1. Ki lika mañi zanaatokwa kueza mutu kuli aambole ni mulena wa Peresia?

 MUUNGE kuli mupila mwa naha ya Peresia, lilimo zebato ba 2,500 kwamulaho. Mubata kuambola ni mulena ka za taba yeñwi; kacwalo, mutama musipili kuya kwa muleneñi wa Shushani, kwapila mulena. Kono musika ambola kale ni mulena, mutokwa pili kufiwa tumelezo ki yena. Hamusa ezi cwalo, mwakona kubulaiwa!—Est. 4:11.

2. Jehova ubata kuli luikutwe cwañi haluambola ni yena?

² Luitumela hahulu kuli Jehova haswani ni mulena yani wa kwa Peresia. Nihaike kuli Jehova unani maata amatuna hahulu kufita mubusi ufi kamba ufi fa lifasi, lwakona kuambola ni yena ka nako ifi kamba ifi. Ubata kuli lulukuluhe kumuatumela. Ka mutala, nihaike kuli Jehova unani malumbatina abizwa ka ona acwale ka Mubupi Yomutuna, Yamaata Kaufela, Mulena Yapahami ka Kufitisisa, ulumema kuli lumubize kuli ‘Ndate.’ (Mat. 6:9) Kwatabisa luli kuziba kuli Jehova ubata kuli luikutwe kuba bukaufi hahulu ni yena!

3. Ki kabakalañi haluswanela kubiza Jehova kuli ‘Ndate,’ mi lukanyakisisañi mwa taba ye?

³ Kwaswanela kubiza Jehova kuli ‘Ndate’ kakuli ki yena yalufile bupilo. (Samu 36:9) Bakeñisa kuli ki Ndataa luna, luswanela kumuutwa. Haiba lueza zalubulelela, lukaikola limbuyoti zeñata. (Maheb. 12:9) Limbuyoti zeo likopanyeleza kuba ni bupilo bobusa feli, ibe kwa lihalimu kamba fa lifasi. Hape haiba lumuutwa, lukaikola limbuyoti nihaiba ka nako ya cwale. Mwa taba ye, lukanyakisisa bupaki bobubonisa kuli Jehova ki Ndataa luna yalilato,  mi hape lukanyakisisa libaka halukona kukolwa kuli haana kuluyubeka nikamuta kwapili. Kono halukaleñi ka kunyakisisa libaka halukona kukolwa kuli Ndataa luna wa kwa lihalimu walulata luli mi waluisa pilu.

4. Ki kabakalañi batu babañwi haku babelanga taata kuunga Jehova sina Ndataa bona?

⁴ Kana kumibelanga taata kuunga Mulimu kuli ki Ndataa mina? Babañwi bakona kuikutwa kuli Jehova ki yomutuna hahulu mi haakoni kuluunga kuli lu ba butokwa. Bakakanyanga kuli Mulimu Yamaata Kaufela wabaisa pilu ka butu. Kono Ndataa luna yalilato haabati kuli luikutwe cwalo. Ulufile bupilo mi ubata kuli lube balikani bahae. Muapositola Paulusi naatusize bateelezi bahae ba mwa Atene kuziba taba yeo, mi hasamulaho, abataluseza kuli Jehova “haayo kwahule ni mañi ni mañi waluna.” (Lik. 17:24-29) Mulimu ubata kuli mañi ni mañi waluna aambolange ni yena sina feela mwanana mwalukuluhelanga kuambola ni mushemi wahae yalilato ni yamuisa pilu.

5. Luitutañi kwa mutala wa kaizeli yomuñwi?

⁵ Babañwi kukona kubabela taata kuunga Jehova kuli ki Ndataa bona bakeñisa kuli bo ndataa bona baba bapepa nebasika babonisa lilato mi nebasika babonisa sishemo. Mulemuhe zanaabulezi kaizeli yomuñwi. Naaize: “Bo ndate nebaitusisanga manzwi amaswe hane baambolanga ni na. Hanikalisa kuituta Bibele lwapili, neku nibezi taata kuikutwa kuli nakona kuba bukaufi ni Ndate wa kwa lihalimu. Kono hase nizibile Jehova, mubonelo waka wacinca.” Kana ni mina munani maikuto aswana ni anaanani ona kaizeli yo? Haiba ki cwalo, mwakona kuba ni buikolwiso bwa kuli hamulaho wa nako, ni mina mukalemuha kuli Jehova ki yena Ndate yomunde ka kufitisisa.

