Mu Sutelele ku Mulimu ka Tapelo
Kauhanyo 17
Mu Sutelele ku Mulimu ka Tapelo
Ki kabakalañi ha lu swanela ku lapela ku Mulimu?
Lu lukela ku ezañi kuli Mulimu a lu utwe?
Mulimu u alabanga cwañi litapelo za luna?
1, 2. Ki kabakalañi ha lu swanela ku nga tapelo ku ba tohonolo ye tuna, mi lu tokwelañi ku ziba ze i luta Bibele ka za yona?
LIFASI ki le li nyinyani-nyinyani ha li bapanyiwa kwa pupo kaufela ye tuna-tuna. Mane ku Jehova, yena “Ya ezize mahalimu ni lifasi,” macaba a swana sina kalotolinyana ka mezi ka ka lota mwa nkwana. (Samu 115:15; Isaya 40:15) Niteñi, Bibele i li: “[Muñ’a] Bupilo u fakaufi ni ba ba mu lapela kaufela, ili kaufela ba ba mu lapela ka ku eza niti. U fa ba ba mu saba se si shukezwi ki bona, hape u utwa ni mihuwo ya bona, mi wa ba lamulela.” (Samu 145:18, 19) Mu nahane kuli seo si talusañi! Mubupi ya m’ata ote u fakaufi ni luna mi ha lu “mu lapela ka ku eza niti,” u ka lu utwa. Lu na ni tohonolo ye tuna luli ya ku lapela ku Mulimu!
2 Kono haiba lu bata kuli Jehova a utwe litapelo za luna, lu lukela ku lapela ku yena ka nzila y’a lumeleza. Lu kona ku eza cwañi cwalo haisi haiba lu utwisisa ze i luta Bibele ka za tapelo. Ku butokwa kuli lu zibe ze a luta Mañolo ka za taba yeo, kakuli tapelo i lu tusa ku sutelela ku Jehova.
KI KABAKALAÑI HA LU SWANELA KU LAPELA KU JEHOVA?
3. Ki lifi libaka la pili la butokwa ha lu swanela ku lapela ku Jehova?
3 Libaka la pili la butokwa ha lu swanela ku lapela ku Jehova ki la kuli wa lu susueza ku eza cwalo. Linzwi la hae li lu susueza kuli: “Mu si ke mwa bilaela ka se siñwi; kono mwa linto kaufela mu zibise Mulimu se mu bata ka tapelo ni ka kupo ye na ni buitumelo. Mi kozo ya Mulimu ye fita kutwisiso kaufela, i ka buluka lipilu za mina ni mihupulo ya mina ku Jesu Kreste.” (Mafilipi 4:6, 7) Kaniti ne lu si ke lwa bata ku sa isa pilu kwa tukiso ye sishemo yeo y’a lu file Mubupi ya Pahami ka ku Fitisisa wa pupo kaufela!
4. Ku lapelanga ku Jehova kamita ku tiisa cwañi bulikani bwa luna ni yena?
4 Libaka le liñwi la ku lapela ki la kuli ku lapelanga kamita ku Jehova ki nzila ya ku tiisa ka yona bulikani bwa luna ni yena. Balikani ba niti ha ba ambolangi fela ha ba tokwa se siñwi. Kono balikani ba bande ba isana lipilu, mi bulikani bwa bona bwa tiya ni ku fita ha ba nze ba lukuluha mwa ku talusa mihupulo, lipilaelo ni maikuto a bona. Ka linzila ze ñwi, ku cwalo ni ha ku taha kwa bulikani bwa luna ni Jehova Mulimu. Ka tuso ya yona buka ye, mu itutile ze ñata ze i luta Bibele ka za Jehova, butu bwa hae, ni milelo ya hae. Mu fitile fa ku ziba kuli ki mutu luli. Tapelo i mi fa kolo ya ku fitisa mihupulo ni maikuto a kwa pilu ya mina luli ku Ndat’a mina wa kwa lihalimu. Ha mu nze mu eza cwalo, mu sutelela hahulu ku Jehova.—Jakobo 4:8.
KI LIFI ZE LU SWANELA KU EZA?
