BAKEÑISA kushutana-shutana kwa lipuo za mwa lifasi ili zebato ba 7,000 kacenu, kukona kuba taata kuzamaya misipili, kulekisa lika zeñwi, kuituta, ni kubusa hande naha. Muinelo wo ubile teñi kuzwa kwaikale. Ka mutala, ibato ba ka silimo sa 475 B.C.E., hane kubusa Mulena Asuerusi (mwendi ili kutalusa Zekisesi Wapili), Maperesia nebafitisize litaelo za mulena kwa batu kaufela ba mwa mubuso wo, ili mwa “manaha a 127, ku kalela kwa India ku yo felela kwa Etopia. Kwa ñolelwa naha ye ñwi ni ye ñwi ka muñolelo wa yona, ni sicaba se siñwi ni se siñwi ka puo ya habo sona.” *

Kacenu, likopano zeñata, mane nihaiba mibuso, halikoni kulika kueza musebezi otaata cwalo. Kono kunani kopano iliñwi yekonile kueza musebezi wo. Lipaki za Jehova bahatisa limagazini, litaba za kuteeleza ni mavidio, ni libuka zeñata, kukopanyeleza cwalo ni Bibele, mwa lipuo zefitelela 750. Palo yeo ikopanyeleza ni lihatiso zebatoloka mwa lipuo za bosusu zebato ba 80. Kuzwa fo, Lipaki bahatisanga mifuta yeshutana-shutana ya lihatiso za libofu.

Nto yekomokisa kikuli Lipaki za Jehova habafumani pulofiti ya masheleñi mwa musebezi obaeza wo. Mane batoloki babona ni babeleki babañwi kaufela baeza musebezi wo ka kuitatela. Ki kabakalañi habaikataza kueza musebezi wo wa kutoloka mwa lipuo zeñata, mi baezanga cwañi musebezi wo?