JESU naabulezi kuli: “Kutulo ki yetuna, kono babeleki ki babanyinyani. Ka mukwa ocwalo, mukupe Muñaa kutulo kuli alume babeleki mwa musebezi wahae wa kutulo.” (Luka 10:2) Manzwi ao anaabulezi Jesu lilimo zebato ba 2,000 kwamulaho, atalusa hande zeezahala mwa naha ya Myanmar kacenu. Ki kabakalañi halubulela cwalo? Mwa Myanmar, kunani feela bahasanyi babafitelela 4,200 babashaela taba yende kwa batu bababato eza 55 milioni.

Nihakulicwalo, Jehova yena “Muñaa kutulo,” ususumelize lipilu za mizwale ni likaizeli babañata-ñata babazwa mwa linaha zeshutana-shutana kuli baye kwa naha yeo ye kwa mboela-upa wa Asia, ilikuli bayo tusa mwa musebezi wa kutulo ya kwa moya. Ki lika mañi zenesusuelize bahasanyi bao kututa mwa libaka zabona? Ki lika mañi zenee batusize kututela mwa naha ya Myanmar? Mi ki limbuyoti mañi zebaikola cwale? Halunyakisiseñi makande abona.

Lilimonyana kwamulaho, Muzwale Kazuhiro yali paina kwa Japan, yakula butuku bwa kuwa, naawelezi, mi aisiwa kwa sipatela. Dokota naamutaluselize kuli asike azamaisanga mota ka lilimo zepeli. Bo Kazuhiro nebazwafile hahulu habautwa cwalo. Baipuza kuli: ‘Nikakona cwañi kueza musebezi onitabela hahulu wa bupaina haiba nisakoni kuzamaisa mota?’ Balapela ka taata, kukupa Jehova kuli abatuse kuzwelapili kusebeza sina mapaina.

Bo Kazuhiro batalusa kuli: “Hamulaho wa kweli, mulikanaaka yasebeleza kwa Myanmar autwa za muinelo one nili ku ona. Anilizeza luwaile, mi anitaluseza kuli: ‘Kwanu kwa Myanmar, luitusisanga hahulu limbasi. Haiba mututela kwanu, mukakona kuyanga mwa sebelezo ya mwa simu musatokwi kuzamaisa mota!’ Nabuza bo dokota haiba nekukonahala kuli nitutele kwa Myanmar kusina taba ni butuku bone nikula. Nataba hahulu bo dokota haba nitaluseza kuli: ‘Kunani caziba wa matuku a booko yazwa kwa Myanmar yatilo pota mwa Japan. Nika mutaluseza za makulanu amina. Haiba butuku bwamina buzuha, uka mitusa.’ Bo dokota hane babulezi cwalo, naikutwa kuli Jehova naaalabile tapelo yaka.”

Kapili-pili, bo Kazuhiro bañolela kwa ofisi ya mutai wa Myanmar kukupa kuli bona ni bo musalaa bona bayo eza bupaina mwa naha yeo. Hamulaho feela wa mazazi aketalizoho, ofisi ya mutai yabaalaba kuli: “Hamutahe, lutokwa mapaina babañata!” Bo Kazuhiro ni bo musalaa bona bo Mari, balekisa limota zabona, balukisa za mapampili abakonisa kuya mwa naha yeo, mi baleka matikiti. Kacenu, banani tabo habanze batusa sikwata sa bo susu mwa muleneñi wa Mandalay. Bo Kazuhiro bali: “Zeezahezi ku luna lilutusize kulemuha buniti bwa sepiso yalufile Mulimu kwa liñolo la Samu 37:5, lelili: ‘Ufe Jehova nzila yahao; uitinge ku yena, mi uka kutusa.’”

Ka silimo sa 2014, Lipaki za Jehova mwa Myanmar nebabile ni tohonolo ya kuba ni mukopano omutuna oipitezi mwa naha yabona. Kwa mukopano wo, nekufumanehile mizwale ni likaizeli babañata bane bazwa mwa linaha lisili. Yomuñwi ku bona, ili kaizeli yabizwa Monique, wa mwahalaa lilimo za ma 30 yanaazwa kwa United States, utalusa kuli: “Hane nikutile kwa mukopano wo, nalapela ku Jehova kuli anituse kuziba zene niswanela kueza. Hape neniambozi ni bashemi baka ka za likonkwani zaka za kwa moya. Kaufelaa luna lwautwana kuli neniswanela kukutela kwa Myanmar, kono nekufitile nako yetelele mi neninani kulapela hahulu kuli nieze katulo ya kuyo sebeleza kwa naha yeo.” Bo Monique batalusa libaka hane kubile cwalo.

