Kauhanyo 16

Ki Sifi Se Si Li Sa Butokwa Luli?

ZAZI le liñwi, munna yo muñwi n’a tile ku t’o bona Jesu. N’a ziba kuli Jesu n’a li munna ya butali hahulu, kacwalo a mu bulelela kuli: ‘Muluti, ha ku bulelele muhulwan’a ka ku ni fa kwa lika z’a na ni.’ Munna y’o n’a ikutwa kuli n’a lukela ku fumana kwa lika zeo.

Kambe n’e li wena Jesu, n’o ka alaba cwañi?— Jesu n’a boni kuli munna y’o n’a na ni butata. Kono butata bwa hae n’e si kuli n’a tokwa za n’a na ni muhulwan’a hae. Butata bwa munna y’o n’e li bwa kuli n’a sa zibi ze li za butokwa luli mwa bupilo.

Ha lu nahane ka za teñi. Ki nto mañi ye lukela ku ba ya butokwa ka ku fitisisa ku luna? Kana ki ku ba ni libapaliso ze nde, liapalo ze nca, ni ze ñwi cwalo?— Kutokwa, ku na ni nto ye ñwi ye li ya butokwa hahulu. Mi ki yona tuto yeo Jesu n’a bata ku luta. Kacwalo a kandeka likande la mutu ya n’a libezi ka za Mulimu. Kana wa tabela ku li utwa?—

Munna y’o n’a fumile hahulu. N’a na ni masimu ni mashete. Licalo za n’a cezi ne li melile hande. Ne ku si na kwa n’a kona ku bulukela lico kaufela za n’a kutuzi. Kacwalo, n’a ka ezañi? A ipulelela kuli: ‘Ni ka yahulula mashete a ka ni ku yaha a matuna. Kihona ni ka buluka licalo za ka kaufela ni lika za ka ze nde kaufela mwa mashete a manca.’

 Mufumi y’o n’a nahana kuli ku eza cwalo n’e li ku eza ka butali. N’a hupula kuli n’a talifile hahulu ka ku buluka lika z’e ñata. N’a ipulelezi kuli: ‘Ni na ni lika ze ñata ze nde ze ni bulukile. Li ka n’i ngela lilimo z’e ñata. Kacwalo, kihona ni ka iketa. Ni ka ca, ku nwa, ni ku ikola.’ Kono ku na ni nto ye ñwi ye n’e fosahezi ka mwa n’a nahanela mufumi y’o. Kana nto yeo wa i ziba?— N’a sweli ku nahana fela ka za hae ni ka za ku ikola. N’a libezi Mulimu.

Kacwalo, Mulimu a ambola ni mufumi y’o. A li: ‘Wena sitoto tuwe. U ka shwa busihu bo. Cwale ki mañi ya ka ikungela lika z’o bulukile?’ Kana mufumi y’o n’a ka kona ku itusisa lika zeo ha s’a shwile?— Kutokwa, ne li k’a ngiwa ki yo muñwi. Jesu a li: “Ya ikubukanyeza bufumu, a sa bu fumeli ku Mulimu, ki mw’a inezi.”—Luka 12:13-21.

Ha u lati ku ba inge mufumi y’o, nji cwañi?— Za n’a bata hahulu  mwa bupilo n’e li ku ipumanela sifumu. F’o n’e li ku fosa. Kamita n’a batanga ku fumana se siñwi hape. Kono n’a si ka ‘fumela ku Mulimu.’

Batu ba bañata ba swana ni mufumi y’o. Kamita ba batanga ze ñata hahulu. Kono ku bata ze ñata k’o ku kona ku tahisa butata bo butuna. Ka mutala, u na ni libapaliso, nji cwañi?— Ki lifi ze ñwi za libapaliso z’o na ni? Ha ku ni bulelele.— Ku cwañi haiba yo muñwi wa balikani ba hao u na ni mbola kamba sipupe kamba libapaliso ze ñwi ili zeo wena u si na? Kana ne ku ka ba ko ku lukile ku bata kuli bashemi ba hao ba ku lekele si li siñwi sa zona?—

Fokuñwi, sibapaliso si bonahalanga ku ba sa butokwa hahulu. Kono ki sifi se si ezahala ku sona ha se ku fitile nako.— Si ba sa kale. Sa kona ku sinyeha, mi cwale ha u sa si tabela hape. Kaniti, u na ni nto ye ñwi ya butokwa hahulu ku fita libapaliso. Kana wa i ziba yona nto yeo?—

Ki bupilo bwa hao. Bupilo bwa hao ki bwa butokwa hahulu kakuli, ha u si na bona, ha u koni ku eza nto ifi kamba ifi. Kono bupilo bwa hao bu itingile fa ku eza ze tabisa Mulimu, nji cwañi?— Kacwalo, lu si ke lwa ba sina mufumi wa sitoto yale ya n’a libezi ka za Mulimu.

