Litaba Ze Ekelizwe

 Jesu Kreste—Mesiya Ya N’a Sepisizwe

KULI a lu tuse ku ziba Mesiya, Jehova Mulimu n’a etelezi ka moya bapolofita ba bañata ba ne ba ñozi Bibele ku fa litaba ka butungi ka za ku pepwa, bukombwa, ni lifu la yena Mupulusi ya  n’a sepisizwe y’o. Bupolofita bwa mwa Bibele b’o kaufela ne bu talelelizwe ku Jesu Kreste. Ki bo bu nepahezi luli mi bu tungile. Ka mutala, ha lu nyakisiseñi bupolofita bu sikai bo ne bu polofitile likezahalo ze ama ku pepwa ni bwanana bwa Mesiya.

 Mupolofita Isaya n’a polofitile kuli Mesiya n’a ka simuluha ku Mulena Davida. (Isaya 9:7) Jesu kaniti n’a pepilwe mwa lusika lwa Davida.—Mateu 1:1, 6-17.

Mika, mupolofita yo muñwi wa Mulimu, n’a polofitile kuli mwana y’o kwa mafelelezo n’a ka ba mubusi ni kuli n’a ka pepelwa mwa “Betelehema-Efrata.” (Mika 5:2) Ka nako ya n’a pepwa Jesu, mwa Isilaele ne ku na ni minzi ye mibeli ye n’e bizwa Betelehema. O muñwi ne u li bukaufi ni Nazareta, kwa mutulo wa naha, mi o muñwi ne u li bukaufi ni Jerusalema mwa Juda. Betelehema ye n’e li bukaufi ni Jerusalema kale ne i biziwanga Efrata. Jesu n’a pepezwi ku ona munzi w’o, sina ka mo ne bu bulelezi luli bupolofita!—Mateu 2:1.

Bupolofita bo buñwi hape bwa mwa Bibele ne bu polofitile kuli Mwan’a Mulimu n’a ka bizwa “ku zwa mwa Egepita.” Jesu ha n’a li mwanana n’a isizwe kwa Egepita. N’a kutisizwe hamulaho wa lifu la Heroda, kacwalo ili ku taleleza bupolofita.—Hosea 11:1; Mateu 2:15.

Mwa  litaba ze fa likepe 200, mwa mañolo a kolohanyizwe mwatas’a toho ya taba ye li “Bupolofita” ku na ni litaba ka butungi ka za Mesiya. Mu bapanye mañolo ao ni a’ kolohanyizwe mwatas’a toho ya taba ye li “Talelezo.” Ku eza cwalo ku ka tiisa tumelo ya mina ya kuli Linzwi la Mulimu ki la niti.

Ha mu nze mu nyakisisa mañolo a, mu hupule kuli mañolo a bupolofita n’a ñozwi lilimo ze mianda-nda Jesu a si ka pepwa kale. Jesu n’a ize: “Kaufela ze ni ñozwi ka zona mwa Mulao wa Mushe ni Bapolofita ni Lisamu, li swanezi ku ezahala.” (Luka 24:44) Sina ha mu kona ku ikolwisa ku zwelela mwa Bibele ya mina, bupolofita kaufela ne bu talelelizwe ka ku tala!

 [Chati fa likepe 200]

BUPOLOFITA KA ZA MESIYA

KEZAHALO BUPOLOFITA TALELEZO

N’a ka pepelwa mwa lusika lwa Juda Genese 49:10 Luka 3:23-33

N’a ka pepwa ki mwalyanjo Isaya 7:14 Mateu 1:18-25

N’a simuluhile ku Mulena Davida Isaya 9:7 Mateu 1:1, 6-17

Jehova n’a mu zibahalize ku ba

Mwan’a hae Samu 2:7 Mateu 3:17

Ba bañata ne ba si ka lumela ku yena Isaya 53:1 Joani 12:37, 38

N’a keni mwa Jerusalema inz’a

pahami mbongolo Zakaria 9:9 Mateu 21:1-9

N’a betekilwe ki mulikani yo mutuna Samu 41:9 Joani 13:18, 21-30

N’a betekilwe ka masheleñi a

mashumi a malalu a silivera Zakaria 11:12 Mateu 26:14-16

N’a kuzize fapil’a ba ne ba mu zekisa Isaya 53:7 Mateu 27:11-14

Liapalo za hae za ikabelwa ka

ku laula Samu 22:18 Mateu 27:35

N’a nyefuzwi ha n’a li fa kota Samu 22:7, 8 Mateu 27:39-43

Kwa masapo a hae ha ku na a

n’a lobilwe Samu 34:20 Joani 19:33, 36

N’a pumbekilwe ni bafumi Isaya 53:9 Mateu 27:57-60

N’a zusizwe kwa bafu a si ka

bola kale Samu 16:10 Likezo 2:24, 27

N’a pahamisizwe ni ku beiwa

kwa bulyo bwa Mulimu Samu 110:1 Likezo 7:56