KWA makalelo a silimo sa 2017, licaziba za sayansi nebabulezi kuli nekukaba ni linako zemaswe hahulu. Mwa kweli ya January, sikwata sesiñwi sa basayansi nesibulezi kuli lifasi nelika telwa ki kozi yetuna yesika bonwa kale. Ka kuitusisa waci yeswaniseza kuatumela kwa kozi yetuna yesika bonwa kale mwa lifasi kaufela, basayansi bashenyisize kanaka ka fa waci yeo kakabala mizuzu, mi bakashenyiselize kwapili ka lisekondi ze 30. Basayansi bao hape babulela kuli waci yeo ibonisa kuli kusiyezi feela mizuzu yemibeli ni lisekondi ze 30 kuli lizazi lifele. Ka mubulelelo omuñwi batalusa kuli kusiyezi feela nako yenyinyani hahulu kuli kozi yeo itahe ili kushutana ni mone kuiinezi mwa lilimo ze 60 zefelile!

Basayansi balela kuli silimo sa 2018 hasikafita, bakanyakisisa nako yesiyezi kuli lifasi lifele. Kana waci yeo hape ikabonisa za kozi yetuna yeo yetuha itela lifasi kaufela? Mubona cwañi? Kana lika zemaswe mwa lifasi halisa konahala kufeliswa? Mwendi kukona kumibela taata kualaba puzo yeo. Kakuli mane nihaiba bona licaziba habalumelelani fa taba yeo. Haki mutu kaufela yalumela kuli kwapili kukataha kozi yetuna mwa lifasi.

Mane batu babañata balumela kuli kwapili lika likaba hande. Batu bao mane babulela kuli banani bupaki bobubonisa kuli batu ni lifasi laluna halina kusinyeha kono bupilo bukaba bobunde kwapili. Kana mwaswanela kusepa taba yeo? Kana lika zemaswe mwa lifasi halisa konahala kufeliswa kamba zakonahala?