Bali: “Jesu naasusuelize balateleli bahae ‘kubala lisinyehelo.’ Kacwalo, naipuza, nali: ‘Kana nakona kututa? Kana nikakona kuyo ipilisa nisatokwi kutanda nako yeñata hahulu kueza misebezi ya kwa mubili?’” Batalusa kuli: “Kapili-pili, nalemuha kuli nenisina masheleñi alikani anaaka nikonisa kuyo pila mwa naha yeo.” Kono cwale nebakonile cwañi kututa?—Luka 14:28.

Bo Monique batalusa kuli: “Zazi leliñwi, mubelekisi waka anikupa kuli nibonane ni yena. Nabilaela hahulu ka kunahana kuli naabata kunizwisa musebezi. Kono mubelekisi waka aitumela ku na kabakala musebezi omunde one nieza. Kihona anitaluseza kuli naabata kunifa mupuzo wa masheleñi kabakala kusebeza ka taata, mi masheleñi ane nifilwe ki ona luli ane nitokwa kuli nilife likoloti zaka kaufela!”

Bo Monique basebelelize mwa Myanmar kuzwa ka December 2014. Baikutwa cwañi ka za kuyo kutaleza kwa sibaka kokutokwahala hahulu bakutazi ba Mubuso? Batalusa kuli: “Nitabile hahulu kuto sebeleza kwanu. Nizamaisa lituto za Bibele zetaalu. Basali babañwi boniituta ni bona Bibele banani lilimo ze 67. Kamita banimenyezanga ni kunikumbata ka lilato haniyo bapotela. Hane baitutile kuli libizo la Mulimu ki Jehova, nebalotisize miyoko. Nebatalusize kuli: ‘Nenisa zibi kuli libizo la Mulimu ki Jehova. Kusina taba kuli ni yomuhulu hahulu ku wena, unilutile taba ya butokwa hahulu.’ Haniutwa cwalo, nalotisa miyoko ni na. Litaba zecwalo linitusanga kulemuha kuli neniezize keto yende kusebeleza kwa sibaka kokutokwahala hahulu bakutazi ba Mubuso.” Cwanoñu fa, bo Monique babile ni tohonolo ya kukena Sikolo sa Bakutazi ba Mubuso.

Bahasanyi babañwi nebasusuelizwe kututela kwa Myanmar hamulaho wa kubala litaba zebulela za naha yeo, zeñozwi mwa buka ya Yearbook of Jehovah’s Witnesses ya 2013. Kaizeli yomuñwi ya mwa lilimo za kwa makalelo a ma 30 yabizwa Li naapila kwa mboela-upa wa Asia. Kaizeli yo naabeleka, kono taba yanaabalile mwa buka ya Yearbook nei mususuelize kuyo sebeleza kwa Myanmar. Utalusa kuli: “Ka 2014, hane niizo fumaneha kwa mukopano omutuna oipitezi mwa Yangon, nenikopani ni bo mutu ni musalaa hae bane basebeleza kwa Myanmar kwa sibaka kone kutokwahala hahulu bakutazi bababulela puo ya Sichaina. Bakeñisa kuli naziba Sichaina, naikatulela kututela kwa Myanmar kuli niyo tusa sikwata seo sene siitusisa puo ya Sichaina. Kwateñi, nakopana ni bo Monique, mi lwalumelelana kututela kwa Mandalay. Jehova naalufuyauzi mi lwafumana musebezi wa buluti fa sikolo sesiswana one luezanga ka linako, mi hape lwafumana sibaka sesili bukaufi kwa kuina. Nihaike kuli sibaka selupila ku sona sacisa mi lukopananga ni miinelo yemiñwi yetaata, niikola kusebeleza mwa sibaka se. Batu ba kwa Myanmar habana lika zeñata, kono banani mikwa yeminde, mi haluyo bapotela, batuhelanga misebezi yabona ni kuteeleza kwa taba yende. Kwatabisa luli kubona Jehova mwatuseza bahasanyi kuzwisezapili musebezi mwa sibaka seo. Ninani buikolwiso bobutuna bwa kuli Jehova ubata kuli nibe kwanu kwa Mandalay.”

