Mubuso Okafelisa Ketululo
Batu babañata baitusisize likuka zebulezwi mwa litaba zefelile mi kueza cwalo kubatusize kuambuka moya wa kuketulula babañwi. Niti kikuli halukoni kufelisa ketululo ya mufuta kaufela ka maata aluna. Kono kana taba yeo italusa kuli ketululo haina kufeliswa?
Mubuso Omunde
Mibuso ya batu ipalezwi kufelisa ketululo. Kana taba yeo ibonisa kuli hakuna mubuso okona kufelisa ketululo?
Mubuso okafelisa ketululo utokwa
-
1. Kususueza batu kucinca mobanahanela ni mobaikutwela ka za batu babañwi.
-
2. Kutatulula butata bobutahisa kuli batu baketulule babañwi.
-
3. Kuba ni baeteleli babasepahala ili babaitebuha mañi ni mañi yebaetelela.
-
4. Kuswalisanisa batu babazwa mwa linaha kaufela.
Bibele ilukolwisa kuli Mulimu utomile mubuso ocwalo. Ki “Mubuso wa Mulimu.”—Luka 4:43.
Hamunyakisise zeuka eza Mubuso wo.
1. Ukaluta Batu Lituto Zende Hahulu
‘Babayahile mwa naha bakaituta kuluka.’—ISAYA 26:9.
“Kuluka kwa niti kukatahisa kozo, mi muselo wa kuluka kwa niti ikaba buiketo ni silelezo ka nako kaufela.”—ISAYA 32:17.
Timana ye ilulutañi? Mubuso wa Mulimu ukaluta batu lituto zende. Batu habaituta ni kuziba kutaluhanya zende ku zemaswe ni kuziba zelukile ni zesika luka, bakacinca mubonelo wabona ka za babañwi. Mañi ni mañi wabona ukalemuha kuli utokwa kulata batu ba mufuta kaufela.
2. Ukafelisa Matata Kaufela
Mulimu “ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.”—SINULO 21:4.
Timana ye ilulutañi? Mubuso wa Mulimu ukafelisa butuku kaufela bobutahiswa ki katulo yesika luka. Batu kaufela babaezizwe maswe habasana kubilaela kamba kuikalelwa kuli bakanyandiswa hape.
3. Ukabusa ka Kuluka
“Haana kuatula ka kuya ka sesibonwa ki meeto ahae, mi haana kufa nyazo ka kuya ka litaba feela zautwa mwa mazebe ahae. Ukaatula babotana ka kuya ka niti ya taba, mi ka kuluka, ukafa nyazo ka kuyemela babaishuwa mwa lifasi.”—ISAYA 11:3, 4.
Litimana ze lilulutañi? Jesu Kreste, Mulena wa Mubuso wa Mulimu wa kwa lihalimu, ukabusa ka kuluka mi haana kuketulula mutu ufi kamba ufi fa lifasi. Jesu haana kuketulula naha ifi kamba ifi, mi ukabona teñi kuli batu kaufela mwa lifasi balatelela milao yahae yelukile.
4. Ukatahisa Swalisano
Mubuso wa Mulimu uluta batu ‘kuba ni muhupulo oswana ni lilato leliswana inze baswalisani ka kutala ni kuba ni muhupulo oswana.’—MAFILIPI 2:2.
Timana ye ilulutañi? Batu babaka busiwa ki Mubuso wa Mulimu habana kubulela feela kuli baswalisana. ‘Bakaswalisana ka kutala’ bakeñisa kuli bakalatana hahulu luli.
