1, 2. Ki keto mañi ye lu tokwa ku eza ka za linzila za ku itabisa ka zona?

 MU NGE kuli mu bata ku ca tolwana ye munati, kono mu lemuha kuli tolwana yeo i bolile lineku le liñwi. Ki sika mañi se mu ka eza? Haiba mwa tabela, mwa kona ku ca tolwana yeo kaufelaa yona hamoho ni lineku le li bolile; kamba mwa kona ku yumba tolwana yeo mukatumbi; kamba mwendi mwa kona ku puma feela kwateñi lineku le li bolile ni ku ca kalulo ye iketile. Ki sika mañi se ne mu ka atula ku eza?

² Ka nzila ye ñwi, ku itabisa ku swana sina tolwana yeo. Mwendi fokuñwi mwa batanga ku itabisa, kono mu lemuha kuli buñata bwa linzila za ku itabisa ka zona kacenu li fosahalile, kamba li bolile. Kacwalo, ki sika mañi se mu ka eza? Ba bañwi ba kana ba nga linzila kaufela za ku itabisa ka zona ze mwa lifasi kuli li lukile ku kopanyeleza ni ze maswe. Ba bañwi ba kana ba hana mifuta kaufela ya ku itabisa ka yona ilikuli ba isileleze kwa kozi ifi kamba ifi. Ba bañwi bona ba kana ba keta ku ambuka linzila za ku itabisa ka zona ze maswe ni ku itabisanga feela ka linzila ze bonahala kuli ki ze nde. Ki ifi keto ye mu swanela ku eza ilikuli mu zwelepili ku tiiseza mwa lilato la Mulimu?

3. Lu ka nyakisisañi cwale?

³ Buñata bwa luna ne lu ka ambuka linzila za ku itabisa ka zona ze maswe ni ku itabisanga feela ka linzila ze nde. Lwa ziba butokwa bwa ku itabisanga, kono lu bata ku itabisanga  feela ka lika ze nde. Kacwalo, lu tokwa ku nyakisisa mo lu kona ku ketela linzila za ku itabisa ka zona ze nde ku ze maswe. Kono pili ha lu nyakisiseñi moo linzila ze lu keta ku itabisa ka zona li amela bulapeli bwa luna ku Jehova.

4. Buineelo bwa luna bu swanela ku ama cwañi liketo za luna ka za linzila ze lu bata ku itabisa ka zona?

⁴ Nako ye ñwi kwamulaho, Paki yo muñwi wa musupali ya naa kolobelizwe ka 1946 naa ize: “Ni bonanga teñi kuli ha ku na ngambolo ya kolobezo ye ni shuta, mi ni teelezanga ka tokomelo kwa ngambolo yeo inge kuli ni na na kolobezwa.” Ki kabakalañi muzwale yo ha ezanga cwalo? Naa talusize kuli, “Ku nahananga za buineelo bwa ka kamita ku ni tusize hahulu ku zwelapili ku sepahala.” Mwendi ni mina mwa lumelelana ni manzwi ao. Ku ikupulisanga kuli ne mu sepisize Jehova kuli mu ka mu sebeleza mwa bupilo bwa mina kaufela ku mi tusa ku itiisa. (Muekelesia 5:4; Maheberu 10:7) Mane ku yeya ni ku nahananga za buineelo bwa mina ha ku na ku mi tusa feela ku ba ni mubonelo o munde wa bukombwa bwa mina, kono hape ku ka mi tusa ku ba ni mubonelo o munde wa lika ze ñwi mwa bupilo bwa mina ze kopanyeleza ni za ku itabisa ka zona. Muapositola Paulusi naa koñomekile taba yeo ha naa ñolezi Bakreste ba mwa miteñi ya hae  kuli: “Niha mu ca, niha mu nwa, niha mu eza nto ye ñwi, mu eze linto kaufela kuli Mulimu a lumbekwe ka zona.”—1 Makorinte 10:31.

