1. Lika zebupilwe libonisa cwañi kuli Jehova unani bufani?

 NIHAIKE kuli Jehova naali anosi asika kalisa kale kubupa lika, naasanahanangi feela ka za hae. Kono afa mpo ya bupilo kwa libupiwa zebutali, ili mangeloi ni batu. Kaniti, Jehova, yena “Mulimu yatabile,” ulata kufana lika zende. (1 Tim. 1:11; Jak. 1:17) Mi bakeñisa kuli ubata kuli ni luna lube ni tabo, ululuta kuba ni bufani.—Maro. 1:20.

2, 3. (a) Ki kabakalañi halukona kuba ni tabo halufana? (b) Lukanyakisisañi mwa taba ye?

² Mulimu naabupile mutu ka siswaniso sahae. (Gen. 1:27) Fo kutalusa kuli naalubupile kuli lube ni buikoneli bwa kubonisa tulemeno twahae. Kacwalo, kuli lupile bupilo bwa tabo, lutokwa kulatelela mutala wa Jehova ka kubonisa kuli lwaiyakatwa babañwi ni kuba ni bufani. (Mafil. 2:3, 4; Jak. 1:5) Kabakalañi? Kabakala kuli Jehova naabupile batu ka nzila yeo. Nihaike kuli halusika petahala, lwakona kulikanyisa Jehova ka kuba ni bufani.

³ Bibele ilutaluseza molukona kubela ni bufani. Halunyakisiseñi lituto zelufumana mwa Mañolo ili zelutusa kuba ni bufani.  Halunze lunyakisisa lituto zeo, lukalemuha kuli Mulimu uka lushemuba haiba luba ni bufani mi lukapeta hande misebezi yalufile haiba luba ni kalemeno kao. Hape lukanyakisisa molukona kubela ni tabo halufana ni libaka haluswanela kuzwelapili kubonisa kalemeno kao.

4, 5. Jehova ni Jesu balutomezi mutala mañi wa kuba ni bufani?

⁴ Jehova ubata kuli luna batu lumulikanyise, mi kacwalo ubanga ni tabo haluba ni bufani. (Maef. 5:1) Mulimu ubata kuli batu babe ni tabo, mi lwaiponela hande taba yeo halunyakisisa molubupezwi ni lika zende zeñata zabupile. (Samu 104:24; 139:13-16) Kacwalo, lubonisa buitebuho ku yena haluikataza kutabisa babañwi.

⁵ Bakreste ba niti balikanyisa Kreste yanaa lutomezi mutala omunde hahulu wa kuba ni bufani. Jesu naabulezi kuli: “Mwanaa mutu [naasika] tela kuto sebelezwa, kono kuli asebeleze ni kufa bupilo bwahae sina tiululo kuli aliulule babañata.” (Mat. 20:28) Muapositola Paulusi ni yena naasusuelize Bakreste kuli: “Munahane sina mwanaanahanela Kreste Jesu . . . Naatobohile lika kaufela mi aba sina mutanga ni kuto ba mutu.” (Mafil. 2:5, 7) Yomuñwi ni yomuñwi waluna uswanela kuipuza kuli: ‘Kana nakona kulikanyisa hahulu mutala wa Jesu kufita moniezeza cwale?’—Mubale 1 Pitrosi 2:21.

6. Jesu naalutile tuto mañi mwa nguli ya Musamaria yasishemo? (Mubone siswaniso sesi fa likepe 18.)

⁶ Jehova uka lushemuba haiba lulikanyisa mutala wahae ni mutala wa Kreste ka kuiyakatwa babañwi ni kubatusa. Mane Jesu naabonisize hande mwa nguli ya Musamaria yasishemo kuli balateleli bahae nebaswanela kuitatela kutusa babañwi, nihaiba batu ba lisimuluho lisili. (Mubale Luka 10:29-37.) Kana mwahupula puzo yanaabuzizwe Jesu, yenetahisize kuli afe nguli ya Musamaria yasishemo? Mujuda yomuñwi naamubuzize kuli: “Kanti wahesu luli ki mañi?” Kalabo yanaafile Jesu ibonisa kuli ka kuswana ni Musamaria yo, luswanela kuba ni bufani haiba lubata kuli Mulimu alushemube.

