Ka bumai, hane nituha nikwanisa lilimo ze 13, silikani saka ni Jehova sakala kufokola. Nekubonahala kuli bana ba sikolo babañwi nebanani tukuluho yetuna, mi ni na nenibata kuba ni tukuluho yecwalo. Nakala kuikutwa kuli milao ya bashemi baka ni likuka zebapila ka zona Bakreste neli nitokwisa tukuluho, mi kulapela Jehova nekuli taata. Nihaike kuli neniziba kuli Jehova uteñi, nenisa ikutwi kuba bukaufi ni yena.

Nenisika tuhela kukutaza luli, kono neniezanga feela zenyinyani mwa bukombwa. Hane niyanga mwa bukombwa, nenisa itukisezangi mi nekuli taata kukalisa lipuisano ni batu. Kabakaleo, nenisina misipili ya makutisezo kamba lituto, mi nenisina tabo, ili taba yenetahisize kuli nisike naikola bukombwa. Neniipuzanga kuli: ‘Mutu ukona cwañi kueza musebezi ocwana, sunda ni sunda, kweli ni kweli?’

Hane ninani lilimo ze 17, nenibata kuba ni tukuluho. Kacwalo, nalonga libyana zaka mwa mukotana, nazwa fa lapa ni kuliba kwa Australia. Bashemi baka nebasika tabela kunibona hanizwa  fa lapa. Nebabilaezi hahulu, kono nebanani buikolwiso bwa kuli nenika zwelapili kusebeleza Jehova.

Hane nili kwa Australia, nafokola hahulu kwa moya. Nakala kufumanehanga kwa mikopano ya puteho ka siwela. Naeza siango ni babanca babañwi, ili bao, sina na, nebafumanehanga kwa mikopano ya puteho kono hape hasamulaho nebayanga kwa libaka za manwelo a bucwala busihu kuyo bina ni kunwa bucwala. Haniiheta kwamulaho, nilemuha kuli neku leliñwi nenili mwa niti kono neku leliñwi hape nenili mwa lifasi; nekusina feela kone niwela.

Ibato ba lilimo zepeli kuzwa fo, nakopana ni kaizeli yomuñwi, ili yo ka kusaziba naanitusize kunahanisisa za bupilo bwaka. Nenipila mwa ndu yeñwi ni likaizeli ba makwasha babañwi babane, mi lwamema muokameli wa mupotoloho ni musalaa hae yabizwa Tamara, kuli bato ina ni luna ka sunda iliñwi. Bo muunaa bo Tamara hane baezanga misebezi ya puteho, bo Tamara nebatandanga nako ni luna mi neluikolanga kuca makande inze luseha. Neniikozi hahulu nako yeo. Nebanani silikani mi nebaatumeleha. Nenikomokile hahulu kuli mutu yacwalo yatiile kwa moya wakona kuambola ni kuseha ni luna cwalo.

Bo Tamara neli batu bane banani mafulofulo. Neba nisusuelize hahulu kabakala kuli nebalata niti ni bukombwa. Nebanani tabo yetuna hane banze basebeleza Jehova ka mone bakonela kaufela, kono na nenisina tabo kakuli nenieza feela zenyinyani mwa bukombwa. Mubonelo wabona wa lika omunde ni tabo ya yetuna yene banani yona neli nisusuelize hahulu. Mutala wabona neu nitusize kulemuha buniti bwa taba ya mwa Mañolo ye: Jehova ubata kuli kaufelaa luna lumusebeleze “ka tabo” ni “mihuwo ya tabo.”—Samu 100:2.

Nenibata kuba ni tabo yeswana ni yene banani yona bo Tamara, kono nenitokwa kueza  licinceho zetuna kuli nibe ni tabo yecwalo. Neku niingezi lilimo zebato ba zetaalu kuli nieze cwalo, mi nenikalile kueza licinceho hanyinyani-hanyinyani. Nakala kuitukisezanga pili nisikaya kale mwa bukombwa, mi neniezanga bupaina bwa kutusa ka linako zeñwi. Kueza cwalo neku nitusize kufelisa maswabi ane ninani ona ni kuba ni buikolwiso. Bakeñisa kuli neniitusisanga hahulu Bibele mwa bukombwa, nakala kuikola hahulu bukombwa. Nakonyana kuzwa fo, nakala kuezanga bupaina bwa kutusa kweli ni kweli.

Naeza silikani ni Bakreste ba lilimo zeshutana-shutana, ili bane baeza hande kwa moya ni bane baikola kusebeleza Jehova. Mutala wabona omunde neu nitusize kunyakisisa lika zene niinga kuba za butokwa mwa bupilo, ni kuba ni tomahanyo yende ya kubala Bibele zazi ni zazi. Nakala kuikola hahulu bukombwa, mi hamulaho wa nako, naba paina wa kamita. Hamulaho wa lilimo zeñata, nakala kuikutwa kulukuluha ni kuba ni tabo mwa puteho hape.

Hamulaho wa silimo silisiñwi kuzwa fo, nakopana ni muzwale yabizwa Alex, ili muuna yasepahala, yanani sishemo, yalata Jehova ni bukombwa. Naali sikombwa sa puteho, mi naasaabile paina ka lilimo ze 6. Bo Alex hape, nese basebelelize kwa sibaka kokutokwahala hahulu bakutazi kwa Malawi ka nakonyana. Hane bali kwa sibaka seo, nebaswalisananga ni balumiwa bane babatomezi mutala omunde ni kubasusueza kuzwelapili kubeya za Mubuso mwa sibaka sapili.

