Ba Banca Ba Buza Kuli

Ki kabakalañi ha lu swanela ku yanga kwa mikopano ya Sikreste?

Kana mwa ikolanga mikopano ya Sikreste?

Eni

Mu zwelepili ku ezanga lika ze mi tusa ku ikolanga mikopano

Batili

Mu swanela ku ezañi ka za teñi?

BIBELE i laela Bakreste kuli ba kopanange hamoho ku lapela Mulimu. (Maheberu 10:25) Kono ku cwañi haiba ha mu ikolangi mikopano? Mi ku cwañi haiba mu nahananga lika li sili ze ne mu ka kona ku eza kambe ne mu li kwa sibaka se siñwi? Mu eze licinceho ka ku lika ku itusisa ze ñwi za liakalezo ze fa makepe a latelela.

1. MU FUMANEHANGE KWA MIKOPANO KAMITA

Liñolo la butokwa: “Lu si ke lwa tuhela ku yanga kwa liputeho za luna . . . sina mo ba ezeza ba bañwi.”—Maheberu 10:25, Bibele ye Kenile, Hatiso ya 1984.

Ki kabakalañi ha mu swanela ku fumanehanga kamita kwa mikopano haili fo ha mu ikolangi yona? Kakuli, mane ku fumanehanga kamita kwa mikopano ki kona ko ku ka mi tusa ku ikola yona! Mu nahane taba ye: Mu kona ku ziba cwañi ku bapala hande papali ye ñwi ni ku i tabela haiba mu yanga feela ka siwela kwa ku ituta mwa ku i bapalela? Sisupo seo sa tusa ni kwa mikopano ya Sikreste. Silikani sa mina ni Jehova si ka tiya ha mu ka yanga kamita kwa mikopano. Mi ku ba ni silikani se si tiile ni Mulimu ku ka mi tusa ku ba ni takazo ya ku zwelapili ku yanga kwa mikopano!—Mateu 5:3.

Liakalezo: Hasamulaho wa mikopano, mu talusezange ni haiba mubuleli a li muñwi sisupo se mu itebuhile mwa ngambolo ya hae. Mu ñolange mwa buka ya mina sisupo se si kona ku mi tusa se mu izo ituta kwa mikopano. Mi ha u bona buñata bwa litaba ze lu ituta kwa mikopano li ama musebezi wa ku kutaza, mu itomele sikonkwani sa ku ba ni buikoneli bwa ku taluseza ba bañwi za tumelo ya mina. Ku eza cwalo, ku ka tahisa kuli litaba ze mu ituta kwa mikopano li be za butokwa hahulu ku mina.

Kalibe ya bizwa Kelsey u li: “Ku zwelela kwa bwanana ne ni lutilwe kuli mikopano ki ya butokwa mi ni tokwa ku fumanehanga teñi kamita. Ni ha ne ni sa li mwanana ne ni bonanga kuli ha ni tokwi ku shuta mikopano ku si na libaka. Ku fitela cwale, ni sa na ni mubonelo wo.”

Sisupo sa butokwa: Batu ba ba ikolanga hahulu mikopano ni ku tusiwa hahulu ki yona, ki ba ba fumanehanga teñi kamita!

 2. MU TEELEZANGE KA TOKOMELO

Liñolo la butokwa: “Mu tokomele mo mu teeleleza.”—Luka 8:18.

Licaziba ba bulela kuli buñata bwa batu ba ba teelezanga kwa lingambolo, mwa lizazi li li liñwi feela ba libalanga litaba ze ñata ze ba utwile. Ku cwañi haiba masheleñi a mina naa ka fela kapili-pili cwalo, kana ne mu si ke mwa eza se si ñwi kuli mu a bukeleze? Ka nzila ye swana, lu swanela ku eza ka mo lu konela kaufela ku hupula buñata bwa litaba ze lu utwa kwa mikopano.

Liakalezo: Mu inelange kwapili ni bashemi ba mina, ilikuli mu teelezange ka tokomelo. Mu ñolange lisupo ze mu ituta. Nihaike kuli batu ba itutanga ka linzila ze shutana-shutana, ku ñolanga lisupo ze mu ituta ku ka mi tusa ku isa mamelelo ya mina ku mubuleli mi lisupo ze mu ñola li ka mi tusa ku lundulula ze mu itutile.

Kalibe ya bizwa Kathleen u li: “Ne ku ni belanga taata ku teeleza ka tokomelo kwa mikopano, kono ni ezize licinceho. Ha ni li kwa mikopano, ni hupulanga libaka le ni yezi kwateñi. Haki taba feela ya ku ba ni mukwa wa ku yanga kwa mikopano, inge ku yanga kwa keleke. Ni yanga kwa mikopano ku yo lapela Mulimu ni ku yo ituta litaba ze kona ku ni tusa mwa bupilo bwa ka.”

Sisupo sa butokwa: Mutu ya ya kwa mukopano ni ku ina feela a sa teelezi ka tokomelo u swana sina mutu ya ya kwa mukiti wa lico ni ku yo kuta cwalo a sa ci se siñwi.

