1. Ki lika mañi zanaapolofitile Jehova kuli nelika ezahala mwa mazazi aluna?

 JEHOVA naapolofitile cwana ka za mazazi aluna: “Baana baalishumi babazwa mwa lipuo kaufela za macaba bakaswalelela, ki cwalo, bakaswalelela kwa siapalo sa Mujuda, inze bali: ‘Lubata kuya ni mina, kakuli luutwile kuli Mulimu uinzi ni mina.’” (Zak. 8:23) “Mujuda” yabulezwi mwa liñolo le, uyemela batu baatozize Mulimu ka moya okenile. Hape batu bao babizwa “Isilaele wa Mulimu.” (Magal. 6:16) “Baana baalishumi” bayemela batu babanani sepo ya kupila fa lifasi kuya kuile. Batu bao baziba kuli Jehova ufuyauzi sikwata sa batu babatozizwe mi baikutwa kuli ki tohonolo kulapela Mulimu ka kuswalisana ni babatozizwe.

2. “Baana baalishumi” bakona “kuya” cwañi ni Bakreste babatozizwe?

² Nihaikaba kuli hakukonahali kuziba mabizo kaufela a Bakreste babatozizwe babasa pila fa lifasi kacenu, b babanani sepo ya kupila fa lifasi bakona “kuya” ni babatozizwe. Ka mukwa ufi? Bibele ibulela kuli “baana baalishumi nebaka ‘swalelela kwa siapalo sa Mujuda, inze bali: “Lubata kuya ni mina, kakuli luutwile kuli Mulimu uinzi ni mina.”’ Timana yeo ya mwa Bibele ibulela za Mujuda alimuñwi. Kono timana yeo haibulela kuli “mina” iama kwa batu babañata. Taba yeo italusa kuli Mujuda haki mutu alimuñwi kono uyemela sikwata kaufela sa Bakreste babatozizwe. Ba lingu zeñwi basebeleza Jehova ka  kuswalisana ni sikwata seo. Nihakulicwalo, habaangi Bakreste babatozizwe kuli ki baeteleli babona kakuli baziba kuli Jesu ki yena Mueteleli wabona.—Mat. 23:10.

3. Ki lipuzo mañi zeluka nyakisisa mwa taba ye?

³ Bakeñisa kuli kacenu kusanani Bakreste babatozizwe fa lifasi, babañwi bakona kubuza kuli: (1) Bakreste babatozizwe baswanela kuikutwa cwañi? (2) Luswanela kuunga cwañi mizwale ni likaizeli babacanga sinkwa ni kunwa waine fa Kupuzo? (3) Kana luswanela kubilaela haiba palo ya batu babaca sinkwa ni kunwa waine fa Kupuzo izwelapili kuekezeha? Lipuzo zeo likaalabiwa mwa taba ye.

4. Ki temuso mañi yefumaneha kwa 1 Makorinte 11:27-29 yebaswanela kunahanisisa hahulu Bakreste babatozizwe, mi ki kabakalañi?

⁴ Bakreste babatozizwe baswanela kunahanisisa hahulu temuso ye kwa 1 Makorinte 11:27-29. (Mubale.) Mukreste yatozizwe ukona kuca sinkwa ni kunwa waine kwa Kupuzo “asaswaneli” ka mukwa ufi? Ukona kueza cwalo, haiba aca sinkwa ni kunwa waine kono inze asalateleli likuka za Jehova zelukile. (Maheb. 6:4-6; 10:26-29) Bakreste babatozizwe baziba kuli baswanela kuzwelapili kusepahala haiba babata kuamuhela “mupuzo  wa pizo ya kwa lihalimu yezwa ku Mulimu ka Kreste Jesu.”—Mafil. 3:13-16.