5. Ki sifi se si bonisa kuli haki litapelo kaufela z’a utwa Jehova?
5 Kana ki litapelo kaufela z’a utwa Jehova? Mu nge mutala wa za n’a bulelezi Maisilaele ba ne ba ipanguzi ba mwa mazazi a mupolofita Isaya. N’a ize: “Niha mu ka eza litapelo ze ñata, ha ni na ku li utwa; mazoho a mina a tezi mali.” (Isaya 1:15) Kacwalo likezo ze ñwi li kona ku tahisa kuli Mulimu a si ke a utwa litapelo za luna. Kuli Mulimu a utwe litapelo za luna, ku na ni lika ze ñwi ze lu lukela ku eza.
6. Ki ifi nto ye tokwahala hahulu kuli Mulimu a utwe litapelo za luna, mi lu kona ku i bonisa cwañi?
6 Nto ya butokwa hahulu kikuli lu be ni tumelo. (Mareka 11:24) Muapositola Paulusi n’a ñozi kuli: “Kwand’a tumelo mutu h’a koni ku tabelwa ki [Mulimu]; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Ku ba ni tumelo ya niti ha ku talusi fela ku ziba kuli Mulimu u teñi ni kuli wa utwa ni ku alaba litapelo. Tumelo i boniswa ka likezo za luna. Lu lukela ku bonisa hande kuli lu na ni tumelo ka mo lu pilela ka zazi.—Jakobo 2:26.
7. (a) Ki kabakalañi ha lu swanela ku ba ni likute ha lu lapela ku Jehova? (b) Ha lu lapela ku Mulimu lu kona ku bonisa cwañi buikokobezo ni buniti?
7 Jehova hape u tokwa kuli ba ba lapela ku yena ba eze cwalo ka buikokobezo ni ka buniti. Ku na ni libaka le li tiile ha lu swanela ku ikokobeza ha lu lapela ku Jehova. Batu ha ba banga ni kolo ya ku ambola ni mulena kamba prezidenti, kamita ba ezanga cwalo ka likute, ka ku lemuha situlo se si pahami sa mubusi y’o. Lwa lukela ku ba ni likute le lituna ni ku fita ha lu lapela ku Jehova! (Samu 138:6) Kucwalo kakuli ki “Mulimu Ya-Mata-Kaufela.” (Genese 17:1) Ha lu lapela ku Mulimu, mo lu lapelela ku swanela ku bonisa kuli lwa lemuha ka buikokobezo mayemo a luna fapil’a hae. Buikokobezo b’o hape bu ka lu tusa ku lapela ku zwelela kwa pilu ni ka buniti, ili ku sa lapela lika ze swana kamita ni ku ezeza fela mulao.—Mateu 6:7, 8.
8. Lu kona ku eza cwañi ka ku ya ka ze lu lapelela?
8 Se siñwi se si tokwahala kuli Mulimu a lu utwe kikuli lu eze ka ku ya ka ze lu lapelela. Jehova u libelela kuli lu like mo lu konela kaufela ku eza ka ku ya ka ze lu lapelela. Ka mutala, haiba lu lapela kuli, “U lu fe kacenu buhobe bwa luna,” lu lukela ku sebeza ka t’ata mwa musebezi kaufela o’ li teñi o lu kona ku eza. (Mateu 6:11; 2 Matesalonika 3:10) Haiba lu lapela kuli Mulimu a lu tuse ku tula bufokoli bo buñwi bwa nama, lu lukela ku tokomela kuli ha lu bi mwa miinelo ye kona ku lu kenya mwa muliko. (Makolose 3:5) Kwand’a lika ze bulezwi ze, ze tokwahala, ku na ni lipuzo ka za tapelo ze lu tokwa kuli li alabiwe.
KU ALABA LIPUZO ZE ÑWI KA ZA TAPELO
9. Lu lukela ku lapela ku mañi, ili ka mañi?
9 Lu swanela ku lapela ku mañi? Jesu n’a lutile balateleli ba hae ku lapela ku “Ndat’a luna ya kwa lihalimu.” (Mateu 6:9) Kacwalo litapelo za luna li lukela ku libiswa fela ku Jehova Mulimu. Kono Jehova u bata kuli lu lemuhe kalulo y’a peta Jesu Kreste yena Mwan’a hae wa libanda. Sina mo ne lu itutezi mwa Kauhanyo 5, Jesu n’a lumezwi fa lifasi sina sitabelo kuli a to lu liulula kwa sibi ni lifu. (Joani 3:16; Maroma 5:12) Ki yena Muprisita yo Mutuna ni Muatuli ya ketilwe. (Joani 5:22; Maheberu 6:20) Kacwalo Mañolo a lu laela ku fitisa litapelo za luna ka Jesu. Yena ka sibili n’a ize: “Ki na nzila, ni niti, ni bupilo; ha ku na mutu ya ka taha ku Ndate, konji ka na.” (Joani 14:6) Kuli litapelo za luna li utwiwe, lu lukela ku lapela fela ku Jehova ka Mwan’a hae.
