Ki Kai ko lu Kona ku Bata Ketelelo?

KI MAÑI ya kona ku lu supeza nzila ya ku kondisa lika ka yona mwa bupilo—isiñi ka ku ya ka mubonelo wa lifasi, kono ka ku ya ka nzila ye kona ku tahiseza mutu ku ikutwa kuli u kondisize mwa bupilo? Sina mo ku taluselizwe mwa taba ye felile, ku kondisa lika mwa bupilo ku swanela ku kopanyeleza ku pila ka likuka za muzamao ze nde ni ku ba ni mulelo wa niti mwa bupilo—ili lika ze si ka itinga fa libubo, maluwo kamba m’ata.

Lu kona ku fumana kai likuka ni likalabo ze nde kwa lipuzo ka za mulelo wa bupilo? Kana ki ku luna bañi? Niti kikuli, ka ku ba batu ba ba si ka petahala, lu banga ni litakazo ze fosahezi ili ze kona ku lu libisa kwa ku eza likatulo ze maswe. (Genese 8:21) Kacwalo, buñata bwa batu ba zwelapili ku ndongwama lika za mbango zeo Bibele i bulela kuli ki “takazo ya nama, ni takazo ya meto, ni buikuhumuso bwa bupilo.” (1 Joani 2:16) Yeo haki yona nzila ye lu kona ku kondisa lika ka yona mwa bupilo, kono i ezisa batu ku nahana kuli ba kondisa lika, hailifo i ba tahiseza maswabi ni ku ba tokwisa tabo kwa mafelelezo. Kona libaka batu ba bañata ha ba bata ketelelo ku Mubupi wa luna kuli a ba tuse ku fumana likalabo kwa lipuzo ze tuna za mwa bupilo. *

Kana Lwa Swanela ku Bata Likalabo ku Mulimu?

Ki kabakalañi ha lu swanela ku bata likalabo ku Mubupi wa luna? Wa ziba libaka ha na lu bupile, ni mulelo o lu swanela ku ba ni ona mwa bupilo. Mi hape wa ziba mwa na bupezi mibili ya luna, minahano ya luna ni maikuto a luna. Kacwalo, Mulimu wa ziba likuka ze nde hahulu ze kona ku etelela batu mwa bupilo. Ku tuha fo, Mulimu ki yena mutala o mutuna wa ku bonisa lilato, mi kacwalo u bata kuli lu be ba ba tabile ni kuli lu kondise lika mwa bupilo. (1 Joani 4:8) Ki kai ko lu kona ku bata ketelelo ya hae ye lilato? Ki mwa Bibele ye Kenile yeo Mulimu na lu lukiselize ka ku itusisa banna ba ba bat’o ba 40 sina bañoli ba hae. * (2 Timotea 3:16, 17) Kono cwale lu kona ku sepa cwañi ketelelo ye fumaneha mwa buka ye?

Jesu Kreste yena muyemeli yo mutuna wa Mulimu na bulezi kuli: “Butali bwa Mulimu bu pakiwa ki likezo za bona.” (Mateu 11:19; Joani 7:29, Bibele ye Kenile, hatiso ya 1984) Butali bo bu tahiswa ki ku ziba likuka za Mulimu bu kona ku lu tusa ku kondisa lika mwa bupilo ni ku lu fa tabo ye sa feli, ili “linzila ze nde kamukana,” kono butali bwa batu ha bu ba tusangi ku kondisa lika mi bwa ba swabisanga.—Liproverbia 2:8, 9; Jeremia 8:9.

Ha mu nyakisise mutala wa banana ba ne ba bile teñi mwa lilimo za ma-1960 ba ne ba hanile ku latelela likuka ni milao ya linaha, kono ili ba ne ba shaela kozo ni lilato mwa lifasi kaufela. Banana ba bañata ne ba sa lati ku latelela milao ni ku zamaiswa ki ba bahulu, kabakaleo ne ba eza lika ze cwale ka ku itusisa milyani ye kola, mupilelo wa ku ikola minyaka mi ne ba na ni tukuluho ya ku ikezeza tobali. Kono kana luli mupilelo wa bona wo,  ne u bonisize kuli ne ba na ni butali? Kana mupilelo wo ne u konile ku bonisa batu mulelo sakata wa bupilo ni likuka ze nde ze ne ka ba tahiseza mwangalwa ni tabo ye sa feli? Litaba za kwakale li bonisa kuli mupilelo wo ne u si ka tahisa kuli batu ba cince ku ba ba bande kono ne u ekelize kwa ku shandauka kwa mizamao ye minde ya batu.—2 Timotea 3:1-5.

Ka ku shutana ni butali bwa batu, butali bo bu tomile fa Bibele kamita bu bonahezi ku ba ni tuso. (Isaya 40:8) Ha mu nze mu bala taba ye tatama, mu ka iponela buniti bwa taba yeo, kakuli i nyakisisa likuka za Bibele ze 6 ze tusize batu ba bañata mwa macaba kaufela ku ba ni tabo ya niti ni ku kondisa lika mwa bupilo ku si na taba kuli ki bafumi kamba ki babotana.

[Litaluso za kwatasi]

[Mbokisi fa likepe 23]

 LITUMELO ZE NYAZISEZA MUHUPULO WA KU KONDISA LIKA MWA BUPILO

Batu ba bañata ba lumela kuli Mulimu ha yo ni kuli bupilo bu itahezi fela ka ku ipilaula. Kambe kuli mubonelo wo ki wa niti, bupilo ne bu ka simuluha fa lika ze itahezi fela, mi buikatazo bwa luna bwa ku bata ku ziba libaka le lu pilela ni milao ye zamaisa pupo kamukana ne li ka ba za mbango.

Ba bañwi ba lumela kuli Mulimu na lu bupile mi hamulaho ni ku lu yubeka. Tumelo ye i bonisa kuli lu lindiala ni kuli niha lu lakaza ku ziba ze lu pilela, lu ikataza fela. Mu nyakisise taba ye: Mulimu na file folofolo ni folofolo butali bwa kuli i kone ku peta lika ze ñwi mwa bupilo bwa yona. Mi kona libaka butali bwa hae bo butuna ha bu bonahala mwa lika ze mwa lifasi. Kana mubupi ya swana na ka lu bupa fela ni ku lu tuhelela kuli lu pile ku si na ketelelo? Batili!—Maroma 1:19, 20.

Ka ku bulela kuli buikatazo bo lu eza ki bwa mbango, ili bwa ku bata ku ziba ze lu pilela ni milao ye zamaisa pupo kamukana, lituto za bo silatula-Mulimu li nyaziseza muhupulo wa ku kondisa lika mwa bupilo.

[Siswaniso se si fa likepe 23]

Butali bo bu fumanwa mwa Bibele bu pakiwa ki likezo za bona