7. Kuba ni bufani kamba kusaba ni bufani kuama cwañi taba ya bubusi bwa Mulimu?

⁷ Kunani mabaka amañwi asusueza Bakreste kubonisa moya wa bufani. Ka mutala, taba yanaazusize Satani mwa simu ya Edeni neiama kalemeno kao. Ka mukwa ufi? Satani naapihelezi kuli Adama ni Eva, mane ni batu kaufela, nebaka pila hande hane bakaiyakatwa zabona feela kufita kuutwa Mulimu. Eva naabile ni buitati ka kubata kuba sina Mulimu. Adama ni yena naabonisize moya wa buitati ka kubata kutabisa Eva. (Gen. 3:4-6) Kaufelaa luna lwaiponela zetahisizwe ki likezo zabona. Moya wa buitati hautahisi tabo. Kono haluba ni bufani, lubonisa kuli lusepile kuli Mulimu uezanga lika ka nzila yende hahulu.

8. Bo muuna ni musali bapili nebaka bonisa cwañi kuli nebaiyakatwa babañwi?

⁸ Mulimu naafile batu bapili litaelo zeneka batusa kunahana za babañwi, nihaike kuli bona nebapila banosi mwa simu ya Edeni. Jehova naafuyauzi Adama ni Eva mi abalaela kuli baate, bataze lifasi, mi babuse fahalimwaa lona. (Gen. 1:28) Mubupi naabata kuli lika zabupile lipile hande, mi kacwalo bo muuna ni musali bapili ni bona nebaswanela  kuiyakatwa bana babona bane basika pepiwa kale. Hamulaho wa nako, lifasi kaufela nelikaba Paradaisi, mi bana ba Adama nebaka pila hande. Kuli taba yeo iezahale, lubasi lwa Adama kaufela nelutokwa kuswalisana.

9. Ki kabakalañi batu hane bakaba ni tabo hane bakaswalisana mwa musebezi wa kufetula lifasi kaufela kuba Paradaisi?

⁹ Kuli lifasi kaufela libe Paradaisi, batu babapetahalile nebaswanela kuswalisana hahulu ni Jehova kupeta mulelo wahae, mi ka kueza cwalo, nebaka kena mwa pumulo yahae. (Maheb. 4:11) Kaniti wo neukaba musebezi otabisa luli! Hane bakaifana ni kuiyakatwa babañwi, nebakaba ni tabo ni limbuyoti zetuna.

10, 11. Lukona kupeta cwañi musebezi olufilwe wa kukutaza ni kuluta batu kuba balutiwa?

¹⁰ Kacenu, Jehova ufile batu bahae musebezi wa kukutaza ni kuluta batu kuba balutiwa. Kuli lupete musebezi wo, lutokwa kubonisa kuli lwaiyakatwa babañwi luli. Lukona feela kutiiseza mwa musebezi wo haiba lwalata Mulimu ni batu babañwi.

¹¹ Mwa linako za baapositola, Paulusi naabulezi kuli yena ni babañwi banaaswalisana ni bona ‘nebasebeza hamoho ni Mulimu’ kabakala kuli nebaeza musebezi wa kucala ni kuselaela peu ya Mubuso. (1 Makor. 3:6, 9) Ni luna kacenu lwakona ‘kusebeza hamoho ni Mulimu’ ka kufana nako yaluna, maluwo aluna, ni maata aluna mwa musebezi walufile wa kukutaza. Yeo ki tohonolo yetuna luli!

12, 13. Babaeza musebezi wa kuluta batu kuba balutiwa baikola limbuyoti mañi?

