Mwa litaba zese lunyakisisize mwa magazini ye, lufumani kalabo kwa puzo yeli, Mulimu ki Mañi? Nelukalile ka kuituta mwa Bibele kuli libizo la Mulimu ki Jehova ni kuli kalemeno kahae kakatuna ki lilato. Hape lunyakisisize zaezize ni zakaeza kuli atuse batu. Nihaike kuli lusatokwa kuituta zeñata ka za Mulimu, mwendi mutabela kuziba momukona kutusezwa hamuituta za Mulimu.

Jehova umisepisa kuli ‘haiba mumubata, ukamilumeleza kumufumana.’ (1 Makolonika 28:9) Hamunze mubata ni kufita fa kuziba Jehova Mulimu, mukaba ni nto ya butokwa hahulu, mukaba “balikani bahae babatuna.” (Samu 25:14) Kuba ni bulikani bobunde ni Jehova kukamitusa cwañi?

Mukaba ni tabo yetuna. Jehova utaluswa kuli ki “Mulimu yatabile.” (1 Timotea 1:11) Kusutelela ku yena ni kumulikanyisa kukamitusa kuba ni tabo yetuna, mi tabo yeo ikamitusa kunahana hande, kuba ni maikuto amande, ni kuba ni buikangulo bobunde. (Samu 33:12) Hape mwakona kupila bupilo bwa tabo ka kuambuka kupila mupilelo omaswe, ka kuba ni mikwa yeminde, ni kupilisana hande ni babañwi. Mukalumelelana ni zanaabulezi walisamu hanaaize: “Kusutelela ku Mulimu ki yona nto yende ku na.”—Samu 73:28.

Wamibabalela ka butu ni kumiisa pilu. Jehova naasepisize batanga bahae kuli: “Nika kueleza inze nikutalimezi ka meeto aka.” (Samu 32:8) Taba yeo italusa kuli Jehova ubabalela mañi ni mañi yali mutangaa hae, kulikana ni zatokwa. (Samu 139:1, 2) Hamukaba ni silikani sesinde ni Jehova, ukamitusanga mwa miinelo kaufela.

Bupilo bobunde kwapili. Kwandaa kumitusa kuba ni tabo ni bupilo bobunde ka nako ya cwale, Jehova Mulimu hape umisepisa kuba ni bupilo bobunde kwapili. (Isaya 48:17, 18) Bibele ili: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.” (Joani 17:3) Mwa linako zetaata ze, Mulimu ulufa sepo yeswana sina ankora yelutusa kuzwelapili kuba ‘babasepahala ni babatiile.’—Maheberu 6:19.

Litaba lisikai zelunyakisisize ki zeñwi za mabaka amañata abonisa libaka hamutokwa kuziba hande Mulimu ni kuba ni silikani sesitiile ni yena. Kuli muitute zeñata, mwakona kuambola ni yomuñwi wa Lipaki za Jehova kamba kukena fa webusaiti ya jw.org.