5. Livitike 22:18-20 i lu tusa cwañi ku lemuha mamela ye lu fiwa kwa Maroma 12:1?

⁵ Lika kaufela ze mu eza mwa bupilo za ama bulapeli bwa mina ku Jehova. Mwa liñolo la naa ñolezi ba kwa Roma, Paulusi naa koñomekile taba yeo ka ku itusisa pulelo ye ne tusize mizwale ba hae ba kwa Roma ku swala sisupo. Naa ba susuelize kuli: “Mu beele mibili ya mina, ibe sitabelo se si pila, se si kenile, se si kateleha ku Mulimu; ki yona sebelezo ye mi lukezi.” (Maroma 12:1) Mubili wa mina u kopanyeleza munahano, pilu, ni maata a mina. Mi zeo kaufela ki lika ze mu itusisa mwa ku sebeleza Mulimu. (Mareka 12:30) Paulusi u talusa sebelezo yeo ya ka moyo kaufela kuli ki sitabelo. Mi ka ku itusisa pulelo yeo, Paulusi u lu fa mamela. Mulao wa Mushe ne u bonisize kuli Mulimu naa sa amuhelangi matabelo a naa nyazahala. (Livitike 22:18-20) Ka mukwa o swana, haiba sitabelo sa kwa moya sa Mukreste si silafazwa ka mukwa o muñwi, ha si na ku amuhelwa ki Mulimu. Kono taba yeo i kona ku ezahala cwañi?

6, 7. Mukreste u kona ku silafaza cwañi mubili wa hae, mi ki lika mañi ze kona ku zwa mwateñi?

⁶ Paulusi naa elelize Bakreste ba kwa Roma kuli: “Mu si ke mwa fa sibi lilama za mina.” Paulusi hape naa ba taluselize ku “bulaya misebezi ya mubili.” (Maroma 6:12-14; 8:13) Mwa liñolo le li swana leo naa saa bulezi kale ye miñwi ya “misebezi ya mubili.” Mwa liñolo leo, batu ba sibi ba taluswa cwana: “Mwa mahanu a bona ku tezi matapa.” “Mautu a bona a na ni bubebe kwa ku yo sulula mali.” “Sabo ya Mulimu ha i yo fapilaa bona.” a (Maroma 3:13-18) Mukreste u silafaza mubili wa hae haiba a itusisa “lilama” za hae ku eza likezo ze cwalo za sibi. Ka mutala, haiba Mukreste kacenu a buha lika ze maswe  ze cwale ka maswaniso a mapunu kamba mafilimu a mifilifili, u ‘fa meto a hae kwa sibi,’ mi kamukwaocwalo u silafaza mubili wa hae kaufela. Bulapeli bwa hae kaufela bu fetuha ku ba sitabelo se si silafezi ili saa sa amuheli Mulimu. (Deuteronoma 15:21; 1 Pitrosi 1:14-16; 2 Pitrosi 3:11) Wo kona mupuzo wa ka ipumanela bakeñisa ku keta ku itabisa ka linzila ze maswe.

⁷ Kwa iponahalela hande kuli linzila za keta ku itabisa ka zona Mukreste za kona ku mu kenya mwa ziyezi ye tuna. Kacwalo, lu bata ku keta linzila za ku itabisa ka zona ze ka lu tusa ku fa Mulimu sitabelo se sinde isike se si silafezi. Cwale ha lu nyakisiseñi mo lu kona ku ketela linzila za ku itabisa ka zona ze nde ku ze maswe.

8, 9. (a) Linzila za ku itabisa ka zona li kona ku alulwa mwa likalulo lifi ze peli? (b) Ki mikwa ifi ya ku itabisa ka yona ye lu ambuka, mi ki kabakalañi?

⁸ Linzila za ku itabisa ka zona li kona ku alulwa mwa likalulo ze peli. Kalulo ya pili i ama linzila za ku itabisa ka zona ze ba ambuka Bakreste bakeñisa kuli ki ze iponahalela fo ku sweu kuli li fosahalile; kalulo ya bubeli ki ya linzila za ku itabisa ka zona zeo Bakreste ba kona ku amuhela kamba ku hana. Ha lu kaleñi ka ku nyakisisa kalulo ya pili—linzila za ku itabisa ka zona ze ba ambuka Bakreste.