¹² Haiba lufana nako yaluna ni maata aluna mwa musebezi wa kukutaza ni kuluta batu kuba balutiwa, lukaba ni tabo yetuna. Bahasanyi babañata babazamaisa lituto za Bibele zezwelapili baka mitaluseza kuli baikola hahulu musebezi wo. Lubanga ni tabo yetuna halubona batu bababonisa buitebuho bwabona hamulaho wa kuituta niti, habanze baekeza kwa tumelo yabona, kueza licinceho mwa bupilo bwabona, ni kutaluseza babañwi niti yebaitutile. Jesu ni yena naabile ni tabo yetuna bakutazi ba 70 hane ‘bakutile inze batabile’ kabakala kulemuha kuli batu nebaamuhezi taba yene bakutaza.—Luka 10:17-21.

¹³ Bahasanyi mwa lifasi kaufela batabile kubona batu habacinca bupilo bwabona hamulaho wa kuutwa taba yende. Munyakisise mutala wa kaizeli wa mukulwani yabizwa Anna, a yanaabata kupeta zeñata mwa bukombwa ka kuyo sebeleza kwa sibaka sesi kwa upa wa Yurope, ili kokutokwahala hahulu bakutazi ba Mubuso. Kaizeli yo naañozi kuli: “Batu babañata kwanu batabela kuituta Bibele, mi taba yeo yatabisa luli. Sebelezo yaka initahiseza tabo yetuna. Hanikutelanga kwa ndu,  hanibangi ni nako ya kunahana hahulu za butata bonikopana ni bona. Ninahananga za batu boniituta ni bona Bibele, za miinelo yetaata yebakopana ni yona hamohocwalo ni lika zebabilaeza. Nibatanga linzila zenikona kubasusueza ka zona ni kubatusa. Mi luli niiponezi kuli ‘kunani tabo yetuna mwa kufana yefita ye mwa kufiwa.’”—Lik. 20:35.

14. Ki lika mañi zekona kulutusa kuba ni tabo mwa bukombwa kusina taba kuli ki batu basikai feela babaamuhela taba yende?

¹⁴ Lukaba ni tabo haiba lufa batu kolo ya kuutwa taba yende nihaikaba kuli habalati kuutwa. Musebezi olueza kacenu uswana ni musebezi wanaafilwe mupolofita Ezekiele, ili yo Jehova naataluselize kuli: “Ubabulelele manzwi aka, ibe kuli bakautwa kamba kutokwa.” (Ezek. 2:7; Isa. 43:10) Nihaike kuli batu babañwi habaitebuhi lushango lwaluna, Jehova yena waitebuha musebezi waluna. (Mubale Maheberu 6:10.) Muzwale yomuñwi naabonisize kuli unani mubonelo omunde ka za taba ye. Naañozi cwana ka za bukombwa bwahae kuli: “Luna lucezi, luselaezi, mi lulapezi inze lusepile kuli Jehova ukatusa batu bolukutalize ku bona kueza zwelopili.”—1 Makor. 3:6.

15. Batu babañata baezanga cwañi hababoniswa bufani, mi kana luswanela kucinca mubonelo waluna kabakala mobaezeza babañwi halu babonisa bufani?

¹⁵ Jesu ubata kuli lube ni tabo ka kuba ni bufani. Batu babañata baitebuhanga hababoniswa moya wa bufani. Jesu naabulezi kuli: “Muzwelepili kufana, mi batu ni bona baka mifa. Baka miselela tikanyo yende mwa siapalo samina, yekatezwi, yenyungilwe, ni yeyuboka. Kakuli ni mina mukalikanyezwa ka tikanyo yemulikanyeza babañwi.” (Luka 6:38) Ki niti kuli haki batu kaufela babaitebuhanga halu babonisa bufani, kono babañwi babanani buitebuho bona baitutanga kuba ni bufani kwa batu babañwi. Kacwalo, mube ni bufani, ibe kuli babañwi baitebuha mina kamba kutokwa. Bufani bwamina bukona kutahisa kuli batu babonise bufani ku babañwi.