10. Ki kabakalañi ha ku sa tokwahali ku ina ka nzila ye ñwi ye ipitezi ha lu lapela?
10 Kana lu swanela ku ina ka nzila ye ñwi ye ipitezi ha lu lapela? Batili. Jehova h’a tokwi muinelo o muñwi o ipitezi, ibe wa mazoho kamba mubili kaufela. Bibele i luta kuli ku lapela inze lu inzi ka linzila ze shutana-shutana ku lukile. Lwa kona ku ina, ku inama, ku kubama, ni ku yema. (1 Makolonika 17:16; Nehemia 8:6; Daniele 6:10; Mareka 11:25) Sa butokwa haki ku ina ka nzila ye ñwi ye ipitezi ye bonwa ki ba bañwi, kono ki ku ba ni moya o swanela. Mane mwa misebezi ya luna ya ka zazi kamba ha ku ba ni butata bwa ka sipundumukela, lwa kona ku lapela mwa pilu ku si na taba ni kuli lu inzi kai. Jehova wa utwa litapelo ze cwalo, be lu inzi ni bona niha ba sa li lemuhi.—Nehemia 2:1-6.
11. Ki litaba mañi za ka butu ze lu kona ku lapelela?
11 Ki lifi ze lu kana lwa lapelela? Bibele i talusa kuli: “Ha lu kupa nto ka ku lata kwa hae, [Jehova] wa lu utwa.” (1 Joani 5:14) Kacwalo lwa kona ku lapelela nto ifi kamba ifi ye zamaelela ni tato ya Hae. Kana ki tato ya hae kuli lu lapelele lika z’e lu bilaeza za ka butu? Ee! Ku lapela ku Jehova ku kona ku swana ni ku ambola ni mulikani yo mutuna. Lwa kona ku bulela ka ku lukuluha, ili ‘ku sululela lipilu za luna’ ku Mulimu. (Samu 62:8) Ku kupa moya o kenile kwa swanela, kakuli u ka lu tusa ku eza ze lukile. (Luka 11:13) Hape lwa kona ku kupa ketelelo ya ku eza likatulo za ngana ni ku kupa m’ata a ku tiyela matata. (Jakobo 1:5) Ha lu eza sibi, lu kupe swalelo ka ku itinga fa sitabelo sa Kreste. (Maefese 1:3, 7) Kono litaba za ka butu ha li swaneli ku ba zona fela lika ze lu lapelela. Litapelo za luna li be ze kopanyeleza ni batu ba bañwi—ba mwa lubasi lwa luna, hamohocwalo ni balapeli ba bañwi.—Likezo 12:5; Makolose 4:12.
12. Lu kona ku beya cwañi litaba ze ama Ndat’a luna wa kwa lihalimu mwa sibaka sa butokwa ka ku fitisisa mwa litapelo za luna?
12 Litaba ze ama Jehova Mulimu li swanela ku ba zona za butokwa ka ku fitisisa mwa litapelo za luna. Kaniti lu na ni mabaka a ku fitisa tumbo ni buitumelo ku yena kwa lika kaufela ze nde z’a eza. (1 Makolonika 29:10-13) Jesu n’a file tapelo ye li mutala, ye ñozwi kwa Mateu 6:9-13, yeo ku yona n’a lu lutile ku lapela kuli libizo la Mulimu li be le li kenile. Ze bulelwa ku tuha f’o kikuli ku tahe Mubuso wa Mulimu ni kuli tato ya hae i ezwe mwa lifasi sina mo i ezezwa kwa lihalimu. Jesu n’a bulezi za litaba za ka butu hamulaho wa ku bulela litaba zeo za butokwa ze ama Jehova. Ni luna ha lu beya Mulimu mwa sibaka sa butokwa ka ku fitisisa mwa litapelo za luna, lu bonisa kuli ha lu iyakatwi fela buiketo bwa luna.
