Mwa lihaulo la ndu yahae mwa Jizireele, Mulena Akabe naabonanga simu ya likota za veine ya muuna yanaabizwa Nabote. Akabe naabata simu yeo, mi naalikile ka taata kuli aleke simu yeo ku Nabote. Kono Nabote ahana kumulekisa kakuli Mulao wa Jehova neuhanisa kulekisa mubu wayolile mutu. Kana Akabe naakutekile Nabote kabakala kueza nto yelukile? Batili. Akabe naanyemile hahulu. Naafilikani hahulu kuli mane naasalati kuzwa mwa muzuzu wahae, mi ahana ni kuca lico.

Musalaa Akabe, yena Muoli Jezabele yasituhu, kihaa li ku yena: ‘Ki wena mulena wa Isilaele. Wakona kuba ni lika kaufela zeubata. Nika kufa simu yeubata.’ Kihaa ñolela baana-bahulu ba muleneñi mañolo, kubataluseza kuli batameleze Nabote kuli ukutile Mulimu ni kuli bamupobaule ka macwe kufitela ashwa. Baana-bahulu baeza zanaa babulelezi Jezabele, mi cwale kihona ali ku Akabe: ‘Nabote ushwile. Simu ya likota za veine ki yahao.’

Nabote nesi feela yena anosi yanaabulailwe ki Jezabele asina mulatu. Naabulaile batu babañata bane balata Jehova. Naalapela milimu ya maswaniso ni kueza lika zeñwi zemaswe. Jehova naaboni lika kaufela zemaswe zanaaezize Jezabele. Ki lika mañi zanaaka eza ka za hae?

Akabe hasaashwile, mwanaa hae wamushimani yabizwa Jorami, amuyola fa bulena. Jehova aluma muuna yabizwa Jehu kuyo fa koto Jezabele ni lubasi lwahae.

Jehu akwela koloi yahae kuliba kwa Jizireele, kwanaapila Jezabele. Jorami ataha ka koloi kuto kopana ni Jehu mi amubuza kuli: ‘Kana kunani kozo mwahalaa ka ni wena?’ Jehu kihaa li: ‘Hakuna kuba ni kozo ibile feela maho, yena Jezabele, aeza lika zemaswe.’ Jorami afetula koloi yahae kuli amate. Kono Jehu akunupa Jorami ka lisho, mi ashwa.

 Hasamulaho, Jehu aya kwa ndu ya Jezabele. Jezabele hanaautwile kuli Jehu wataha, aipenta kwa meeto, akabisa milili yahae, mi amulibelela kwa muzuzu wa kwahalimu mwa lihaulo. Jehu hafita, Jezabele amulumelisa ka buhali. Jehu kihaa huweleza batanga ba Jezabele bane bayemi kwatuko ni yena kuli: “Hamu munepele fafasi!” Bakasheza Jezabele mwa lihaulo, mi awela fafasi ni kushwa.

Hamulaho wa zeo, Jehu abulaya bana babashimani ba Akabe ba 70 mi azusa bulapeli bwa Baale mwa naha. Kaniti luli, Jehova waziba lika kaufela, mi ka nako yeswanela wafanga koto batu babaeza zemaswe!