Salumoni hasaabile mulena wa Isilaele, Jehova ki hamubuza kuli: ‘Ki nto mañi yeubata kuli nikufe?’ Salumoni aalaba, ali: ‘Nisali mwanana, mi hanizibi zenieza. Unife butali kuli nibabalele hande batu bahao.’ Jehova kihaa li: ‘Bakeñisa kuli ukupile kuba ni butali, nikatahisa kuli ube wena muuna yatalifile hahulu mwa lifasi. Hape nika kufa sifumu sesiñata hahulu. Mi haiba umamela milao yaka, ukapila ka nako yetelele.’

Salumoni akala kuyaha tempele. Naaitusisize gauda yende hahulu, silivera, likota, ni macwe. Baana ni basali babañata bane baziba hande musebezi nebatusize mwa musebezi wa kuyaha tempele. Hamulaho wa lilimo ze 7, tempele yafezwa kuyahiwa kuli ifiwe ku Jehova. Tempele yeo neinani aletare, mi nekunani matabelo fateñi. Salumoni akubama fapilaa aletare mi alapela, ali: ‘Wena Jehova, tempele ye haki yetuna hahulu ku wena, mi haki yende hahulu ku wena, kono uamuhele sebelezo yaluna mi uteeleze kwa litapelo zaluna.’ Jehova naangile cwañi tempele yeneyahilwe ni tapelo ya Salumoni? Salumoni asafeza feela kulapela, mulilo wazwa kwa lihalimu mi wacisa matabelo anaabeilwe fa aletare. Jehova naatabezi tempele yeo. Maisilaele nebatabile hahulu hane baboni kezo yeo.

Mulena Salumoni naazibahala kuba ni butali mwa Isilaele kaufela mane nihaiba kwa libaka za kwahule. Batu nebatahanga ku Salumoni kuli abatuse kutatulula matata abona. Nihaiba mulena wamusali wa kwa Sheba naatile ku yena kuto mulika ka lipuzo zetaata. Hanaautwile likalabo za Salumoni, kihaa li: ‘Nenisika lumela litaba zene banibulelezi batu ka za hao, kono niboni kuli unani butali hahulu kufita mone babulelela. Mulimu wahao, yena Jehova, ukufuyauzi.’ Batu mwa naha ya Isilaele nebapila bupilo bobunde mi nebatabile. Kono nekutuha kuezahala nto yeñwi.