1. Lukona kusebeza cwañi hamoho ni Jehova?

MUBUPI waluna naabata kuli batu babapetahalile baswalisane hamoho ni yena kupeta milelo yahae. Nihaike kuli halusika petahala, batu babasepahala basakona kusebeza hamoho ni Jehova zazi ni zazi. Ka mutala, “lusebeza hamoho ni Mulimu” halukutaza taba yende ya Mubuso ni kuluta batu kuba balutiwa. (1 Makor. 3:5-9) Lunani tohonolo yetuna kuketiwa ki Mubupi yamaata wa pupo kaufela kuli lueze musebezi waanga kuba wa butokwa! Kono kusebeza hamoho ni Jehova hakuami feela kueza musebezi wa kukutaza ni kuluta batu kuba balutiwa. Mwa taba ye, lukanyakisisa molukona kusebeleza hamoho ni Jehova, ili ka kutusa mabasi aluna ni Bakreste babañwi, ka kuba ni moya wa kuamuhela baenyi, ka kuitatela kueza misebezi ya Mubuso, ni ka kupeta zeñata mwa sebelezo yaluna ku Mulimu.—Makolo. 3:23.

2. Ki kabakalañi hakusa swaneli kubapanya zemueza mwa sebelezo yamina ku Jehova ni zebaeza babañwi?

² Halunze lunyakisisa taba ye, musike mwabapanya zemukona kueza mwa sebelezo yamina ku Jehova ni zebakona kueza babañwi. Muhupule kuli batu bashutana-shutana kulikana ni fobakuma, buikangulo bwabona, miinelo yebali ku yona, ni buikoneli bwabona.  Muapositola Paulusi naañozi ka kususumezwa ki moya wa Mulimu kuli: “Mutu ni mutu atatube likezo zahae, mi cwale ukaba ni libaka la kunyakalala ka lona anosi, mi isiñi ka kuibapanya ku yomuñwi.”—Magal. 6:4.

3. Ki kabakalañi halukona kubulela kuli mutu yababalela lubasi lwahae usebeza hamoho ni Mulimu?

³ Jehova ubata kuli batanga bahae bababalele mabasi abona. Ka mutala, mwendi mukatokwa kusebeza kuli mufumane masheleñi atokwahala kuli mubabalele lubasi lwamina. Bashemi babañata babasali bainanga kwa mandu kuli bababalele banana. Mi bana babañwi base bahulile batokwa kubabalela bashemi babona babakenezwi ki mapongo. Yeo ki misebezi yeluswanela kueza kaufelaa luna. Linzwi la Mulimu libulela kuli: “Haiba mutu hababaleli bahae, mi sihulu ba ndu yahae, yo ulatuzi tumelo mi ufitwa ki mutu yasina tumelo.” (1 Tim. 5:8) Haiba ki yona misebezi yemupeta yeo, mwendi hamuna nako yeñata ya kueza misebezi ya kwa moya ka mone mukatabelela. Kono musike mwazwafa! Jehova ukatabela haiba mutusa mabasi amina.—1 Makor. 10:31.

4. Bashemi bakona kubonisa cwañi kuli babeya za Mubuso mwa sibaka sapili, mi ki limbuyoti mañi zebakona kuba ni zona haiba baeza cwalo?

