Kuzwa feela January 2018, fa likepe lapili la Buka ya Mukopano wa Bupilo ni Bukombwa kubeiwanga liakalezo za mwakuambolisanela ni batu. Lususuelizwe hahulu kuambola ni batu kufita kufa feela lihatiso. Mavidio a liakalezo za mwakuambolisanela ni batu sabonisize mwa kukalela puisano ka kuitusisa feela Bibele, mi nto yeo itusize hahulu bahasanyi. Kono kana taba yeo italusa kuli haluswaneli kufa lihatiso halukutaza fa ndu ni ndu? Batili! Ka mutala, matrakiti akona kutusa hahulu kwa kukalisa lipuisano ni batu. Lwakona kuitusisa mutahisezo olatelela haluitusisa trakiti ifi kamba ifi:

1. Mubuze puzo yefa likepe la makalelo la trakiti, ili yenani likalabo zatokwa kuketa mutu.

2. Mubonise muñaa ndu kalabo ya mwa Bibele ka kubala ni yena mañolo abonisizwe fahalimwaa likepe labubeli. Haiba kunani nako, mubale ni kunyakisisa litaba lisikai ze mwahalaa trakiti yeo.

3. Mufe muñaa ndu trakiti yeo mi mumususueze kubala litaba kaufela hakaba ni nako.

4. Musika funduka kale, mumubonise puzo ye mwatasaa taba yeli: “Za Kunahanisisa” mi mulukise kuto mupotela hape kuli mutonyakisisa ni yena kalabo ya Bibele kwa puzo yeo.

Fa musipili otatama, mualabe puzo yeo mi mubuze puzo yeñwi hape yemukato nyakisisa nako yetatama. Mwakona kubuza puzo yefumaneha fa webusaiti yaluna kamba ye mwa hatiso yebonisizwe kwa mafelelezo a trakiti yeo. Ka nako yeswanela, mufe muñaa ndu broshuwa ya Taba Yende Yezwa ku Mulimu! kamba hatiso yeñwi yeluitusisanga kwa kuluta batu.