Josefa hanaali mwa tolongo, Faro mulena wa Egepita, alola litolo mi hakuna yanaakona kulitalusa. Yomuñwi wa batanga bahae ataluseza Faro kuli Josefa naakona kumutaluseza litolo zahae. Honafo feela, Faro aluma batu kuli bayo biza Josefa.

Faro kihaa buza Josefa kuli: ‘Kana wakona kutalusa litolo zaka?’ Josefa kihaa li ku Faro: ‘Kukaba ni lico zeñata hahulu mwa Egepita ka lilimo ze 7, mi hasamulaho kukaba ni lilimo ze 7 za tala yetuna. Ukete mutu yatalifile kuli abuluke lico kuli batu bahao basike bashwa tala.’ Faro kihaa li: ‘Niketa wena! Ukaba wena wabubeli kwa maata mwa Egepita!’ Josefa naazibile cwañi taluso ya litolo za Faro? Jehova ki yena yanaatusize Josefa.

Mwa lilimo ze 7 za lico zeñata, Josefa naabulukile lico. Mi kwaba ni tala yetuna mwa lifasi kaufela sina feela mwanaabulelezi Josefa. Batu mwa lifasi kaufela bataha kuto leka lico ku Josefa. Ndatahe, yena Jakobo autwa kuli nekunani lico mwa Egepita, kacwalo aluma bana bahae babashimani ba 10 kuli bayo leka lico.

Bana ba Jakobo baya kuyo leka lico ku Josefa, mi abaziba honafo feela. Kono bahulwani bahae nebasika ziba kuli neli yena Josefa. Bamukubamela sina feela mwanaalolezi inze asali mwanana. Josefa naabata kuziba haiba bahulwani bahae nebasa nani sitoyo. Kacwalo, kihaa li ku bona: ‘Mu matwela. Mubata kuziba foifokola naha yaluna.’ Kihaa bali: ‘Batili! Lu bana babashimani ba 12 mi luzwa mwa naha ya Kanana. Yomuñwi wa ku luna ushwile mi yomunyinyani ka kufitisisa uinzi ni ndataa luna.’ Josefa ali ku bona: ‘Mutise munyanaa mina wamucaha  ku na mi nika mikolwa.’ Kacwalo, bakutela habo bona ku ndataa bona.

Hane bafelezwi ki lico, Jakobo aluma bana bahae babashimani hape kwa Egepita. Ka nako ye, baya hamoho ni Benjamine, munyanaa bona ka kufitisisa wamushimani. Ka kubata kulika bahulwani bahae, Josefa apata komoki ya silivera mwa saka ya Benjamine mi kihona atameleza bahulwani bahae kuli baiuzwize. Batanga ba Josefa hane bafumani komoki mwa saka ya Benjamine, bahulwani bahae nebakomokile hahulu. Bakupa Josefa kuli abafe koto mwa sibaka sa Benjamine.

Cwale Josefa aba ni buikolwiso bwa kuli bahulwani bahae nebacincize. Josefa kihaa palelwa kuzwelapili kuiswala. Mi akala kulila hahulu mi kihona ali: ‘Ki na Josefa mwanahabo mina. Kana bo ndate basapila?’ Bana bahabo yena nebakomokile hahulu. Kihona ali ku bona: ‘Musike mwaikutwa bumaswe kabakala zene muniezize. Mulimu naanilumile kwanu kuli nipilise bupilo bwamina. Hamuye kapili muyo taha ni bo ndate.’

Kiha bakutela habobona kuli bayo bulelela ndataa bona zeneezahezi ni kuli aye kwa Egepita. Hamulaho wa lilimo zeñata, Josefa akopana ni bo ndatahe hape.