TUTO 12
Ki Lika Mañi Zeka Mitusa Kuzwelapili Kuituta Bibele?
Kuituta Bibele kwatusa kono fokuñwi kukona kuba taata kueza cwalo. Mwendi mukana mwanahana kuli hamuna kukona kuzwelapili kuituta Bibele. Kono ki kabakalañi hamuswanela kuzwelapili kuituta Bibele? Mi ki lika mañi zekona kumitusa kuzwelapili kuituta Bibele kusina taba ni miinelo yetaata yemukona kukopana ni yona?
1. Ki kabakalañi hamutokwa kuituta Bibele?
“Linzwi la Mulimu lapila mi linani maata.” (Maheberu 4:12) Bibele yakona kumitusa bakeñisa kuli litaba ze mwateñi libonisa mwaikutwela Mulimu ka za mina. Litaba zeo hape lika mitusa kuba ni zibo, butali mane ni sepo. Sa butokwa ni kufita kikuli kuituta Bibele kuka mitusa kuba mulikanaa Jehova. Mi hape kuka mitusa kupila bupilo bobunde.
2. Ki kabakalañi hakuli kwa butokwa kulemuha kuli litaba za niti za mwa Bibele zakona kumitusa?
Litaba za niti za mwa Bibele liswana sina maluwo a butokwa. Kona libaka Bibele hailususueza ‘kuitekela niti ni kusa ilekisa.’ (Liproverbia 23:23) Kuziba kuli litaba za niti za mwa Bibele zakona kulutusa, kukatahisa kuli lueze molukonela kaufela kuzwelapili kuituta Bibele niha lukona kukopana ni miinelo yetaata.—Mubale Liproverbia 2:4, 5.
3. Jehova ukona kumitusa cwañi kuzwelapili kuituta Bibele?
Ka kuba Mubupi wamina yamaata ni Mulikanaa mina, Jehova ubata kumitusa kuli muitute ka za hae. Wakona kumifa “takazo ni maata a kuunga muhato.” (Mubale Mafilipi 2:13.) Kacwalo haiba fokuñwi muikutwanga kuli kutaata kuituta ni kusebelisa zemuituta, Jehova wakona kumitusa. Hape wakona kumitusa haiba mutokwa maata a kutiyela miinelo yetaata yemukopana ni yona. Mukupange Jehova mwa tapelo kuli amituse kuzwelapili kuituta Bibele.—1 Matesalonika 5:17.
MUBATISISE
Munyakisise zekona kumitusa kuitutanga Bibele niha mupatehile hahulu kamba hamulwaniswa ki babañwi. Mi mubone mwakona kumituseza Jehova kuzwelapili kuituta Bibele.
4. Mubone teñi kuli kuituta Bibele ki nto ya butokwa mwa bupilo bwamina
Fokuñwi lukona kuikutwa kuli lupatehile hahulu mi haluna nako ya kuituta Bibele. Ki lika mañi zekona kulutusa? Mubale Mafilipi 1:10, mi kihona mukanyakisisa lipuzo zelatelela:
-
Ki lika mañi zemuunga kuba “za butokwa hahulu nikufita” mwa bupilo bwamina?
-
Mukona kubonisa cwañi kuli muunga tuto yamina ya Bibele kuba ya butokwa?
-
Haiba mukalisa kubeya mushabati mwa hemele ni kubeya macwe fahalimu, macwe ao haana kukwana mwateñi
-
Kono haiba mukalisa kubeya macwe pili, mukakona kubeya mushabati omuñata mwa hemele. Ka nzila yeswana, haiba mueza pili “lika za butokwa hahulu nikufita” mwa bupilo bwamina, mukakondisa mi mukaba ni nako yeñata ya kueza lika zeñwi
Kuituta Bibele kulutusa kuziba za Mulimu ni kumulapela. Mubale Mateu 5:3, mi kihona mukanyakisisa puzo yelatelela:
-
Lukona kutusiwa cwañi haiba luunga tuto ya Bibele kuba ya butokwa mwa bupilo bwaluna?
5. Muitiise hamukopana ni twaniso
Fokuñwi babañwi bakona kumizwafisa kuli musike mwaituta Bibele. Munyakisise mutala wa bo Francesco. Mubuhe VIDIO, mi kihona mukanyakisisa lipuzo zelatelela.
-
Mwa vidio yemubuhile, balikani ba bo Francesco ni ba lubasi lwabona nebaezize cwañi, bo Francesco hane babataluselize kuli baituta Bibele?
-
Bo Francesco nebafuyauzwi cwañi kabakala kuitiisa kwabona?
Mubale 2 Timotea 2:24, 25, mi kihona mukanyakisisa lipuzo zelatelela:
-
Ba lubasi ni balikani bamina baikutwa cwañi ka za litaba zemusweli kuituta?
-
Ka kuya ka litimana ze, ki lika mañi zemuswanela kueza haiba mutu yomuñwi hatabeli kuli muzwelepili kuituta Bibele? Mi ki kabakalañi?
6. Muitinge ku Jehova kuli amituse
Silikani saluna ni Jehova hasizwelapili kutiya, lukabata hahulu kumutabisa. Nihakulicwalo, kukona kulubela taata kueza licinceho mwa bupilo kuli lupile ka nzila yetabisa Jehova. Haiba kona momuikutwela cwalo, musike mwazwafa. Jehova uka mitusa. Mubuhe VIDIO, mi kihona mukanyakisisa lipuzo zelatelela.
-
Ka kuya ka zemubuhile mwa vidio, ki licinceho mañi zene baezize bo Jim kuli batabise Jehova?
-
Muitutileñi kwa mutala wabona?
Mubale Maheberu 11:6, mi kihona mukanyakisisa lipuzo zelatelela:
-
Jehova ukafuyaula cwañi “babatukufalezwi kumubata” ili babaeza mobakonela kaufela kumuziba ni kumutabisa?
-
Taba yeo imilutañi ka za mwaikutwela Jehova habona buikatazo bomueza bwa kuituta Bibele?
MUTU YOMUÑWI UKONA KUMIBUZA KULI: “Ki kabakalañi hamuituta Bibele?”
-
Mukona kualaba cwañi?
LITABA KA BUKUSWANI
Nihaike kuli kuituta Bibele haki nto yebunolo, kwakona kumitusa kuikola bupilo kuya kuile. Muzwelepili kuitinga ku Jehova mi uka mifuyaula.
Mulundulule
-
Ki kabakalañi litaba za niti za mwa Bibele halikona kumitusa?
-
Mukona kubonisa cwañi kuli ‘mwalemuha lika za butokwa hahulu nikufita’?
-
Ki kabakalañi hamuswanela kukupa Jehova kuli amituse kuzwelapili kuituta Bibele?
MUBONE LITABA ZEÑWI
Munyakisise linzila zeene zetusize batu babañata kuitusisa nako yabona hande.
“Momukona Kuitusiseza Hande Nako Yamina” (Muzuhe!, February 2014)
Mubone mo Jehova naatuselize musali yomuñwi ili yo muunaa hae naasatabeli kubona musalaa hae inze alapela Mulimu.
Mubone mo muuna yomuñwi naatuselizwe ki musalaa hae yanaazwezipili kuitiisa.
Lipaki za Jehova fokuñwi batamelezwanga kuli bafapahanyanga mabasi. Kono kana taba yeo ki ya niti?
“Kana Lipaki za Jehova Batahisa Lifapahano Mwa Mabasi A Batu Kamba Baatiisa?” (Taba ya fa webusaiti)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
