1. Ki lika mañi zeluswanela kueza kuli lube ni tabo ya luli, mi ki kabakalañi? (Isaya 48:​17, 18)

 NDATAA luna wa kwa lihalimu ululata hahulu, mi ubata kuli luikole bupilo ka nako ya cwale ni kwapili. (Muek. 3:​12, 13) Naalubupile ni buikoneli bwakueza lika zeñwi zekomokisa, kono naasika lufa buikoneli bwa kuipusa kamba kuiketela zelukile ni zesika luka. (Muek. 8:9; Jer. 10:23) Waziba kuli luswanela kumusebeleza ni kupila ka likuka zahae kuli lube ni tabo ya luli.—Mubale Isaya 48:​17, 18.

2. Ki taba mañi ya buhata yabata Satani kuli lulumele, mi Jehova uezizeñi ka za teñi?

² Satani ubata kuli lulumele kuli lwakona kuba ni tabo niha lusasebelezi Jehova, ni kuli batu bakona kuipusa hande. (Gen. 3:​4, 5) Jehova ubonisize kuli Satani ki lihata ka kutuhelela batu kuli baipuse ka nakonyana. Kwaiponahalela hande kuli batu habakoni kuipusa. Nihakulicwalo, mwa Bibele kunani mitala yemiñata ya baana ni basali bane babile ni tabo kabakala kusebeleza Jehova. Mutala omunde ka kufitisisa ki wa Jesu Kreste. Mwa taba ye, lukanyakisisa mabaka Jesu hanaaiketezi kusebeleza Jehova. Kuzwa fo, lukanyakisisa mabaka haluswanela kusebeleza Ndataa luna wa kwa lihalimu. Kihona lukanyakisisa mabaka amañwi haluiketezi kusebeleza Jehova.

 MABAKA JESU HANAAIKETEZI KUSEBELEZA JEHOVA

3. Ki lika mañi zeo Satani naabata kufa Jesu, mi Jesu naaketile kuezañi?

³ Jesu hanaali fa lifasi, naanani kuketa yanaaka sebeleza. Nakonyana kuzwa fakolobelezwa Jesu, Satani naamubulelezi kuli naaka mufa mibuso kaufela ya lifasi hanaaka mulapela feela hañwi. Jesu naamualabile kuli: “Zwa Satani! Kakuli kuñozwi kuli: ‘Ki Jehova Mulimu wahao yeulukela kulapela, mi ki yena feela anosi yeulukela kufa sebelezo yekenile.’” (Mat. 4:​8-10) Ki kabakalañi Jesu hanaaezize keto yeo? Halunyakisiseñi mabaka amañwi anaatahisize kuli aeze cwalo.

4-5. Ki mabaka mañi amañwi anaatahisize kuli Jesu aiketele kusebeleza Jehova?

⁴ Libaka lelituna lene litahisize kuli Jesu aiketela kusebeleza Jehova ki lilato, Jesu ulata hahulu Ndatahe. (Joa. 14:31) Kuzwa fo, Jesu usebeleza Jehova kakuli kueza cwalo kwaswanela. (Joa. 8:​28, 29; Sin. 4:11) Waziba kuli Jehova ki yena Simbule sa bupilo ni kuli wasepahala mi unani bufani. (Samu 33:4; 36:9; Jak. 1:17) Jehova kamita ubulelelanga Jesu niti mi ki yena yamufile lika kaufela zanani zona. (Joa. 1:14) Kono Satani yena utahisize lifu. Ki lihata mi unani mukwañuli ni buitati. (Joa. 8:44) Kabakaleo, Jesu naasika nahana nihanyinyani kulikanyisa Satani ka kukwenuhela Jehova.—Mafil. 2:​5-8.

⁵ Libaka leliñwi Jesu hanaaketile kusebeleza Jehova kikuli, naanyolezwi lika zende zeneka zwa mwa busepahali bwahae. (Maheb. 12:2) Naaziba kuli hanaaka zwelapili kusepahala, naakakenisa libizo la Ndatahe ni kukonahalisa kuli manyando kaufela atahisizwe ki Diabulosi afele.

MABAKA HALUSWANELA KUSEBELEZA JEHOVA

6-7. Ki kabakalañi batu babañata kacenu habasa sebelezi Jehova, mi ki kabakalañi luna haluswanela kumusebeleza?