Bahasanyi babañata babaizo sebeleza kwa libaka kokutokwahala hahulu bakutazi ba Mubuso balemuhile kuli tapelo yatusa. Hamunyakisise mutala wa bo Jumpei ni bo musalaa bona bo Nao, baba mwa lilimo ze mwahalaa ma 30. Hane bali kwa Japan, nebaswalisananga ni puteho  yeitusisa puo ya bo susu. Kono ki kabakalañi hane batutezi kwa Myanmar? Bo Jumpei batalusa kuli: “Na ni bo musalaaka nelubanga ni milelo ya kuyo sebeleza mwa naha isili kokutokwahala hahulu bakutazi ba Mubuso. Muzwale yomuñwi yene lukopananga ni yena mwa puteho ya bo susu kwa Japan naatutezi kwa Myanmar. Nihaike kuli nelukonile feela kubuluka masheleñi amanyinyani, ni luna lwatutela kwa Myanmar mwa May 2010. Mizwale ni likaizeli ba kwa Myanmar neba luamuhezi hande!” Bo Jumpei baikutwa cwañi ka za kuyo sebeleza kwa Myanmar, mwa kalulo ya simu yeitusisa puo ya bo susu? Batalusa kuli: “Batu babañata batabela. Halubuhisanga bañi ba mandu mavidio a mwa puo ya bo susu, babanga ni tabo yetuna. Lutabile hahulu kuli neluikatulezi kuto sebeleza Jehova kwanu!”

Bo Jumpei ni bo Nao bakonile cwañi kufumana masheleñi ebatokwa? Batalusa kuli: “Hamulaho wa lilimo zetaalu, nese luitusisize buñata bwa masheleñi ane lunani ona, mi anaasiyezi naasike alukonisa kulifela ndu mone luina mwa silimo sene sikatatama. Na ni bo musalaaka nelulapezi ka taata. Lwataba hahulu hane luamuhezi liñolo lelizwa kwa ofisi ya mutai la kulukupa kuli lukale kusebeza sina mapaina babaipitezi ba swalelele! Nelusepile Jehova mi neluiponezi kuli naasika luyubeka. Uzwezipili kulubabalela.” Cwanoñu fa, bo Jumpei ni bo Nao ni bona bakeni Sikolo sa Bakutazi ba Mubuso.

Ki lika mañi zenesusuelize Muzwale Simone, yasimuluha kwa Italy, ili ya mwa lilimo za fahalaa ma 40, ni musalaa hae Anna, yasimuluha kwa New Zealand, ya mwa lilimo ze kwa mafelelezo a ma 30, kututela kwa Myanmar? Bo Anna batalusa kuli: “Nelususuelizwe ki litaba zeñozwi mwa buka ya Yearbook ya silimo sa 2013.” Bo Simone bali: “Ki tohonolo kusebeleza mwa Myanmar. Kwanu haluna lika zeñata, mi niitusisa nako yaka yeñata kwa kusebeleza Jehova. Kwatabisa luli kubona kuli Jehova walubabalela halunze lusebeleza kwa sibaka kokutokwahala hahulu bakutazi ba Mubuso.” (Samu 121:5) Bo Anna bali: “Nitabile hahulu luli kwanu. Lunolofalize bupilo bwaluna. Nitandanga nako yeñata ni bo muunaaka, mi silikani saluna sifitile fa kutiya. Hape lufumani balikani babande. Batu baitebuha musebezi obaeza Lipaki za Jehova, mi babañata bateelezanga halukutaza ku bona!” Ki lika mañi zebonisa cwalo?

Bo Anna batalusa kuli: “Zazi leliñwi, nenikutalize musizana yomuñwi wa fa yunivesiti kwa musika, mi nalukisa kuyo mupotela hasamulaho. Haniyo fita, nafumana kuli naamemile mulikanaa hae. Musipili omuñwi haniya kwateñi, nafumana kuli naamemile balikani bahae babañwi basikai. Hasamulaho, amema balikani bahae babañwi hape. Halubulela cwana, niituta Bibele ni baketalizoho ku bona.” Bo Simone bali: “Batu bolufumananga mwa bukombwa banani silikani mi babatanga kuziba zeñata. Batu babañata batabela. Mane halubangi ni nako ya kuambola ni bona kaufela.”

