Kauhanyo 19

Kana Ku Lwana Ku Lukile?

KANA ku na ni bashimani kamba basizana b’o ziba ba ba lata ku ikutwisisa kamba ku iponisa kuli ba tiile?— Kana wa lata ku ba ni bona? Kamba kana n’o ka tabela ku ba ni mutu ya sishemo, ya lata kozo?— Muluti yo Mutuna n’a ize: “Mbuyoti ki ya ba ba batiseza batu kozo, kakuli ba ka bizwa bana ba Mulimu.”—Mateu 5:9.

Kono fokuñwi batu ba ezanga lika ze lu nyemisa. Nji hakucwalo?— Kacwalo, lu kana lwa ikutwa kuli lu lukela ku ba kutiseza. Ne ku ezahezi cwalo kwa balutiwa ba Jesu zazi le liñwi ha ne ba li mwa musipili ni Jesu wa ku ya kwa Jerusalema. Teeleza ni ku bulelele ka za teñi.

Ha se ba zamaile musipili o mutelelenyana, Jesu a luma ba sikai kwa balutiwa ba hae ku itangeta kwa munzi wa Samaria kuli ba y’o fumana teñi sibaka ko ba ka y’o lobala. Kono batu ba kwateñi ne ba sa lati kuli ba fitele mwa munzi w’o, bakeñisa kuli Masamaria  ne ba li ba bulapeli bu sili. Mi ne ba sa lati mutu ufi kamba ufi ya n’a y’o lapelelanga kwa muleneñi wa Jerusalema.

Ha ne ku ka ezahala cwalo ku wena, n’o ka ezañi? Kana n’o ka nyema? Kana n’o ka bata ku ba kutiseza?— Balutiwa bo Jakobo ni Joani ne ba bata ku eza honacwalo. Ne ba ize ku Jesu: ‘Kana u bata kuli lu bulelele mulilo ku zwa kwa lihalimu ni ku ba bulaya?’ Ku swanezi Jesu ha n’a ba bizize kuli Bana ba Pula! Kono Jesu n’a ba bulelezi kuli ku eza batu ba bañwi cwalo ha ku si ka luka.—Luka 9:51-56; Mareka 3:17.

Ki niti kuli batu fokuñwi ba ka lu eza maswe. Banana ba bañwi ba kana ba sa lati kuli lu bapale ni bona. Mane ba kona ku bulela kuli: “Ha lu lati ku bapala ni wena.” Ha ne ku ka ezahala nto ye cwalo, ya kona ku lu nyemisa, nji cwañi? Lwa kona ku ikutwa kuli lu lukela ku ba kutiseza ni luna. Kono kana lwa swanela ku eza cwalo?—

Kiñi ha u sa ngi Bibele ya hao? Ha lu apule kwa Liproverbia kauhanyo 24, timana 29. Teñi, i bala kuli: “U si ke wa li; sina mw’a ni ezelize, ni na ni ka mu eza cwalo, ni likanyise mutu ka s’a ni ezize.”

Timana yeo i talusañi ku wena?— I bulela kuli mane ha lu lukeli ku lika ku kutiseza. Ha lu lukeli ku eza maswe mutu ka libaka fela la kuli n’a lu ezize maswe ni yena. Kono ku cwañi haiba mutu a bata ku ku lwanisa? Mwendi u ka bata ku ku nyemisa ka ku ku shendaka. A kana a ku seha ni ku bulela kuli wa saba. Mwendi u ku biza kuli u lipyeha. U lukela ku ezañi? Kana n’o ka ituhelela ku lwana ni yena?—

Hape, ha lu bone se i bulela Bibele. Ha ku apule kwa Mateu kauhanyo 5, timana 39. Teñi, Jesu u li: “Mu si ke mwa hanisa ya mi eza maswe; kono mutu h’a ka ku bakula fa lilama la bulyo, u mu sikamiseze ni lona le liñwi.” Ka m’o bonela wena, Jesu n’a talusañi ha n’a bulezi cwalo? Kana n’a talusa kuli haiba mutu a ku nata ñindi kwa lilama le liñwi, u swanela ku mu tuhelela kuli a ku nate ni ku le liñwi?—

 Awa, Jesu n’a sa talusi cwalo ni hanyinyani. Ku bakulwa ha ku swani ni ku natiwa ñindi. Ku bat’o swana fela ni ku kasha-kashana. Mutu u kona ku eza cwalo kuli a zuse ndwa. U bata ku lu nyemisa. Mi ha lu nyema, lwa kalisa ku mu kasha-kasha ni luna, ku ezahalañi?— F’o luli mwendi lu ka lwana.