13. Mañolo a bulelañi ka za butelele bwa litapelo ze swanela?
13 Litapelo za luna li swanela ku ba ze kuma kai? Bibele ha i bonisi kuli litapelo za ka butu kamba za nyangela li swanela ku ba ze kuma kai. Li kana za ba ze kuswani ku si ka ciwa kale lico kamba li kana za ba ze telele za ka butu, zeo ku zona lu sulula pilu ya luna ku Jehova. (1 Samuele 1:12, 15) Nihakulicwalo, Jesu n’a nyazize batu ba ba ezanga litapelo ze telele za ku iponahaza fela ku ba bañwi. (Luka 20:46, 47) Litapelo ze cwalo ha li tabisi Jehova. Sa butokwa kikuli lu lapele ku zwelela kwa pilu. Kacwalo butelele bwa litapelo ze swanela bu kona ku itinga fa butokwi ni miinelo ye li teñi?
14. Bibele i talusañi ha i lu susueza ku ‘zwelapili ku lapela,’ mi ki kabakalañi taba yeo ha i li ye omba-omba?
14 Lu swanela ku lapela hakai? Bibele i lu susueza ku ‘zwelapili ku lapela,’ ku ‘tundamena mwa ku lapela,’ ni ku ‘lapela ka ku sa lisela.’ (Mateu 26:41, NW; Maroma 12:12; 1 Matesalonika 5:17) Kono manzwi ao h’a talusi kuli lu lukela ku lapela ku Jehova nako kaufela mwahal’a lizazi. Bibele ze i lu susueza ki ku lapela kamita, ili ku itumela ku Jehova kwa lika ze nde z’a lu ezeza ni ku itinga ku yena kuli a lu etelele, ku lu omba-omba, ni ku lu tiisa. Kana ha ku omba-ombi ku ziba kuli Jehova h’a tomi kuli lu lapele ku yena nako ye kuma kai kamba kuli ibe hakai? Haiba luli lwa itebuha tohonolo ya ku lapela, lu ka fumana linako ze ñata za ku lapela ku Ndat’a luna wa kwa lihalimu.
15. Ki kabakalañi ha lu swanela ku bulela kuli “Amen” kwa mafelelezo a litapelo za ka butu kamba za nyangela?
15 Ki kabakalañi ha lu swanela ku bulela kuli “Amen” kwa mafelelezo a tapelo? Linzwi la “amen” li talusa kuli “kaniti,” kamba kuli “ku be cwalo.” Ku na ni mitala ya mwa Mañolo ye bonisa kuli ku bulela kuli “Amen” kwa mafelelezo a tapelo ya ka butu kamba ya nyangela kwa swanela. (1 Makolonika 16:36; Samu 41:13) Ha lu bulela kuli “Amen” kwa mafelelezo a tapelo ya luna beñi, lu bonisa kuli ze lu bulezi li zwelela kwa pilu. Ha lu bulela kuli “Amen”—ibe mwa pilu kamba ka ku tumusa—kwa mafelelezo a tapelo ya nyangela ye fitisizwe ki yo muñwi, lu bonisa kuli lwa lumelelana ni ze bulezwi.—1 Makorinte 14:16.
MW’A ALABELANGA MULIMU LITAPELO ZA LUNA
16. Lu kona ku kolwañi ka za litapelo?
16 Kana Jehova wa alabanga luli litapelo? Ee! Lu na ni mabaka a tiile a ku kolwa kuli Yena “ya utwa milapelo” u alabanga litapelo ze zwelela kwa pilu ze fiwa ki bolule-lule ba batu. (Samu 65:2) Jehova u kona ku alaba litapelo za luna ka linzila ze shutana-shutana.
17. Ku konwa ku bulelelwañi kuli Mulimu u itusisanga mangeloi a hae ni batanga ba hae ba fa lifasi kwa ku alaba litapelo za luna?
17 Jehova u itusisanga mangeloi a hae ni batanga ba hae ba fa lifasi kwa ku alaba litapelo. (Maheberu 1:13, 14) Ku bile ni litaba ze ñata za batu ba ne ba lapezi ku Mulimu kuli a ba tuse ku utwisisa Bibele mi hañihañi ne ba potezwi ki yo muñwi wa batanga ba Jehova. Litaba ze cwalo li fa bupaki bwa kuli musebezi wa ku kutaza Mubuso u etelelwa ki mangeloi. (Sinulo 14:6) Jehova a kana a susumeza Mukreste yo muñwi ku lu tusa, kacwalo ili ku alaba litapelo za luna ha lu li mwa butata.—Liproverbia 12:25; Jakobo 2:16.