⁹ Sina mo ku boniselizwe mwa Kauhanyo 1, linzila ze ñwi za ku itabisa ka zona li bubanisa likezo ze talusizwe ka ku nonga mwa Bibele kuli li fosahalile. Ka mutala, mu nahane za ma-Web site a fa Intaneti, mafilimu, lipina, kamba liprogilamu za fa TV za lindwa, za sidimona, za maswaniso a mapunu, kamba ze susueza likezo ze maswe ze masila. Bakeñisa kuli mikwa ye maswe yeo ya ku itabisa ka yona i bonahalisa likezo ze loba milao kamba likuka za Bibele kuli li lukile, Bakreste ba niti ba swanela ku i ambuka. (Likezo 15:28, 29; 1 Makorinte 6:9, 10; Sinulo 21:8) Ha mu hana linzila ze maswe zeo  za ku itabisa ka zona, mu bonisa Jehova kuli ‘mu toile bumaswe’ luli mi mu zwelapili ku “kauhana ni bumaswe.” Ha mu eza cwalo, u zibe mu na ni “tumelo ye si na buikeziso.”—Maroma 12:9; Samu 34:14; 1 Timotea 1:5.

10. Ki muhupulo mañi wa kona ku ba ni ona mutu ka za linzila za ku itabisa ka zona ili o kona ku mu kenya mwa kozi, mi ki kabakalañi?

¹⁰ Niteñi, ba bañwi ba kana ba ikutwa kuli ku itabisa ka linzila ze fosahalile za muzamao o maswe ha ku koni ku ba tahiseza kozi. Ba li, ‘Na kona ku buha lika ze ñwi mwa mafilimu kamba fa TV, kono na ki mo ni ka shwela ku eza lika ze cwalo.’ Ku ba ni muhupulo o cwalo ki ku ipuma mi kwa kona ku kenya mutu mwa kozi. (Jeremia 17:9) Haiba lwa tabela ku buha lika za nyaza Jehova, kana luli lu ‘toile bumaswe’? Ku kuta-kutela ku bona lika ze maswe, ku li bala, kamba ku li teeleza ku ka cinelisa lizwalo la luna. (Samu 119:70; 1 Timotea 4:1, 2) Seo si kona ku tahisa kuli lu kalise ku eza likezo ze maswe kamba ku nga likezo za sibi ze ba eza ba bañwi kuli li lukile.

11. Manzwi aa kwa Magalata 6:7 a bonahezi cwañi kuli ki a niti ha ku taha ku za ku itabisa ka zona?

¹¹ Taba yeo mane se i ezahalile. Bakreste ba bañwi ba ezize sibi bakeñisa kuli ne ba na ni mukwa wa ku itabisanga ka ku buha lika ze maswe. Ka bumai, ba itutile kuli “saa cala mutu, ki sona saa ka kutula” ha se ba kutuzi kale se ne ba cezi. (Magalata 6:7) Kono mutu wa kona ku ambuka kozi ye cwalo. Haiba mu ba ni tokomelo ya ku cala lika ze nde mwa munahano wa mina, mu ka kutula ze nde mwa bupilo bwa mina.—Mu bone taba ye li  “Ki Ifi Nzila ye ni ka Itabisa ka Yona?” ye fa likepe 67.

12. Ki taba mañi ye lu ituta kwa Magalata 6:5 ka za linzila za ku itabisa ka zona, mi ki ketelelo mañi ye kona ku lu tusa ha lu eza liketo za ka butu?

¹² Cwale ha lu nyakisiseñi kalulo ya bubeli—linzila za ku itabisa ka zona ze ama ku eza lika ze si ka bulelwa ka ku  nonga mwa Linzwi la Mulimu kuli li fosahalile kamba kuli li lukile. Mukreste ha bata ku itabisa ka ye ñwi ya linzila ze cwalo, u swanela ku iketela isali yena nzila ya bona kuli i lukile. (Magalata 6:5) Nihakulicwalo, lu na ni ketelelo ye kona ku lu tusa ha lu eza liketo za mufuta wo. Bibele i na ni likuka kamba ketelelo ye lu tusa ku ziba munahano wa Jehova. Haiba lu isa pilu kwa likuka zeo, lu ka kona ku ziba “se si latwa ki Mulena” mwa lika kaufela mane nihaiba mwa linzila za ku itabisa ka zona.—Maefese 5:17.