⁴ Bashemi babali Bakreste basebeza hamoho ni Jehova haiba batusa bana babona kuitomela likonkwani za kwa moya. Bashemi babaezize cwalo babile ni tabo kubona bana babona babashimani ni babasizana habakena mwa sebelezo ya nako kaufela kwa libaka za kwahule. Babañwi ku bona ki balumiwa, babañwi ki mapaina babasebeleza kwa libaka kokutokwahala hahulu bakutazi ba Mubuso, mi babañwi bona basebeleza fa Betele. Bakeñisa kuli bana babona bapila kwahule, mwendi habana kukona kubonananga ni bona ka mobalatela. Nihakulicwalo, bashemi babaifana basusueza bana babona kuzwelapili mwa musebezi wabona. Kabakalañi? Kabakala kuli babanga ni tabo yetuna kubona bana babona hababeya za Mubuso mwa sibaka sapili. (3 Joa. 4) Mwendi buñata bwa bashemi bao baikutwa sina Anna yanaabulezi kuli ‘naafile’ mwanaa hae Samuele ku Jehova. Bashemi bao baanga kuli kuswalisana ni Mulimu ka nzila yeo ki tohonolo yetuna. Baikutwa kuli yeo ki nzila yende yebakonisa kusebeza hamoho ni Mulimu.—1 Sam. 1:28.

5. Mukona kutusa cwañi batu bomukopana ni bona mwa puteho? (Mubone siswaniso sesi fa likepe 23.)

⁵ Haiba hamuna hahulu buikalabelo bwa kubabalela mabasi, kana mwakona kutusa Bakreste babañwi babababalela bakuli, basupali, ni babañwi babatokwa tuso? Mulemuhe babatokwa kutusiwa mwa puteho yamina. Mwendi mwakona kutanda nako ni mushemi wa kaizeli yatusa kubabalela mushemi wahae yasupezi, ilikuli kaizeli yo abe ni nako ya kueza lika zeñwi. Kamba mwendi mwakona kutusa babañwi babatokwa kuiswa kwa mikopano ya puteho, kubaezeza misebezi yemiñwi, kubalekela zebatokwa, kamba kupotela babali mwa lipatela. Haiba mueza cwalo, mukaitusiswa ki Jehova kualaba litapelo zabona.—Mubale 1 Makorinte 10:24.

6. Lukona kubonisa cwañi moya wa kuamuhela baenyi?

⁶ Batu babasebeza hamoho ni Mulimu banani moya wa kuamuhela baenyi. Mwa Mañolo A Sigerike A Sikreste, pulelo ya “kuamuhela baenyi” italusa “kubonisa sishemo kwa batu basili.” (Maheb. 13:2; litaluso ze kwatasi) Linzwi la Mulimu litalusa za batu bane babonisize lilato ka nzila yecwalo. (Gen. 18:1-5) Lwakona kutusa babañwi, ibe kuli ki “banabahabo luna mwa tumelo” kamba kutokwa, mi luswanela kuezanga cwalo ka nako kaufela.—Magal. 6:10.

7. Ki kabakalañi hamuswanela kuamuhela mizwale ni likaizeli babali mwa sebelezo ya nako kaufela babatilo pota?

 ⁷ Kana mwakona kusebeza hamoho ni Mulimu ka kuamuhela mizwale ni likaizeli babatilo pota, ili babali mwa sebelezo ya nako kaufela? (Mubale 3 Joani 5, 8.) Batu bao habato pota, lubanga ni kolo ya ‘kususuezana.’ (Maro. 1:11, 12) Munyakisise mutala wa muzwale yabizwa Olaf. Bo Olaf batalusa kuli lilimo-limo kwamulaho, nekusina batu mwa puteho yabona bane bakona kuamuhela muokameli wa mupotoloho yali likwasha mwa mandu abona. Bo Olaf bane bali mukulwani ka nako yeo, bakupa bashemi babona bane basi Lipaki kuli muokameli wa mupotoloho ato fitela kwa ndu yabona. Bashemi babona balumela, mi batalusa kuli bo Olaf nebaka tokwa kulobala mwa sipula. Bo Olaf nebaitumezi hahulu kuli nebaezize cwalo. Habahupula taba yeo, bali: “Sunda yeo, neli sunda yekatulusa luli! Zazi ni zazi kakusasana hane lukushukanga ni muokameli wa mupotoloho, neluambolanga litaba zeyahisa. Neniikutwile kususuezwa luli kuli mane nakalisa kunahana za kukena mwa sebelezo ya nako kaufela.” Mwa lilimo ze 40 zefelile, bo Olaf basebelize sina balumiwa mwa libaka zeshutana-shutana.

