1. Ki lika mañi zakona kueza Jehova kuli apete mulelo wahae?

JEHOVA wakona kuketa kuba nto ifi kamba ifi kuli apete mulelo wahae. Ka mutala, Jehova wakona kuketa kuba Muluti, Muomba-ombi, Mubuleli wa Evangeli, ni zeñwi cwalo. (Isa. 48:17; 2 Makor. 7:6; Magal. 3:8) Nihakulicwalo, hañata uitusisanga batu kuli bapete mulelo wahae. (Mat. 24:14; 28:19, 20; 2 Makor. 1:3, 4) Hape Jehova ukona kufa mutu ufi kamba ufi butali ni maata kuli akone kupeta tato yahae. Mane seo ki sona selitalusa libizo la Jehova, sina mobataluseza licaziba babañata.

2. (a) Ki kabakalañi fokuñwi halukona kukakanya kuli Jehova wakona kuitusisa luna? (b) Lukanyakisisañi mwa taba ye?

² Kaufelaa luna lubata kuitusiswa ki Jehova, kono babañwi mwendi bakona kukakanya ka za haiba Jehova wakona kuitusisa bona. Kabakalañi? Kabakala busupali, miinelo yebali ku yona, kamba kutokwa buikoneli. Kono babañwi bona baikutwanga kuli lika zebapetile lilikani mi habatokwi kueza zeñata. Mwa taba ye, lukanyakisisa mo Jehova akona kuitusiseza mañi ni mañi waluna kuli apete mulelo wahae. Hasamulaho, lukanyakisisa mitala ya mwa Bibele yebonisa mo Jehova naatuselize batanga bahae, ili baana ni basali, kuba ni takazo ni maata a kuunga muhato. Kihona lukanyakisisa zelukona kueza kuli Jehova aitusise luna.

3. Jehova ukona kulufa cwañi takazo ya kuunga muhato, sina mwasepiselize kwa liñolo la Mafilipi 2:13?

³ Mubale Mafilipi 2:13. * Jehova wakona kulufa takazo ya kuunga muhato. Ukona kueza cwañi cwalo? Luungeñi kuli mwa  puteho yamina kunani muzwale kamba kaizeli yomuñwi yatokwa kutusiwa, kamba mwendi kutokwahala mutu yakaeza musebezi omuñwi. Kamba mwendi baana-bahulu babala liñolo lelizwa kwa ofisi ya mutai lelibonisa kuli kwa sibaka sesiñwi kutokwahala hahulu bakutazi ba Mubuso. Taba yeo ikona kutahisa kuli muipuze kuli: ‘Nikona kutusa cwañi?’ Kamba mwendi lukupilwe kueza musebezi omuñwi kono luikutwa kuli musebezi wo utaata mi halukoni kuueza hande. Kamba mwendi nelubala Bibele kono haluzibi molukona kusebeliseza taba yene lubala yeo kuli lutuse babañwi. Jehova haana kuluhapeleza kueza nto ifi kamba ifi. Kono haiba alemuha kuli lusweli lwanahana za muhato oluswanela kuunga, wakona kulutusa kuba ni takazo ya kupeta milelo yaluna.

4. Jehova ukona kulufa cwañi maata a kuunga muhato?

⁴ Jehova hape wakona kulufa maata a kuunga muhato. (Isa. 40:29) Wakona kuitusisa moya wahae okenile kuli alutuse kuekeza kwa buikoneli bwaluna. (Exo. 35:30-35) Jehova wakona kuitusisa kopano yahae kululuta mwakuezeza misebezi yemiñwi. Haiba hamuzibi hande mwakuezeza musebezi omuñwi, mukupe tuso. Hape mukupe Ndataa luna ya kwa lihalimu yanani bufani kuli amife “maata afita a butu.” (2 Makor. 4:7; Luka 11:13) Mwa Bibele kunani mitala yemiñata yebonisa mwanaatuselize Jehova batanga bahae ba kwamulaho, ili baana ni basali kuba ni takazo ni maata a kuunga muhato. Halunze lunyakisisa mitala yeo, munahane mwakona kumituseza Jehova ni mina kuli mupete musebezi wamifile.