⁶ Batu babañata kacenu habasebelezi Jehova kakuli habazibi tulemeno twahae totunde mi habazibi lika zende zabaezelize. Ki mona mone bainezi batu ba kwa Atene banaakutalize ku bona Paulusi.—Lik. 17:​19, 20, 30, 34.

⁷ Paulusi naataluselize batu ba kwa Atene kuli Mulimu ki yena “yafa batu kaufela bupilo ni moya wakubuyela ni lika kamukana.” Naaekelize kubulela kuli: “Ka yena lunani bupilo, lwazamaya, mi luteñi.” Lwaswanela kusebeleza Mulimu kakuli ki Mubupi, ili yo “ka mutu alimuñwi uezize macaba kamukana a batu.”—Lik. 17:​25, 26, 28.

8. Ki lika mañi zasike aeza Jehova nikamuta? Mutaluse.

⁸ Ka kuba Mubupi ni Mubusi wa pupo kamukana, Jehova naakona kuhapeleza batu kuli bamusebeleze. Nihakulicwalo, Jehova haana kueza cwalo nikamuta. Kono ulufile bupaki bobubonisa kuli uteñi ni kuli ulata hahulu mañi ni mañi waluna. Ubata kuli batu babañata hahulu babe balikani bahae kuya kuile. (1 Tim. 2:​3, 4) Kabakaleo, Jehova ululutile mwakulutela babañwi ka za milelo yahae ni kubataluseza ka za lika zende kaufela zakaezeza batu. (Mat. 10:​11-13; 28:​19, 20) Uluonga-ongile mwa liputeho ni kulukisa kuli lubabalelwe ki baokameli babalilato.—Lik. 20:28.

9. Jehova ubonisize cwañi kuli walata batu kaufela?

⁹ Jehova ubonisanga lilato lahae ka kufa lika zende ni kwa batu babasa lati kulumela kuli uteñi. Munahane taba ye: Kuzwa feela kwamulaho, batu babañata baikatulezi kupila ka likuka zabona ka za zelukile  ni zesika luka. Nihakulicwalo, Jehova ubabonisize sishemo ka kubafa lika zebatokwa kuli baikole bupilo ni kuzwelapili kupila. (Mat. 5:​44, 45; Lik. 14:​16, 17) Kabakala hae, bakona kuba ni balikani ni lubasi lolu balata, kuba ni bana, kusebeza ni kuikola bupilo. (Samu 127:3; Muek. 2:24) Bupaki bubonisa hande kuli Ndataa luna ya kwa lihalimu walata batu kaufela. (Exo. 34:6) Haluikupuliseñi mabaka amañwi haluiketezi kusebeleza Jehova ni mwafuyaulelanga batu babaketa kumusebeleza.

MABAKA HALUIKETEZI KUSEBELEZA JEHOVA

10. (a) Ki lifi libaka lelituna lelitahisa kuli lusebeleze Jehova? (Mateu 22:37) (b) Pilu-telele ya Jehova imitusize cwañi? (Samu 103:​13, 14)

¹⁰ Ka kuswana ni Jesu, libaka lelituna lelitahisa kuli lusebeleze Jehova kikuli, lumulata hahulu. (Mubale Mateu 22:37.) Lusutelelanga hahulu ku Jehova haluituta ka za tulemeno twahae. Ka mutala, munahanisise mwaluboniseza pilu-telele Jehova. Maisilaele hane basika muutwa, naabakupile kuli: “Hamukute shangwe, muzwe mwa linzila zamina zemaswe.” (Jer. 18:11) Jehova waziba kuli halusika petahala ni kuli lu liluli. (Mubale Samu 103:​13, 14.) Hamunahanisisa ka za pilu-telele ya Jehova ni tulemeno twahae totuñwi totunde, kana hamususuezwangi kumusebeleza kuya kuile?

11. Ki mabaka mañi amañwi atahisa kuli lusebeleza Ndataa luna wa kwa lihalimu?

¹¹ Hape lususuezwanga kusebeleza Jehova kakuli kueza cwalo kwaswanela. (Mat. 4:10) Kuzwa fo, lwaziba kuli kunani lika zende zezwanga mwa kusebeleza Jehova ka busepahali. Haiba lusebeleza Jehova ka busepahali, lukakenisa libizo lahae, lukabonisa kuli Diabulosi ki lihata, mi lukatabisa pilu ya Ndataa luna. Mi haiba luiketela kusebeleza Jehova kacenu, lukaba ni sepo ya kuli luka musebeleza kuya kuile!—Joa. 17:3.

