Ki Kabakalañi Halutokwa Mubuso wa Mulimu?
Batu bapili hane babupilwe, Mubupi waluna, yena wa libizo la Jehova, ki yena feela anosi yanaabusa. Naabusa ka nzila yelilato. Naaezize sibaka sesinde, yona simu ya Edeni kuli batu bapile mwateñi. Mi naafile batu lico zeñata. Hape naafile batu musebezi omunde wa kueza. (Genese 1:28, 29; 2:8, 15) Batu nebaka zwelapili kupila ka kozo kambe nebazwezipili kubusiwa ki Mulimu.
Batu bapili nebahanile kubusiwa ki Mulimu
Bibele ilutaluseza kuli lingeloi leliñwi, lene litilo bizwa Satani Diabulosi hasamulaho, nelikwenuhezi Mulimu ni kulwanisa tukelo yahae ya kubusa. Ka kueza cwalo, lingeloi leo nelitalusa kuli batu nebakaba ni tabo yetuna hane basike baetelelwa ni kubusiwa ki Mulimu. Ka bumai, bashemi baluna bapili, bona bo Adama ni Eva, bautwa Satani mi bakwenuhela Mulimu.—Genese 3:1-6; Sinulo 12:9.
Bakeñisa kuli bo Adama ni Eva nebahanile kubusiwa ki Mulimu, balatehelwa ki Paradaisi yabona ni sepo yene banani yona ya kupila kuya kuile inze banani mibili yepetehile. (Genese 3:17-19) Zene baezize nelitahisize butata kwa bana babona kaufela bane batilo pepwa hasamulaho. Bibele ibulela kuli, bakeñisa kuli Adama naaezize sibi, ‘sibi sikeni mwa lifasi mi lifu litile ka sibi.’ (Maroma 5:12) Sibi hape sitahisize butata bobuñwi: ‘Mutu ubile ni maata a kuhatelela yomuñwi, kumueza maswe.’ (Muekelesia 8:9) Ka mubulelelo omuñwi, batu habaipusa, matata akazwelapili kubateñi.
BATU BAKALISA KUIPUSA
Nimirodi naalwanisize bubusi bwa Jehova
Bibele ilutaluseza kuli mutu wapili kubusa batu neli Nimirodi. Kono Nimirodi naalwanisize bubusi bwa Jehova. Kuzwa feela mwa linako za Nimirodi, batu babamaata bazwezipili kuitusisa maata abona a kubusa babañwi ka nzila yemaswe. Ibato ba lilimo ze 3,000 kwamulaho, Mulena Salumoni naañozi kuli: “Nabona miyoko ya babanyandiswa, mi nekusina yanaa baomba-omba. Mi bane babanyandisa nebanani maata.”—Muekelesia 4:1.
Ni kacenu, babusi babusa ka nzila yemaswe. Ka mutala, mwa silimo sa 2009, hatiso yeñwi ya katengo ka UN (United Nations) neibulezi kuli, “bumaswe buzwelapili kuekezeha mwa lifasi kabakala lipuso za batu zemaswe.”
MULIMU ATUHA ANGA MUHATO!
Batu batokwa babusi babande ni mubuso omunde. Mi zeo ki zona zalusepisize Mubupi waluna!
Nihaiba mibuso yeminde ya batu ipalezwi kutatulula miinelo yetaata yebasweli kukopana ni yona batu kacenu
Mulimu utomile Mubuso, kamba mulonga, okayola mibuso ya batu, mi ona ‘ukaba teñi kuya kuile.’ (Daniele 2:44) Wo ki ona Mubuso ose balapelezi batu babañata-ñata ka nako yetelele. (Mateu 6:9, 10) Kono Mulimu haki yena yakabusa mwa Mubuso wo. Mulimu uketile mutu yomuñwi yanaakile apila fa lifasi kuli abe Mulena wa Mubuso wo. Ki mañi mutu yo yaketilwe ki Mulimu?
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Kana Mubuso wa Mulimu ki Nto Feela ye Mwa Pilu Yamina?
Bibele italusañi haibulela kuli “Mubuso wa Mulimu u mwahali ku mina”?