5. Luitutañi ku Jehova halunyakisisa mwanaaitusiselize Mushe kuli alukulule sicaba sahae ni nako yanaaketile kueza cwalo?

⁵ Jehova naatusize Mushe kulukulula Maisilaele mwa Egepita. Kono Jehova naakalile lili kuitusisa Mushe? Kana neli ka nako yeo Mushe naaikutwa kuli naakona kueza musebezi wo kakuli ‘naalutilwe butali kaufela bwa Maegepita’? (Lik. 7:22-25) Batili, Jehova naaitusisize feela Mushe hamulaho wa kumutusa kuba ni buikokobezo ni kuba yabunolo. (Lik. 7:30, 34-36) Jehova naafile Mushe bundume kuli akone kuyema fapilaa mubusi yamaata wa Egepita. (Exo. 9:13-19) Luitutañi ku Jehova halunyakisisa mwanaaitusiselize Mushe ni nako yanaaketile kueza cwalo? Jehova uitusisanga batu babalikanyisa tulemeno twahae ni babaitingile ku yena kuli uka bafa maata.—Mafil. 4:13.

6. Luitutañi kwa taba yebonisa mo Jehova naaitusiselize Barizilai kutusa Mulena Davida?

⁶ Hamulaho wa lilimo zeñata kuzwa fo, Jehova naaitusisize Barizilai kutusa Mulena Davida. Davida ni batu banaali ni bona ‘nebashwile tala, nebakatezi mi nebashwile linyolwa’ ka nako yene babaleha fapilaa Abisalomi mwanaa Davida. Barizilai, yanaali musupali ka nako yeo, hamoho ni batu babañwi, naabeile bupilo bwahae mwa lubeta kuli atuse Davida ni batu banaali ni bona. Barizilai naasika ikutwa kuli Jehova naasakoni kuitusisa yena bakeñisa kuli naali musupali. Kono ka sishemo, naaitusisize lika zanaanani zona kuli atuse batanga ba Mulimu bane batokwa tuso. (2 Sam. 17:27-29) Luitutañi kwa taba yeo? Kusina taba ni folukuma, Jehova wakona kuitusisa luna kutusa mizwale ni likaizeli baluna babatokwile, ibe kuli lupila ni bona mwa naha yeswana kamba kutokwa. (Liprov. 3:27, 28; 19:17) Nihaike kuli halukoni kuya kobainzi kuyo batusa, lwakona kufa linubu za musebezi wa mwa lifasi kaufela kuli kube ni masheleñi atokwahala a kutusa mizwale ni likaizeli baluna babatokwa tuso.—2 Makor. 8:14, 15; 9:11.

7. Jehova naaitusisize cwañi Simioni, mi ki kabakalañi taba yeo haisusueza?

 ⁷ Jehova naasepisize Simioni, muuna wa musupali yanaasepahala, ili yanaapila mwa Jerusalema, kuli naasike ashwa pili asika bona kale Mesia. Kubonahala kuli Simioni naasusuelizwe hahulu hanaautwile sepiso yeo kakuli naasalibelezi kubona Mesia ka lilimo zeñata-ñata. Naafuyauzwi hahulu bakeñisa kuli naanani tumelo mi naaitiisize. Zazi leliñwi, “ka kususumezwa ki moya,” aya kwa tempele. Teñi ko, abona mbututu yena Jesu, mi Jehova aitusisa Simioni kupolofita za mwana yo yanaakaba Kreste. (Luka 2:25-35) Nihaike kuli Simioni mwendi naashwile pili Jesu asika kalisa kale bukombwa bwahae bwa fa lifasi, naaitebuhile tohonolo yanaanani yona, mi kwapili ukaikola limbuyoti zeñata. Mwa lifasi lelinca, muuna yasepahala yo ukabona mo puso ya Jesu ikatahisa kuli mabasi kaufela mwa lifasi aipumanele limbuyoti. (Gen. 22:18) Ni luna luswanela kuitebuha hahulu tohonolo ifi kamba ifi yalufa Jehova ya kumusebeleza.

