Kauhanyo 15

Ku Ituta Tuto Ya Ku Ba Ya Musa

KANA wa ziba se ku talusa ku ba ni saluluti?— Ku ba ni saluluti ku talusa ku sa tabela mutu ka libaka fela la kuli mwendi u bonahalela mu sili kamba u bulela puo i sili. Kacwalo, ku ba ni saluluti ki ku ba ni maikuto kamba mubonelo o maswe ka za mutu yo muñwi u si ka fita luli fa ku mu ziba.

Kana u ikutwa kuli ki ko ku lukile ku sa tabela mutu pili u si ka mu ziba luli kuli ki mutu ya cwañi kamba kakuli fela h’a swani ni wena?— Kutokwa, saluluti ha si si ka luka, mi haki se si musa. Ha lu swaneli ku ba ni saluluti ku mutu ka libaka fela la kuli mwendi h’a swani ni luna.

Ha ku nahane ka za teñi. Kana ku na ni y’o ziba wa litalo la mubala o sa swani ni la hao kamba y’a bulela puo ye sa swani ni ya hao?— Mwendi mane wa ziba batu ba ba bonahalela mu sili kakuli ba holofezi kamba kakuli ba kula. Kana u ya musa, ya lilato, ku ba ba sa swani ni wena?—

Ha lu teeleza ku Muluti yo Mutuna, yena Jesu Kreste, lu ka ba ni musa kwa batu kaufela. Naha kw’a zwa mutu kamba mubala wa litalo la hae ha li lukeli ku lu fa libaka la ku sa mu tabela. Lu lukela ku ba ni musa ku yena. Nihaike haki batu kaufela ba ba lumela cwalo, Jesu n’a lutile yona tuto yeo. Ha lu ambole ka za yona.

Mujuda yo muñwi ya n’a na ni saluluti ku ba bañwi n’a tile ku Jesu ni ku t’o mu buza kuli: ‘Ni lukela ku ezañi kuli ni pile ku ya ku ile?’ Jesu n’a ziba kuli munna y’o mwendi n’a bata kuli Jesu a bulele kuli lu lukela fela ku ba ni musa kwa batu ba mubala o swana ni wa luna kamba ba mwa naha ya hesu. Kacwalo, ku fita kuli yena Jesu a alabe puzo  yeo, a buza munna y’o kuli: ‘Mulao wa Mulimu u bulela kuli lu lukela ku ezañi?’

Munna y’o a alaba kuli: ‘U swanezi ku lata Jehova Mulimu wa hao ka pilu ya hao kaufela, mi u swanezi ku lata wa henu mo u itatela.’ Jesu a li: ‘U alabile hande. U zwelepili ku eza cwalo, mi u ka fumana bupilo bo bu sa feli.’

Kono munna y’o n’a sa bati ku ba ya musa kamba ya lilato kwa batu be ne ba sa swani ni yena. Kacwalo, a lika ku bata mwa ku itatulela. A buza Jesu kuli: ‘Wahesu luli ki mañi?’ Mwendi n’a bata kuli Jesu a bulele kuli: “Bahenu ki balikani ba hao,” kamba kuli “Ki batu ba ba swana ni wena.” Kuli a alabe puzo yeo, Jesu a bulela likande la Mujuda ni Musamaria. Likande leo ne li kandekilwe cwana.

Munna yo muñwi n’a shetumukela kwa Jeriko ku zwa kwa Jerusalema. Munna y’o n’a li Mujuda. Ha n’a nze a zamaya, masholi ba mu swala. Ba mu wiseza fafasi, mi ba mu ngela masheleñi ni liapalo za hae. Masholi bao ba mu lindaula mi ba mu siya kwatuko ni nzila a welezi.

Hamulahonyana wa f’o, muprisita yo muñwi kih’a taha ka nzila yeo. A bona yena munna y’o ya n’a holofezi maswe. N’o ka ezañi wena?— Ka bumai, muprisita y’o n’a fitelezi, a zamaela kwa lineku  le liñwi la nzila. Mane n’a si ka yema. N’a si ka eza niheba nto i liñwi kuli a tuse yena munna y’o.

Cwale munna yo muñwi wa bulapeli hahulu a taha ka nzila yeo. N’a li Mulivi, mi n’a sebelezanga mwa tempele kwa Jerusalema. Kana n’a ka yema kuli a tuse?— Kutokwa. N’a ezize nto ye swana ni ya n’a ezize muprisita.

