Kauhanyo 3

Yena Ya Ezize Linto Kamukana

KU NA ni nto ye ñwi ye tabisa ye ni ziba. Kana wa tabela ku i utwa?— Talima lizoho la hao. Puta minwana ya hao. Cwale nopa nto ye ñwi. Lizoho la hao li kona ku eza lika ze ñata, mi la kona ku li eza hande. Kana wa ziba ya ezize mazoho a luna?—

Ee, ki Yena ya n’a ezize mulomo wa luna, ngo ya luna, ni meto a luna. Ki Mulimu, yena Ndat’ahe Muluti yo Mutuna. Kana ha lu itumeli kuli Mulimu u lu file meto?— Ka ona, lwa kona ku bona lika ze ñata. Lwa kona ku bona lipalisa. Lwa kona ku bona bucwañi ni malu. Mane lwa kona ku bona ni linyunywani ze nyinyani ze ca, sina ze bonisizwe mwa siswaniso se. Kaniti, kwa tabisa kuli lwa kona ku bona lika ze, nji cwañi?—

Kono ki mañi ya ezize lika ze? Kana ne li ezizwe ki batu ba bañwi? Kutokwa. Batu ba kona ku yaha ndu. Kono ha ku na mutu ya kona ku eza bucwañi bo bu mela. Batu ha ba koni ku eza kanyunywani, palisa, kamba nto ifi kamba ifi ye pila. Kana wa ziba cwalo?—

Mulimu ki yena ya ezize linto zeo kaufela. Mulimu n’a ezize mahalimu ni lifasi. Hape n’a ezize ni batu. N’a ezize munna ni musali  ba pili. Seo ki sona sa n’a lutile Jesu, yena Muluti yo Mutuna.—Mateu 19:4-6.

Jesu n’a zibile cwañi kuli Mulimu n’a ezize munna ni musali? Kana Jesu n’a boni Mulimu inz’a eza cwalo?— Ee n’a mu boni. Jesu n’a li ni Mulimu ka nako yeo Mulimu n’a eza munna ni musali. Jesu ki yena mutu wa pili ya n’a bupilwe ki Mulimu. Jesu n’a li lingeloi, mi n’a pilile kwa lihalimu ni Ndat’ahe.

Bibele i lu bulelela kuli Mulimu n’a ize: “A lu eze mutu.” (Genese 1:26) Kana wa ziba y’o Mulimu n’a bulela ni yena?— N’a bulela ni Mwan’a hae. N’a bulela ni yena y’o hasamulaho n’a til’o ba Jesu fa lifasi.

Kana taba yeo ha i tabisi? Nahana fela za teñi! Ha lu utwa Jesu, lu sweli lwa lutiwa ki yena ya n’a li ni Mulimu ka nako yeo Mulimu n’a eza lifasi ni lika ze ñwi kaufela. Jesu n’a itutile ze ñata ha n’a sebeza  ni Ndat’ahe mwa lihalimu. Ku swanezi Jesu h’a li Muluti yo Mutuna!

Ka mo u bonela wena, kana Mulimu n’a tokwile tabo ha n’a li a nosi pili a si ka eza Mwan’a hae?— Kutokwa. Haiba n’a li ya tabile ha n’a pila a nosi, n’a ezelizeñi lika ze ñwi ze pila?— N’a ezize cwalo kakuli ki Mulimu ya lilato. N’a bata kuli ba bañwi ba pile ni ku ikola bupilo. Lu lukela ku itebuha ku Mulimu kuli u lu file bupilo.

Linto kaufela za ezize Mulimu li bonisa lilato la hae. Mulimu n’a ezize lizazi. Lizazi li lu fa liseli ni ku lu futumaza. Kambe ne lu si na lizazi, lika kaufela ne li ka ba ze bata mi ne ku si ke kwa ba ni bupilo fa lifasi. Kana ha u ya tabile kuli Mulimu n’a ezize lizazi?—

Hape, Mulimu wa nelisa pula. Mwendi fokuñwi ha u na ku tabela pula ha i nela, kakuli ha u koni ku zwela fande ku y’o bapala. Kono pula i tusa lipalisa ku mela. Kacwalo, ha lu bona lipalisa ze nde, lu ka itumela ku mañi kabakala zona?— Lu itumela ku Mulimu. Mi ki mañi ye lu lukela ku itumela ku yena ha lu ca miselo ni miloho ye tabusa?— Lu swanela ku itumela ku Mulimu kakuli lizazi la hae ni pula ya hae ki zona ze melisa lika.

Ku cwañi mutu ha n’a ka ku buza kuli, ‘Kana Mulimu n’a ezize batu ni lifolofolo?’ N’o ka alaba cwañi?— Ku lukile ku bulela kuli: “Ee, Mulimu ki yena ya ezize batu ni lifolofolo.” Kono ku cwañi haiba yo muñwi h’a lumeli kuli Mulimu ki yena luli ya n’a ezize batu? Ku cwañi ha n’a ka bulela kuli batu ba simuluha kwa lifolofolo? Bibele ha i luti cwalo. I bulela kuli Mulimu n’a ezize lika ze pila kaufela.—Genese 1:26-31.