16. Ki lika mañi zeswanela kulususueza kufana?

 ¹⁶ Batu babanani bufani bwa niti habafanangi lika zabona ka kulibelela kuli bakakutisezwa sesiñwi. Jesu naabulezi cwana ka za taba yeo: “Haulukisa mukiti, umeme babotana, liyanga za mahutu, lihole, ni libofu; mi ukataba, kabakala kuli habana sebaka kukutiseza.” (Luka 14:13, 14) Muñoli yomuñwi wa Bibele naabulezi cwana ka kususumezwa ki moya wa Mulimu: “Mutu yafana ukafuyaulwa.” Yomuñwi naaize: “Tabo ki ya mutu yatusa wa mayemo a kwatasi.” (Liprov. 22:9; Samu 41:1) Kaniti, luswanela kufana bakeñisa kuli lwatabela kutusa babañwi.

17. Lukona kufana ka linzila lifi kuli lube ni tabo?

¹⁷ Paulusi hanaaamile kwa manzwi a Jesu a kuli “kunani tabo yetuna mwa kufana yefita ye mwa kufiwa,” naasatalusi feela kuli luswanela kufana maluwo aluna, kono hape naatalusa kuli luswanela kufana ka kususueza babañwi, kubafa ketelelo ni kubatusa. (Lik. 20:31-35) Paulusi naabonisize bufani bwahae ka lika zanaabulezi ni zanaaezize, mi ni luna luswanela kubonisa bufani ka kuitusisa hande nako yaluna, maata aluna, kuisa babañwi pilu, ni kubalata.

18. Babatisisi babañata babuleziñi ka za kuba ni moya wa bufani?

¹⁸ Babatisisi babatalima za mupilelo wa batu ni bona balemuhile kuli kufana kutahisa kuli batu babe ni tabo. Taba yeñwi ibonisa kuli “batu babanga ni tabo yetuna hamulaho wa kubonisa babañwi sishemo.” Babatisisi hape batalusa kuli kutusa babañwi ki kwa butokwa kakuli “kutusa batu kulemuha kuli bupilo bunani mulelo” kakuli halufana “lueza nto yeli ya butokwa hahulu mwa bupilo.” Kacwalo, licaziba hañata basusuezanga batu kueza misebezi ya kuitatela ya kutusa batu kakuli kueza cwalo kutusa kuli baikangule hande kwa mubili ni kuba ni tabo. Taba yeo haikomokisi kwa batu babalumela kuli Bibele ki Linzwi la Jehova, yena Mubupi waluna yalilato.—2 Tim. 3:16, 17.

19, 20. Ki kabakalañi hamuswanela kuba ni bufani?

¹⁹ Kukona kulubela taata kuzwelapili kuba ni bufani halupila ni batu babaiyakatwa feela zabona. Kono Jesu naabulezi kuli milao yemituna yemibeli ibonisa kuli luswanela kulata Jehova ka pilu yaluna kaufela, ka moyo waluna kaufela, ka munahano waluna kaufela, ni ka maata aluna kaufela, ni kuli luswanela kulata babañwi moluitatela. (Mare. 12:28-31) Sina moluitutezi mwa taba ye, batu babalata Jehova baswanela kumulikanyisa. Jehova ni Jesu banani bufani. Mi babata kuli ni luna lube ni bufani, kakuli haiba lueza cwalo lukaba ni tabo luli. Haiba luikataza kuba ni moya wa bufani mwa sebelezo yaluna ku Mulimu ni mwa lika zeluezeza babañwi, lukatahisa tumbo ku Jehova mi lukatusiwa ni kutusa babañwi.

²⁰ Kusina kukakanya, musweli kueza momukonela kaufela kuli mutuse babañwi, sihulu banabahabo mina mwa tumelo. (Magal. 6:10) Haiba muzwelapili kuba ni bufani, batu baka milata ni kuitebuha zemu baezeza, mi mukaba ni tabo. Liñolo la Liproverbia 11:25 libulela kuli: “Mutu yafana ukakondisa zahae, mi yawetulusa babañwi ni yena ukawetuluswa.” Ka kuba Bakreste, lwakona kubonisa sishemo ni moya wa bufani ka linzila zeñata mwa bukombwa mi lukaba ni limbuyoti zeñata. Mwa taba yetatama, lukanyakisisa linzila zeñwi zelukona kubonisa ka zona moya wa bufani.