5. Bakreste babatozizwe baswanela kuikutwa cwañi?

⁵ Moya wa Jehova okenile utusa batanga bahae kuba ni buikokobezo, kufita kuikuhumusa. (Maef. 4:1-3; Makolo. 3:12) Kacwalo, Bakreste babatozizwe habaikutwangi kuli ki ba butokwa hahulu kufita babañwi. Baziba kuli Jehova hafangi Bakreste babatozizwe moya okenile omuñata kufita mwafelanga batanga bahae babañwi. Habaikutwi kuli bautwisisa hande niti ya mwa Bibele kufita mutu ufi kamba ufi. Mi habana kubulelela mutu yomuñwi kuli utozizwe ni kuli uswanela kukalisa kuca sinkwa ni kunwa waine fa Kupuzo. Kono baikokobeza mi baziba kuli ki Jehova feela yakona kumema batu kuli baye kwa lihalimu.

6. Ka kuya ka liñolo la 1 Makorinte 4:7, 8, ki lika mañi zebasa swaneli kueza Bakreste babatozizwe?

⁶ Nihaike kuli Bakreste babatozizwe baikutwa kuli ki tohonolo kumemiwa kuya kwa lihalimu, habatokwi kuli batu babañwi babaange kuba ba butokwa hahulu. (Mafil. 2:2, 3) Hape baziba kuli Jehova hanaa batozize, naasika zibisa batu kaufela ka za teñi. Kacwalo, Mukreste yatozizwe hakomokangi haiba batu babañwi bapalelwa kulumela kapili kuli utozizwe. Waziba kuli Bibele ilubulelela kuli haluswaneli kulumela kapili haiba mutu yomuñwi abulela kuli Mulimu umufile buikalabelo bobuipitezi. (Sin. 2:2) Bakeñisa kuli mutu yatozizwe habati kuli batu babañwi bamuise hahulu mamelelo, haana kubulelela batu bakopana ni bona lwapili kuli utozizwe. Mi haana kuitumbaeta ka za teñi ku babañwi.—Mubale 1 Makorinte 4:7, 8.

7. Bakreste babatozizwe baswanela kuambuka kuezañi, mi ki kabakalañi?

⁷ Bakreste babatozizwe habaswaneli kuikutwa kuli baswanela kutandanga feela nako ni Bakreste babañwi babatozizwe, mane inge kuli ba mwa sikwata sa batu babaeza nto yeñwi. Hababatangi Bakreste babañwi babatozizwe kuli baikambote ka za kuba mutoziwa kamba kuli bakopane ni kuituta Bibele hamoho kwa mukunda. (Magal. 1:15-17) Hane bakaeza cwalo, nebaka tahisa kuli puteho isike yaswalisana. Mi nebaka lwanisa moya okenile otusa batu ba Mulimu kuba ni kozo ni swalisano.—Maro. 16:17, 18.

8. Ki kabakalañi hamuswanela kutokomela momuungela batu babaca sinkwa ni kunwa waine fa Kupuzo? (Mubone ni litaluso ze kwatasi.)

⁸ Luswanela kuunga cwañi mizwale ni likaizeli babatozizwe? Kufosahalile kuikumbuta hahulu mutu yomuñwi, nihaikaba kuli ki  yomuñwi wa banyani ba Kreste babatozizwe. (Mat. 23:8-12) Bibele haibulela ka za baana-bahulu, ilususueza kuli ‘lulikanyise tumelo yabona,’ kono haibuleli kuli luswanela kuunga mutu ufi kamba ufi kuba mueteleli waluna. (Maheb. 13:7) Ki niti kuli Bibele ibulela kuli babañwi “balukela kufiwa likute lelituna.” Kueza cwalo kwaswanela isiñi kabakala kuli batozizwe, kono kabakala kuli ‘bazamaisa ka mukwa omunde’ mi ‘basebeza ka taata mwakubulela ni kuluta.’ (1 Tim. 5:17) Haiba lufa hahulu tumbo ni mamelelo kwa Bakreste babatozizwe, lwakona kubautwisa maswabi. c Mane nto yemaswe nikufita kikuli lukatahisa kuli baikuhumuse. (Maro. 12:3) Hakuna mutu ni yomukana ku luna yabata kueza nto yekona kutahisa kuli yomuñwi wa banyani ba Kreste babatozizwe aeze mafosisa amatuna ao!—Luka 17:2.

