Elizabeta naanani mwanaa habo yena wamusizana wa libizo la Maria, yanaapila mwa muleneñi wa Nazareta mwa Galilea. Maria naabeelelizwe ki Josefa, yanaali mubeti. Elizabeta hanaanani likweli ze 6 inze aitwezi, lingeloi Gabriele lato bonahala ku Maria. Lali ku yena: ‘Lumela, Maria. Jehova ukushemubile hahulu.’ Maria naasika utwisisa zene litalusa lingeloi. Kiha lili ku yena: ‘Ukaitwala mi ukapepa mwana wamushimani, mi umubeye libizo la Jesu. Ukabusa sina Mulena. Mubuso wahae hauna kufela.’

Maria ali: ‘Kono na ni mwalyanjo. Nikona kuba cwañi ni mwana?’ Gabriele ali ku yena: ‘Ku Jehova hakuna sesipala. Moya okenile ukataha ku wena, mi ukaba ni mwana wamushimani. Elizabeta mwanahabo wena, ni yena uitwezi.’ Maria kihaa li: ‘Na ni mutangaa Jehova! Hakuezahale ku na kulikana ni linzwi lahao.’

 Maria aya kwa muleneñi wo mwa malundu kuyo potela Elizabeta. Maria hamulumelisa, mbututu ye mwa mba ya Elizabeta yanyanganya. Ka kutala moya okenile, Elizabeta ali: ‘Maria, Jehova ukufuyauzi. Ki tohonolo yetuna kuba ni mahe Mulenaa ka mwa ndu yaka.’ Maria ali: ‘Nalumbeka Jehova ka pilu yaka kaufela.’ Maria aina ni Elizabeta ka likweli zetaalu, mi hamulaho akutela habo yena kwa Nazareta.

Josefa hanaautwile kuli Maria uitwezi, abata kufeza libato lahae ni yena. Kono lingeloi lataha ku yena mwa tolo mi lali: ‘Usike wasaba kumunyala. Hakuna safosize nihanyinyani.’ Kacwalo, Josefa aanga Maria kuba musalaa hae mi amutisa kwa ndu yahae.