1. Ki lika mañi zanaaezize Jehova nakonyana kuzwa faezeza sibi Adama ni Eva? (Genese 3:15)

 NAKONYANA kuzwa faezeza sibi Adama ni Eva, Jehova afa bupolofita bwa butokwa bone butusize bana babona kuba ni sepo. Zanaabulezi liñozwi kwa liñolo la Genese 3:15.—Mubale.

2. Ki kabakalañi bupolofita bo habuli bwa butokwa hahulu?

² Bupolofita bo, bufumaneha mwa buka yapili ya mwa Bibele. Kono litaba zeñwi zebulezwi kaufela za mwa Bibele zaswalisana ni bupolofita bo ka nzila yeñwi. Sina likumba lakona kuitusisa mutu kuli atame hamoho likota, manzwi añozwi kwa Genese 3:15 atamahanya libuka kaufela za Bibele kueza lushango lululuñwi lo: Muliululi naakalumiwa kuli ayundise Diabulosi ni balateleli bahae kaufela babamaswe. * Kaniti luli, yeo ikaba taba yende ku babalata Jehova kaufela!

3. Lukanyakisisañi mwa taba ye?

³ Mwa taba ye, lukaalaba lipuzo zelatelela ka za bupolofita bobu kwa Genese 3:15: Ki bo mañi babataluswa kwa liñolo leo? Bupolofita bo, butalelelizwe cwañi? Mi bupolofita bo, bulutusa cwañi?

4. “Noha” iyemelañi, mi luziba cwañi cwalo?

⁴ Genese 3:14, 15 ibulela za “noha,” “mwanaa” noha, “musali,” ni “mwanaa” musali. Bibele ilutusa kuziba babataluswa kwa liñolo leo. * “Noha” iyemelañi? Noha ya luli neisike yautwisisa zanaabulezi Jehova mwa simu ya Edeni. Kacwalo, kubonahala kuli Jehova hanaafa katulo, naabulela kwa sibupiwa sesiñwi sesibutali. Ki sibupiwa sifi ona seo? Liñolo la Sinulo 12:9 litalusa hande seiyemela noha yeo. Ka kuya ka liñolo leo “noha yakale” ki Satani Diabulosi. Kono bana ba noha ki bo mañi?

5. Ki mañi mwanaa noha?

⁵ Bibele fokuñwi iitusisanga pulelo ya mwana kutalusa batu babalikanyisa hahulu mwanahanela ni kuezeza lika mutu yomuñwi kuli mane bakona kuungiwa kuli ki bana bahae. Kacwalo, mwanaa noha ki libupiwa za moya ni batu, ili bao sina Satani, bahanyeza Jehova Mulimu ni kulwanisa batanga bahae. Mwana yo ukopanyeleza mangeloi anaasiile litulo zaona kwa lihalimu mwa linako za Nuwe ni batu babamaswe babaeza lika sina ndataa bona Diabulosi.—Gen. 6:1, 2; Joa. 8:44; 1 Joa. 5:19; Juda 6.

6. Ki kabakalañi “musali” yabulezwi mwa bupolofita haasayemeli Eva?

⁶ Kono cwale “musali” yena uyemelañi? Neisike yakona kuba Eva. Libaka ki lifi? Halunyakisiseñi feela libaka lililiñwi. Bupolofita bo, bubonisa kuli mwanaa musali ‘naakapyata’ toho ya noha. Sina mose lunyakisiselize, noha iyemela Satani, yali  sibupiwa sa moya, mi hakuna mwanaa Eva yasika petahala yanaaka kona kupyata toho ya Satani. Kacwalo, Satani naakayundiswa cwañi?

7. Sina mokuboniselizwe kwa Sinulo 12:1, 2, 5, 10, musali yabulezwi kwa Genese 3:15 uyemelañi?

⁷ Buka ya Bibele ya mafelelezo ilutaluseza zayemela musali yabulezwi kwa liñolo la Genese 3:15. (Mubale Sinulo 12:1, 2, 5, 10.) Yo haki musali wa luli! Musali yo unani kweli kwatasaa mahutu ahae, mi kwa toho yahae kunani kuwani ya bulena ya linaleli ze 12. Upepa mwana yakomokisa, ona Mubuso wa Mulimu. Mubuso wo u kwa lihalimu; kacwalo, musali yo ni yena ulukela kuba wa kwa lihalimu. Musali yo uyemela kalulo ya kwa lihalimu ya kopano ya Jehova, ili libupiwa za Jehova za moya zesepahala.—Magal. 4:26.

