Likande la mone isinyelizwe Jeriko lahasanela kwa libaka zeñwi za mwa Kanana. Malena ba Makanana bautwana kuli balwanise Maisilaele. Kono Magibioni bona bautwana kueza nto yeñwi yeshutana ni malena babañwi kaufela. Baapala liapalo zepazauhile, baya ku Joshua mi bayoli ku yena: ‘Luzwa kwa naha ya kwahule. Luutwile ka za Jehova ni zamiezelize mwa Egepita ni mwa Moabi. Haike mulusepise kuli hamuna kululwanisa, mi lukaba batanga bamina.’

Joshua naalumezi zene babulezi mi balumelelana kuli habana kubalwanisa. Hamulaho wa mazazi amalaalu kuzwa fo, aziba kuli nebasa zwi kwa naha ya kwahule. Nebazwa kwa naha ya Kanana. Joshua abuza Magibioni kuli: ‘Ki kabakalañi hane mulupumile?’ Baalaba kuli: ‘Nelusaba! Lwaziba kuli Jehova Mulimu wamina wamilwanela. Shangwe, musike mwalubulaya.’ Joshua naatalelelize sepiso yahae mi naabatuhelezi kuli bapile.

Hamulahonyana wa fo, malena ba Makanana baketalizoho ni limpi zabona balela kuyo lwanisa Magibioni. Joshua ni mpi yahae  bazamaya busihu kaufela kuli bayo balamulela. Ndwa neikalile habusa kakusasana. Makanana bakala kubaleha. Kone bamatela kaufela Jehova abawiseza macwe amatuna. Cwale Joshua akupa Jehova kuli ayemise lizazi. Ki kabakalañi hanaakupile Jehova kuli ayemise lizazi hailifo lizazi lali kuba liyeme? Kakuli Joshua naasepile Jehova. Lizazi nelisika likela kufitela Maisilaele batula malena ba Makanana ni lila zabona.