. Kabakalañi? Kakuli walata batu mi ubata kuli bakondise. Ubata kuli babe ni silikani sesinde ni yena ni kupila kuya kuile.—Deut. 30:19, 20; Magal. 6:7, 8.
2. Jehova uikutwanga cwañi ka za baezalibi babasika baka?
2 Nihakulicwalo, Jehova hahapelezi mutu ufi kamba ufi kumusebeleza. Ufile mutu ni mutu tukelo ya kuiketela za kueza. Kucwañi haiba Mukreste yakolobelizwe aloba mulao wa Mulimu ka kueza sibi sesituna? Haiba haalati kubaka, uswanela kuzwisiwa mwa puteho. (1 Makor. 5:13) Kono mane nihaiba mwa muinelo wo, Jehova ubanga ni sepo ya kuli muezalibi yo ukakutela ku yena. Mane libaka la butokwa lene litahisize kuli Jehova afe tiululo kikuli baezalibi bababakile bakone kuswalelwa. (Mubale 1 Joani 2:1.) Mulimu waluna yalilato ususueza baezalibi kuli babake.—Zak. 1:3; Maro. 2:4; Jak. 4:8.
3. Lukanyakisisañi mwa taba ye?
3 Jehova ubata kuli lube ni mubonelo wahae ka za libi zetuna ni ka za baezalibi. Mwa taba ye, lukanyakisisa molukona kuezeza cwalo. Hamunze mubala taba ye, mulemuhe (1) mone italimezwi taba yeama sibi sesituna mwa puteho ya mwa Korinte ya mwa linako za baapositola, (2) ketelelo yanaafile muapositola Paulusi muezalibi yo hanaabakile, ni (3) zeluituta kwa likande la mwa Bibele leo ka za mo Jehova aangela Bakreste babaezize sibi sesituna.
MONE ITALIMEZWI TABA YEAMA SIBI SESITUNA MWA LINAKO ZA BAAPOSITOLA
4. Ki muinelo mañi one ubile teñi mwa puteho ya mwa Korinte ya mwa linako za baapositola? (1 Makorinte 5:1, 2)
4 Mubale 1 Makorinte 5:1, 2. Paulusi hanaali mwa musipili wahae wabulaalu wa bulumiwa, naautwile nto yemaswe hahulu yeneezahala mwa puteho ya mwa Korinte yenesazo tomiwa. Muzwale yomuñwi mwa puteho yeo naaeza buhule ni bo mahe ba mutose. Muzamao wo neukomokisa hahulu mi mane neusa “fumanehi nihaiba mwahalaa ba macaba”! Kono mizwale ni likaizeli nebanahana kuli nekusika fosahala kuli muzwale wa muzamao wa buhule yo azwelepili kuba mwa puteho. Mwendi babañwi mwa puteho nebanahana kuli ka kueza cwalo nebabonisa sishemo ni kutwisiso zabonisanga Mulimu kwa batu babasika petahala. Kono Jehova hatabeli kuli batu bahae baikenye mwa muzamao omaswe. Kusina kukakanya, ka kuikenya mwa muzamao wo wa kusaswabela bufosi, muuna yo naasinya libizo la puteho. Hape mwendi naakukueza Bakreste babañwi bane baswalisana ni yena. Kacwalo, Paulusi naalaezi puteho kuli iezeñi?
5. Paulusi naalaezi puteho kuezañi, mi naatalusañi? (1 Makorinte 5:13) (Mubone ni siswaniso.)
5 Mubale 1 Makorinte 5:13. Ka kususumezwa ki moya wa Mulimu, Paulusi naañozi liñolo la kulaela kuli muezalibi yanaasika baka yo azwisiwe mwa puteho. Bakreste babasepahala nebaswanela kueza cwañi muuna yo? Paulusi naabataluselize kuli ‘batuhele kuswalisana’ ni yena. Taelo yeo neitalusañi? Paulusi naatalusize kuli taelo yeo neitalusa kuli ‘mane nihaiba kuca ni mutu yacwalo basike baca ni yena.’ (1 Makor. 5:11) Kuca sico ni mutu yomuñwi kukona kutahisa kuli kube bunolo kueza siango ni yena. Kusina kukakanya, Paulusi naatalusa kuli mizwale ni likaizeli mwa puteho nebasa swaneli kueza siango ni muuna yo. Kueza cwalo nekuka tusa kuli mizwale ni likaizeli mwa puteho basike bakukuezwa ki yena. (1 Makor. 5:5-7) Kutuha fo, kuambuka kuswalisana ni muuna yo nekukona kumutusa kulemuha kuli naafoselize hahulu Jehova, mi mwendi naakaikutwa hahulu bumaswe ni kususuezwa kubaka.
