Niteñi, Jehova ubata kuli lulibelele ka pilu-telele nako yahae ya kuli aange muhato. Ki kabakalañi habata kuli lueze cwalo? Ki lika mañi zekona kulutusa kuba ni tabo halunze lulibelela?

KI KABAKALAÑI JEHOVA HABATA KULI LULIBELELE?

Bibele ibulela kuli: “Jehova ulibelela ka pilu-telele kuli amishemube, mi ukayema kuli amibonise sishemo. Kakuli Jehova ki Mulimu wa katulo yelukile. Tabo ki ya batu kaufela babazwelapili kumulibelela.” (Isa. 30:18) Manzwi a Isaya ao, kwa makalelo naañolezwi Majuda bane bali mangulunde. (Isa. 30:1) Kono nekunani Majuda babañwi bane basepahala, mi manzwi ao naabatusize kuba ni sepo. Manzwi aswana ao akona kutusa batanga ba Jehova babasepahala kacenu kuba ni sepo.

Kacwalo, luswanela kulibelela ka pilu-telele, kakuli Jehova ni yena usweli kulibelela ka pilu-telele. Utomile nako yakayundisa lifasi le, mi ulibelela lizazi ni nako yeo. (Mat. 24:36) Ka nako yeo, kukaiponahalela hande kuli litaba zeo Diabulosi atameleza Jehova ni batu baba musebeleza, ki za buhata. Kihona akayundisa Satani ni baba muyemela kaufela, kono luna uka “[lubonisa] sishemo.”

Ka nako ya cwale, Jehova mwendi haana kufelisa miinelo yetaata yelukopana ni yona, kono ulusepisa kuli lwakona kuba ni tabo halunze lulibelela. Sina mwanaabulelezi Isaya, lwakona kuba ni tabo halunze lunyolelwa kamba kulibelela kuli nto yeñwi yende iezahale. (Isa. 30:18) a Ki lika mañi zekona kulutusa kuba ni tabo yeo? Kunani lika zeene zekona kulutusa.

ZEKONA KULUTUSA KUBA NI TABO HALUNZE LULIBELELA

Muise pilu kwa lika zende. Mulena Davida naaboni lika zemaswe zeñata mwa bupilo bwahae kaufela. (Samu 37:35) Niteñi, naañozi kuli: “Uikuzeze fapilaa Jehova mi umulibelele ka pilu-telele. Usike wafilikana kabakala mutu yakondisa milelo  yahae yemaswe.” (Samu 37:7) Davida naasebelisize kelezo yeo ka kuisa pilu kwa sepo yanaanani yona ya kuli naakapiliswa. Hape naaitebuhile lika kaufela zende zanaa muezelize Jehova. (Samu 40:5) Ni luna kuka lubela bunolo kulibelela ku Jehova, haiba luisa hahulu pilu kwa lika zende kufita kuisa pilu kwa miinelo yetaata yelukopana ni yona.

Mutukufalelwe kulumbeka Jehova. Muñoli wa Samu 71, ili yo mwendi neli Davida, naabulelezi Jehova kuli: “Nikazwelapili kulibelela; nika kulumbeka hahulu.” (Samu 71:14) Naakalumbeka cwañi Jehova? Naakataluseza babañwi ka za Jehova ni kumuopelela milumbeko. (Samu 71:​16, 23) Ka kuswana ni Davida, ni luna lwakona kuba ni tabo halunze lulibelela ku Jehova. Lulumbekanga Jehova halukutaza, mwa lingambolo zaluna za ka zazi, ni haluopela lipina za Mubuso. Nako yeñwi hamuka opela pina ya Mubuso, munahanisise ka tokomelo manzwi ayona ni mwamituseza kuba ni tabo.

Mususuezwe ki mizwale ni likaizeli bamina. Davida hanaakopana ni miinelo yetaata, naabulelezi Jehova kuli: “Mwahalaa babasepahala bahao, nikasepa libizo lahao.” (Samu 52:9) Ni luna lwakona kususuezwa ki mizwale ni likaizeli baluna babasepahala, haluli kwa mikopano, mwa bukombwa, ni haluitabisa feela ni bona.—Maro. 1:​11, 12.

Mutiise sepo yamina. Samu 62:5 ili: “Nilibelezi Mulimu ka pilu-telele kakuli sepo yaka izwa ku yena.” Ki kwa butokwa hahulu kuba ni sepo yetiile, sihulu haiba mafelelezo abonahala kuliyeha kufita mone lunahanela. Luswanela kukolwa kuli lisepiso za Jehova likatalelezwa luli, niha lutokwa kulibelela ka nako yetelele. Lwakona kutiisa sepo yaluna ka kuituta Linzwi la Mulimu, ili bupolofita, moliswalisanela litaba ze mwateñi, ni litaba zapatulula Jehova ka za hae. (Samu 1:​2, 3) Hape, luswanela kuzwelapili kulapela “ka moya okenile” kuli luzwelepili kuba ni silikani sesinde ni Jehova halunze lulibelela kuli sepiso yahae ya kulufa bupilo bobusa feli italelezwe.—Juda 20, 21.

Ka kuswana ni Mulena Davida, mukolwe kuli Jehova utalima babalibelela ku yena mi ubabonisa lilato lahae lelisa feli. (Samu 33:​18, 22) Muzwelepili kulibelela ku Jehova ka pilu-telele ka kuisa pilu kwa lika zende, ka kumulumbeka, ka kususuezwa ki mizwale ni likaizeli bamina, ni ka kuzwelapili kutiisa sepo yamina.