 Haki banana fela ba ba kana ba eza lika za butoto sina mufumi yale. Buñata bwa ba ba hulile ba ezanga cwalo ni bona. Ba bañwi ku bona kamita ba batanga ku ba ni lika ze ñata ku fita ze ba na ni. Ka zazi, ba kana ba ba ni lico za ku ca, liapalo za ku tina, ni sibaka mwa ku pila. Kono ba sa bata ze ñwi. Ba bata liapalo ze ñata. Mi ba bata mandu a matuna. Lika zeo li tokwa masheleñi. Kacwalo, ba beleka ka t’ata kuli ba fumane mali a mañata. Mi ka mo ba fumanela masheleñi a mañata, ki mo ba ka batela ku ba ni ze ñwi hape.

Ba bahulu ba bañwi ba patehiswa hahulu ki ku bata ku ipumanela masheleñi kuli mane ha ba na nako ya ku ba ni lubasi lwa bona. Mi ha ba na nako ya ku ituta za Mulimu. Kana masheleñi a bona a kona ku ba pilisa?— Kutokwa. Kana ba kona ku itusisa masheleñi a bona ha se ba shwile?— Kutokwa. Libaka kikuli ba ba shwile ha ba koni ku eza se siñwi.—Muekelesia 9:5, 10.

Kana f’o ku talusa kuli ku ba ni masheleñi ku fosahezi?— Awa. Lwa kona ku leka lico ni liapalo ka masheleñi. Bibele i bulela kuli yeo ki silelezo. (Muekelesia 7:12) Kono haiba lu lata masheleñi, fohe lu ka kena mwa butata. Lu ka ba sina mufumi wa sitoto yale ya n’a ikubukanyelize sifumu mi n’a si ka si fumela ku Mulimu.

Ku fumela ku Mulimu ku talusañi?— Ku talusa ku beya Mulimu kwapili mwa bupilo bwa luna. Batu ba bañwi ba li ba lumela kuli Mulimu u teñi. Ba nahana kuli se si tokwahala fela ki ku lumela. Kono kana luli ba fumezi ku Mulimu?— Kutokwa, ba swana sina mufumi yale ya n’a libezi ka za Mulimu.

Jesu n’a si ka libala Ndat’ahe wa kwa lihalimu. N’a si ka lika ku ipumanela masheleñi a mañata. N’a si na lika ze ñata. Jesu n’a ziba se si li sa butokwa luli mwa bupilo. Kana wa ziba yona nto yeo?— Ki ku fumela ku Mulimu.

Ha ku ni taluseze, lu kona ku fumela cwañi ku Mulimu?— Lu kona ku fumela ku Mulimu ka ku eza ze mu tabisa. Jesu n’a ize: “Kamita  ni eza ze mu tabisa.” (Joani 8:29) Mulimu wa tabela ha lu eza lika z’a bata kuli lu eze. Cwale ha ku ni bulelele, ki lifi lika z’o kona ku eza kuli u tabise Mulimu?— Wa kona ku bala Bibele, ku ya kwa mikopano ya Sikreste, ku lapela ku Mulimu, ni ku tusa ba bañwi ku ituta ka za hae. Zeo ki lika za butokwa hahulu luli mwa bupilo.

Bakeñisa kuli Jesu n’a fumezi ku Mulimu, Jehova n’a mu babalezi. N’a file Jesu mupuzo wa ku pila ku ya ku ile. Haiba lu ba sina Jesu, Jehova u ka lu lata ni luna ni ku lu babalela. Kacwalo, ha lu be sina Jesu mi lu si liki ku ba sina mufumi yale ya n’a libezi ka za Mulimu.

Ki a mañolo a mañwi a’ zwa mwa Bibele a bonisa mwa ku ngela hande sifumu: Liproverbia 23:4; 28:20; 1 Timotea 6:6-10; ni Maheberu 13:5.

[Siswaniso se si fa likepe 87]

Munna y’o n’a na ni butata mañi?

[Siswaniso se si fa likepe 88]

Mufumi y’o u sweli ku nahana lika mañi?

[Siswaniso se si fa likepe 89]

Ki sifi s’o na ni se si li sa butokwa hahulu ku fita libapaliso?

[Maswaniso a fa likepe 91]

Ki sifi s’a eza mwanana y’o se si li sa butokwa luli?