9. Lukona kubonisa cwañi kuli lwakuteka Bakreste babatozizwe?

⁹ Lukona kubonisa cwañi kuli lwakuteka Bakreste babatozizwe ki Jehova? Haluna kubabuza mone kutezi kuli batoziwe. Taba yeo ki ya ka butu, mi haluna tukelo ya kuiziba. (1 Mates. 4:11; 2 Mates. 3:11) Mi haluswaneli kunahana kuli bakubona, bashemi babona, kamba batu babañwi ba mwa lubasi lwabona ni bona batozizwe. Mutu hakoni kuyola sepo ya kuya kwa lihalimu kuzwelela mwa lubasi lwahae. Mulimu ki yena yafa batu sepo yeo. (1 Mates. 2:12) Hape haluswaneli kubuzanga lipuzo zekona kuutwisa babañwi butuku. Ka mutala, haluna kubuza musalaa muzwale yatozizwe mwaikutwela ka za kupila kuya kuile fa lifasi kusina muunaa hae. Kakuli lunani sepo yetiile ya kuli mwa lifasi lelinca Jehova uka ‘kulisa takazo ya zepila kaufela.’—Samu 145:16.

10. Lukaisileleza cwañi haiba ‘lusaikumbuti batu babañwi’?

¹⁰ Haiba lusaangi kuli Bakreste babatozizwe ki ba butokwa hahulu kufita babañwi, lukaisileleza ni luna. Ka mukwa ufi? Bibele ilubulelela kuli Bakreste babañwi babatozizwe mwendi bakona kupalelwa kuzwelapili kusepahala. (Mat. 25:10-12; 2 Pit. 2:20, 21) Kono haiba ‘lusaikumbuti batu babañwi,’ haluna kulatelela zebaeza, nihaikaba kuli batozizwe kamba kuli bazibahala hahulu kamba kuli basebelelize Jehova ka nako yetelele. (Juda 16, litaluso ze kwatasi) Mi haiba bapalelwa kuzwelapili kusepahala, kamba haiba bafulalela puteho, haluna kutuhela kuba ni tumelo ku Jehova kamba kutuhela kumusebeleza.

11. Ki lika mañi zeezahezi kwa palo ya batu babaca sinkwa ni kunwa waine fa Kupuzo?

¹¹ Ka lilimo zeñata, palo ya batu bane baca sinkwa ni kunwa waine fa Kupuzo neizwelapili kukutela mwatasi. Kono mazazi a, palo yeo isweli yaekezeha silimo ni silimo. Kana lwaswanela kubilaezwa ki taba yeo? Batili. Haluboneñi libaka.

12. Ki kabakalañi halusa swaneli kubilaezwa ki palo ya batu babaca sinkwa ni kunwa waine fa Kupuzo?

¹² “Jehova waziba babali bahae.” (2 Tim. 2:19) Ka kushutana ni Jehova, mizwale bababalanga palo ya batu babaca sinkwa ni kunwa waine fa Kupuzo habazibi luli babatozizwe. Kacwalo, mwa palo yeo kunani batu babanahana kuli batozizwe kono inze basika toziwa. Ka mutala, batu babañwi bane bacanga sinkwa ni kunwa waine nebatuhezi hasamulaho. Babañwi bakana baba ni butata bwa mwa munahano mi balumela kuli bakabusa ni Kreste kwa lihalimu. Kaniti, haluzibi luli kuli ki babakai batu babatozizwe babasali fa lifasi.

