Kauhanyo 26

‘Ha Ku Na Muyahi Ya ka Ipulela Kuli: Na Kula’

Isaya 33:1-24

1. Ki kabakalañi manzwi a’ kwa Isaya 33:24 h’a li a omba-omba?

 MUAPOSITOLA Paulusi n’a ize: “Ze bupilwe kaufela li tonga hamoho, mi hamoho li utwa butuku bwa ku pepa ku fitela cwale.” (Maroma 8:22) Kalulo ya sayansi ya za bualafi niha i zwezipili, makulanu ni mafu li zwelapili ku kataza batu. Kacwalo, sepiso ye fweka kalulo ye ya bupolofita bwa Isaya ki ye nde luli! Mu nahane nako ye ku si ke kwa ba ni ‘muyahi ya ka ipulela kuli: Na kula.’ (Isaya 33:24) Yona sepiso yeo i ka talelezwa lili, mi ili ka mukwa ufi?

2, 3. (a) Sicaba sa Isilaele si kula ka mukwa ufi? (b) Asirya ne i bile cwañi yona “tupa” yeo Mulimu n’a fitisize ka yona koto?

² Isaya u ñola ka nako yeo batu bao Mulimu a itamile ni bona bulikani ba kula kwa moya. (Isaya 1:5, 6) Ba tupwikezi hahulu-hulu mwa bukwenuheli ni muzamao o maswe kuli Jehova Mulimu u tokwa ku ba ota maswe. Jehova u itusisa Asirya ku ba yona “tupa” yeo a fitisize ka yona koto yeo. (Isaya 7:17; 10:5, 15) Pili, mubuso wa Isilaele wa masika a’ lishumi wa kwa mutulo u bitiwa ki Maasirya ka 740 B.C.E. (2 Malena 17:1-18; 18:9-11) Lilimonyana hasamulaho, Senakeribi mulena wa Asirya u lwanisa ka t’ata mubuso wa Juda wa kwa mboela. (2 Malena 18:13; Isaya 36:1) Bona Maasirya ba ba m’ata bao ha ba nze ba shandaula naha, ku bonahala kuli ha ku na se si ka tibela Juda ku yundiselezwa.

³ Kono Asirya i fiteleza koto ye i lumelelizwe ku ota batu  ba Mulimu ka yona. Yona cwale ka mukwañuli i bata ku hapa lifasi kaufela. (Isaya 10:7-11) Kana Jehova u ka i tuhelela ku nyandisa h’a situhu batu ba hae a sa i oti? Kana butuku bwa sicaba bwa kwa moya bu ka foliswa? Mwa Isaya kauhanyo 33, lu bala likalabo za Jehova ku zona lipuzo zeo.

Ku Sinya Sisinyi

4, 5. (a) Asirya i ka welwa ki cinceho mañi? (b) Isaya u lapelela batu ba Jehova tapelo mañi?

⁴ Bupolofita bu kala bu li: “Bumai ki bwa hao wena sisinyi se si si ka sinywa kale, wena muhapi ya si ka hapiwa kale! Mi cwale ha u s’o felize ku sinya, u ka sinywa; ha u s’o felize ku hapa, u ka hapiwa.” (Isaya 33:1) Isaya u bulela ku sisinyi luli, yona Asirya. Ka nako ye si na ni m’ata ka ku fitisisa, sicaba se si na ni bulwani seo si bonahala kuli ha si koni ku bitiwa. Si ‘sinyize, mi sona ha si si ka sinywa kale.’ Si shandauzi minzi ya Juda, mane si kubuluzi ni tutu ya mwa ndu ya Jehova—mi ku bonahala kuli niha si ezize zeo kaufela ha si si ka otiwa! (2 Malena 18:14-16; 2 Makolonika 28:21) Kono cwale, miinelo i ka cinca. Isaya u zibahaza ka bundume kuli, “U ka sinywa.” Bupolofita b’o bwa omba-omba luli ku ba ba sepahala!