Kono Jesu n’a sa bati balateleli ba hae kuli ba lwane. Kacwalo, a bulela kuli haiba mutu a lu bakula, ha lu lukeli ku mu bakula ni luna. Ha lu lukeli ku nyema ni ku kalisa ku lwana. Ha lu lwana, lu bonisa kuli luna ni yena mutu y’o ya kalisize lindwa lu na ni moya o swana.

Butata ha bu kalisa, ki ifi nto y’o bona kuli ki ye nde ku eza?— Ki ku zwa fateñi. Mutu yo muñwi mwendi a kana a bata ku zwelapili ku ku kasha-kasha. Kono mwendi u ka feleza honaf’o. Ha u zwa  fateñi, ha ku talusi kuli u nakulonda. Ku talusa kuli u ya tiyezi ze lukile.

Kono ku cwañi ha ne u ka lwana mi wa fenya y’o lwana ni yena? Ne ku ka ezahalañi cwale?— Yena y’o fenyize y’o wa kona ku ku kubukanela ni balikani ba hae. Mane ba kona ku ku holofaza ka mulamu kamba tipa. Kacwalo, kana cwale wa kona ku bona libaka Jesu ha n’a sa bati kuli lu lwane?—

Ki sifi se lu lukela ku eza ha lu bona batu ba bañwi ba nze ba lwana? Kana lwa swanela ku tusa yo kamba yale mwa ndwa yeo?— Bibele i lu bulelela se si li se si lukile. Ha ku apule kwa Liproverbia kauhanyo 26, timana 17. I li: “Lifita-nzila le li ikapeleza mwa muzeko wa ba bañwi, li swana nge ya swala nja kwa lizebe.”

Ne ku ka ezahalañi ha n’o ka swala nja kwa lizebe za yona? Nja yeo ne i ka utwa butuku, mi ni yona ne i ka ku luma, nji cwañi? Nja yeo ha ne i ka ikataza kuli i lukuluhe, n’o ka swalelela ka ku tiya kwa lizebe za yona mi ni yona ne i ka nyema hahulu. Ha ne u ka i tuhela, ne i ka ku luma hahulu. Kono kana n’o ka swalelela kwa lizebe za yona ku ya ku ile?—

Ne lu ka ba mwa butata bo bu cwalo ha ne lu ka ikenya mwa lindwa za batu ba bañwi. Mwendi ha lu zibi ya kalisize lindwa zeo kamba libaka le ba lwanela. Mwendi mutu yo muñwi wa fenyiwa, kono mwendi u uzwelize yo muñwi nto ye ñwi. Ha ne lu ka mu tusa, ne lu ka tusa lisholi. F’o ne ku si ke kwa ba hande, nji cwañi?

 Kacwalo, ki sifi s’o lukela ku eza ha u bona ba ba lwana?— Haiba ki kwa sikolo, wa kona ku mata ku y’o bulelela bo muluti. Mi haiba haki kwa sikolo, wa kona ku biza bashemi ba hao kamba mupokola. Ee, batu ba bañwi niha ne ba ka bata ku lwana, lu lukela ku ba ba kozo.

Balutiwa ba niti ba Jesu ba lika mo ba konela kaufela kuli ba tokolomohe ku lwana. Ka ku eza cwalo, lu bonisa kuli lu ba ba tiyezi ze lukile. Bibele i bulela kuli mulutiwa wa Jesu “h’a lukeli ku lwana; kono u lukela ku ba ya na ni musa kwa batu kaufela.”—2 Timotea 2:24.

Ha lu bone cwale likelezo ze nde ze ñwi ze ka lu tusa ku sa ikenya mwa lindwa: Maroma 12:17-21 ni 1 Pitrosi 3:10, 11.

[Siswaniso se si fa likepe 102]

Bo Jakobo ni Joani ne ba bata ku ezañi kuli ba kutiseze Masamaria misuha?

[Siswaniso se si fa likepe 104]

Lu lukela ku ezañi mutu yo muñwi h’a bata ku lu lwanisa?

[Siswaniso se si fa likepe 105]

Ku kena mwa lindwa za ba bañwi ku swana cwañi ni ku swala nja kwa lizebe za yona? Wa kona ku holofala, kacwalo, si ikenyi mwa lindwa za bona!

[Siswaniso se si fa likepe 106]

Ki sifi s’o lukela ku eza ha u bona ba ba lwana?