12-13. Luitutañi ku zeneezahezi ku bo Jane ni bo Pam?

¹² Lwakona kuituta kulata hahulu Jehova niha lusali banana mi halunze luhula, lilato leo likazwelapili kuhula. Halunyakisiseñi mutala wa likaizeli bababeli babapepwa hamoho, ili bo Jane ni bo Pam. a Habakala kuituta Bibele, bo Jane nebanani lilimo ze 11 mi bo Pam nebanani lilimo ze 10. Nihaike kuli bashemi babona nebasa tabeli kuituta Bibele, nebalumelelize bo Jane ni bo Pam kuituta Bibele ni Lipaki ibile feela baya kwa keleke ni lubasi kwa mafelelezo a sunda. Bo Jane batalusa kuli, “Zene banilutile Lipaki kuzwelela mwa Bibele neli nitusize kuhana kukuezo ya litaka zaka ya kuitusisa milyani yekola ni kuikenya mwa muzamao wa buhule.”

¹³ Bubeli bwabona nebabile bahasanyi kwa mafelelezo a lilimo zabona za kunonoboka. Hasamulaho, nebabile mapaina ba kamita inze bababalela bashemi babona bane basupala. Bo Jane habahupula zeneezahezi kubona, batalusa kuli: “Neniitutile kuli Jehova wababalelanga balikani bahae, mi sina moliboniseza liñolo la 2 Timotea 2:​19, ‘Jehova waziba babali bahae.’” Kusina kukakanya, waiyakatwa batu babaketa kumulata ni kumusebeleza!

14. Lukona kuyemela cwañi Jehova? (Mubone ni maswaniso.)

¹⁴ Lubata kutusa batu kuziba niti ka za Jehova. Halunyakisiseñi muinelo wo: Munani mulikani yomutuna, ili yanani sishemo ni bufani mi walata kuswalela. Zazi leliñwi, muutwa mutu yomuñwi inzaa tameleza mulikanaa mina kuli unani situhu mi hasepahali. Mukaeza cwañi? Mukayemela mulikanaa  mina. Ka nzila yeswana, Satani ni batu babakukuezwa ki yena basweli kusinya Jehova libizo ka kuhasanya litaba za buhata ka za hae; luyemelanga libizo la Jehova ka kubulela niti ka za hae. (Samu 34:1; Isa. 43:10) Lubonisa kuli lwalata Jehova mi lubata kumusebeleza ka zelubulela ni zelueza.

15. Ki limbuyoti mañi zanaaikozi muapositola Paulusi hamulaho wa kueza licinceho zetuna mwa bupilo bwahae? (Mafilipi 3:​7, 8)

¹⁵ Luitatelanga kueza licinceho mwa bupilo ilikuli lutabise Jehova ni kupeta zeñata mwa sebelezo yaluna ku yena. Muapositola Paulusi naanani situlo sa butokwa mwa bulapeli bwa Sijuda, kono naasiile bulapeli bo kuli abe mulateleli wa Kreste ni kusebeleza Jehova. (Magal. 1:14) Kabakaleo, naaikozi bupilo mi naafilwe tohonolo ya kuyo busa ni Kreste kwa lihalimu. Naasika inyaza kabakala katulo yanaaezize ya kusebeleza Jehova, mi ni luna haluna kuinyaza.—Mubale Mafilipi 3:​7, 8. 

