Mulimu naasepisize mupolofita Abrahama kuli yomuñwi ku bane baka simuluha ku yena, naakatahisa limbuyoti kwa “macaba kaufela a lifasi.” (Genese 22:18) Mutu yo ki mañi?

Ibato ba lilimo ze 2,000 kwamulaho, Mulimu naafile Jesu, ili yanaasimuluha ku Abrahama, maata a kueza limakazo zetuna. Limakazo zeo lilutusa kukolwa kuli batu nebaka fuyaulwa ka Jesu.—Magalata 3:14.

Limakazo zanaaezize Jesu lilutusa kuziba kuli ki yena yanaaketilwe ki Mulimu kuli atahiseze batu limbuyoti, mi hape libonisa mo Mulimu akaitusiseza Jesu kutahisa limbuyoti zeo kuya kuile. Halunyakisiseñi mo limakazo zanaaezize Jesu lilutuseza kuziba butu bwahae bobunde.

Musa—Jesu naafolisanga bane bakula.

Nako yeñwi mutu yomuñwi yanaakula mbingwa naakupile Jesu kuli amufolise. Jesu amuswala ni kumualaba kuli: “Nalata!” Honafo feela mbingwa ya muuna yo yafela.—Mareka 1:40-42.

Bufani—Jesu naafepanga bane basina za kuca.

Jesu naabata kuli batu kaufela babe ni za kuca. Ka linako zeshutana-shutana, Jesu naaezize limakazo za kufepa batu babañata-ñata ka kuitusisa feela linkwa lisikai ni tutapinyana. (Mateu 14:17-21; 15:32-38) Batu hase bacile, kwasiyala lico zeñata zene bapalezwi kufeza.

Makeke—Jesu naazusanga batu babashwile.

Bakeñisa ‘kumushwela makeke,’ Jesu naazusize mwana anosi wa mbelwa yanaasina wa ku mubabalela.—Luka 7:12-15.