Kono yo muñwi wa kona ku ku bulelela kuli h’a lumeli kuli Mulimu u teñi. N’o ka liñi cwale?— Ku cwañi ha n’o ka mu bonisa ndu? U buze mutu y’o kuli: “Ya yahile ndu ye ki mañi?” Mañi ni mañi wa ziba  kuli ku na ni yo muñwi ya n’a i yahile. Kaniti luli ndu yeo ne i si ka icaha i li yona!—Maheberu 3:4.

Cwale, ha ku y’o bonisa mutu y’o palisa. U mu buze kuli: “Ya ezize nto ye ki mañi?” Ha ku na mutu ya n’a i ezize. Mi sina ndu ha ne i si ka icaha i li yona, palisa yeo ni yona ne i si ka ikeza i li yona. Ku na ni yo muñwi ya n’a i ezize. Mulimu ki yena ya n’a i ezize.

Kupa mutu y’o ku kutumana ni ku teeleza kanyunywani ha ka nze ka cobila. Cwale u mu buze kuli: “Ki mañi ya ezize linyunywani ni ku li luta ku cobila?” Ki Mulimu. Mulimu ki yena ya ezize mahalimu ni lifasi ni linto ze pila kaufela! Ki Yena ya fana bupilo.

Kono mutu yo muñwi wa kona ku bulela kuli u lumela fela z’a bona. A kana a bulela kuli: ‘Haiba ha ni koni ku bona nto ye ñwi, ha ni koni ku lumela kuli i teñi.’ Kacwalo, batu ba bañwi ba bulela kuli ha ba lumeli kuli Mulimu u teñi kakuli ha ba koni ku mu bona.

Ki niti kuli ha lu koni ku bona Mulimu. Bibele i li: ‘Ha ku na mutu ya kona ku bona Mulimu.’ Ha ku na munna, musali, kamba mwanana fa lifasi ya kona ku bona Mulimu. Kacwalo, ha ku na mutu ya swanela ku eza siswaniso sa Mulimu. Mulimu mane u lu bulelela kuli lu si ezi siswaniso sa hae. Kacwalo, ha lu koni ku tabisa Mulimu ha ne lu ka ba ni lika ze cwalo mwa ndu ya luna.—Exoda 20:4, 5; 33:20; Joani 1:18.

Kono haiba ha u koni ku bona Mulimu, u kona ku ziba cwañi kuli Mulimu u teñi luli? Ki wo mutala. Kana wa kona ku bona moya?— Kutokwa. Ha ku na y’a kona ku bona moya. Kono wa kona ku bona lika z’o eza moya. Wa kona ku bona matali ha nyanganya ha ku fuka moya. Kacwalo, wa lumela kuli moya u teñi.

Hape wa kona ku bona lika z’a ezize Mulimu. Ha u bona palisa kamba nyunywani ye pila, u bona nto ye ñwi ya ezize Mulimu. Kacwalo wa lumela kuli Mulimu u teñi luli.

 Yo muñwi wa kona ku ku buza kuli, ‘Ki mañi ya ezize lizazi ni lifasi?’ Bibele i li: “Mulimu n’a ezize Lihalimu ni Lifasi.” (Genese 1:1) Ee, Mulimu n’a ezize lika ze nde zeo kaufela! U ikutwa cwañi ka za seo?—

Kana ha ku tabisi ku ba ya pila? Lwa kona ku utwa linyunywani ha li cobila hande. Lwa kona ku bona lipalisa ni lika ze ñwi z’a ezize Mulimu. Mi lwa kona ku ca lico z’a lu file Mulimu.

Lu lukela ku itumela ku Mulimu kabakala lika zeo kaufela. Sa butokwa ka ku fitisisa kikuli, lu swanela ku itumela ku yena kakuli u lu file bupilo. Haiba luli lwa itumela ku Mulimu, lu ka eza nto ye ñwi. Ki nto mañi yona yeo?— Lu ka utwa Mulimu, mi lu ka eza z’a lu bulelela mwa Bibele. Ka ku eza cwalo, lwa kona ku bonisa kuli lu lata Yena ya ezize linto kamukana.

Lu swanela ku bonisa kuli lwa itumela ku Mulimu kabakala linto kamukana z’a ezize. Ka nzila ifi? U bale ze ñozwi kwa Samu 139:14; Joani 4:23, 24; 1 Joani 5:21; ni Sinulo 4:11.

[Siswaniso se si fa likepe 21]

Ki mañi ya ezize lika ze pila kaufela?

[Maswaniso a fa likepe 22]

Bakeñisa kuli ndu ne i yahilwe ki mutu, ki mañi ya n’a ezize lipalisa, likota, ni lifolofolo?

[Siswaniso se si fa likepe 25]

U ziba cwañi kuli moya u teñi?