13. Ki sika mañi se si ka lu tusa ku ambuka linzila za ku itabisa ka zona za sa tabeli Jehova?

 ¹³ Kutwisiso ya Bakreste ni temuho ya bona ya lika ya shutana-shutana. Zwelopili ya ezize Mukreste yo muñwi i kona ku shutana ni ya ezize yo muñwi. (Mafilipi 1:9) Ku zwa fo, Bakreste ba ziba kuli batu ba kona ku tabela ku itabisa ka linzila ze shutana-shutana. Kacwalo, ha lu koni ku libelela Bakreste kaufela ku eza liketo ze swana. Niteñi, haiba lu zwelapili ku lumeleza likuka za Mulimu ku zamaisa minahano ni lipilu za luna, lu ka zwelapili ku hulisa takazo ya luna ya ku ambuka mifuta kaufela ya ku itabisa ka yona ya sa tabeli Jehova.—Samu 119:11, 129; 1 Pitrosi 2:16.

14. (a) Ki nto mañi ye lu swanela ku nyakisisanga ha lu keta nzila ya ku itabisa ka yona? (b) Lu kona cwañi ku beya Mubuso mwa sibaka sa pili mwa bupilo bwa luna?

¹⁴ Ha lu keta nzila ya ku itabisa ka yona hape ku na ni nto ye ñwi ye lu swanela ku nyakisisanga: nako ye lu ka tanda inze lu itabisa. Ze mu keta ku itabisa ka zona li bonisa lika ze mu nga kuli li lukile, kono nako ye mu tanda inze mu itabisa i bonisa lika ze mu nga ku ba za butokwa. Mi lwa ziba kuli kwa Bakreste, lika za kwa moya kona za butokwa hahulu. (Mateu 6:33) Kacwalo, ki sika mañi se mu kona ku eza ilikuli mu zwelepili ku beya Mubuso mwa sibaka sa pili mwa bupilo bwa mina? Muapositola Paulusi naa ize: “Mu tokomele mo mu zamaela, mu si ke mwa ba sina likuba, kono mu be sina ba ba butali. Mu yolise linako.” (Maefese 5:15, 16) Kaniti, ku sa sinyeza nako ye ñata hahulu kwa ku itabisa ku ka mi tusa ku fumana nako ya ku eza “linto ze nde ku fita”—lika ze mi tusa kwa moya.—Mafilipi 1:10.

15. Ha lu keta mukwa wa ku itabisa ka wona, ki kabakalañi ha ku li kwa butokwa ku keta nzila ye fapahanela kwahule ni linzila ze lu bata ku ambuka?

¹⁵ Hape, kamita ki kwa butokwa ku bonanga teñi kuli ku na ni shutano ye tuna ye mwahalaa linzila ze lu keta ku itabisa ka zona ni linzila ze lu bata ku ambuka. Ki sifi se si taluswa fo? Ha mu nyakisise mutala wa tolwana hape. Kuli mu si ke mwa ca kalulo ye bolile ya tolwana ka ku sa ziba,  ha mu na ku sehulula feela kwateñi kalulo ye bolile i nosi-nosi, kono mu ka puma hanyinyani ni kwa kalulo ye iketile. Kamukwaoswana, ki kwa butokwa ku bonanga teñi kuli nzila ye lu keta ku itabisa ka yona i fapahanela kwahule ni linzila ze fosahalile. Mukreste ya butali ha ambuki feela linzila za ku itabisa ka zona ze iponahalela fo ku sweu kuli li lwanisana ni likuka za Bibele, kono u ambuka ni ze bonahala ku sa swaleha hande kamba ze bonahala kuli li kopanyeleza likezo ze kona ku mu holofaza kwa moya. (Liproverbia 4:25-27) Ku kumalela kwa Linzwi la Mulimu ku ka mi tusa ku ambuka linzila za ku itabisa ka zona ze cwalo.

16. (a) Lu kona ku bonisa cwañi kuli lu nga litaba za muzamao mwa li ngela Jehova? (b) Ku sebelisa likuka za Bibele ku kona cwañi ku ba mukwa wa luna?

