Nebabonisizwe Lilato ka Likezo
BO YOMARA ni likaizeli zabona bo Marcelo ni bo Hiver bapila mwa munzi omunyinyani kwa Guatemala. Bo Yomara nebakalile kuituta Bibele ni Lipaki za Jehova, mi hamulaho wa nako, likaizeli zabona ni bona bakala kuituta Bibele. Kono nekunani butata bobuñwi. Kaufelaa bona babalaalu ki libofu mi nebasa zibi kubala litaba ze mwa muñolo wa libofu. Kabakaleo, bane baitutanga Bibele ni bona neba babalelanga litaba za kuituta ni litimana za mwa Bibele zebonisizwe mwa tuto yeo.
Kufumaneha kwa mikopano ya puteho ni kona nekuli taata. Ka ili bona feela, nebasa koni kuya kwa Ndu ya Mubuso yeneli bukaufi, ili musipili one ukona kuunga mizuzu ye 40. Kono mizwale mwa puteho nebalukisize kuyanga ni bona kwa mikopano kaufela ya puteho. Mi hane bakalile kufanga lingambolo za baituti kwa mukopano wa mwahalaa sunda, mizwale neba batusanga kupeta litaba zene baswanela kubulela.
Mwa May ka 2019, mikopano ya puteho neikalile kuezezwanga mwa munzi wabona. Ka nako yeo, bo mutu ni musalaa hae bane bali mapaina ba kamita nebatutezi mwa munzi wo. Nebaezize mone bakonela kaufela kuluta baituti babalaalu ba libofu bao kubala ni kuñola mwa muñolo wa libofu, nihaike kuli bo mutu ni musalaa hae bao nebasa zibi kubala ni kuñola mwa muñolo wa libofu. Nebaile kwa sifalana sa libuka kuyo ituta ka za muñolo wa libofu ni linzila za kuluta ka zona muñolo wo.
Bo Marcelo baalaba ka nako ya mukopano wa puteho
Hamulaho wa likweli lisikai feela, baituti ba Bibele babalaalu bao nese bakona kubala muñolo wa libofu ka bunolo mi kueza cwalo, nekuba tusize kueza zwelopili ya kwa moya. a Ka nako ya cwale, bo Yomara, bo Marcelo, ni bo Hiver ki mapaina ba kamita. Muzwale Marcelo usebeza sina sikombwa sa puteho. Sunda kaufela bapatehanga kueza misebezi ya kwa moya. Tukufalelo yabona mwa sebelezo yabona ku Jehova isusueza babañwi kueza nto yeswana.
Bo Yomara ni likaizeli zabona bababeli baitebuha hahulu lilato lebaboniswa ni tuso yebafiwa ki puteho. Bo Yomara bali: “Kuzwa feela folukopanela ni Lipaki za Jehova lwapili, balubonisize lilato la niti la Sikreste.” Bo Marcelo baekeza kubulela kuli: “Lunani balikani babande mwa puteho yaluna, mi luswalisana ni mizwale mwa lifasi kaufela babanani lilato.” Bo Yomara ni likaizeli zabona banyolelwa nako yebaka bona lifasi halifetulwa kuba paradaisi.—Samu 37:10, 11; Isa. 35:5.
a Broshuwa yeli Learn to Read Braille ilukiselizwe kutusa mutu yali sibofu kamba yanani butata bwa meeto kuituta kubala ni kuñola muñolo wa libofu.
Hape Mwendi Mwakona Kutabela Litaba Ze
MOLIITUSISEZWA LINUBU ZAMINA
Muñolo Ocincize Bupilo Bwa Batu Babañata
Halulukisangi feela lihatiso mwa muñolo wa libofu, kono hape lutusanga batu kuziba kubala muñolo wa libofu.