8. Ki mañi kalulo yapili ya butokwa ya mwanaa musali, mi naabile lili cwalo? (Genese 22:15-18)

⁸ Linzwi la Mulimu hape lilutusa kuziba kalulo yapili ya butokwa ya mwanaa musali. Nelipolofitile kuli mwana yo naakasimuluha ku Abrahama. (Mubale Genese 22:15-18.) Sina mone kupolofitezwi, Jesu naasimuluhile ku muuna yasepahala yo. (Luka 3:23, 34) Kono mwana yo naatokwa kuba ni maata amatuna hahulu afita a butu bakeñisa kuli naanani kupyata toho ya Satani Diabulosi, ili kumuyundisa. Kacwalo, Jesu hanaanani lilimo zebato ba ze 30, naatozizwe ka moya okenile sina Mwanaa Mulimu. Ka nako yatoziwa, Jesu aba kalulo ya butokwa yapili ya mwanaa musali. (Magal. 3:16) Hamulaho wa lifu la Jesu ni kuzusiwa kwahae, Mulimu ‘amuapesa kuwani ya kanya ni likute’ mi amufa “maata kaufela mwa lihalimu ni fa lifasi,” kukopanyeleza cwalo ni maata a kuli “asinye misebezi ya Diabulosi.”—Maheb. 2:7; Mat. 28:18; 1 Joa. 3:8.

9-10. (a) Ki bo mañi babañwi babali kalulo ya mwanaa musali, mi babanga lili cwalo? (b) Lukanyakisisañi cwale?

⁹ Kono nekukaba ni kalulo yabubeli ya mwana yo. Muapositola Paulusi naazibahalize kalulo yabubeli ya mwana hanaabulelezi Bakreste babatozizwe ba Majuda ni ba Macaba kuli: “Haiba mu ba Kreste, mu bana ba Abrahama luli, babayola saanda kulikana ni sepiso.” (Magal. 3:28, 29) Jehova hatoza Mukreste ka moya okenile, mutu yo uba kalulo ya mwanaa musali. Kacwalo, mwana ukopanyeleza Jesu Kreste ni Bakreste ba 144,000 babaka busa ni yena. (Sin. 14:1) Kaufelaa bona banahana ni kueza lika sina Ndataa bona, Jehova Mulimu.

¹⁰ Haubona kikale luziba babataluswa kwa Genese 3:15, halunyakisiseñi ka bukuswani mo Jehova atalelelize bupolofita bo hanyinyani-hanyinyani ni molutusezwa ki bona.

11. Mwanaa musali naalumilwe cwañi “kwa lisito”?

¹¹ Ka kuya ka bupolofita bobu kwa Genese 3:15, noha neika luma mwanaa musali “kwa lisito.” Bupolofita bo, nebutalelelizwe Satani hanaaitusisize Majuda ni Maroma kuli babulaye Mwanaa Mulimu. (Luka 23:13, 20-24) Sina feela mutu hanani sitombo kwa lisito hakona kupalelwa kuzamaya ka nakonyana, Jesu ni yena naasakoni kueza nto ifi kamba ifi ka nako yanaali mwa libita ka mazazi amalaalu.—Mat. 16:21.

12. Toho ya noha ikapyatiwa cwañi, mi ki lili foika pyatelwa?

¹² Kuli bupolofita bobuñozwi kwa Genese 3:15 butalelezwe, Jesu naasaswaneli kuzwelapili mwa libita. Libaka ki lifi? Bakeñisa  kuli bupolofita bo, bubonisa kuli mwana naakapyata toho ya noha. Taba ye ibonisa kuli sitombo sanaanani sona Jesu kwa lisito nesika fola. Mi nesifolile luli! Hamulaho wa mazazi amalaalu kuzwa fabulaelwa, Jesu azusiwa kwa bafu sina sibupiwa sa moya sesisa koni kushwa. Ka nako yatomile Mulimu, Jesu ukapyata toho ya Satani, ili kumuyundisa. (Maheb. 2:14) Babaka busa ni Kreste bakatusana ni yena kuyundisa lila za Mulimu kaufela fa lifasi, yena mwanaa noha.—Sin. 17:14; 20:4, 10. *

13. Kutalelezwa kwa bupolofita bo kulutusa cwañi?

¹³ Haiba mu batanga ba Mulimu babaineezi ku yena, uzibe musweli mwatusiwa ki kutalelezwa kwa bupolofita bo. Jesu naatile fa lifasi sina mutu. Naalikanyisize tulemeno twa Ndatahe ka kutala. (Joa. 14:9) Kacwalo, haiba luituta ka za Jesu, lukaziba Jehova Mulimu ni kumulata. Hape lutusiwa ki lituto za Jesu ni ketelelo yalufa ka kuitusisa puteho ya Sikreste kacenu. Ululutile kupila ka nzila yetabisa Jehova. Mi kaufelaa luna lwatusiwa ki lifu la Jesu, kona kulumiwa kwahae kwa lisito. Ka mukwa ufi? Jesu hanaazusizwe kwa bafu, Jehova naaamuhezi mali a Mwanaa hae sina sitabelo sesipetahalile, sesi ‘lukenisa kwa sibi kaufela.’—1 Joa. 1:7.