Kwa mafelelezo, Musamaria a taha ka nzila yeo. Kana wa kona ku mu bona h’a nz’a taha fo i lobela nzila yeo?— A bona Mujuda y’o a lobezi fafasi, a holofezi maswe. Masamaria ni Majuda ne ba sa latani ni hanyinyani. (Joani 4:9) Kacwalo, kana Musamaria y’o n’a ka siya munna y’o a sa mu tusi? Kana n’a ipulelezi kuli: ‘Ni ka tusezañi Mujuda y’o? N’a si ke a ni tusa kambe ki na ya holofezi’?

 Musamaria y’o a talimela munna ya n’a lobezi kwatuko ni nzila, mi a mu utwela butuku. N’a sa koni ku mu siya f’o kuli a shwe. Kacwalo, a tuluka fa pelesa ya hae, a atumela munna y’o, mi a kalisa ku alafa litombo za hae. A li sela mafula ni veine. Ku eza cwalo ne ku ka tusa litombo zeo ku fola. Kihona a tama litombo zeo ka lisila.

Musamaria y’o a nanula ka tokomelo munna ya holofezi y’o ni ku mu pahamisa fa pelesa ya hae. Cwale ba shetumuka hanyinyani-hanyinyani mwa nzila yeo ku fitela ba fita kwa hotela. Teñi k’o, Musamaria a fumanela munna y’o sibaka mwa ku ina, mi a mu babalela hande.

Cwale Jesu a buza munna y’o ya n’a ambola ni yena kuli: ‘Ku wena, ki mañi kwa banna ba balalu bao ya n’a li muhabo yo munde?’ N’o ka alaba cwañi? Kana n’e li muprisita, Mulivi, kamba Musamaria?—

Munna y’o a alaba kuli: ‘Wahabo mutu ki munna ya n’a yemi ni ku babalela munna ya n’a holofezi.’ Jesu a li: ‘U bulezi niti. Ha ku ye, mi ni wena u y’o eza cwalo.’—Luka 10:25-37.

Kana leo ne li si likande le linde? Li bonisa hande kuli bahesu ki bomañi.  Haki balikani fela ba luna ba batuna. Mi haki batu fela ba mubala wa litalo le li swana ni la luna kamba ba ba bulela puo ye lu bulela. Jesu n’a lu lutile kuli lu lukela ku ba ni musa kwa batu ku si na taba kuli ba zwa kai, ba bonahala cwañi, kamba ba bulela puo mañi.

Kona mw’a inezi Jehova Mulimu cwalo. H’a na saluluti. Jesu n’a ize: ‘Ndat’a mina ya kwa lihalimu u pazuliseza batu ba bande ni ba ba maswe lizazi la hae. Mi u neliseza ba bande ni ba ba maswe pula ya hae.’ Kacwalo, lu lukela ku ba ni musa kwa batu kaufela, sina Mulimu h’a li cwalo.—Mateu 5:44-48.

Kacwalo, ha u bona mutu ya holofezi, u ka eza cwañi?— Ku cwañi haiba mutu y’o u zwa kwa naha i sili kamba litalo la hae haki la mubala o swana ni la hao? U sa li wahenu, mi u lukela ku mu tusa. Haiba u ikutwa kuli u mwanana hahulu mi ha u koni ku tusa, fohe wa kona ku kupa yo muhulu kuli a t’o tusa. Kamba wa kona ku biza mupokola kamba bo muluti kwa sikolo. Ka ku eza cwalo, u bonisa kuli u ya musa, sina Musamaria yale.

Muluti yo Mutuna u bata kuli lu be ni musa. U bata kuli lu tuse ba bañwi, ku si na taba kuli ki bomañi. Ki kabakaleo ha n’a kandekile likande la za Musamaria ya n’a na ni musa.

Ka za tuto ye ya ku ba ya musa kwa batu ku si na taba ni mubala wa litalo la bona kamba naha ko ba zwa, u bale Liproverbia 19:22; Likezo 10:34, 35; ni 17:26.

[Maswaniso a fa likepe 83]

Lu lukela ku eza cwañi batu ba ba kana ba sa swani ni luna?

[Maswaniso a fa likepe 85]

Ki kabakalañi Musamaria ha n’a li muhabo yo munde?

[Siswaniso se si fa likepe 86]

U kona ku ba cwañi wahabo yo munde?