TUTO 35
Zekona Kulutusa Kuezanga Likatulo Zende
Kaufelaa luna lwaezanga likatulo mwa bupilo. Buñata bwa likatulo zeluezanga likona kucinca lika zeñwi mwa bupilo bwaluna mi mane likona kutahisa kuli lube ni silikani sesinde ni Jehova kamba kutokwa. Ka mutala, lwakona kueza katulo ya kolubata kupila, moluka ipiliseza, ni kuatula haiba lukakena mwa linyalo kamba kutokwa. Halueza likatulo zende, lwakona kupila bupilo bobunde ni kutabisa Jehova.
1. Mukona kuitusisa cwañi Bibele kuli mueze likatulo zende?
Musika eza kale katulo, mukupe Jehova kuli amituse mi mubatisise mwa Bibele kuli muzibe mwaangela taba yeo. (Mubale Liproverbia 2:3-6.) Mwa litaba zeñwi, Jehova ulufile milao yeluswanela kulatelela. Kacwalo, lutokwa kulatelela milao yeo kuli lueze likatulo zende mwa bupilo.
Kono mukona kuezañi haiba hakuna mulao mwa Bibele omibulelela zemuswanela kueza? Jehova uka mietelela ‘mwa nzila yemuswanela kuzamaya ku yona.’ (Isaya 48:17) Ka mukwa ufi? Kunani likuka zekona kumitusa. Likuka za mwa Bibele ki litaba za niti zebonisa mubonelo ni maikuto a Mulimu fa litaba zeshutana-shutana. Hañata lwazibanga mwaikutwela Mulimu fa taba yeñwi halubala taba yeñwi mwa Bibele. Haluutwisisa mwaikutwela Jehova fa taba yeñwi, lwakona kueza likatulo zeka mutabisa.
2. Ki lika mañi zemuswanela kunyakisisa pili musika eza kale katulo?
Bibele ibulela kuli: “Yabutali unahanisisa mihato yahae kaufela.” (Liproverbia 14:15) Taba ye italusa kuli pili lusika eza kale katulo, luswanela kunahanisisa lika zelubata kueza. Hamunze muketa zemubata kueza, muipuze kuli: ‘Ki sifi sikuka sa mwa Bibele seniswanela kusebelisa? Ki katulo mañi yeka nitusa kuba ni kozo ya mwa munahano? Likatulo zaka likatahisa kuli babañwi baikutwe cwañi? Mi sa butokwa ni kufita kikuli, kana katulo yenika eza ikatabisa Jehova?’—Deuteronoma 32:29.
Jehova unani tukelo ya kulutaluseza zeluswanela kueza. Haiba lulata milao ni likuka zahae ni kulilatelela, lukaba ni lizwalo lelinde. Lizwalo ki nto yelutusa kuziba zende ni zemaswe. (Maroma 2:14, 15) Haiba luluta lizwalo laluna hande, lukaeza likatulo zende mwa bupilo.
MUBATISISE
Mubone mo kulatelela likuka za mwa Bibele ni kuba ni lizwalo lelilutilwe hande kukona kumituseza hamueza likatulo.
3.Musebelise likuka za mwa Bibele
Likuka za mwa Bibele likona kulutusa cwañi halueza likatulo? Mubuhe VIDIO, mi kihona mukanyakisisa lipuzo zelatelela.
-
Tukululo ya kuiketela za kueza ki nto mañi?
-
Ki kabakalañi Jehova halufile tukuluho yeo?
-
Ki lika mañi zalufile Jehova zekona kulutusa kueza likatulo zende mwa bupilo?
Kuli muutwisise kuli sikuka sa mwa Bibele ki nto mañi, mubale Maefese 5:15, 16. Mi kihona mukanyakisisa momukona ‘kuitusiseza hande nako yamina’ kuli . . .
-
mubalange Bibele kamita.
-
mubonise tulemeno totunde mwa linyalo, mube mushemi yomunde, ni kuba mwana yomunde.
-
mufumanehange kwa mikopano ya puteho.
4. Mulute lizwalo lamina hande kuli limituse kuezanga likatulo zende
Kukona kumibela bunolo kueza katulo hakunani taelo yezwelela mwa Mañolo yebulela fa taba yeñwi. Kono kucwañi haiba hakuna zeibulela Bibele ka za katulo yemubata kueza? Mubuhe VIDIO, mi kihona mukanyakisisa puzo yelatelela.