6. Ka kuya ka liñolo la Mateu 11:27, ki ifi nzila yeñwi yaitusisize Jehova kuli alutuse kuziba kuli ki Ndate yalilato?

⁶ Nzila yeñwi yaitusisize Jehova kuli alutuse kuziba kuli ki Ndate yalilato ki ka kulukisa kuli litaba zanaabulezi Jesu ni zanaaezize liñolwe mwa Bibele. (Mubale Mateu 11:27.) Jesu naalikanyisize tulemeno twa Ndatahe ka kutala kuli mane naakona kubulela kuli: “Mutu kaufela yaniboni uboni ni Ndate.” (Joa. 14:9) Hañata Jesu naatalusanga kuli Jehova ki Ndate. Mwa libuka feela zeene za Evangeli, Jesu uitusisize libizo la ‘Ndate’ kuama ku Jehova ibato ba ha 165. Ki kabakalañi Jesu hanaabulezi za kuli Jehova ki Ndate hañata-ñata cwalo? Libaka leliñwi kikuli, naabata kutusa batu kuba ni buikolwiso bwa kuli Jehova ki Ndate yalilato.—Joa. 17:25, 26.

7. Luitutañi ka za Jehova ka mwanaasebelisanezi ni Mwanaa hae?

⁷ Halunyakisiseñi zelukona kuituta ka za Jehova ka mwanaasebelisanezi ni Mwanaa hae, yena Jesu. Jehova kamita naautwanga litapelo za Jesu. Mi mane naasautwangi feela litapelo zahae, kono hape naalialabanga. (Joa. 11:41, 42) Kusina taba kuli Jesu naakopani ni miinelo yetaata, naaziba kuli Ndatahe naamulata mi naamutusanga.—Luka 22:42, 43.

8. Jehova naatusize cwañi Jesu?

⁸ Jesu naabonisize kuli Ndatahe ki yena yanaa mufile bupilo mi ki yena yanaa mutusa, ka kubulela kuli: “Nipila kabakala Ndate.” (Joa. 6:57) Jesu naasepile Ndatahe ka kutala, mi Jehova naamutusize kufumana lika zanaatokwa kwa mubili. Sa butokwa nikufita kikuli, Jehova naatusize Jesu kuzwelapili kusepahala ku yena.—Mat. 4:4.

9. Jehova naabonisize cwañi Jesu kuli naali Ndate yalilato mi naamuisa pilu?

⁹ Ka kuba Ndate yalilato, Jehova naatusize Jesu kuziba kuli Ndatahe naamutusa. (Mat. 26:53; Joa. 8:16) Nihaike kuli Jehova  naasika sileleza Jesu kwa lika kaufela zenekona kumuholofaza, naamutusize kutiyela miliko yanaakopani ni yona. Jesu naaziba kuli niha naakanyandiswa, manyando ao naakaba a ka nakonyana feela. (Maheb. 12:2) Jehova naabonisize kuli naalata Jesu ka kuteeleza ku yena, ka kumutusa kufumana lika zanaatokwa, ka kumuluta, ni ka kumufa tuso yanaatokwa. (Joa. 5:20; 8:28) Cwale halunyakisiseñi mwaboniseza Ndataa luna wa kwa lihalimu kuli waluisa pilu.

10. Ka kuya ka Samu 66:19, 20, Jehova ubonisa cwañi kuli walulata?

¹⁰ Jehova wateelezanga kwa litapelo zaluna. (Mubale Samu 66:19, 20.) Haabati kuli lulapelange ku yena ka linako; kono ulususueza kulapelanga ku yena ka nako kaufela. (1 Mates. 5:17) Lwakona kulapela ku Mulimu ka nako ifi kamba ifi, kusina taba ni koluinzi. Haki yapatehile hahulu kuli apalelwe kuluutwa; uitukiselize kuutwa litapelo zaluna ka nako kaufela. Haiba lulemuha kuli Jehova watabela kuutwa litapelo zaluna, luka mulata hahulu. Muñoli yomuñwi wa samu naabulezi kuli: “Nalata Jehova kakuli wautwa linzwi laka.”—Samu 116:1.