⁵ Ka yona nako ye sabisa yeo, balapeli ba Jehova ba ba sepahala ba ka tokwa ku kupa tuso ku yena. Kacwalo Isaya u lapela kuli: “Mawe [Muñ’a] Bupilo, u lu utwele butuku; ki Wena ye lu talimezi. U be lizoho [la m’ata ni matiyelo] le li lu zusa kakusasa ka zazi ni zazi; i be Wena ya lu pilisa ka nako ya ziyezi. Linzwi la hao ha li luma, macaba a saba; u sa nanuha fela, macaba a hasana.” (Isaya 33:2, 3) Ki nto ye swanela Isaya h’a lapela kuli Jehova a lukulule batu ba Hae sina Mw’a ezelize hañata-ñata mwa linako za kwamulaho. (Samu 44:3; 68:1) Mi Isaya a sa fitisa fela yona tapelo yeo, u polofita ni kalabo y’a ka fa Jehova ku yona!

6. Kiñi se si ka ezahala ku Asirya, mi ki kabakalañi ha ku swanela cwalo?

 ⁶ “Tutu ya mina [Maasirya] ye hapilwe ki sila, i ka ciwa sina simu ye cilwe ki sishenyi; batu ba ka i tulela fahalimu sina nziye ye t’o ina fafasi.” (Isaya 33:4) Juda ya ziba sinyeho ye li tahisanga likokwani ha li ambeka sibaka. Kono ka nako ye, ki lila za Juda ze ka sinyiwa. Asirya i ka bitiwa ka nzila ye swabisa, mi masole ba yona ba ka eziswa ku baleha, ili ku siyela bayahi ba Juda tutu ye ñata ya ku kubulula! Kwa swanela luli kuli Asirya ye ile nkuwa kwa situhu i sinyiwe.—Isaya 37:36.

Muasirya wa mwa Linako za Cwale

7. (a) Ki bomañi kacenu ba ba kona ku likanyezwa ni sicaba sa Isilaele se si kula kwa moya? (b) Ki bomañi ba ba ka ba “tupa” y’a ka itusisa Jehova kwa ku sinya Krestendomu?

⁷ Bupolofita bwa Isaya bu sebeza cwañi mwa mazazi a luna? Sicaba sa Isilaele se si kula kwa moya si kona ku likanyezwa kwa Krestendomu ye sa sepahali. Jehova mwa n’a itusiselize Asirya ku ba yona “tupa” ya ku ota Isilaele ka yona, ka nzila ye swana u ka itusisa “tupa” kwa ku ota Krestendomu—hamoho ni kopano mutumbi ya mwa lifasi kamukana ya bulapeli bwa buhata, yena “Babilona yo mutuna.” (Isaya 10:5; Sinulo 18:2-8) Yona “tupa” yeo ikaba linaha z’e li lilama za Kopano ya ba Macaba—ili kopano yeo mwa buka ya Sinulo i swaniselizwe ku ba sibatana se si fubelu, se si na ni litoho ze 7, ni manaka a’ lishumi.—Sinulo 17:3, 15-17.

8. (a) Ki mañi kacenu ya kona ku likanyezwa ni Senakeribi? (b) Senakeribi wa mwa linako za cwale u ka ba ni bundume bwa ku lwanisa bomañi, mi ki lifi ze ka zwa mwateñi?

⁸ Muasirya wa mwa linako za cwale h’a ka tataula bulapeli kaufela bwa buhata, ku ka bonahala inge kuli h’a koni ku tuheliswa. Ka moya o swana ni wa Senakeribi, Satani Diabulosi u ka ba ni bundume bwa ku lwanisa Bakreste ba niti  kwand’a ku lwanisa likopano za bukwenuheli ze swanela ku otiwa. Bolule-lule ba batu ba swalisani ni bomasiyaleti ba bana ba Jehova ba kwa moya ba ba tozizwe. Bona bao ba zwile mwa lifasi la Satani, le li kopanyeleza ni Babilona yo mutuna, mi ba yemela Mubuso wa Jehova. Satani, yena “mulimu wa lifasi le,” u halifiswa hahulu ki kuli Bakreste ba niti ba hana ku mu kuteka, mi u ka ba lwanisa maswe. (2 Makorinte 4:4; Ezekiele 38:10-16) Twaniso yeo ku si na kakanyo ikaba ye sabisa luli. Kono batu ba Jehova ha ba na ku tokwa ku hoboka ku saba. (Isaya 10:24, 25) Mulimu u ba sepisize kuli u ka ba “pilisa ka nako ya ziyezi.” U ka kena mwa ndwa ili ku yundisa Satani ni sicaba sa hae. (Ezekiele 38:18-23) Sina mwa linako za kale, ba ba lika ku sinya batu ba Mulimu ki bona ba ba ka sinyiwa! (Mu bapanye Liproverbia 13:22b.) Libizo la Jehova li ka boniswa ku ba le li kenile, mi ba ba ka punyuha ba ka fiwa mupuzo kakuli ne ba batile “butali ni zibo; [ni] ku saba [Muñ’a] Bupilo.”—Mu bale Isaya 33:5, 6.