8. Jehova ukona kuitusisa cwañi luna sina mwanaaitusiselize Barnabasi?

⁸ Mwa linako za baapositola, muuna yasishemo wa libizo la Josefa, naatabela kuitusiswa ki Jehova. (Lik. 4:36, 37) Kubonahala kuli Josefa naaomba-ombanga hahulu babañwi kuli mane baapositola neba mufile libizo la Barnabasi lelitalusa “Yaomba-omba.” Ka mutala, Saule hasaabile mulumeli, mizwale babañata nebasabanga kumuatumela bakeñisa kuli naazibahala kuba mutu yanaanyandisanga hahulu liputeho. Nihakulicwalo, Barnabasi naaomba-ombile Saule ni kumutusa, mi kaniti Saule naaitebuhile hahulu sishemo sanaabonisizwe. (Lik. 9:21, 26-28) Hasamulaho, baana-bahulu mwa Jerusalema nebalemuhile kuli mizwale ba kwa Antioke wa mwa Siria nebatokwa kususuezwa. Ki mañi yene balumile? Neli Barnabasi! Nebaketile mutu yaswanela. Bibele ilutaluseza kuli Barnabasi ‘akala kubasusueza kaufelaa bona kuli batiiseze ku Mulena ka kuikatulela mwa lipilu zabona.’ (Lik. 11:22-24) Ni kacenu, Jehova wakona kuitusisa luna kuli luomba-ombe Bakreste babañwi. Ka mutala, ukona kuitusisa luna kuli luomba-ombe babashwezwi ki balatiwa babona. Kamba mwendi ukona kuitusisa luna kuli lupotele kamba kulizeza luwaile mutu yakula kamba yalembwalile ni kumuomba-omba. Kana mukatuhelela Jehova kuli aitusise mina sina mwanaaitusiselize Barnabasi?—1 Mates. 5:14.

9. Luitutañi kwa mutala obonisa mo Jehova naatuselize muzwale yabizwa Vasily kuba mulisana yomunde wa kwa moya?

⁹ Jehova naatusize muzwale yomuñwi yabizwa Vasily kuba mulisana yomunde wa kwa moya. Bo Vasily hane baketilwe kuba muuna-muhulu inze banana lilimo ze 26, nebaikalezwi kuli nebasike bakona kutusa puteho kwa moya, sihulu kutusa batu bane bakopana ni miinelo yetaata. Nihakulicwalo, nebatusizwe ki baana-bahulu bane banani yeloseli mi nebatusizwe ki kukena Sikolo sa Bukombwa Bwa Mubuso. Bo Vasily nebasebelize ka taata kuli baeze licinceho. Ka mutala, nebañozi mukoloko obonisa lika zenyinyani zene balela kueza. Hane bapetile yeñwi ni yeñwi ya lika zeo, bakala kuba ni buikolwiso bwa kuli nebaka kona kupeta buikalabelo bone bakafiwa mwa puteho. Mi cwale batalusa kuli: “Lika zene nisaba kueza kwamulaho, cwale linitahiseza tabo yetuna. Jehova haanitusanga kufumana liñolo leliswanela kuli ni omba-ombe muzwale kamba kaizeli mwa puteho, nibanga ni tabo yetuna.” Mizwale, haiba ni mina sina bo Vasily mutuhelela Jehova kuitusisa mina, uka mifa buikoneli bwa kupeta zeñata mwa puteho.