Kono ki lika mañi zene baezize bahasanyi babañwi pili basika tutela kale kwa Myanmar? Bo Mizuho babasimuluha kwa Japan batalusa kuli: “Na ni bo muunaaka bo Sachio nelubatanga kuyo sebeleza kwa naha isili kokutokwahala hahulu bakutazi ba Mubuso, kono nelusa zibi kwa kuya. Hase lubalile litaba zebulela za Myanmar, zefumaneha mwa buka ya Yearbook ya 2013, lwasusuezwa hahulu,  mi lwakala kunyakisisa ka za haiba neluka kona kututela kwa Myanmar.” Bo Sachio baekeza kuli: “Lwaikatulela kuyo pota sunda iliñwi kwa Yangon, ili muleneñi omutuna mwa Myanmar, kuli luyo bona haiba neluka kona kusebeleza kwateñi. Nako yekuswani yene luizo pota kwa sibaka seo nei lutusize kulemuha kuli neluka kona kututela kwateñi.”

Kuzwa ka silimo sa 2010, bo Rodney ni bo musalaa bona bo Jane, ili babasimuluha kwa Australia, baba mwa lilimo za ma 50, ni mwanaa bona wamushimani Jordan ni wamusizana Danica, basebelelize kwa sibaka kokutokwahala hahulu bakutazi ba Mubuso mwa Myanmar. Bo Rodney bali: “Hane lulemuhile kuli batu babañata nebatabela kuituta za Mulimu, lwabata kubatusa. Nisusueza mabasi amañwi kuli ni ona anahane za kuyo sebeleza kwa sibaka sesiswana sina Myanmar.” Ki kabakalañi hababulela cwalo? Batalusa kuli: “Kututa kutusize hahulu lubasi lwaluna kutiya kwa moya! Banana babañata kacenu baisa hahulu pilu kwa kubata mafoni, limota, misebezi ni lika zeñwi. Kono bana baluna bona bapatehile kuituta puo yenca ilikuli batuse babañwi habali mwa bukombwa. Baituta mwakuambolisanela ni batu babasa zibi hande litaba za mwa Bibele ni mwakufela likalabo habali kwa mikopano ya puteho, mi bapatehile kueza misebezi yemiñwi yeminde ya kwa moya.”

Muzwale Oliver yasimuluha kwa United States, ya mwa lilimo za kwa mafelelezo a ma 30, utalusa libaka haikutwa kuli kuyo sebeleza kwa libaka lisili ki nto yende, uli: “Niikozi limbuyoti zeñata kabakala kusebeleza Jehova mwa sibaka sisili. Kututa kunitusize kusepa hahulu Jehova kuli uka nitusa mwa miinelo ifi kamba ifi yenikopana ni yona. Kusebeza hamoho ni mizwale bane nisazibani ni bona, kono ili babalapela Mulimu yaswana yenilapela, kunitusize kulemuha kuli ki Mubuso wa Mulimu feela okona kuswalisanisa batu cwalo.” Kacenu, bo Oliver ni bo musalaa bona bo Anna, bazwelapili kusebeza ka tukufalelo mwa sibaka mokubulelwa puo ya Sichaina.

Bo Kaizeli Trazel, babasimuluha kwa Australia, ili baba mwa lilimo za kwa makalelo a ma 50, basebelize sina mapaina mwa Myanmar kuzwa ka silimo sa 2004. Batalusa kuli: “Nisusueza bahasanyi babañwi kuli bayo sebeleza kwa libaka kokutokwahala hahulu bakutazi ba Mubuso, haiba miinelo yabona ibakonisa kueza cwalo. Niitutile kuli haiba mutu unani takazo ya kutusa babañwi, Jehova ukafuyaula buikatazo bwahae. Nenisika libelela kuli nenika ikola bupilo cwana. Kaniti luli, nipila bupilo bobunde hahulu, bobutabisa.”

Haike litaba zebabulezi bahasanyi babatutezi kwa libaka za kwa Myanmar kokutokwahala hahulu bakutazi ba Mubuso, limisusueze kutusa batu ba lipilu zende, babafumaneha mwa libaka zesakutalezwangwi hahulu. Kaniti, bahasanyi bao basweli babiza, bali: “Hamusilele mwa Myanmar muto lutusa!”