18. Jehova u itusisanga cwañi moya wa hae o kenile ni Linzwi la hae kwa ku alaba litapelo za batanga ba hae?
18 Jehova Mulimu hape u itusisanga moya wa hae o kenile ni Linzwi la hae yona Bibele kwa ku alaba litapelo za batanga ba hae. U kana a alaba litapelo za luna za ku kupa tuso ya ku tiyela miliko ka ku lu fa ketelelo ni m’ata ka moya wa hae o kenile. (2 Makorinte 4:7) Hañata kalabo kwa litapelo za luna za ku kupa ketelelo i zwelelanga mwa Bibele, m’o Jehova a lu fa tuso ya ku eza likatulo ze nde. Lu kana lwa fumana mañolo a tusa ha lu nze lu eza tuto ya ka butu ya Bibele ni ha lu nze lu bala lihatiso za Sikreste, ze cwale ka yona buka ye. Kwa mikopano ya Sikreste kamba ka ze bulelwa ki eluda ya iyakatwa luna, lisupo za mwa mañolo ze lu tokwa ku nyakisisa li kana za bulelwa.—Magalata 6:1.
19. Lu swanela ku hupulañi haiba fokuñwi ku bonahala kuli litapelo za luna ha li alabiwi?
19 Haiba ku bonahala kuli Jehova wa liyeha ku alaba litapelo za luna, ni kamuta haki ka libaka la kuli h’a koni ku li alaba. Lu lukela ku hupula kuli Jehova u alabanga litapelo ka ku ya ka tato ya hae ni ka nako y’a bona ku ba ye lukile. Wa ziba hande ze lu tokwa ni mwa ku bonela za teñi hande ku fita mo lu zibela luna. Hañata u lu tuhelelanga ku zwelapili ‘ku kupa, ku bata, ni ku ngongota.’ (Luka 11:5-10) Ku tundamena ko ku cwalo ku bonisa Mulimu kuli takazo ya luna ki ye tuna ni kuli tumelo ya luna ki ya niti. Hape, Jehova u kona ku alaba litapelo za luna ka nzila ye sa lemusehi ku luna. Ka mutala, u kona ku alaba tapelo ya luna ka za muliko o muñwi, isi ka ku felisa muliko w’o, kono ka ku lu fa m’ata a ku u tiyela.—Mafilipi 4:13.
20. Ki kabakalañi ha lu swanela ku sebelisa ka ku tala tohonolotuna ya tapelo?
20 Lwa itumela luli kuli Mubupi wa pupo kaufela ye u fakaufi ni bote ba ba lapela ku yena ka nzila ye swanela! (Samu 145:18) Haike lu sebelise ka ku tala tohonolotuna ya tapelo. Ha lu ka eza cwalo, lu ka ba ni sepo ye nde ya ku sutelela hahulu ku Jehova, yena Muutwi wa litapelo.
ZE I LUTA BIBELE
▪ Ku lapela kamita ku Jehova ku lu tusa ku sutelela hahulu ku yena.—Jakobo 4:8.
▪ Kuli Mulimu a utwe litapelo za luna, lu lukela ku lapela ka tumelo ni ka buikokobezo ni ka ku zwelela kwa pilu.—Mareka 11:24.
▪ Lu lukela ku lapela fela ku Jehova ka Mwan’a hae.—Mateu 6:9; Joani 14:6.
▪ Jehova “ya utwa milapelo” u itusisa mangeloi, batanga ba hae ba fa lifasi, moya wa hae o kenile, ni Linzwi la hae kwa ku alaba litapelo.—Samu 65:2.
[Lipuzo za Tuto]
[Maswaniso a fa likepe 165]
“Ya ezize mahalimu ni lifasi” wa lata ku utwa litapelo za luna
[Maswaniso a fa likepe 171]
Tapelo ya mina i kona ku utwiwa ka nako ifi kamba ifi
[Siswaniso se si fa likepe 172, 173]
Ka ku alaba litapelo za luna, Jehova u kona ku susumeza Mukreste yo muñwi ku lu tusa