Ka 2003, na ni bo Alex lwanyalana, mi luzwezipili kuba mwa sebelezo ya nako kaufela. Luitutile lituto zende zeñata, mi Jehova ulufuyauzi hahulu.

Ka 2009, nelukupilwe kusebeza sina balumiwa mwa naha yenyinyani ya Timor-Leste, yefumaneha mwahalaa lioli za Indonesia. Nelukomokile  hahulu, mi nelutabile luli, kono hape neluikalezwi. Hamulaho wa likweli zeketalizoho kuzwa fo, lwayo punya mwa muleneñi omutuna wa naha yeo obizwa Dili.

Nelutokwa kueza licinceho zetuna kuli lutwaele bupilo bwa kwa sibaka seo. Nelunani kuituta sizo, puo, ni kutwaela lico, ni mupilelo wa kwateñi. Hañata hane luli mwa bukombwa, nelukopananga ni batu babashebile, babasika ituta hahulu, ni bane banyandiswa. Mi nelukopani ni batu babañata bane baholofezi ni bane banani masitapilu kabakala ndwa ni mifilifili yenebile teñi kwamulaho. a

Neluikozi hahulu bukombwa! Ka mutala, nako yeñwi, nenikopani ni musizana yomuñwi wa lilimo ze 13 yanaasina tabo, yabizwa Maria. b Bo mahe nese batimezi kale lilimonyana kwamulaho, mi naabonananga feela ni bo ndatahe ka siwela bakeñisa kuli nebasa pili hamoho. Maria naasazibi zanaaka eza mwa bupilo, sina feela litaka zahae. Nihupula kuli zazi leliñwi hanaa nitaluseza mwanaaikutwela, naalilile. Kono nenisa utwisisi zanaabulela kakuli nenisa zibi hande puo yahae. Nalapela ku Jehova kuli anituse kumususueza, mi nakala kumubalela mañolo atiisa. Mwa lilimo lisikai zenetatami, nalemuha kuli kuituta niti nekucincize bupilo bwa Maria. Akala kuba ni tabo ni kuapalanga hande. Akolobezwa, mi ka nako ya cwale, ni yena unani lituto za Bibele. Kacenu, Maria unani lubasi lolutuna lwa kwa moya, mi uikutwa kulatiwa.

Jehova usweli wafuyaula musebezi wa kukutaza mwa Timor-Leste. Nihaike kuli buñata bwa bahasanyi bakolobelizwe mwa lilimo zelishumi zefelile, buñata bwabona ki mapaina ba kamita, likombwa za puteho kamba baana-bahulu. Babañwi basebeleza fa ofisi ya toloko mi batusa kutoloka lihatiso zetomile fa Bibele mwa lipuo zebulelwa mwa naha yeo. Nenitabile hahulu kubabona inze baopela kwa mikopano ya puteho, kubabona inze batabile, ni kubabona habaeza zwelopili ya kwa moya.

Bupilo mwa Timor-Leste nebushutana hahulu ni mone lupilela kwa Australia, kono nelunani tabo yetuna. Fokuñwi, nelukwelanga mbasi yenyinyani mokutezi batu babañata, ili mone kulongilwe litapi zeomile ni mabunda a muloho zenelekilwe kwa musika. Fa mazazi amañwi, neluzamaisanga lituto za Bibele inze luli mwa ndu yenyinyani yenecisa. Fafasi nekutezi masila, mi likuhu nelinze limata-mata. Niteñi, kusina taba ni miinelo yetaata yene nikopana ni yona, hañata neniipulelisanga kuli: ‘Naikola bupilo!’

Naitumela luli kuli bashemi baka nebaezize mone bakonela kaufela kuniluta za Jehova, mi neba nitusize hahulu nihaiba ka nako yene nifokozi kwa moya. Niiponezi buniti bwa taba yeñozwi kwa Liproverbia 22:6. Bo ma ni bo ndate banani tabo yetuna bakeñisa kuli na ni bo Alex luzwelapili kusebeleza Jehova. Kuzwa feela ka silimo sa 2016, luzwezipili kueza musebezi wa kupotela liputeho mwa libaka zeokamelwa ki mutai wa Australasia.

Nikomoka kuli nako yeñwi kwamulaho, nenisa ikolangi musebezi wa kukutaza. Kono ka nako ya cwale senilata hahulu bukombwa! Niitutile kuli kusina taba ni miinelo yetaata yelukona kukopana ni yona mwa bupilo, lukona feela kuba ni tabo haiba lusebeleza Mulimu ka pilu yaluna kaufela. Kaniti luli, mwahalaa lilimo ze 18 zenisebelelize Jehova hamoho ni bo Alex, nibile ni tabo yetuna. Cwale seniutwisisa hande manzwi anaabulezi muñoli wa samu Davida ka za Jehova, ali: “Batu kaufela babasabela ku wena bakataba; bakahuweleza ka tabo kamita. . . . Mi babalata libizo lahao bakataba kabakala hao.”—Samu 5:11.