11. Jehova uezanga cwañi halulapela ku yena?

¹¹ Ndataa luna hateelezangi feela kwa litapelo zaluna, kono hape walialabanga. Muapositola Joani naañozi kuli: “Halukupa nto ifi kamba ifi ka kuya ka tato [ya Mulimu], waluutwa.” (1 Joa. 5:14, 15) Nihakulicwalo, Jehova ukona kualaba litapelo zaluna ka nzila yelusika libelela. Waziba hande lika zekona kulutusa; kacwalo fokuñwi haalabangi litapelo zaluna mi fokuñwi ubatanga kuli lulibelele.—2 Makor. 12:7-9.

12-13. Ndataa luna wa kwa lihalimu ulutusanga cwañi kufumana lika zelutokwa?

¹² Jehova walubabalela. Uezanga lika zabata kuli bo ndate bana kaufela baeze. (1 Tim. 5:8) Ufanga bana bahae lika za kwa mubili zebatokwa. Haabati kuli lubilaele ka za lico, liapalo, kamba maino. (Mat. 6:32, 33; 7:11) Ka kuba Ndate yalilato, Jehova mane ulukisize kuli kwapili luto fumana lika kaufela zelutokwa.

¹³ Sa butokwa nikufita kikuli, Jehova ulutusa kufumana lico za kwa moya zelutokwa. Uitusisa Linzwi lahae kulutusa kuziba niti ka za hae, milelo yahae, mulelo wa bupilo, ni lika zekaezahala kwapili. Naabonisize kuli waluisa pilu ka butu hanaaitusisize bashemi baluna kamba mutu yomuñwi kulutusa kuituta niti ka za hae. Mi uzwelapili kulutusa kuba balikani bahae ka kuitusisa baana-bahulu ba puteho ni mizwale ni likaizeli babahulile kwa moya. Hape Jehova ululuta ka kuitusisa mikopano ya puteho, ili ko luituta hamoho ni lubasi lwaluna lwa kwa moya. Ka kuitusisa linzila zeo ni zeñwi, Jehova ubonisa kuli waluisa pilu ka kuba Ndataa luna.—Samu 32:8.

14. Ki kabakalañi Jehova haalulutanga, mi uezanga cwañi cwalo?

¹⁴ Jehova waluluta. Ka kushutana ni Jesu, luna halusika petahala. Kacwalo, Ndataa luna yalilato ulufanga kalimelo hakutokwahala kakuli ki nzila yeñwi yaluluta ka yona. Linzwi lahae lilutaluseza kuli: “Jehova ukalimela balata.” (Maheb. 12:6, 7) Jehova ulukalimelanga mwa linzila zeñata. Ka mutala, Jehova ukona kulukalimela halubala taba yeñwi mwa Bibele kamba haluli kwa mikopano. Kamba mwendi ukona kulufa kalimelo yelutokwa ka kuitusisa baana-bahulu. Kusina taba ni nzila yaitusisa Jehova kuli alukalimele, kamita uezanga cwalo kakuli walulata.—Jer. 30:11.

15. Jehova ulutusanga cwañi?

¹⁵ Jehova walutusanga halutahelwa ki miliko. Sina feela ndate hakona kutusa mwanaa hae hakopana ni miinelo yetaata, Ndataa luna wa kwa lihalimu walutusanga halutahelwa ki  miliko. Uitusisanga moya wahae okenile kulusileleza kwa lika zekona kusinya silikani saluna ni yena. (Luka 11:13) Jehova hape walutusanga haluzwafile. Ka mutala, ulufile sepo yende ka za lika zekaezahala kwapili. Sepo yeo ilutusa kuitiisa halukopana ni miinelo yetaata. Munahanisise taba ye: Kusina taba ni lika zemaswe zelutalimana ni zona, Ndataa luna yalilato ukafelisa lika kaufela zeelutahiseza manyando. Miinelo yetaata yelukopana ni yona cwale ki ya nakonyana feela, kono limbuyoti zalufa Jehova liina kuya kuile.—2 Makor. 4:16-18.