8. Ki kabakalañi haluswanela kubonisa babañwi sishemo niha basaitebuhi luna sapili? Mufe mutala.

⁸ Mukona kubonisa lilato kwa batu bomusa zibi ka linzila zeñata, niha basaitebuhi mina sapili. Munyakisise mutala wo. Muhasanyi yomuñwi kwa Spain naalemuhile kuli hanaanze aituta Bibele ni muituti wahae yabizwa Yesica, yasimuluha kwa Ecuador, muituti wahae yo naasweli kulila. Muhasanyi yo amubuza libaka hanaalila. Bo Yesica nebatalusize kuli basika tutela kale mwa sibaka seo, nebashebile hahulu kuli mane zazi leliñwi nebasina lico. Nebafile feela mwanaa bona mezi a kunwa. Bo Yesica balika kulobaza mwanaa bona hane banze balapela kukupa tuso. Hamulahonyana wa fo, kwataha likaizeli bababeli babali Lipaki za Jehova, kono bo Yesica babahalifela ni kupazaula limagazini zene babafile. Bo Yesika bababuza, bali: “Munahana kuli na ni mwanaka lwakona kuca limagazini ze nji?” Likaizeli balika kubaomba-omba, kono nekusika tusa sesiñwi. Hasamulaho, bato siya sizuma fa munyako wa ndu yabona mone kunani lico. Bo Yesica nebaitebuhile hahulu sishemo sene babonisizwe, mi nebaikutwile bumaswe hane bahupuzi kuli nebasika lemuha kuli Mulimu naaalabile tapelo yabona. Kono cwale, baikatulela kusebeleza Jehova. Kaniti, bufani bone babonisize likaizeli bao nebutahisize kuli babe ni limbuyoti zeñata!—Muek. 11:1, 6.

9, 10. (a) Ki litaba mañi zebulezwi mwa Bibele zebonisa linako fone kutokwahalela kuli batu ba Mulimu baitatele kueza misebezi yemiñwi? (b) Ki misebezi mañi yebaeza baana babaitatela kutusa mwa puteho kacenu?

⁹ Mwa linako za Maisilaele ba kwaikale, fokuñwi nekutokwahalanga baitateli. (Exo. 36:2; 1 Makol. 29:5; Neh. 11:2) Ni mina mwakona kufana nako yamina, maluwo amina, ni buikoneli bwamina kuli mutuse mizwale ni likaizeli bamina. Mi haiba muba ni bufani, mukaba ni tabo yetuna ni kufuyaulwa.

¹⁰ Linzwi la Mulimu lisusueza baana mwa liputeho kuli basebeze hamoho ni Jehova ka kueza ka taata kuli bafiwe buikalabelo. (1 Tim. 3:1, 8, 9; 1 Pit. 5:2, 3) Babaeza cwalo babata kutusa babañwi kwa mubili ni kwa moya. (Lik. 6:1-4) Kana baana-bahulu bamikupile kuli musebeze sina mubabaleli kamba kutusa kwa libuka, ku za kalulo ya simu, kukenisa ni kubabalela Ndu ya Mubuso, kamba kueza misebezi yemiñwi? Babaeza misebezi yeo baka mitaluseza kuli baikola hahulu kutusa babañwi.