Ka kususumezwa ki moya wa Mulimu, Paulusi naañozi liñolo la kulaela kuli muezalibi yanaasika baka azwisiwe mwa puteho (Mubone paragilafu 5)
6. Liñolo la Paulusi nelitusize cwañi puteho ni muezalibi?
6 Paulusi hasaalumile liñolo lahae kwa Bakreste ba mwa Korinte, naasazibi mone bakaangela kelezo yahae. Kono Tite ato mutaluseza taba yeñwi yenee mutabisize. Mizwale ni likaizeli mwa puteho nebaamuhezi hande liñolo la Paulusi. (2 Makor. 7:6, 7) Nebamamezi litaelo zahae. Kuzwa fo, hamulaho wa likweli lisikai kuzwa fanaalumezi liñolo lahae lapili, muezalibi yo naasaabakile ni kutuhela mupilelo wahae omaswe! Naacincize muzamao ni mubonelo wahae mi naakalile kupila ka kulumelelana ni likuka za Jehova zelukile. (2 Makor. 7:8-11) Ki lika mañi zeñwi zanaatalusize Paulusi kuli puteho ieze?
PUTEHO MONE ISWANELA KUEZEZA MUEZALIBI YANAABAKILE
7. Ki lika mañi zende zenezwile mwa kuzwisa muezalibi mwa puteho? (2 Makorinte 2:5-8)
7 Mubale 2 Makorinte 2:5-8. Paulusi naatalusize kuli, ‘Kalimelo yenefilwe ki babañata neilikani ku mutu yacwalo.’ Ka mubulelelo omuñwi, muuna yo naatusizwe ki kalimelo yanaafilwe. Ka mukwa ufi? Kalimelo yeo nei mutusize kubaka.—Maheb. 12:11.
8. Ki lika mañi zeñwi zanaatalusize Paulusi kuli puteho ieze?
8 Kacwalo, Paulusi naalaezi mizwale ni likaizeli mwa puteho kuli: “Muswanela kumuswalela ka pilu kaufela ni kumuomba-omba” mi “mubonise lilato lamina ku yena.” Mulemuhe kuli Paulusi naabata kuli mizwale ni likaizeli mwa puteho baeze lika zeñwi kwandaa feela kulumeleza muuna yo kuswalisana ni batu ba Jehova hape. Paulusi naabata kuli bakolwise muuna yo yanaabakile, ka lipulelo ni ka likezo zabona, kuli neba muswalezi luli mi neba mulata. Ka kueza cwalo, nebaka bonisa hande kuli neba muamuhezi hande mwa puteho.
9. Ki kabakalañi babañwi hane kubabezi tata kuswalela muezalibi yo yanaabakile?
9 Kubonahala kuli babañwi mwa puteho neku babezi taata kubonisa muezalibi yanaabakile yo sishemo hanaakalile kuswalisana hape ni batu ba Mulimu. Ki kabakalañi halubulela cwalo? Babañwi mwendi nebasa munyemezi kabakala butata bwanaatahiselize puteho, mi babañwi bona mwendi nebasa ikutwa hahulu bumaswe kabakala likezo zahae. Kubonahala kuli babañwi nebaikutwa kuli nekusa swaneli kuamuhela hande muuna yo sina muzwale kakuli bona nebaezize mone bakonela kaufela kuli bazwelepili kuba ni muzamao omunde. (Mubapanye Luka 15:28-30.) Kono ki kabakalañi hane kuli kwa butokwa kuli mizwale ni likaizeli babonise lilato la niti ku muzwale wabona yanaakutezi mwa puteho?
10-11. Ki lika mañi zeneka ezahala baana-bahulu hane bakahana kuswalela muezalibi yanaabakile?
10 Munahane feela zeneka ezahala kambe baana-bahulu nebasika lumeleza muuna yo yanaabakile habuniti kukutela mwa puteho, kamba kambe mizwale ni likaizeli mwa puteho nebahanile kumubonisa lilato hasaakutile. Naakakomiwa ki “maswabi atulile tikanyo.” Naakaikutwa kuli haasakona kusebeleza Jehova hape. Mane naakapalelwa kuikataza kuba ni silikani sesinde ni Mulimu hape.
11 Mane nto yemaswe nikufita kikuli, mizwale ni likaizeli hane bakahana kuamuhela muezalibi yanaabakile yo, silikani sabona ni Jehova nesika sinyeha. Libaka? Kakuli nebasike balikanyisa mubonelo wa Jehova ka za baezalibi bababakile, kono nebaka likanyisa Satani yasituhu ili yasina makeke. Nebaka lumeleza Diabulosi kuitusisa bona kuzwafisa muuna yo kuli asike asebeleza Jehova hape.—2 Makor. 2:10, 11; Maef. 4:27.
