TUTO 15
Jesu ki Mañi?
Jesu ki yomuñwi wa batu babazibahala hahulu babakile bapila fa lifasi. Batu babañata baziba kuli nekunani mutu yanaabizwa Jesu, kono baziba litaba zenyinyani ka za hae mi hape banani mibonelo yeshutana-shutana ka za Jesu. Kono ki lika mañi zeibulela Bibele ka za Jesu?
1. Jesu ki mañi?
Jesu ki sibupiwa sa moya sesimaata sesipila kwa lihalimu. Jehova Mulimu naabupile Jesu pili, mi hasamulaho kihona abupa lika zeñwi kaufela. Kona libaka Jesu habizwa kuli ki “mweli wa pupo kaufela.” (Makolose 1:15) Bibele ibiza Jesu kuli ki ‘Mwanaa Mulimu wa libanda’ kakuli Jesu ki yena feela yanaabupilwe ki Jehova anosi. (Joani 3:16) Jesu naasebelisani ni Ndatahe, yena Jehova, kubupa lika zeñwi kaufela. (Mubale Liproverbia 8:30.) Hape uzwelapili kusebelisana hande ni Jehova. Mi usebeza ka busepahali sina mubuleli wa Mulimu, kamba “Linzwi,” ili kushaela litaba ni litaelo za Mulimu.—Joani 1:14.
2. Ki kabakalañi Jesu hanaatile fa lifasi?
Ibato ba lilimo ze 2,000 kwamulaho, Jehova ka makazo naaitusisize moya wahae okenile kushimbululela bupilo bwa Jesu yanaali kwa lihalimu ku mwalyanjo yabizwa Maria. Kueza cwalo nekutahisize kuli Jesu apepwe sina mutu fa lifasi. (Mubale Luka 1:34, 35.) Jesu naatile fa lifasi sina Mesia yanaasepisizwe kamba Kreste kuli apilise batu. a Jesu hanaatile fa lifasi, naatalelelize bupolofita kaufela bone bubonisa kuli neli yena Mesia, ili kutusa batu kuli bazibe kuli ki yena “Kreste, Mwanaa Mulimu yapila.”—Mateu 16:16.
3. Jesu uinzi kai ka nako ya cwale?
Jesu hasaashwile, Mulimu naamuzusize kwa bafu sina sibupiwa sa moya mi akutela kwa lihalimu. Teñi koo, “Mulimu amupahamisa hahulu nikufita.” (Mafilipi 2:9) Cwale Jesu saanani situlo sesituna—seli yena wabubeli kuzwa ku Jehova.
MUBATISISE
Munyakisise litaba zeñata ka za Jesu zebonisa kuli ki mañi luli ni libaka kuituta ka za hae hakuli kwa butokwa.
4. Jesu haki Mulimu Yamaata Kaufela
Bibele iluta kuli nihaike kuli Jesu ki sibupiwa sesimaata kwa lihalimu, ueza lika kaufela zamubulelela Ndatahe, yena Jehova Mulimu. Ki kabakalañi halubulela cwalo? Mubuhe VIDIO kuli mubone zeibulela Bibele ka za mwashutanela Jehova ni Jesu.
Mañolo alatelela alutusa kuutwisisa shutano yemwahalaa Jehova ni Jesu. Mubale liñolo ni liñolo lelibonisizwe mi kihona mukanyakisisa lipuzo zelatelela.
Mubale Luka 1:30-32.
-
Lingeloi nelitalusize cwañi shutano yemwahalaa Jesu ni Jehova Mulimu, yena “Yapahami ka Kufitisisa”?
Mubale Mateu 3:16, 17.
-
Ka nako yanaakolobezwa Jesu, linzwi lene lizwa kwa lihalimu nelibuleziñi?
-
Munahana kuli ki mañi yanaabulezi manzwi ao?
Mubale Joani 14:28.
-
Ki mañi yomuhulu ni yanani maata mwahalaa ndate ni mwana?
-
Jesu naatalusañi hanaabizize Jehova kuli ki Ndatahe?
Mubale Joani 12:49.
-
Kana Jesu uikutwa kuli yena ni Ndatahe ki mutu alimuñwi? Mubona cwañi?
5. Zebonisa kuli Jesu neli yena Mesia
Mwa Bibele kunani litaba zeñata za bupolofita zeneka tusa batu kuziba Mesia, yena yanaaketilwe ki Mulimu kuli apilise batu. Mubuhe VIDIO yebonisa bupolofita bobuñwi bwanaatalelelize Jesu hanaatile fa lifasi.
Mubale litaba za bupolofita, mi kihona mukanyakisisa lipuzo zelatelela:
Mubale Mika 5:2 kuli muzibe kwanaaka pepelwa Mesia. b
-
Kana kupepwa kwa Jesu nekutalelelize bupolofita bo?—Mateu 2:1.
Mubale Samu 34:20 ni Zakaria 12:10 kuli mubone litaba zebulela ka za lifu la Mesia.
-
Kana bupolofita bo nebutalelelizwe? —Joani 19:33-37.
-
Kana munahana kuli Jesu ki yena yanaatahisize kuli bupolofita bo butalelezwe?
-
Taba yeo imitusa kuutwisisañi ka za Jesu?
6. Kuituta ka za Jesu kwalutusa
Bibele ibonisa libaka hakuli kwa butokwa kuituta ka za Jesu ni zabata Mulimu kuli Jesu aeze. Mubale Joani 14:6 ni 17:3, mi kihona mukanyakisisa puzo yelatelela:
-
Ki kabakalañi halutokwa kuituta ka za Jesu?
Zanaaezize Jesu lilutusize kuli lukone kuba balikani ba Mulimu. Naalutile batu niti ka za Jehova, mi ka yena, lwakona kufumana bupilo bobusa feli
BABAÑWI BABULELANGA KULI: “Lipaki za Jehova habalumeli ku Jesu.”
-
Mukona kualaba cwañi mutu yabulela cwalo?
LITABA KA BUKUSWANI
Jesu ki sibupiwa sa moya sesimaata. Ki Mwanaa Mulimu mi hape ki yena Mesia.
Mulundulule
-
Ki kabakalañi Jesu habizwa kuli “mweli wa pupo kaufela”?
-
Pili Jesu asika taha kale fa lifasi, ki musebezi mañi wanaaezanga?
-
Luziba cwañi kuli Jesu ki Mesia?
MUBONE LITABA ZEÑWI
Muitute zeñata ka za buikalabelo bwa Jesu ka kuba yena Mesia.
“Kana Bupolofita Bobubulela ka za Mesia Bwabonisa Kuli Jesu Neli Yena Mesia?” (Taba ya fa webusaiti)
Munyakisise ka za haiba Bibele iluta kuli Mulimu naabile ndatahe Jesu sina feela bashemi ba baana mobabelanga ni bana ba kuipepela.
“Ki Kabakalañi Jesu Habizwa Kuli ki Mwanaa Mulimu?” (Taba ya fa webusaiti)
Munyakisise libaka tuto ya Silaalu haisa lumelelani ni zeiluta Bibele.
“Kana Jesu ki Mulimu?” (Tawala ya Mulibeleli, April 1, 2009)
Mubale ka za mo musali yomuñwi naacincelize bupilo bwahae hamulaho wa kuituta zeibulela Bibele ka za Jesu.
“Musali wa Mujuda Utalusa Libaka Hanaanyakisisize Sinca Tumelo Yahae” (Muzuhe!, May 2013)
b Mubone Litaluso za kwa mafelelezo 2 kuli mubale bupolofita bobubulela ka za nako luli yanaaka taha Jesu mwa lifasi.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