Temuso ku Ba Ba Sa Sepahali

9. (a) “Lindume” ba Juda ni “mandumeleti [ba bona] ba ba lumilwe ku y’o koza” ba ka ezañi? (b) Muasirya u ka eza cwañi Juda niha i ka lika ku eza kozo?

⁹ Kono ki sifi se si ka ezahala ku ba ba sa sepahali ba ba mwa Juda? Isaya u talusa za sinyeho ye ka ba tahela ka Asirya. (Mu bale Isaya 33:7.) “Lindume” za mpi ya Juda za bokolola kabakala ku saba Maasirya ba ba taha. “Mandumeleti ba ba lumilwe ku y’o koza,” ili ku yo lika ku eza kozo ni Maasirya ba ba na ni bulwani b’a somiwa ni ku shubulwa. Ba ka bokolola maswe kabakala ku sa kondisa lika kwa bona. (Mu bapanye Jeremia 8:15.) Muasirya ya situhu h’a na ku ba shwela makeke. (Mu bale Isaya 33:8, 9.) Ka situhu h’a na ku isa pilu kwa litumelelano za n’a ezize ni bayahi ba Juda. (2 Malena 18:14-16) Muasirya u ka ‘shwaula  minzi’ ya Juda, ili ku i nyefula. H’a na ku ba ni taba ni bupilo bwa batu. Muinelo u ka ba o maswe hahulu kuli mane naha ka sibili i ka lila, ka swanisezo. Lebanoni, Sharoni, Bashani, ni Karmele ni zona li ka lila kabakala yona sinyeho yeo.

10. (a) “Lindume” ba Krestendomu ba ka ba cwañi ba ba si na tuso? (b) Ki mañi ya ka sileleza Bakreste ba niti mwa nako ya ziyezi ya Krestendomu?

¹⁰ Ku si na kuli cwañi, miinelo ye swana ikaba teñi honafa macaba h’a ka kala ku lwanisa bulapeli. Sina mwa mazazi a Ezekiasi, ku lika ku tibela yona twaniso ye sinya yeo ha ku na ku konda. “Lindume” za Krestendomu—ba bupolitiki ba yona, ba ba i fa mali, ni batu ba bañwi ba ba m’ata ku yona—ha ba na ku kona ku i tusa. “Bulikani,” kamba litumelelano za mali ni za bupolitiki ze ezizwe ilikuli milelo ya Krestendomu i silelezwe li ka lobiwa. (Isaya 28:15-18) Ku lika ka t’ata ku tibela sinyeho ka buanyu ha ku na ku konda. Litekiso li ka fela kakuli Krestendomu i ka amuhiwa kamba ku sinyezwa tutu ni lipisinisi za yona. Ba ba sa tabela Krestendomu ba ka yemela fela kwahule ni ku lila sinyeho ya yona. (Sinulo 18:9-19) Kana Bukreste bwa niti ni bona bu ka sinyelezwa ni bwa buhata? Kutokwa, kakuli Jehova yena ka sibili u sepisa kuli: “Cwale ni ka zuha, ku bulela [Muñ’a] Bupilo, cwale ni ka ipahamisa, cwale ni ka lumbiwa.” (Isaya 33:10) Kwa mafelelezo, Jehova u ka yemela basepahali ba ba swana ni Ezekiasi ni ku yemisa twaniso ya Maasirya.—Samu 12:5.

11, 12. (a) Manzwi a’ kwa Isaya 33:11-14 a talelezwa lili mi ili ka mukwa ufi? (b) Manzwi a Jehova a fa temuso mañi ya kacenu?