 3. MU ALABANGE NI KU EZANGA LIKA ZE ÑWI

Liñolo la butokwa: “Sipi i shemuna sipi, ni cwalo mutu u shemunana ni ya latana ni yena.”—Liproverbia 27:17.

Ka ku ba mukulwani, mu peta kalulo ya butokwa kwa mikopano ya puteho. Mu si ke mwa hupula kuli ku fumaneha kwa mikopano ni lika ze ñwi ze mu ezanga teñi ha li tusi se siñwi, ibe ku alaba ka nako ya ngambolo ya lipuzo ni likalabo kamba siango se mu ezanga ni balumeli ba bañwi.

Liakalezo: Mu itomele sikonkwani sa ku alabanga ni haiba feela hañwi ka nako ya ngambolo ya lipuzo ni likalabo. Mu itatelange ku kenisa Ndu ya Mubuso kamba ku eza misebezi ye miñwi ye tokwa ku eziwa pili mikopano isi ka kalisa kale, ye tokwa ku eziwa ka nako ya mikopano kamba hamulaho wa mikopano. Mu ambolange ni batu be mu sa ambolangi ni bona kamita.

Bo Miles ba li: “Ka nako ye ne ni na lilimo ze 16, ne ni itatezi ku zamaisanga lipangaliko za mulumo kwa mikopano ni ku lukisanga hande fa libulelelo. Misebezi yeo, ne i ni tahiselize ku ikutwa kuli ba bañwi ba ni tokwa, mi ne i ni susuelize ku fumanehanga kwa mikopano, ni ku fitanga ka ku itahanela. Ku ezanga cwalo, ne ku ni tusize ku lata hahulu ku ituta Bibele ni ku lapela Mulimu.”

Sisupo sa butokwa: Mu si ke mwa fumanehanga feela kwa mikopano kono mu ezange misebezi ye miñwi kwateñi. Ku alabanga kwa mikopano ni ku eza lika ze ñwi, kamita ku tusa hahulu ku fita ku fumanehanga feela kwateñi.

Mwa kona ku fumana litaba ze ñata ka za “Ba Banca ba Buza Kuli” fa sibaka sa luna sa fa Intaneti sa www.watchtower.org/ype

[Mbokisi/Maswaniso a fa likepe 11]

LWA MI MEMA!

Kana ne mu ka tabela ku

● Ituta niti ka za Mulimu?

● Ba mutu yo munde?

● Fumana balikani ba bande?

Mikopano ya Lipaki za Jehova ya kona ku mi tusa ku eza lika zeo, mane ni ze ñwi ze ñata! Lipaki za Jehova ba kopananga hamoho ku lapela Mulimu kwa Mandu A Mubuso a bona habeli mwa sunda. Ha ku ngiwangi likoleko, mi bapoti ba lukuluhile ku fumaneha teñi.

Mu si ke mwa yawa! Mandu A Mubuso haa swani ni likeleke ze mu fumanehile ku zona. Lipaki za Jehova ba isanga hahulu pilu kwa ku ituta Bibele kwa mikopano ya bona, mi mu ka ituta ka mo Linzwi la Mulimu li kona ku mi tuseza ku pila bupilo bo bunde!—Deuteronoma 31:12; Isaya 48:17.

Mutangana ya bizwa Sai u li: Ha ni kena mwa Ndu ya Mubuso lwa pili, ne ni komokile kuli ne ku si na milimu ya maswaniso mwateñi, ne ku si na mutu ya naa apezi sina muprisita, mi ne ku si na mutu ya naa ni kupile ku fa koleko. Ne ni amuhezwi ki mañi ni mañi, mi ne ni ikutwile ku lukuluha. Litaba ze ne nyakisisizwe kwa mukopano ne li utwisiseha hande mi ne li litaba ze utwahala. Ne li yona niti ye ne ni bata mwa bupilo bwa ka!

Kalibe ya bizwa Deyanira u li: Ne ni na ni lilimo ze 14 fo ni yela lwa pili kwa mukopano wa Lipaki za Jehova. Ne ni amuhezwi ki mañi ni mañi honafo feela. Ne ku bonahala kuli ne ba tabile luli ha ne ni fumanehile kwa mukopano wa bona, mi ne ba bonisize kuli ne ba ni iseza pilu. Bakeñisa ku ni amuhela hande cwalo ha ne ni ile kwateñi lwa pili, ne ni ikutwile ku lukuluha ku yo fumaneha kwa mikopano ya bona hape.

[Mbokisi fa likepe 12]

Mu bone litaba ze ka nyakisiswa kwa mukopano wa puteho o tatama. Mu kete kalulo i liñwi ya mukopano ye mu tabezi mi . . .

MU PUME NI KU KOPISA LITABA ZE

Mu taleleze litaba ze latelela pili mu si ka ya kale kwa mukopano.

Kalulo ya mukopano:

․․․․․

Ze ni bata ku ziba ka za taba ye:

․․․․․

Mu taleleze litaba ze latelela kalulo ya mukopano yeo ha se i filwe.

Ze ni itutile:

․․․․․

Litaba ze ni kona ku taluseza mubuleli, ili ze ni itebuhile mwa ngambolo ya hae:

․․․․․