Kacenu, litaba likona kuhasanyiwa ka bubebe kwa batu babañata ka kuitusisa litaba zehatisizwe, wayalesi, TV, ni Intaneti. Babalapela “Mulimu yanani niti” hababatangi kuhasanya litaba za buhata, nihaiba ka kusalela. (Samu 31:5; Exo. 23:1) Haiba lutaluseza babañwi litaba za buhata zeluutwile, lwakona kubatahiseza butaata bobutuna. Hamubata kuziba kuli taba yeñwi ki ya niti kamba kutokwa, muipuze kuli:

• ‘Kana taba ye izwa luli ku mutu yenisepile?’ Mutu yamibulelela taba yeo mwendi ni yena haana hande bupaki. Batu habazwelapili kutalusa taba yebautwile, kwa mafelelezo yakona kucinca, kacwalo mutokomele haiba hamuzibi hande koisimuluha taba yeo. Bakeñisa kuli babanani buikalabelo mwa puteho balibelelwa kutalusa litaba za niti, baswanela kutokomela hahulu kuli basike bahasanya litaba zesina hande bupaki

• ‘Kana taba yeo ki ya kusinya mutu libizo?’ Haiba taba yeo isinya libizo la mutu kamba sikwata sesiñwi sa batu, ki hande kusa bulela taba yeo.—Liprov. 18:8; Mafil. 4:8

• ‘Kana taba yeo ki ya niti luli?’ Mutokomele hamuutwa litaba ni zebonwi zekomokisa

MUBUHE VIDIO YELI, NIKONA KUFELISA CWAÑI LUSEBO? MI KIHONA MUKAALABA LIPUZO ZELATELELA:

• Ka kuya ka Liproverbia 12:18, litaba zelubulela likona kutahisa butata mañi?

• Liñolo la Mafilipi 2:4 lilutusa cwañi kunahanisisanga lusika bulela kale?

• Ki lika mañi zeluswanela kueza haiba batu bakala kubulela litaba zemaswe kamba za mashendekela ka za mutu yomuñwi?

• Ki lipuzo mañi zeluswanela kuipuza lusika kala kale kubulela ka za batu babañwi?