16. Ki nto mañi yeneezahezi Adama hanaasika utwa Ndatahe yalilato?

¹⁶ Lwaiponela hande kuli Jehova walulata halunahanisisa zanaaezize, Adama hanaasika muutwa. Adama hanaalobile mulao wa Ndatahe ya kwa lihalimu, naatahisize kuli yena ni bana bahae balatehelwe ki tohonolo ya kuba mwa lubasi lwa Jehova lolutabile. (Maro. 5:12; 7:14) Niteñi, Jehova naaezize nto yeñwi kuli atuse bana ba Adama.

17. Adama hasakwenuhile, ki nto mañi yanaaezize Jehova honafo feela?

¹⁷ Jehova naafile Adama koto, kono asepisa kuli naakatusa bana bahae bane basika pepwa kale. Honafo feela, asepisa kuli batu bane baka muutwa nebaka kutela kuba mwa lubasi lwahae. (Gen. 3:15; Maro. 8:20, 21) Kuli ataleleze mulelo wahae, Jehova naalukisize kuli kube ni sitabelo sa tiululo sa Mwanaa hae yalatwa, yena Jesu. Jehova naabonisize kuli ululata hahulu ka kufa Mwanaa hae kuli alushwele.—Joa. 3:16.

18. Ki kabakalañi halukona kukolwa kuli Jehova ubata kuli lube bana bahae nihaike kuli nelukeluhile ku yena?

¹⁸ Nihaike kuli halusika petahala, Jehova ubata kuli lube mwa lubasi lwahae, mi hakatalangi kulutusa. Fokuñwi lwakona kueza lika zesa mutabisi kamba kukeluha ku yena ka nakonyana, kono kamita ubatanga kuli  lukutele ku yena. Jesu naaitusisize swanisezo ya mwana yalatehile kuli abonise butuna bwa lilato lanani lona Jehova kwa bana bahae. (Luka 15:11-32) Ndate wa mwa swanisezo yeo naasika tuhela kuba ni sepo ya kuli mwanaa hae naakakutela ku yena. Mwanaa hae hanaakutile kwandu, ndatahe amuamuhela ka tabo. Haiba nelukeluhile ku Jehova kono lubakile, lwakona kukolwa kuli Ndataa luna yalilato uitukiselize kuluamuhela ka tabo.

19. Jehova ukafelisa cwañi lika kaufela zemaswe zetahisizwe ki Adama?

¹⁹ Ndataa luna ukafelisa lika kaufela zemaswe zetahisizwe ki Adama. Adama hasaa mukwenuhezi, Jehova alukisa kuli naakaañula batu ba 144,000 fa lifasi, ili babakayo busa kwa lihalimu ni Mwanaa hae sina malena ni baprisita. Jesu ni bakabusa ni bona bakatusa batu babaipeya kuutwa Mulimu kuli babe babapetahalile mwa lifasi lelinca. Haiba batula tiko ya mafelelezo, Mulimu uka bafa bupilo bobusa feli. Ndataa luna ukataba hahulu kubona lifasi lelitezi bana bahae babashimani ni babasizana babapetahalile. Kaniti, yeo ikaba nako yetabisa luli!

20. Jehova ubonisize cwañi kuli ululata hahulu, mi lukanyakisisañi mwa taba yetatama?

²⁰ Jehova ubonisize kuli ululata hahulu. Ki yena Ndate yomunde ka kufitisisa. Wautwanga litapelo zaluna mi walufanga lika za kwa mubili ni za kwa moya zelutokwa. Walulutanga ni kulutusa. Mi hape uka luezeza lika zende kwapili. Kwatabisa luli kuziba kuli Ndataa luna walulata mi waluisa pilu! Mwa taba yetatama, lukanyakisisa molukona kuboniseza kuli lwaitebuha lilato lahae, ka kuba bana bahae.