-
Ki lika mañi zanaaezize kaizeli yolubuhile mwa vidio kuli alute lizwalo lahae kueza katulo yeneka tabisa Jehova?
Ki kabakalañi halusa swaneli kukupa babañwi kuli baluezeze likatulo zeluswanela kueza? Mubale Maheberu 5:14, mi kihona mukanyakisisa lipuzo zelatelela:
-
Nihaike kuli kubunolo kukupa babañwi kuli baluezeze likatulo, ki lika mañi zeluswanela kuiketela kueza luna beñi?
-
Ki lika mañi zekona kumitusa kuluta lizwalo lamina hande ni kueza likatulo zende?
Sina mapa, lizwalo laluna lilutusa kueza likatulo zende mwa bupilo
5. Mukuteke mazwalo a babañwi
Batu baezanga likatulo zeshutana-shutana. Lukona kubonisa cwañi kuli lwakuteka mazwalo a babañwi? Halunyakisiseñi miinelo yemibeli yelatelela:
Muinelo wapili: Kaizeli yalata kuikabisa hahulu kwa meeto ututela mwa puteho yeñwi ili mo likaizeli babañata basitatalanga kubona kaizeli yaikabisize hahulu kwa meeto.
Mubale Maroma 15:1 ni 1 Makorinte 10:23, 24, mi kihona mukanyakisisa lipuzo zelatelela:
-
Ka kuya ka litimana zeo, ki lika mañi zakona kueza kaizeli yabulezwi mwa muinelo wapili? Mukona kueza cwañi hamuli ni mutu yahana kueza lika zemubona mina kuli lilukile?
Muinelo wabubeli: Muzwale yomuñwi waziba kuli Bibele haihanisi kunwa bucwala ka kuitikanelela, kono uketa kusanwa bucwala. Umemiwa kwa kakitinyana ili koo alemuha kuli mizwale babañwi basweli banwa bucwala.
Mubale Muekelesia 7:16 ni Maroma 14:1, 10, mi kihona mukanyakisisa lipuzo zelatelela:
-
Ka kuya ka litimana zeo, ki lika mañi zakona kueza muzwale yabulezwi mwa muinelo wabubeli? Mukona kueza cwañi hamubona mutu yomuñwi inze aeza nto yeñwi yelisa milumelezi kueza lizwalo lamina?
Muswanela kuezañi kuli mueze likatulo zende?
1. Mukupe Jehova kuli amituse kueza likatulo zende.—Jakobo 1:5.
2. Mueze lipatisiso mwa Bibele ni mwa lihatiso zetomile fa Bibele kuli muzibe likuka zemuswanela kusebelisa. Hape mwakona kukupa Bakreste babahulile kwa moya kuli bamituse.
3. Munyakisise momuka ikutwela ni mobaka ikutwela babañwi hase muezize katulo yeñwi.
BABAÑWI BABULELANGA KULI: “Ninani tukelo ya kueza zenilata kaufela. Hanina taba ni mobanahanela babañwi.”
-
Ki kabakalañi haluswanela kunyakisisa mwaikutwela Mulimu ni batu babañwi?
LITABA KA BUKUSWANI
Lwakona kueza likatulo zende haiba lunyakisisa mwaikutwela Jehova ka za likatulo zelueza, ni kubona haiba likezo zaluna likatusa babañwi kamba kubatahiseza butata.
Mulundulule
-
Mukona kueza cwañi likatulo zetabisa Jehova?
-
Mukona kuluta cwañi lizwalo lamina?
-
Mukona kubonisa cwañi kuli mwakuteka mazwalo a babañwi?
MUBONE LITABA ZEÑWI
Mukona kueza cwañi likatulo zekona kumitusa kuba ni silikani sesitiile ni Mulimu?
“Muezange Liketo Zekutekisa Mulimu” (Tawala ya Mulibeleli, April 15, 2011)
Mubatisise litaba zeñwi zebonisa mwalufelanga likelezo Jehova.
Mubone zenetusize muuna yomuñwi kueza katulo yetaata.
Muitute zekona kumitusa kutabisa Jehova hakusina zeibulela Bibele ka za taba yeñwi.
“Kana ki Kamita Mutokwa Taelo ya Mwa Bibele?” (Tawala ya Mulibeleli, December 1, 2003)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