¹¹ Ba ba sa sepahali ha ba koni ku itinga ku yona silelezo ye cwalo yeo. Jehova u li: “Mu itwale bucwañi, mi mu ka pepa muuku; moya o mu buyela ki mulilo o ka mi feza. Macaba a ka ca sina kalaka ye beswa; a ciswe ki lubya sina miutwa ye lemilwe. Mina ba kwahule, mu utwe se ni ezize;  ni mina ba ba inzi fakaufi, mu zibe mata a ka! Mwa Sione baezalibi ba mbemuka; ku ngangama ku sweli ba ba hana Mulimu. Ba li: Ki ufi ku luna ya ka pila ni mulilo o lyakama? Ki mañi ku luna ya ka pila ni lyangalilo le li sa timi?” (Isaya 33:11-14) Ku bonahala kuli manzwi ao a ama nako f’o Juda i lwanisezwa ki Babilona, ye ka ba sila se sinca. Ezekiasi ha s’a shwile, Juda i kutela mwa linzila za yona za bumaswe. Mwahal’a lilimo ze mashuminyana ze latelela, miinelo ya Juda i ba ye maswe ku to fita fa ku eza kuli sicaba kaufela si na ni ku suluhelwa ki mulilo wa buhali bwa Mulimu.—Deuteronoma 32:22.

¹² Milelo ye maswe ye leliwa ki batu ba ba sa utwi ya ku tibela katulo ya Mulimu i ba ye si ka tiya mane inge muuku. Mane, moya wa muikuhumuso, ili wa buipanguli wa sicaba u ka shangumuna likezahalo ze ka tahisa sinyeho ya sona. (Jeremia 52:3-11) Ba ba maswe ba ka “ca sina kalaka ye beswa”—ili ku yundelela! Ha ba nahana za sinyeho ye taha yeo, bayahi ba Juda ba baipanguli ba kenelwa ki sabo ye tuna. Manzwi ao Jehova n’a bulelezi Juda ye sa sepahali a bonisa muinelo wa ba ba mwa Krestendomu kacenu. Haiba ba sa utwi temuso ya Mulimu, nako ya bona ya kwapili ha i na ku ba ye nde.

Ku “Zamaya mwa Nzila ya Mulao”

13. Ki sepiso mañi ye fiwa ku ya “zamaya mwa nzila ya mulao,” mi ne i talelelizwe cwañi ku Jeremia?

¹³ Ku tuha f’o, Jehova ka ku fapana u li: “Yena ya zamaya mwa nzila ya mulao, ya bulela buniti bwa taba, ya nyaza maluwo a ngilwe ka ku koma, ya hanisa lizoho la hae kwa ku amuhela mali a kweta, ya itiba lizebe kuli a si ke a utwa milelo ya ku bulaya, ya itima kwa meto kuli a si ke a bona bumaswe, ki yena ya ka yaha mwa mabaka a’ lumbile; macwe a tiile a ka ba sisabelo sa hae; u ka fiwa buhobe bwa hae, mezi a hae h’a na ku kala.” (Isaya 33:15, 16)  Ka ku ya ka mw’a taluseza muapositola Pitrosi hasamulaho, “Mulena u ziba ku lamulela batu ba balapeli kwa miliko, ni ku bulukela ba ba maswe lizazi la Katulo, ku ba nata koto.” (2 Pitrosi 2:9) Jeremia n’a lamulezwi cwalo. Mababilona ha ne ba taekile munzi, batu ne ba na ni ku ‘ca buhobe bo bu beilwe fa sikala inze ba kalehile mwa lipilu.’ (Ezekiele 4:16) Basali ba bañwi mane ne ba cile bana ba bona ba ku ipepela. (Malilo 2:20) Niteñi, Jehova a tokomela kuli Jeremia wa babalelwa.