16. Luitutañi ku zeneezahezi ku bo Julia? (Mubone ni maswaniso.)

¹⁶ Haiba luunga kusebeleza Jehova kuba yona nto ya butokwa hahulu mwa bupilo, lukaikola limbuyoti ka nako ya cwale ni kwapili. Halunyakisiseñi zeneezahezi ku kaizeli yabizwa Julia. Pili bo Julia basika ituta kale niti, nebabanga mwa sikwata sa baopeli ba keleke kuzwa feela kwa bwanana. Mutu yomuñwi yanaacuukile mwa musebezi wa kuopela naalemuhile buikoneli bwabona mi abatusa kuba muopeli yomunde. Kusika fita nako, bo Julia bazibahala hahulu mi bakala kuopelelanga mwa libaka zetumile hahulu. Hane bali kwa sikolo sa kuituta lipina, mutu yomuñwi yene bakena ni yena sikolo  abataluseza ka za Mulimu mi ababulelela kuli Mulimu unani libizo, lona la Jehova. Kusika fita nako, bo Julia bakala kuitutanga Bibele habeli ka sunda. Hasamulaho, baikatulela kuisa hahulu pilu kwa kusebeleza Jehova kufita kuisa pilu kwa musebezi wa kuopela. Yeo neli katulo yetaata. Batalusa kuli, “Batu babañata neba nibulelezi kuli nesi nto yende kutuhela kuopela kuli nisebeleze Jehova, kono na nenibata kupeta zeñata mwa sebelezo yaka ku Jehova.” Baikutwa cwañi ka nako ya cwale ka za katulo yene baezize lilimo zefitelela 30 kwamulaho? Babulela kuli: “Ninani kozo ya mwa munahano mi ninani sepo ya kuli kwapili Jehova ukakulisa litakazo zaka kaufela.”—Samu 145:16.

MUZWELEPILI KUSEBELEZA JEHOVA

17. Kuziba kuli mafelelezo a lifasi le a fakaufi hahulu kuama cwañi batu babaiketezi kusebeleza Mulimu ni babasika eza kale cwalo?

¹⁷ Mafelelezo a lifasi le a fakaufi hahulu. Muapositola Paulusi naañozi kuli: “Kakuli kusiyezi feela ‘nako yenyinyani,’ mi ‘yena yataha ukapunya mi haana kuliyeha.’” (Maheb. 10:37) Taba ye iluama cwañi? Nako yesiyezi ya kuli batu baiketele kusebeleza Jehova ki yekuswani. (1 Makor. 7:29) Mi haiba luikatulezi kale kusebeleza Mulimu, lwaziba kuli kusina taba kuli lukatokwa kutiyela miinelo yetaata, ikaba feela ka “nako yenyinyani.”

18. Jesu ni Jehova babata kuli luezeñi?

¹⁸ Jesu naasusuelize batu kuli babe balutiwa  bahae ni kuli bazwelepili kumulatelela. (Mat. 16:24) Kacwalo, haiba selusebelelize Jehova ka lilimo zeñata, haike luikatulele kuzwelapili kumusebeleza. Luswanela kubeleka ka taata kuli luzwelepili kusebeleza Jehova. Kueza cwalo kukona kuba taata, kono haiba lumusebeleza, lukaba ni tabo ni kuikola limbuyoti zeñata nihaiba ka nako ya cwale!—Samu 35:27.

19. Luitutañi ku zeneezahezi ku bo Gene?

¹⁹ Babañwi baikutwa kuli haiba basebeleza Jehova habana kuikola bupilo. Haiba musali babanca, kana muikutwa kuli mukaicawisa lika zeñwi haiba musebeleza Jehova? Muzwale yomuñwi yasali yomunca yabizwa Gene, utalusa kuli: “Neniikutwa kuli kuba yomuñwi wa Lipaki za Jehova neku nipaleliswa kueza lika zeñwi. Nekubonahala inge kuli litaka zaka nebaikola lika zecwale ka kuya kwa tukiti, kuba mwa libato, kamba kubapala lipapali za fa kompyuta za lindwa, kono na zene niezanga feela ki kuya kwa mikopano ni mwa bukombwa.” Maikuto ao naaamile cwañi bo Gene? Batalusa kuli: “Nenikalile kueza lika zemaswe zene baezanga banana babañwi mi nenibanga ni tabo ka nakonyana. Kono lika zeo nelisa nifangi tabo ya luli. Nenikalile kunahanisisa ka za litaba za niti za mwa Bibele zene nituhezi kusebelisa, mi naikatulela kusebeleza Jehova ka pilu yaka kaufela. Kuzwa feela nako yeo, niikutwa kuli Jehova ualabile litapelo zaka kaufela.”

20. Luswanela kuikatulela kuezañi?

²⁰ Muñoli yomuñwi wa lisamu naaopelezi Jehova kuli: “Tabo ki ya mutu yeuketa ni kumutisa bukaufi ni wena kuli apile mwa malapa ahao.” (Samu 65:4) Haike luzwelepili kuba ni buikolwiso bwanaanani bona Joshua hanaabulezi kuli: “Haili na ni ba ndu yaka, lukasebeleza Jehova.”—Josh. 24:15.