11. Kaizeli yomuñwi utusizwe cwañi ki balikani babile ni bona hanaanzaa eza misebezi ya kuyaha?

¹¹ Hañata, mizwale ni likaizeli babaitatela kueza misebezi ya Mubuso babanga ni balikani babanca. Halunyakisiseñi mutala wa kaizeli  yabizwa Margie, yasatusize mwa musebezi wa kuyaha Mandu A Mubuso ka lilimo ze 18. Mwahalaa lilimo zeo, ubonisize lilato kwa likaizeli ba banana ni kubaluta misebezi. Uikutwa kuli kueza cwalo kumufile kolo ya kutiisa babañwi kwa moya. (Maro. 1:12) Bo Margie habakopananga ni miinelo yetaata mwa bupilo, batiiswangwa ki balikani bebabile ni bona mwa misebezi ya buyahi. Kana mukile mwaitatela kutusa mwa musebezi wa kuyaha? Ibe kuli mwaziba musebezi omuñwi kamba kutokwa, kana mwakona kuifana kuli mutuse mwa musebezi wo?

12. Mukona kutusa cwañi mizwale babatahezwi ki likozi?

¹² Hakuba ni likozi, batu ba Mulimu babanga ni kolo ya kusebeza hamoho ni Mulimu ka kutusa mizwale babona ka linzila zeshutana-shutana. Ka mutala, bafanga linubu za masheleñi kuli batuse babatahezwi ki likozi zeo. (Joa. 13:34, 35; Lik. 11:27-30) Hape lwakona kutusa ka kueza misebezi ya kukenisa ni kuyaha sinca miyaho yesinyehile. Kaizeli wa kwa Poland yabizwa Gabriela naaomba-ombilwe hahulu mizwale babazwa mwa liputeho zeneli bukaufi hane batile kuto yaha sinca ndu yahae yenesinyizwe ki muunda. Batalusa kuli: “Hanilati kuambola za lika zenisinyehezwi ki zona, kakuli zeo ki lika feela za kwa mubili. Kono nibata kumitaluseza za lika zenifumani. Muinelo oniipumani ku ona unitusize kulemuha kuli kuba mwa puteho ya Sikreste ki tohonolo yetuna mi kutahisa tabo yetuna luli.” Babañata babatusizwe hamulaho wa kutahelwa ki kozi batalusa kuli tumelo yabona itiisizwe. Mi babasebeza hamoho ni Jehova ka kutusa babañwi banani tabo yetuna.—Mubale Likezo 20:35; 2 Makorinte 9:6, 7.

13. Kuba ni moya wa kuitatela kukona kutiisa cwañi silikani saluna ni Jehova? Mufe mutala.

¹³ Bo Stephanie ni bahasanyi babañwi nebabile ni tabo ya kusebeza hamoho ni Mulimu ka kutusa Lipaki bane babalehile kuzwa mwa linaha zabona ni kututela kwa United States. Nebatusize mabasi anaabalehile mwa linaha zabona kabakala ndwa ka kubabatela mandu ni kubalukiseza ona. Bo Stephanie batalusa kuli: “Nelususuelizwe hahulu hane luboni tabo ni buitebuho bwabona kabakala kuboniswa lilato ki mizwale babona ba mwa lifasi kaufela. Mabasi ao aikutwa kuli lubatusize, kono mane ki bona  baba lutusize hahulu nikufita.” Bazwelapili kutalusa kuli: “Luiponezi mizwale hababonisa lilato, swalisano, tumelo, ni kusepa Jehova, mi lika zeo litiisize lilato laluna ku Jehova ni kutahisa kuli luitebuhe hahulu lika kaufela zeluamuhela mwa kopano yahae.”

14, 15. (a) Mupolofita Isaya naabonisize moya mañi? (b) Bakutazi ba Mubuso bakona kulikanyisa cwañi mutala wa Isaya kacenu?

¹⁴ Kana mwatabela kusebeza hamoho ni Jehova ka kutala? Kana mwatabela kumusebeleza ka kututela kwa libaka kokutokwahala hahulu babeleki mwa kopano yahae? Ki niti kuli batanga ba Mulimu habatokwi kututela kwahule kuli babonise bufani. Kono miinelo ya mizwale ni likaizeli babañwi yabakonisa kuyo sebeleza kwa libaka za kwahule. Babonisa moya oswana ni wanaabonisize mupolofita Isaya. Jehova hanaabuzize kuli: “Ki mañi yenika luma, mi ki mañi yakaya kuyo luyemela?” Isaya naaalabile kuli: “Ki na yo! Haku nilume!” (Isa. 6:8) Kana ni mina mwatabela kutusa mwa misebezi ya Mubuso, mi kana miinelo yamina yamikonisa kueza cwalo? Ki misebezi mañi yetokwa kuezwa?

