TUTO 26
Ki Kabakalañi Batu Habanyanda?
Lika zemaswe haliezahalanga, batu babuzanga kuli: “Ki kabakalañi hakubile cwana?” Kono kwasusueza kuziba kuli Bibele inani likalabo kwa lipuzo kaufela!
1. Satani naatahisize cwañi lika zemaswe mwa lifasi?
Satani Diabulosi naakwenuhezi Mulimu. Bakeñisa kuli Satani naabata kubusa batu, naatahisize kuli batu bapili, bona bo Adama ni Eva, ni bona bakwenuhele Mulimu. Satani naaezize cwalo ka kupuma Eva. (Genese 3:1-5) Naatahisize kuli Eva anahane kuli kunani nto yeñwi yende yanaa mutima Mulimu. Satani naatalusa kuli batu nebakaba ni tabo hane basike bautwa Mulimu. Satani naapumile Eva lwapili ka kumubulelela kuli naasike ashwa. Kona libaka Bibele haibiza Satani kuli ki “lihata mi ki ndatahe buhata.”—Joani 8:44.
2. Ki lika mañi zene baketile kueza bo Adama ni Eva?
Jehova naafile bo Adama ni Eva zene batokwa kaufela. Naabataluselize kuca kwa likota kaufela za mwa simu ya Edeni kwandaa kota iliñwi feela. (Genese 2:15-17) Kono bona baca kwa kota yanaa bahanisize. Eva “akoyola muselo kwa kota ni kuuca.” Mi hasamulaho, Adama “ni yena aca.” (Genese 3:6) Nebasika utwa Mulimu. Bakeñisa kuli bo Adama ni Eva nebapetahalile, nekuli bunolo ku bona kueza zelukile. Kono hane baiketezi kusautwa Mulimu, nebaezize sibi ni kuhana kubusiwa ki Mulimu. Kueza cwalo nekutahisize kuli banyande hahulu.—Genese 3:16-19.
3. Zene baezize bo Adama ni Eva lilutahiselizeñi?
Bo Adama ni Eva hane baezize sibi, baba babasika petahala, mi nto yeo itahisize kuli batu kaufela babasimuluha ku bona babe babasika petahala. Bibele ibulela ka za Adama kuli: ‘Sibi sikeni mwa lifasi ka mutu alimuñwi mi lifu litile ka sibi, mi ka mukwa ocwalo lifu layamba kwa batu kaufela.’—Maroma 5:12.
Kunani lika zeñata zetahisa kuli lukopane ni manyando. Lukopananga ni manyando amañwi kabakala likatulo zemaswe zeluezanga. Fokuñwi lukopananga ni manyando kabakala likatulo zemaswe zebaezanga babañwi. Mi fokuñwi lwanyandanga kabakala kuli luipumananga mwa sibaka sesiñwi hakuezahala nto yeñwi yemaswe.—Mubale Muekelesia 9:11.
MUBATISISE
Munyakisise mwaikutwela Mulimu ka za miinelo yetaata yelukopana ni yona mwa lifasi kacenu, ni libaka haisi yena yalutahiseza manyando.
4. Ki mañi yalutahiseza manyando?
Batu babañata balumela kuli Mulimu ki yena yabusa lifasi. Kana taba yeo ki ya niti? Mubuhe VIDIO.
Mubale Jakobo 1:13 ni 1 Joani 5:19, mi kihona mukanyakisisa puzo yelatelela:
-
Kana Mulimu ki yena yalutahiseza manyando elukopana ni ona?
5. Munyakisise zeezahala kabakala kubusiwa ki Satani
Mubale Genese 3:1-6, mi kihona mukanyakisisa lipuzo zelatelela:
-
Ki taba mañi ya buhata yanaabulezi Satani?—Mubone litimana 4 ni 5.
-
Ki nto mañi yanaabulezi Satani yebonisa inge kuli Mulimu utima batu lika zeñwi zende?
-
Kana zanaabulezi Satani libonisa kuli batu batokwa kubusiwa ki Jehova kuli babe ni tabo?
Mubale Muekelesia 8:9, mi kihona mukanyakisisa puzo yelatelela:
-
Bakeñisa kuli Jehova haki yena yabusa lifasi, ki lika mañi zeezahezi?
-
Adama ni Eva nebapetehile mi nebapila mwa Paradaisi. Kono nebautwile Satani ni kukwenuhela Jehova
-
Adama ni Eva hase bakwenuhezi Mulimu, batu bakala kueza sibi, kunyanda, ni kushwa
-
Jehova ukafelisa sibi, manyando, ni lifu. Batu bakapetahala hape ni kupila mwa Paradaisi
6. Jehova waziba manyando elukopana ni ona
Kana Mulimu wautwisisa moluikutwela ka za manyando elukopana ni ona? Munyakisise zanaañozi Mulena Davida ni muapositola Paulusi. Mubale Samu 31:7 ni 1 Pitrosi 5:7, mi kihona mukanyakisisa puzo yelatelela:
-
Muikutwa cwañi kuziba kuli Jehova wabona manyando emukopana ni ona ni kuli wamiisa pilu?
7. Mulimu ukafelisa manyando kaufela ebakopana ni ona batu
Mubale Isaya 65:17 ni Sinulo 21:3, 4, mi kihona mukanyakisisa puzo yelatelela:
-
Ki kabakalañi kuziba kuli Mulimu ukafelisa lika kaufela zemaswe zelutahiseza manyando haku luomba-omba?
Kana mwaziba?
Satani hanaabulezi buhata bwapili, naasawanile Jehova. Naasinyize libizo la Jehova ka kubonisa kuli haki mubusi yomunde mi haana lilato. Jehova hakafelisa manyando kaufela kwapili, ukakenisa libizo lahae. Kueza cwalo kukabonisa kuli ki yena feela mubusi yomunde ka kufitisisa. Taba ya kukanyiswa kwa libizo la Jehova, ki yona nto yetuna hahulu mwa pupo kaufela.—Mateu 6:9, 10.
BABAÑWI BABULELANGA KULI: “Mulimu naalukisize kuli lukopanange ni manyando.”
-
Mukona kualaba cwañi mutu yabulela cwalo?
LITABA KA BUKUSWANI
Satani Diabulosi ni bashemi baluna bapili ki bona baba lutahiselize manyando fa lifasi. Jehova waziba moluikutwela ka za manyando elukopana ni ona, mi utuha afelisa manyando ao.
Mulundulule
-
Satani Diabulosi naabulelezi Eva taba mañi ya buhata?
-
Ki lika mañi zelukopana ni zona bakeñisa kuli bo Adama ni Eva nebakwenuhezi Mulimu?
-
Luziba cwañi kuli Mulimu wautwisisa moluikutwela ka za manyando aluna?
MUBONE LITABA ZEÑWI
Mubone zelitalusa linzwi la sibi mwa Bibele.
Muitute zeñata ka za taba yanaazusize Satani Diabulosi mwa simu ya Edeni.
“Ki Kabakalañi Mulimu Hatuhelela Manyando Kuba Teñi?” (Tawala ya Mulibeleli, January 1, 2014)
Munyakisise likalabo zeomba-omba zealaba puzo yetaata.
“Ki Kabakalañi Mulimu Hanaatuhelezi Kuli Batu Babañata Babulaiwe?” (Taba ya fa webusaiti)
Mubone zanaaitutile muuna yomuñwi ka za manyando anaaiponela mwa sibaka sapila ku sona.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