¹⁶ Ha ba keta linzila za ku itabisa ka zona, Bakreste ba niti pili ba batanga ku ziba mubonelo wa Jehova. Bibele i patulula maikuto a Jehova ni likuka za hae. Ka mutala, Mulena Salumoni u kolokisa lika za toile Jehova ze cwale ka ‘lilimi le li puma, mazoho aa sulula mali aa si na mulatu, pilu ye lela milelo ye maswe, mautu a lubilo aa matela kwa ku yo sinya.’ (Liproverbia 6:16-19) Kacwalo mu swanela ku nga cwañi lika za nga Jehova kuli li fosahalile? Walisamu u lu susueza kuli: “Mina ba ba lata Muñaa Bupilo, mu toye bumaswe.” (Samu 97:10) Linzila ze mu keta ku itabisa ka zona li swanela ku bonisa kuli luli mu toile lika za toile Jehova. (Magalata 5:19-21)  Hape mu hupulange kuli ze mu eza kwa mukunda kona ze bonisa hahulu kuli mu batu ba ba cwañi ku fita ze mu eza fa nyangela. (Samu 11:4; 16:8) Kacwalo, haiba mu na ni takazo ye zwelela kwa pilu ya ku nga lika kaufela mwa bupilo bwa mina sina mwa li ngela Jehova, kamita mu ka ezanga liketo ze zamaelela ni likuka za Bibele. Ku eza liketo ze cwalo i ka ba mukwa wa mina.—2 Makorinte 3:18.

17. Lu si ka keta kale nzila ya ku itabisa ka yona, ki lipuzo mañi ze lu swanela ku ipuza?

¹⁷ Ki lifi ze ñwi ze mu kona ku eza ze ka mi tusa ku bona teñi kuli linzila ze mu keta ku itabisa ka zona za lumelelana ni munahano wa Jehova? Ha mu nahanisise puzo ye, ‘Ku itabisa ka nzila ye, ku ka ni ama cwañi mi ku ka ama cwañi bulikani bwa ka ni Mulimu?’ Ka mutala, mu si ka buha kale filimu ye ñwi, mu ipuze kuli, ‘Lika ze mwa filimu ye li ka ama cwañi lizwalo la ka?’ Ha lu nyakisiseñi likuka ze kona ku lu tusa mwa taba ye.

18, 19. (a) Sikuka se si kwa Mafilipi 4:8 si lu tusa cwañi ku ziba haiba linzila ze lu itabisa ka zona li lukile? (b) Ki likuka lifi ze ñwi ze kona ku mi tusa ku keta linzila ze nde za ku itabisa ka zona? (Mu bone litaluso za kwatasi.)

¹⁸ Sikuka se situna si fumaneha kwa Mafilipi 4:8, ye li: “Linto kaufela ze li za niti, kaufela ze kutekeha, kaufela ze lukile, kaufela ze kenile, kaufela ze na ni libubo le linde, kaufela ze na ni swanelo, ni ze lukela ku lumbwa, ibe zona ze mu nze mu hupula.” Ki niti kuli Paulusi fo naa sa amboli ka za linzila za ku itabisa ka zona, kono naa bulela za minahano ya mwa lipilu za luna ye swanela ku ba ya lika ze nde ze tabisa Mulimu. (Samu 19:14) Nihakulicwalo, sikuka se si mwa manzwi a Paulusi sa kona ku itusiswa ha ku taha kwa taba ya linzila za ku itabisa ka zona. Ka mukwa ufi?

¹⁹ Mu ipuze kuli, ‘Kana mafilimu e ni keta ku buha, lipapali za ka za fa kompyuta kamba fa TV, lipina ze ni teeleza ku zona, kamba lika ze ñwi ze ni itabisanga ka zona li ni tusa ku ba ni munahano o na ni lika “kaufela ze kenile”?’ Ka mutala, hamulaho wa ku buha filimu ye ñwi, ki maswaniso  a cwañi a siyalanga mwa munahano wa mina? Haiba ki maswaniso a mande, aa kenile, ni aa katulusa, u zibe nzila ye mu itabisize ka yona ki ye nde. Kono haiba filimu ye mu buhile i mi tahiseza ku nahana lika ze masila, fo kona kuli muitabisezo wa mina ne li o maswe mi wa kona ku mi tahiseza kozi. (Mateu 12:33; Mareka 7:20-23) Kabakalañi? Kakuli ku nahana lika ze maswe ku mi tokwisa mombecima, ku silafaza lizwalo la mina le li lutilwe ka Bibele, mi ku kona ku sinya bulikani bwa mina ni Mulimu. (Maefese 5:5; 1 Timotea 1:5, 19) Bakeñisa kuli linzila za ku itabisa ka zona ze cwalo li mi tahiseza kozi, mu like ka taata ku li ambuka. b (Maroma 12:2) Mu be sina walisamu ya naa lapezi ku Jehova kuli: “U biule meto a ka ku ze si na tuso.”—Samu 119:37.