14. Luziba cwañi kuli bupolofita bwanaafile Jehova mwa simu ya Edeni nebusika talelezwa honafo feela? Mutaluse.

¹⁴ Zanaabulezi Jehova mwa simu ya Edeni libonisa kuli nekuka fita nako yetelele pili bupolofita bo, busika talelezwa kale ka kutala. Nekuka fita nako kuli musali abe ni mwana yasepisizwe, kuli Diabulosi abe ni balateleli, ni kuli kube ni sitoyo mwahalaa likwata zepeli zeo. Kuziba bupolofita bo kwalutusa bakeñisa kuli kululemusa kuli lifasi lelizamaiswa ki Satani likatoya batanga ba Jehova. Hamulaho wa nako, Jesu naafile balutiwa bahae temuso yeswana. (Mare. 13:13; Joa. 17:14) Kusina kukakanya, luiponezi bupolofita bo habutalelezwa, sihulu mwa lilimo ze 100 zefelile. Ka mukwa ufi?

15. Ki kabakalañi lifasi halitoile hahulu batanga ba Mulimu, kono ki kabakalañi halusa tokwi kusaba Satani?

¹⁵ Nakonyana kuzwa Jesu fabela Mulena yali Mesia ka 1914, Satani alundulwa kwa lihalimu. Ka nako ya cwale, haasakona kukutela kwa lihalimu, mi ulibelezi kuyundiswa. (Sin. 12:9, 12) Kono haki kuli uinzi feela kusina zaeza. Satani uhalifile hahulu, mi ulwanisa batanga ba Mulimu. (Sin. 12:13, 17) Kabakaleo, lifasi lizwezipili kutoya hahulu batanga ba Mulimu. Niteñi, halutokwi kusaba Satani ni babaswalisana ni yena. Kono luswanela kuba ni buikolwiso bobuswana bwanaanani bona Paulusi, hanaañozi kuli: “Haiba Mulimu u kwa lineku laluna, ki mañi yaka lulwanisa?” (Maro. 8:31) Lwakona kusepa hahulu Jehova kakuli sina mose lunyakisiselize, buñata bwa litaba zepolofitilwe kwa Genese 3:15 litalelelizwe.

16-18. Kuutwisisa bupolofita bobuñozwi kwa Genese 3:15, kutusize cwañi bo Curtis, bo Ursula, ni bo Jessica?

¹⁶ Sepiso yalufile Jehova yefumaneha kwa Genese 3:15 yakona kulutusa kutiyela muliko ufi kamba ufi olukona kukopana ni ona. Muzwale yabizwa Curtis yasebeza sina mulumiwa kwa Guam, utalusa kuli: “Nenikopani ni miliko yenetahisize kuli kunibele taata kuzwelapili kusepahala ku Jehova. Kono kunahanisisa bupolofita bobuñozwi  kwa Genese 3:15 neku nitusize kuzwelapili kusepa Ndate ya kwa lihalimu.” Bo Curtis banyolezwi hahulu nako yeo Jehova akafelisa miinelo yetaata kaufela yelukopana ni yona.

¹⁷ Kaizeli yabizwa Ursula yapila kwa Bavaria, utalusa kuli kuutwisisa litaba zeñozwi kwa Genese 3:15, neku mutusize kuba ni buikolwiso bwa kuli Bibele iñozwi ka kususumezwa ki moya wa Mulimu. Naaboni mo bupolofita bobuñwi kaufela buswalisanela ni bupolofita bo, mi taba yeo nei mususuelize hahulu. Kaizeli yo hape utalusa kuli: “Nenisusuelizwe hahulu hane nizibile kuli Jehova naangile muhato kapili-pili kuli atuse batu kuba ni sepo.”

¹⁸ Kaizeli yabizwa Jessica yapila kwa Micronesia utalusa kuli: “Nisahupula mone niikutwezi hane nilemuhile lwapili kuli nifumani niti! Bupolofita bobuñozwi kwa Genese 3:15 nebusweli kutalelezwa. Bunitusize kuziba kuli Jehova naasabati kuli lukopane ni miinelo yetaata yelukopana ni yona kacenu. Bupolofita bo hape bunitusize kuba ni buikolwiso bobutuna bwa kuli kusebeleza Jehova kukona kulutusa kuba ni tabo ka nako ya cwale mane ni kwapili.”

19. Ki kabakalañi halunani buikolwiso bwa kuli kalulo ya mafelelezo ya bupolofita bobu kwa Genese 3:15 ikatalelezwa?

¹⁹ Sina mose lunyakisiselize, liñolo la Genese 3:15 lisweli latalelezwa. Sekuzibahala hande kuli mwanaa musali ni mwanaa noha ki mañi. Jesu, yena kalulo yapili ya butokwa hahulu ya mwanaa musali, ufolile mi haasana sitombo kwa lisito, mi ka nako ya cwale, saali Mulena yamaata yasashwi. Jehova atuha afeza kuketa batu kaufela babali kalulo yabubeli ya mwanaa musali. Bakeñisa kuli kalulo yapili ya bupolofita bo italelelizwe, lunani buikolwiso bobutuna bwa kuli kalulo ya mafelelezo ya bupolofita bo, ili kupyatiwa kwa toho ya noha, ni yona ikatalelezwa. Kaniti luli, batanga ba Mulimu babasepahala bakaba ni tabo yetuna Satani haakayundiswa! Kacwalo, lusike lwazwafa. Mulimu waluna wasepahala. Ukaitusisa mwanaa musali kutahisa limbuyoti zeñata kwa “macaba kaufela a lifasi.”—Gen. 22:18.