10. Ki lika mañi zanaaezize Abigaili, mi muitutañi kwa mutala wahae?

¹⁰ Davida ni baana bane bali ni yena nebamatiswa ki Mulena Saule, mi nebatokwa tuso. Baana bao nebakupile liconyana ku Nabali, yena muuna wa Muisilaele yanaafumile hahulu. Nebaikutwile kuli nebakona kukupa Nabali lico kakuli nebasilelelize mitapi yahae mwa lihalaupa. Kono muuna yo yanaanani buitati ahana kubafa nto ifi kamba ifi. Davida ahalifiswa hahulu ki taba yeo mi alela kubulaya Nabali ni baana kaufela ba ndu yahae. (1 Sam. 25:3-13, 22) Niteñi, Abigaili musalaa Nabali neli mutu yanaanani temuho mi naabuheha. Ka bundume, ayo katanyeza Davida, mi hasa mufumani awela kwa mahutu ahae ni kumukupa kuli asike aba ni mulatu wa mali ka kukutisa bumaswe. Ka maseme, aeleza Davida kusiya lika mwa mazoho a Jehova. Litaba zanaabulezi Abigaili ka buikokobezo ni sishemo sanaabonisize nelifitile Davida kwa pilu. Davida naalemuhile kuli Jehova ki yena yanaa mulumile. (1 Sam. 25:23-28, 32-34) Abigaili naanani tulemeno totunde tone tutahisize kuli Jehova aitusise yena. Ka mukwa oswana, Jehova wakona kuitusisa likaizeli babanani maseme ni temuho kutiisa mabasi abona ni mizwale ni likaizeli mwa puteho.—Liprov. 24:3; Tite 2:3-5.

11. Ki lika mañi zene baezize bana ba Shalume babasizana, mi ki bo mañi baba balikanyisa kacenu?

¹¹ Hamulaho wa lilimo zeñata kuzwa fo, Jehova naaitusisize bana ba Shalume babasizana kutusa mwa musebezi wa kulukisa mamota a Jerusalema. (Neh. 2:20; 3:12) Nihaike kuli Shalume naali nduna, bana bahae babasizana nebaitatezi kueza musebezi otaata ni okatalisa wo. (Neh. 4:15-18) Kaniti, bana ba Shalume babasizana nebashutanela kwahule ni baana ba kwa Tekoa, ‘bane basalati kuikokobeza kuli baeze musebezi!’ (Neh. 3:5) Munahane feela tabo yene babile ni yona bana ba Shalume babasizana kubona musebezi kaufela wa kulukisa mamota haufezwa mwa mazazi feela a 52! (Neh. 6:15) Kacenu, kunani likaizeli babañata baba balikanyisa ka kuitatela kueza sebelezo yeñwi yekenile, ili kuyaha ni kulukisa miyaho yeitusiswa kwa kulapela Jehova. Kuli musebezi wo ukone kupetiwa hande, kutokwahala likaizeli babacwalo babanani buikoneli, babasepahala, ni babanani mafulofulo.

12. Jehova ukona kuitusisa cwañi luna sina mwanaaitusiselize Tabita?

¹² Jehova naaitusisize Tabita kueza “misebezi yeminde yemiñata ni kufa limpo zeñata za sishemo,” sihulu kuli atuse limbelwa. (Lik. 9:36) Bakeñisa kuli naanani bufani ni sishemo, batu babañata neba mulilile hanaashwile. Kono nebabile ni tabo yetuna muapositola Pitrosi hanaa muzusize kwa bafu. (Lik. 9:39-41) Luitutañi kwa mutala wa Tabita? Ibe kuli lu babahulu kamba banana, lu baana kamba basali, kaufelaa luna lwakona kutusa mizwale ni likaizeli baluna.—Maheb. 13:16.