14. Bakreste kacenu ba kona cwañi ku zwelapili ku “zamaya mwa nzila ya mulao”?

¹⁴ Bakreste kacenu ni bona ba lukela ku “zamaya mwa nzila ya mulao,” ili ku latelela lipimo za Jehova ka zazi. (Samu 15:1-5) Ba lukela ku “bulela buniti bwa taba” ni ku hana buhata ni bupumi. (Liproverbia 3:32) Buputeleli ni ku leka likweta li kana za ba ze atile mwa linaha ze ñata, kono ku ya “zamaya mwa nzila ya mulao,” ki lika ze nyenyisa. Hape Bakreste ba lukela ku ba ni ‘lizwalo le linde’ mwa lipisinisi, ili ku eza ka t’ata kuli ba si ke ba kena mwa ku itusisa mikwa ye ile nkuwa kamba ya buputeleli. (Maheberu 13:18; 1 Timotea 6:9, 10) Hape, mutu ya ‘itibile lizebe kuli a si ke a utwa milelo ya ku bulaya ni ya itimile kwa meto kuli a si ke a bona bumaswe’ u ka keta hande lipina ni lika za ku itabisa ka zona. (Samu 119:37) Mwa lizazi la hae la katulo, Jehova u ka sileleza ni ku babalela balapeli ba hae, ba ba pila ka zona lipimo ze cwalo zeo.—Zefania 2:3.

Ku Bona Mulena wa Bona

15. Ki sepiso mañi ye ka tiisa Majuda ba ba sepahala ba ba mwa buhapiwa?

¹⁵ Ka ku tatama, Isaya u talusa hanyinyani nako ya kwapili ye nde kuli: “Meto a hao a ka bona Mulena mwa bunde bwa hae; a ka buha lifasi mwa butuna bwa lona kaufela. Pilu ya hao i ka hupula linako za sabo; mi fo u ka li: U kai  muñoli? U kai ya n’a telisa ka ku likanyeza bukiti bwa mitelo? U kai ya na tatuba litawala? Ha u sa na ku bona sicaba se si tata, sicaba sa manzwi a’ sa utwahali, sa puo i sili y’o sa koni ku utwiseza.” (Isaya 33:17-19) Majuda ba ba sepahala ha ba nze ba li mwa buhapiwa bwa kwa Babilona ka nako ye telele, ba ka tiiswa ki sepiso ya kuli mwa nako ya kwapili ku ka ba ni Mulena ya li Mesiya ni Mubuso wa hae. Niteñi, Mubuso w’o ba u bonela u sa li kwahule. (Maheberu 11:13) Puso ya Mesiya kwa mafelelezo ha i ka yo taha, puso ya Babilona ya buhateleli ikabe i li nto ye n’e ezahezi kale-kale. Ka tabo, ba ba ka punyuha twaniso ya Muasirya ba ka buza kuli: “Likombwa za mulena ya t’ata ba kai, be ne ba lu telisa, ku lu lifisa, ni ku lu amuha mitelo?”—Isaya 33:18, toloko ya Moffat.

16. Batu ba Mulimu ba kalile lili ku “bona” Mulena Mesiya, mi seo si tahisizeñi?

¹⁶ Manzwi a Isaya niha bonisa hande kuli ku ka ba ni tukuluho ya ku zwa mwa buhapiwa bwa kwa Babilona, lihapwa ba Majuda ka buñwi ba ka tokwa ku libelela zuho ya bafu kuli ba kone ku ikola talelezo ye tezi ya bona bupolofita b’o. Ku cwañi ka za batanga ba Mulimu kacenu? Ku zwelela ka 1914, batu ba Jehova ba konile ku “bona,” kamba ku lemuha, Mesiya, Mulena Jesu Kreste, mwa bunde bwa hae kaufela bwa kwa moya. (Samu 45:2; 118:22-26) Kabakaleo, ba lukuluzwi kwa nyandiso ni tamaiso ya muinelo wa linto o maswe wa Satani. Mwatas’a Sione, fona fo u tomilwe Mubuso wa Mulimu, ba ikola silelezo ya kwa moya ya niti.

17. (a) Ki lisepiso mañi ze bulelwa ka za Sione? (b) Lisepiso za Jehova ka za Sione li talelezwa cwañi kwa Mubuso wa Bumesiya ni kwa bayemeli ba ona fa lifasi-mubu?