12. Mizwale ni likaizeli mwa puteho nebakona kulikanyisa cwañi Jehova?
12 Kono cwale mizwale ni likaizeli mwa puteho ya mwa Korinte nebakona kulikanyisa cwañi Jehova, isiñi Satani? Nebakona kueza cwalo ka kuswalela baezalibi bababakile sina mwaezezanga Jehova. Mulemuhe zene babulezi bañoli babañwi ba Bibele ka za Jehova. Davida naabulezi kuli, ki “yomunde mi ulata kuswalela.” (Samu 86:5) Mika naañozi kuli: “Ki ufi Mulimu yaswana ni wena, yaswalela bufosi ni kukwahela milatu?” (Mika 7:18) Mi Isaya naabulezi kuli: “Mutu yamaswe atuhele nzila yahae ni yalunya atuhele mihupulo yahae; akutele ku Jehova, yena yaka mushemuba, akutele ku Mulimu waluna, kakuli uka muswalela ka kutala.”—Isa. 55:7.
13. Ki kabakalañi hane kuswanela kuli muezalibi yanaabakile akutiswe mwa puteho? (Mubone mbokisi yeli, “ Muuna wa Mwa Korinte Naakutisizwe Lili Mwa Puteho?”)
13 Kuli balikanyise Jehova, mizwale ni likaizeli mwa puteho ya mwa Korinte nebanani kuamuhela hande muuna yanaabakile yo ni kumukolwisa kuli neba mulata. Ka kumamela taelo ya Paulusi ya kuli baamuhele hande muezalibi yanaabakile yo, mizwale ni likaizeli mwa puteho nebabonisize kuli ‘nebautwa mwa lika kaufela.’ (2 Makor. 2:9) Ki niti kuli nekufitile feela likweli lisikai kuzwa fanaazwiselizwe mwa puteho, kono kalimelo yanaafilwe nei mutusize kubaka. Kacwalo, baana-bahulu nebasa swaneli kuliyeha kumukutisa mwa puteho.
MOLUKONA KULIKANYISEZA JEHOVA KA KUBA NI KATULO YELUKILE NI SISHEMO
14-15. Likande la mone italimezwi taba mwa Korinte wa kwaikale lilulutañi? (2 Pitrosi 3:9) (Mubone ni siswaniso.)
14 Likande la mone italimezwi taba mwa Korinte wa kwaikale neliñozwi ni kubukelezwa ka mulelo wa “kululuta.” (Maro. 15:4) Likande leo liluluta kuli Jehova haatuhelelangi batu babaezize sibi sesituna, ili babasika baka, kuzwelapili kuba mwa puteho. Babañwi bakona kunahana kuli bakeñisa kuli Jehova unani sishemo, wakona kutuhelela mutu yasalati kubaka kuzwelapili kuba mwa puteho, kono Jehova habonisangi sishemo ka nzila yeo. Nihaike kuli Jehova unani sishemo, haatuhelelangi bumaswe mi haacincangi likuka zahae ka za zelukile ni zesika luka. (Juda 4) Kaniti luli, hanaaka eza cwalo naasike abonisa sishemo, kakuli puteho kaufela neikaba mwa lubeta.—Liprov. 13:20; 1 Makor. 15:33.
15 Nihakulicwalo, luituta kuli Jehova haalati kuli mutu ufi kamba ufi atimezwe. Kono ubata kupilisa batu ka mokukonahalela kaufela. Ubonisanga sishemo kwa batu babacincize mupilelo wabona ili bababata kuba ni silikani sesinde ni yena hape. (Ezek. 33:11; mubale 2 Pitrosi 3:9.) Kacwalo, muuna wa mwa Korinte hanaabakile ni kutuhela mupilelo wahae omaswe, Jehova naaitusisize Paulusi kutaluseza puteho kuli muuna yo naaswanela kuswalelwa ni kukutiswa mwa puteho.
Lulikanyisa lilato la Jehova ni sishemo sahae halubonisa lilato ni sishemo kwa batu babakutisizwe mwa puteho (Mubone paragilafu 14 ni 15)
16. Muikutwa cwañi ka za Jehova hamulaho wa kuituta mone italimezwi taba mwa Korinte?
16 Kunyakisisa mone italimezwi taba ya mwa Korinte kulutusize kulemuha kuli Jehova unani lilato lelituna, walata kuluka, mi walata katulo yelukile. (Samu 33:5) Kaniti luli, kuituta taba ye kutahisa kuli lulumbeke hahulu Jehova! Luitebuha hahulu kuli unani sishemo kakuli kaufelaa luna lubaezalibi mi lutokwa kuswalelwa. Mañi ni mañi waluna unani mabaka amande a kuitumela ku Jehova kabakala tiululo yekonahalisa kuli libi zaluna liswalelwe. Kwaomba-omba luli kuziba kuli Jehova ulata hahulu batu bahae mi ubata luli kuli bakondise!
17. Ki lika mañi zekanyakisiswa mwa taba yetatama?
17 Litaba zeama libi zetuna liswanela kutalimwa cwañi kacenu? Baana-bahulu bakona kulikanyisa cwañi Jehova yabata kuli baezalibi babake? Puteho iswanela kuezañi haiba baana-bahulu baatula kuli mutu yomuñwi azwisiwe mwa puteho kamba kukutiswa? Lipuzo zeo likaalabiwa mwa taba yetatama.
PINA 109 Mulatane Hahulu Kuzwelela Kwatasaa Pilu