13. Jehova naaitusisize cwañi kaizeli yabizwa Ruth yanaanani maswabi, mi ki lika mañi zanaabulezi kaizeli yo?

¹³ Kaizeli yanaanani maswabi yabizwa Ruth, naaitomezi sikonkwani sa kuba mulumiwa. Hanaasali mwanana, naakutazanga fa ndu ni ndu ka mafulo-fulo inzaa abela matrakiti, mi naaezanga cwalo ka bubebe. Utalusa kuli: “Neniikolanga hahulu kueza musebezi wo.” Nihakulicwalo, neku mubelanga taata kuambola ni batu ka za Mubuso wa Mulimu fa ndu ni ndu. Nihaike kuli Kaizeli Ruth naanani maswabi, naabile paina wa kamita inzaa nani lilimo ze 18. Ka silimo sa 1946, naakeni Sikolo sa Giliadi sa Bibele sa Watchtower, mi hasamulaho ayo sebeleza kwa Hawaii ni kwa Japan. Jehova naaitusisize yena kukutaza taba yende ya Mubuso mwa libaka zeñata. Hamulaho wa kutanda lilimo zebato ba 80  mwa bukombwa, bo Ruth batalusa kuli: “Jehova uzwezipili kunitiisa. Unitusize kufelisa maswabi ane nibanga ni ona. Ninani buikolwiso bwa kuli Jehova wakona kuitusisa mutu ufi kamba ufi yamusepile.”

14. Ka kuya ka liñolo la Makolose 1:29, ki lika mañi zeluswanela kueza kuli luitusiswe ki Jehova?

¹⁴ Kuzwa feela kwamulaho, Jehova utusize batanga bahae kupeta misebezi yeshutana-shutana. Jehova uka mitusa kuezañi? Ukona feela kuitusisa mina haiba mwatabela kusebeza ka taata. (Mubale Makolose 1:29.) Jehova wakona kumitusa kuba mukutazi wa evangeli yatukufalezwi, muluti yomunde, muomba-ombi yomutuna, mubeleki ya sikwala, mulikani yomunde, kamba ukona kumitusa kueza nto ifi kamba ifi yatokwa kuli apete mulelo wahae, ibile feela mwatabela kuitusiswa ki yena.

15. Ka kuya ka liñolo la 1 Timotea 4:12, 15, mizwale ba mikulwani baswanela kukupa Jehova kuli abatuse kuezañi?

¹⁵ Mina bo, mizwale ba mikulwani babatuha bazwa mwa lilimo za kunonoboka: Ki lika mañi zemuswanela kueza kuli muitusiswe ki Jehova? Kutokwahala mizwale babañata babasa mata mali kuli babe likombwa za puteho, ilikuli baeze misebezi yeshutana-shutana mwa puteho. Mwa liputeho zeñata, baana-bahulu ki babañata hahulu kufita likombwa za puteho. Mina mizwale ba mikulwani, kana mwakona kunahana za momukona kutuseza puteho yamina? Fokuñwi mizwale babañwi babulelanga kuli: “Na nitabela kuba feela muhasanyi.” Haiba ni mina ki mona momuikutwela cwalo, mukupe Jehova kuli amituse kuba ni takazo ya kukwanisa zetokwahala kuli mube sikombwa sa puteho, ni kuli amife maata a kueza momukonela kaufela mwa sebelezo yamina ku yena. (Muek. 12:1) Lutokwa tuso yamina!—Mubale 1 Timotea 4:12, 15.

16. Ki lika mañi zeluswanela kukupa Jehova, mi ki kabakalañi?

¹⁶ Jehova wakona kumitusa kueza nto ifi kamba ifi yatokwa kuli apete mulelo wahae. Kacwalo, mumukupe kuli amife takazo ya kueza musebezi wahae, mi mumukupe kuli amife maata amutokwa. Ibe kuli mu babahulu kamba mu banana, muitusise nako yamina, maata amina, ni maluwo amina kuli musebeleze Jehova. (Muek. 9:10) Hamufiwa kueza musebezi omuñwi mwa kopano ya Jehova, musike mwamatukela kuhana kueza musebezi wo ka kuunga kuli hamuna kukondisa. Kaniti luli, kaufelaa luna lunani tohonolo yetuna ya kueza molukonela kaufela kuli lukutekehise Ndataa luna yalilato!