¹⁷ Isaya u zwelapili u li: “U talime Sione, ona munzi wa mikiti ye kenile ya luna! Meto a hao a bone Jerusalema munzi wa buiketo, ni tende ye si na ku zwiswa, yeo limapo za yona li sa kumulwi, ye si na muhala o pumeha. Mwateñi,  [Muñ’a] Bupilo u ka ina ni luna, mwa bulena bwa hae kaufela; ku luna u ka ba sina linuka, e, linuka ze tuna, mo ku sa keni lisepe za lilabo, ni mo ku sa hapi lisepe za ndwa.” (Isaya 33:20, 21) Isaya u lu kolwisa kuli Mubuso wa Bumesiya wa Mulimu ha u koni ku kumulwa kamba ku sinyiwa. Hape, yona silelezo ye cwalo yeo ku si na kuli cwani i wela ni kwa bayemeli ba ba sepahala ba Mubuso fa lifasi-mubu kacenu. Buñata bwa bona niha ba likiwa maswe ka buñwi, babusiwa ba Mubuso wa Mulimu ba kolwa kuli ha ku na buikatazo bwa ku lika ku ba bulaya ka ku ba puteho bo bu kona ku konda. (Isaya 54:17) Jehova u ka sileleza batu ba hae sina mukokolombwa o tungile mo u sileleza munzi. Sila kaufela se si to ba lwanisa—nihaiba se si m’ata se si cwale ka “lisepe za lilabo” kamba “lisepe za ndwa”—li ka yunda!

18. Jehova u itumelela buikalabelo mañi?

¹⁸ Kono ki kabakalañi ba ba lata Mubuso wa Mulimu ha ba kona ku kolwa ka ku tiya kuli Mulimu u ka ba babalela? Isaya u talusa kuli: “[Muñ’a] Bupilo ki muatuli wa luna, [Muñ’a] Bupilo ki mutomi wa luna wa mulao; [Muñ’a] Bupilo ki Mulena wa luna, u ka na a lu pilisa.” (Isaya 33:22) Jehova u itumelela buikalabelo bwa ku sileleza ni ku etelela batu ba hae, ba ba lemuha kuli ki yena Mubusi Ya Pahami ka ku Fitisisa. Bona bao ba itatela ku ipeya kwatas’a puso ya hae ye zamaiswa ki Mulena ya li Mesiya. Ba lumela kuli Jehova u na ni m’ata a ku toma milao ni ku bona kuli ya latelelwa. Kono, kakuli Jehova u lata ku luka ni ku atula ka mulao, puso ya hae, ka Mwan’a hae, ha i imezi balapeli ba hae. Kono ba eza ‘se si ba swanela’ ka ku ipeya kwatas’a m’ata a hae. (Isaya 48:17) Ni kamuta, h’a na ku tuhela ba ba sepahala ku yena.—Samu 37:28.

19. Isaya u talusa cwañi ku sa ba ni tuso kwa lila za batu ba Jehova ba ba sepahala?

¹⁹ Isaya u bulelela lila za batu ba Jehova ba ba sepahala  kuli: “Mihala ya lisepe za hao i tepile Asirya, ha i tiisi musumo wa sisepe, nihaiba liseili ze pahekwa ku ona; kifohe, bufumu ni tutu ye ñata-ñata za hapiwa ni ku abiwa; mane ni ba ba toza ba fumana kwateñi.” (Isaya 33:23) Sila kaufela se si taha ku to lwanisa Jehova si ka ba se si si na tuso. Si ka ba sina sisepe sa ndwa se si na ni mihala ye tepile, musumo o si ka tiya, se si si na liseili. Sinyeho ya lila za Mulimu i ka tahisa tutu ye ñata ku eza kuli mane nihaiba liyanga li ka abana mwa ku i lobela. Kacwalo lwa kona ku kolwa kuli ka Mulena Jesu Kreste, Jehova u ka tula lila za hae mwa “ñalelwa ye tuna” ye taha.—Sinulo 7:14.

Foliso

20. Batu ba Mulimu ba ka ba ni foliso ye cwañi, mi ikaba lili?

²⁰ Kalulo ye ya bupolofita bwa Isaya i fela ka sepiso ye nde: “Ha ku na mutu ya yahile mwa Jerusalema ya ka ipulela kuli: Na kula. Sicaba se si yahile mwa Sione si swalezwi libi za sona.” (Isaya 33:24) Ku kula kw’a talusa Isaya sihulu ki kwa kwa moya, kabakala kuli ku bulezwi hamoho ni “libi.” Mwa talelezo ya pili ya ona manzwi ao, Jehova u sepisa kuli sicaba ha se si lukuluzwi mwa butanga bwa kwa Babilona, si ka foliswa kwa moya. (Isaya 35:5, 6; Jeremia 33:6; mu bapanye Samu 103:1-5.) Ha se ba swalezwi libi ze ne ba ezize kale, Majuda ba ba kuta ba ka to kalisa sinca bulapeli bo bu kenile mwa Jerusalema.