13. Kana Bibele yabonisa palo ya Bakreste babatozizwe babakaba teñi fa lifasi ñalelwa yetuna haika kalisa?

 ¹³ Kukaba ni batu babatozizwe mwa libaka zeñata za lifasi Jesu haakataha kuto baangela kwa lihalimu. (Mat. 24:31) Bibele ibonisa kuli mwa mazazi a mafelelezo, kukaba ni palonyana ya batu babatozizwe babasali fa lifasi. (Sin. 12:17) Kono haibuleli kuli ki babakai babakaba teñi fa lifasi ñalelwa yetuna haika kalisa.

14. Ka kuya ka liñolo la Maroma 9:11, 16, luswanela kuutwisisañi ka za babatozizwe?

¹⁴ Jehova ki yena yaziba nako yakaketa batoziwa. (Maro. 8:28-30) Jehova naakalile kuketa Bakreste babatozizwe hamulaho wa zuho ya Jesu. Kubonahala kuli mwa linako za baapositola, Bakreste ba niti kaufela nebatozizwe. Hamulaho wa lilimo zeñata kuzwa fo, buñata bwa batu bane babulela kuli neli Bakreste nebasika latelela Kreste. Nihakulicwalo, mwahalaa lilimo zeo, Jehova naatozize batu basikai bane bali Bakreste ba niti. Bakreste bao nebaswana sina buloto bwanaatalusize Jesu kuli nebuka hulelela hamoho ni mufuka. (Mat. 13:24-30) Mwa mazazi a mafelelezo a, Jehova uzwezipili kuketa batu babakaba kalulo ya ba 144,000. d Kacwalo, haiba Mulimu aketa batu bao pili mafelelezo asika taha kale, kaniti haluswaneli kukakanya ka za haiba ueza nto yelukile. (Mubale Maroma 9:11, 16.) e Luswanela kutokomela kuli haluezi sina mone baezelize babeleki banaatalusize Jesu mwa swanisezo yahae. Nebabilaezi ka mo mubelekisi wabona naaezelize babeleki  bane bakalile kubeleka mwa hora ya mafelelezo.—Mat. 20:8-15.

15. Kana ki Bakreste babatozizwe kaufela babali kalulo ya “mutanga yasepahala yanani kutwisiso,” yabulezwi kwa Mateu 24:45-47? Mutaluse.

¹⁵ Haki batu kaufela babanani sepo ya kuyo pila kwa lihalimu babali kalulo ya “mutanga yasepahala yanani kutwisiso.” (Mubale Mateu 24:45-47.) Sina feela mone kubezi mwa linako za baapositola, Jehova ni Jesu kacenu baitusisa mizwale basikai kwa kufepa kamba kuluta batu babañata. Mwa linako za baapositola, ki Bakreste babatozizwe basikai feela bane baitusisizwe kwa kuñola Mañolo A Sigerike A Sikreste. Kacenu, ki Bakreste babatozizwe basikai feela babanani buikalabelo bwa kufa batu ba Mulimu “lico zabona ka nako yeswanela.”

16. Ki lika mañi zemuitutile mwa taba ye?

¹⁶ Ki lika mañi zeluitutile mwa taba ye? Jehova uatuzi kuli ukafa bupilo bobusa feli kwa batu babañata babaka pila fa lifasi, ni kufa bupilo bwa kwa lihalimu kwa batu basikai babaka busa ni Jesu. Jehova ufa mupuzo kwa batanga bahae kaufela, ili “Mujuda” ni “baana baalishumi,” mi utokwa kuli balatelele milao yeswana ni kuli bazwelepili kusepahala. Kaufelaa bona baswanela kuba ni buikokobezo. Kaufelaa bona baswanela kusebeleza Mulimu hamoho mi baswanela kuswalisana. Mi kaufelaa bona baswanela kubukeleza kozo mwa puteho. Mafelelezo hanzaa atumela, haike kaufelaa luna luzwelepili kusebeleza Jehova ni kulatelela Kreste sina “mutapi ulimuñwi.”—Joa. 10:16.