Mushe naapilile lilimo ze 40 mwa naha ya Midiani. Naanyezi mi naanani bana. Zazi leliñwi inze alisa lingu zahae kwatuko ni Lilundu la Sinai, abona nto yekomokisa hahulu. Sicacani sa miutwa nesituka mulilo kono nesisaci! Mushe hanaaile kwatuko ni sona kuli ayo bona zeneezahala, autwa linzwi kuzwelela mwa sicacani, lelili: ‘Mushe! Usike wasutelela fakaufi. Tubula makatulo ahao, kakuli sibaka fouyemi ki sibaka sesikenile.’ Neli Jehova yanaaambola ni yena ka kuitusisa lingeloi.

Mushe naasabile, kacwalo kihaa ikwahela kwa pata. Linzwi ki halili: ‘Niboni mobanyandela Maisilaele. Nika balamulela kwa Maegepita ni kubaisa kwa naha yende. Ki wena yakaetelela batu baka kubazwisa mwa Egepita.’ Kaniti luli Mushe naakomokisizwe hahulu ki litaba zanaautwile!

Mushe abuza kuli: ‘Niswanela kualaba cwañi haiba batu banibuza yanilumile?’ Mulimu amualaba kuli: ‘Ubabulelele kuli Jehova, Mulimu wa Abrahama, Mulimu wa Isaka, ni Mulimu wa Jakobo, ki yena yakulumile.’ Mushe kiha buza hape kuli: ‘Kucwañi haiba batu habana kuniteeleza?’ Jehova naafile Mushe bupaki bone buka mutusa kuziba kuli naaka mutusa. Abulelela Mushe kuli ayumbele mulamu wahae fafasi. Mi mulamu wahae wafetuha kuba noha! Mushe hanaasweli noha kwa muhata, seifetuha kuba mulamu hape. Jehova kihaa li: ‘Hauka eza sisupo se, batu bakalumela kuli ki na yakulumile.’

Mushe kihaa li: ‘Hanizibi hande kubulela.’ Jehova kihaa musepisa kuli: ‘Nika kutaluseza zakubulela, mi nikaluma Aruni muhulwanaa hao kuli akutuse.’ Ka kuziba kuli Jehova naali ni yena, Mushe aanga musalaa hae ni bana bahae babashimani nikukutela kwa Egepita.