Kana Kuba ni Mikwa Yeminde Kwakona Kumitusa Kuto Pila Bupilo Bobunde Kwapili?
Ka lilimo zeñata, batu babañata baanga kuli kuba ni mikwa yeminde kwakona kutusa mutu kuba ni bupilo bobunde kwapili. Ka mutala, batu babapila kwa Upa wa Asia bakuteka hahulu zanaabulezi muluti wa mihupulo ya batu yabizwa Confucius (551-479 B.C.E.) hanaaize: “Usike waeza lika zeusa tabeli kuli batu babañwi balieze ku wena.” *
TUTO YEBALATELELA HAHULU BABAÑATA
Babañata basalumela kuli kuba ni mikwa yeminde kukona kutusa mutu kuba ni bupilo bobunde kwapili. Kacwalo, bakutekanga babañwi, babonisanga mikwa yeminde, bapilisananga hande ni babañwi mwa silalanda, mi banani lizwalo lelinde. Bo Linh, basali babapila kwa Vietnam babulela kuli. “Nilumela kuli nikafuyaulwa haiba nizwelapili kusepahala mwa lika kaufela.”
Batu babañwi basusuezwanga ki ba bulapeli bwabona kueza zende. Muuna yabizwa Hsu-Yun, yapila kwa Taiwan, ubulela kuli, “Nenilutilwe kuli zaeza mutu hasapila likatahisa kuli ayopila bupilo bobunde kamba ayonyanda hasaashwile.”
KI LIKA MAÑI ZEZWILE MWATEÑI?
Ki niti kuli haluezeza babañwi lika zende, lukaikola lika zende zeñata. Nihakulicwalo, batu babañata babaezezanga babañwi lika zende habaeziwangi hande ki babañwi. Bo Shiu Ping, babapila kwa Hong Kong batalusa kuli: “Nilemuhile kuli batu babaezezanga babañwi lika zende hañata bona habaezezwangi lika zende. Ka mutala, neniezize monikonela kaufela kubabalela lubasi lwaka ni kueza lika zende. Kono linyalo laka nelifelile, bo muunaaka neba luyubekile ni mwanaka wamushimani.”
Batu babañata balemuhile kuli bulapeli bobuñata bupalezwi kutusa batu kuba babande. Bo Etsuko, babapila kwa Japan bali: “Nenikalile kuswalisana ni kopano ya bulapeli mi nenili mueteleli wa babanca. Nenikomokile hahulu kubona muzamao omaswe ni kusasepahala kwa batu bane nilapela ni bona, ili bane bauzwanga masheleñi.”
“Neniezize monikonela kaufela kubabalela lubasi lwaka ni kueza lika zende. Kono linyalo laka nelifelile, bo muunaaka neba luyubekile ni mwanaka wamushimani.”—BO SHIU PING, BA KWA HONG KONG
Batu babañwi babanani mikwa yeminde baikutwanga hahulu bumaswe habasa eziwi hande ki batu babañwi. Ki mona mone baikutwezi bo Van, ba kwa Vietnam. Bo Van babulela kuli: “Zazi ni zazi nenilekanga litolwana, lipalisa, ni lico mi neniliisezanga bo kukululu baka babashwile, ka kusepa kuli nikafumana limbuyoti kwapili. Kusina taba ni lika zende zene niezanga ni kulatelela lizo za bulapeli ka lilimo zeñata, bo muunaaka nebakulile hahulu. Kuzwafo, mwanaka yanaainzi kwa sikolo mwa naha isili, atimela inze anani feela lilimo ze 20.”
Haiba batu babanani mikwa yeminde bakopananga ni miinelo yemaswe, ki lika mañi zekona kumitusa kuba ni bupilo bobunde kwapili? Kuli lualabe puzo yeo, lutokwa kunyakisisa litaba za niti ili zekona kulutusa kufumana likalabo kwa lipuzo zaluna kaufela ni kulutusa kuziba zekona kulutusa kuba ni bupilo bobunde kwapili. Lukona kufumana kai litaba zeo?
^ para. 2 Kuli muzibe zeñata ka za mo lituto za Confucius neliamezi batu, mubone kauhanyo 7, maparagilafu 31-35, ya buka ya Mankind’s Search for God, yehatisizwe ki Lipaki za Jehova ili yefumaneha ni fa webusaiti ya www.jw.org.
Hape Mwendi Mwakona Kutabela Litaba Ze
MUZUHE!
Kuutwisisa Zelukile ni Zesika Luka
Kuluta bana bamina kuba ni muzamao omunde kukabatusa kwapili habaka hula.
LIKALABO KWA LIPUZO ZA BIBELE
Mulao wa Kueza Hande Babañwi Utalusañi?
Jesu hanaafa mulao wo, naabonisa moluswanela kupilisanela ni batu babañwi, kukopanyeleza cwalo ni lila zaluna.
TAWALA YA MULIBELELI
Ki Kabakalañi Lika ze Maswe ha li Ezahalanga Kwa Batu ba Bande?
Bibele i talusa lika ze taalu ze tahisezanga batu manyando.