20, 21. Liñolo la 1 Makorinte 10:23, 24 li swalisana cwañi ni taba ya za ku keta linzila za ku itabisa ka zona?

²⁰ Paulusi naa talusize sikuka sa butokwa hahulu sa mwa Bibele se lu swanela ku hupulanga ha lu eza liketo za ka butu. Naa ize: “Linto . . . kaufela li lumelehile, kono ha li yahisi kaufela. Ku si ke kwa fumanwa mutu ya ya ka se si mu swanela yena a li nosi, kono a ye ka se si swanela ba bañwi.” (1 Makorinte 10:23, 24) Lu kona ku itusisa cwañi sikuka seo ha lu keta linzila ze nde za ku itabisa ka zona? Mu swanela ku ipuza kuli, ‘Nzila ye ni bata ku itabisa ka yona i ka ama cwañi ba bañwi?’

²¹ Lizwalo la mina la kona ku mi lumeleza ku itabisa ka nzila ye ñwi ye mu ikutwa kuli i “lumelehile,” kamba i lukile. Kono haiba mu lemuha kuli Bakreste ba bañwi ba ba na ni mazwalo aa ba hanisa ku itabisa ka linzila ze shutana-shutana ba ikutwa kuli nzila yeo i fosahalile, fohe mwa kona ku i ambuka. Kabakalañi? Kakuli ha mu tabeli ku “foseza banabahabo mina”—kamba ku “foseza ni yena Kreste” sina mwa naa bulelezi Paulusi. Mu foseza banabahabo mina kamba Kreste  ka ku tahiseza balumeli ba bañwi ku fumana taata ku zwelapili ku sepahala ku Mulimu. Mu mamele kelezo ye li: “Mu si ke mwa fa mutu libaka la ku wa.” (1 Makorinte 8:12; 10:32) Bakreste ba niti kacenu ba utwa kelezo ye nde yeo ya naa file Paulusi ka ku ambuka linzila za ku itabisa ka zona ze kona ku ba ze “lumelehile” kono ili ze sa “yahisi.”—Maroma 14:1; 15:1.

22. Ki kabakalañi Bakreste ha ba swanela ku lumeleza ba bañwi ku ba ni mibonelo ye shutana-shutana mwa litaba za ka butu?

²² Kono ku ya ka ze swanela ba bañwi ha ku feleli fo. Mukreste ya na ni lizwalo le li mu hanisa ku eza lika ze shutana-shutana ha swaneli ku hapeleza Bakreste ba bañwi mwa puteho ya Sikreste kuli ba itabise feela ka linzila za nga yena kuli li lukile. Ha naa ka eza cwalo na ka swana sina muzamaisi wa mota ya li fa mukwakwa ya bata kuli bazamaisi ba bañwi kaufela ba matise limota za bona ka lubilo lwa mata ka lona yena. Ku ñañelela taba yeo ne ku ka mu bonisa ku ba ni mubonelo o fosahalile. Kabakala lilato la hae la Sikreste, Mukreste ya na ni lizwalo le li mu hanisa ku eza lika ze shutana-shutana u swanela ku kuteka Bakreste ba bañwi ba ba na ni mibonelo ye shutana hanyinyani ni ya hae ka za linzila za ku itabisa ka zona, ibile feela mibonelo ya bona ha i lobi likuka za Sikreste. Ha eza cwalo u tahisa kuli “kutwisiso ya hae i zibwe ki batu kamukana.”—Mafilipi 4:5, NW; Muekelesia 7:16.

23. Mu kona ku ikolwisisa cwañi kuli linzila ze mu keta ku itabisa ka zona li lukile?

²³ Ka bukuswani, mu kona cwañi ku keta linzila ze nde za ku itabisa ka zona? Mu ambuke mifuta kaufela ya ku itabisa ka yona ye ama ku eza lika ze maswe ze hanisizwe fo ku sweu mwa Linzwi la Mulimu. Mu latelele likuka za Bibele ha mu bata ku itabisa ka linzila ze i si ka bulela ka za teñi Bibele. Mu ambuke linzila za ku itabisa ka zona ze holofaza lizwalo la mina ni mazwalo a ba bañwi, sihulu a Bakreste ba bañwi. Haike katulo ya mina ye tiile ya ku eza cwalo i kanyise Mulimu ni ku tahisa kuli mina hamoho ni lubasi lwa mina mu tiiseze mwa lilato la hae.