Jesu kihona asazo zinga baparisita babahulu ni babahulu ba sicaba kwa tempele, bane bakakanya maata aitusisa kwa kueza lika. Kalabo yabafile Jesu ya bakuzisa. Cwale ufa swanisezo yebonisa mobainezi luli.

Jesu uli: “Muuna yomuñwi naanani bana bababeli. Aya ku wapili, ali: ‘Mwanaka, hakuyo beleka mwa simu ya veine kacenu.’ Yo amualaba ali: ‘Hanina kuya,’ kono hasamulaho ainyaza mi aya. Aatumela wabubeli mi amubulelela nto yeswana. Yo yena ali: ‘Nikaya sha,’ kono naasika ya. Ki ufi kwa bana bababeli bao yaezize tato ya ndatahe?” (Mateu 21:28-31) Kalabo ki ya kuli mwana wapili ki yena yaezize tato ya ndatahe.

Ka mukwa ocwalo, Jesu ubulelela balwanisi bahae kuli: “Kaniti namibulelela nili, batelisi ni mahule baka milaka mwa Mubuso wa Mulimu.” Batelisi ni mahule sapili nebasa koni kusebeleza Mulimu. Kono ka kuswana sina mwana wapili, hasamulaho babaka mi cwale seba sebeleza Mulimu. Ka kushutana, baeteleli ba bulapeli baswana sina mwana wabubeli. Baipapata kuli basebeleza Mulimu kono inze bapalelwa kueza cwalo. Jesu uli: “Joani [Mukolobezi] naatile ku mina ka nzila ya kuluka, kono nemusika mulumela. Nihakulicwalo, batelisi ni mahule bamulumezi, kono mina ni hamuboni cwalo, hamusika inyaza hasamulaho ni kumulumela.”—Mateu 21:31, 32.

Jesu ufa swanisezo yeñwi hape. Ka nako ye, Jesu ubonisa kuli baeteleli ba bulapeli baeza nto yeñwi kwandaa kupalelwa kusebeleza Mulimu. Ki batu babamaswe. Jesu ubulela kuli: “Mutu yomuñwi naacezi simu ya veine mi aibeya mwa lukwakwa, ayepa silubelo ni kutoma tawala; kihona asiyela balimi simu yeo mi aya kwa naha ya kwahule. Nako ya kukutula haifitile, aluma mutanga kuyo nga kwa litolwana za mwa simu ya veine kwa balimi. Kono bona bamuswala, bamunata ni kumukutisa mazoho-zoho. Hape aluma mutanga yomuñwi ku bona, yo yena bayo munata kwa toho ni kumushubula. Mi aluma mutanga yomuñwi, mi yo bayo mubulaya, aluma babañwi babañata, babañwi ku bona bayo natiwa, mi babañwi bona bayo bulaiwa.”—Mareka 12:1-5.

Kana babateeleza ku Jesu bautwisisa taluso ya swanisezo ye? Mwendi bahupula manzwi a Isaya, ali: “Simu ya veine ya Jehova wa limpi ki ba ndu ya Isilaele; Batu ba Juda ki bona simu yanaalata hahulu. Naalibelela kuli ukabona katulo yelukile, kono batu nebasa atuli ka kuluka.” (Isaya 5:7) Jesu ni yena ubulela lika zeswana mwa swanisezo yahae. Muñaa simu ki Jehova, mi simu ya veine ki sicaba sa Isilaele. Mulao wa Mulimu uswana sina lukwakwa lolu sisileleza. Jehova naalumile bapolofita kuto luta batu bahae ni kubatusa kuba ni miselo yeminde.

Kono “balimi” banyandisa ni kubulaya “batanga” bane balumilwe. Jesu ubulela kuli: “Nekusiyezi alimuñwi, ili mwanaa hae [muñaa simu] yalatwa. Kwa mafelelezo, amuluma ku bona, ali: ‘Bakakuteka mwanaka.’ Kono balimi bao babulelisana, bali: ‘Ki yena shwana yo. Hamutahe, lumubulaye, mi saanda ikaba saluna.’ Kiha bamuswala ni kumubulaya mi bamunepela kwande a simu ya veine.”—Mareka 12:6-8.

Jesu cwale ubuza kuli: “Muñaa simu ya veine ukaezañi?” (Mareka 12:9) Baeteleli ba bulapeli baalaba kuli: “Bakeñisa bumaswe bwabona, ukaba bulaya ka nzila yemaswe, mi ukafa simu ya veine kwa balimi basili, babaka mufa miselo haika buzwa.”—Mateu 21:41.

Ka mukwa ocwalo, baeteleli ba bulapeli ka kusalemuha baikatula ili bona, kakuli ki bona “balimi” ba “simu ya veine” ya Jehova, sona sicaba  sa Isilaele. Muselo wa libelela Jehova kwa balimi bao ukopanyeleza kuba ni tumelo ku Mwanaa hae, yena Mesia. Jesu utalimela baeteleli ba bulapeli ba, mi uli: “Hamusika bala liñolo le, lelili: ‘Licwe lebahanile bayahi ki lona lelifetuhile licwe la butokwa la mwa kona. Taba ye izwa ku Jehova, mi ki nto yemakaza mwa meeto aluna’?” (Mareka 12:10, 11) Cwale Jesu ubonisa hande zatalusa, uli: “Ki lona libaka hani mibulelela kuli: Mubuso wa Mulimu ukazwiswa ku mina ni kufiwa sicaba sesibeya miselo yaona.”—Mateu 21:43.

Bañoli ni baprisita babahulu balemuha kuli Jesu ‘utalusa bona mwa swanisezo ye.’ (Luka 20:19) Babata hahulu kubulaya Jesu, yena “shwana.” Kono basaba sicaba, kakuli baanga Jesu kuli ki mupolofita, ka mukwa ocwalo, bapalelwa kumubulaya onafo.