¹⁵ Jesu naabulezi cwana ka za musebezi wa kukutaza ni wa kuluta batu kuba balutiwa, kuli: “Kutulo ki yetuna, kono babeleki ki babanyinyani. Ka mukwa ocwalo, mukupe Muñaa kutulo kuli alume babeleki mwa musebezi wahae wa kutulo.” (Mat. 9:37, 38) Kana mwakona kuyo sebeleza kwa sibaka kokutokwahala hahulu bakutazi ba Mubuso, mwendi ka kuba paina cwalo? Kamba kana mwakona kutusa muhasanyi yomuñwi kueza cwalo? Mizwale ni likaizeli babañata batalusa kuli kusebeza sina paina mwa libaka mokutokwahala hahulu bakutuli ki yona nzila yende hahulu yelukona kubonisa ka yona kuli lwalata Mulimu ni batu babañwi. Kana kunani linzila zeñwi zemukona kuekeza ka zona sebelezo yamina ku Mulimu? Mukaba ni tabo yetuna haiba mueza cwalo.

16, 17. Ki lika mañi zemukona kueza haiba mubata kupeta zeñata mwa sebelezo yamina ku Jehova?

¹⁶ Kana mwatabela kuyo sebeleza fa Betele kamba kutusa mwa musebezi wa kuyaha miyaho ya Mubuso, ibe ka kuba mubeleki wa swalelele, kamba kuyo tusanga mwa misebezi yeezwa fa Betele ka mazazi amañwi mwa sunda? Kutokwahala hahulu batu babaitukiselize kusebeleza Jehova kobalumiwa kaufela ni babaitukiselize kueza misebezi ifi kamba ifi yebafiwa. Ka linako zeñwi, batu bao bakona kukupiwa kuyo eza musebezi omuñwi otokwahala, nihaike kuli bona baziba musebezi usili. Nihakulicwalo, Jehova uitebuha moya wa buitomboli obabonisa batu babaitatela kuyo sebeleza kokunani butokwi.—Samu 110:3.

¹⁷ Kana mwatabela kulutiwa litaba zeñwi kuli mukone kupeta hande sebelezo yamina ku Mulimu? Haiba ki cwalo, mueze momukonela kaufela kuli mukwanise zetokwahala za kuli mukene Sikolo sa Bakutazi ba Mubuso. Sikolo seo silukiselizwe kuluta baana ni basali babatabela za kwa moya ili babali mwa sebelezo ya nako kaufela kuli bapete zeñata mwa sebelezo yabona ku Mulimu. Batu babaiñolisa kukena sikolo se batokwa kuitatela kuyo sebeleza kwa sibaka sifi kamba sifi hase bakwazize. Kana nemuka tabela kukena sikolo seo ilikuli mupete zeñata mwa sebelezo yamina?—1 Makor. 9:23.

18. Ki limbuyoti mañi zemuka fumana haiba musebeza hamoho ni Jehova zazi ni zazi?

¹⁸ Ka kuba batu ba Jehova, lutabela kuba ni bufani ni kuiyakatwa babañwi zazi ni zazi, kakuli bufani bubonisa kalemeno ka bunde, sishemo, ni lilato. Halueza cwalo, lubanga ni tabo, kozo, ni bupilo bobunde. (Magal. 5:22, 23) Kusina taba ni miinelo yemuli ku yona, mwakona kuba ni tabo ka kulikanyisa bufani bwa Jehova ni kuba ni tohonolo ya kusebeza hamoho ni yena!—Liprov. 3:9, 10.