Bo Pamela babulela kuli: “Ka nako yene nisweli kualafiwa butuku bwa kansa, nenikenelwanga ki sabo. Kono hane nilapelanga ku Jehova Mulimu, sabo yene nibanga ni yona neifelanga mi nenikona kuitiisa. Nihaike kuli nisauutwanga butuku, kulapelanga kunitusize kuba ni mubonelo omunde ka za muinelo waka. Batu haba nibuzanga moniikutwela, nibaalabanga kuli, ‘Haniikutwi hande, kono ninani tabo!’”

Luswanela kulapelanga nako ni nako ibe kuli lu mwa butata kamba kutokwa. Kaufelaa luna lukopananga ni miinelo yetaata, ibe kuli ki yeminyinyani kamba ki yemituna, mi lutokwanga tuso kuli luitiise mwa miinelo yeo. Kana kulapela kwakona kulutusa?

Bibele ili: “Unepele mushimbo wahao ku Jehova, mi uka kutiisa. Haana kulumeleza yalukile kuli awe.” (Samu 55:22) Taba yeo yaluomba-omba luli! Kacwalo, kulapelanga kukona kumitusa cwañi? Haiba mulapela ku Mulimu ka nzila yeswanela, uka mifa zemutokwa kuli muitiise mwa miinelo yetaata.—Mubone mbokisi yeli, “ Bunde Bwa Kulapelanga.”