21. Balapeli ba Jehova kacenu ba foliswa cwañi kwa moya?

²¹ Nihakulicwalo, bupolofita bwa Isaya bu na ni talelezo ya mwa linako za cwale. Batu ba Jehova kacenu ni bona ba folisizwe kwa moya. Ba lukuluzwi kwa lituto za buhata ze cwale ka za ku sa shwa kwa moyo, Silalu, ni mulilo wa lihele. Ba fiwa ketelelo ku za muzamao, y’e ba lukulula kwa  muzamao o maswe ni ku ba tusa ku eza likatulo ze nde. Mi ka tuso ya sitabelo sa tiululo sa Jesu Kreste, ba na ni mayemo a kenile fapil’a Mulimu mi ba na ni lizwalo le li kenile. (Makolose 1:13, 14; 1 Pitrosi 2:24; 1 Joani 4:10) Kona ku foliswa kwa moya k’o kwa tusa ni kwa mubili. Ka mutala, ku ambuka buhule ni ku zuba kwai ku sileleza Bakreste kwa matuku a sihule a yambukela ni mifuta ye miñwi ya butuku bwa kansa.—1 Makorinte 6:18; 2 Makorinte 7:1.

22, 23. (a) Isaya 33:24 i ka ba ni talelezo mañi ye tuna mwa nako ya kwapili? (b) Ki katulo mañi ye ba ezize balapeli ba niti kacenu?

²² Fahalimw’a zeo, manzwi a’ kwa Isaya 33:24 a ka ba ni talelezo ye tuna ni ku fita hamulaho wa Armagedoni, mwa lifasi le linca la Mulimu. Mwatas’a Mubuso wa Bumesiya, batu ba ka ba ni foliso ye tuna ya kwa mubili hamoho ni ya kwa moya. (Sinulo 21:3, 4) Hamulahonyana wa ku sinyiwa kwa muinelo wa linto wa Satani, limakazo ze swana ni za n’a ezize Jesu ha n’a li fa lifasi-mubu li ka ezahala mwa lifasi kaufela. Libofu ba ka bona, bosusu ba ka utwa, lihole ba ka zamaya! (Isaya 35:5, 6) Seo si ka konahalisa kuli kaufela ba ba ka punyuha ñalelwa ye tuna ba abane mwa musebezi o mutuna wa ku ezisa lifasi-mubu ku ba paradaisi.

²³ Hasamulaho, zuho ya bafu ha i ka kalisa, ku si na kuli cwañi, ba ba ka zuha ba ka zuha inge ba na ni buikangulo bo bunde. Kono butokwa bwa sitabelo sa tiululo ha bu ka na bu zwelapili ku sebeza, ku ka ba ni lituso ze ñwi za kwa mubili, ku fitela batu ba ka fita fa ku petahala. Ku tuha f’o, ba ba lukile ba ka “zuha” ka ku tala. (Sinulo 20:5, 6) Ka nako yeo, kwa moya, ni kwa mubili, “Ha ku na [muyahi] ya ka ipulela kuli: Na kula.” Yeo ki sepiso ye nyangumuna luli! Haike balapeli ba niti kaufela kacenu ba ikatulele ku ba mwahal’a ba ba ka bona yona talelezo yeo!

[Lipuzo za Tuto]

 [Siswaniso se si fa likepe 344]

Isaya u lapela ku Jehova ka buikolwiso

 [Maswaniso a fa likepe 353]

Ka tuso ya sitabelo sa tiululo, batu ba Jehova ba na ni mayemo a kenile fapil’a hae

 [Siswaniso se si fa likepe 354]

Mwa lifasi le linca, ku ka ba ni ku foliswa ko kutuna kwa kwa mubili

‘Ha Ku Na Muyahi Ya ka Ipulela Kuli: Na Kula’